Matthew 15 - Iñupiatun Mumiksat Uqalugiksuat

Iḷisaurrutaat Maŋŋuuruat

¹ Tavra Pharisees-lu iḷisaurriḷḷu pitquranik ullautiŋarut Jesus-mun Jerusalem-miñ aasii apiġivlugu,

² Summan iḷitchitquravich kamagilaitpatigik iḷisaurrutiŋich maŋŋuupta? Qanuq niġiŋaiñŋaġmiŋ iqaġilaitkaich argatiŋ tuvraġlugu piraksriutaat maŋŋuupta.

³ Jesus kiuŋagai, Summallivsauq ilivsi kamagilaitpisigik pitquraŋi God-im, kamagiłhaaqługich maŋŋuuvsi iḷisaurrutiŋich?

⁴ Qanuq God piraksriiŋaruq Moses-kun, suuŋiḷaġinagik aapallu aakallu. Kiñaliqaa uqallautiqaqtuaq pigiitchuamik aapamigun aakamigullu, tuquruksraupiaqtuq.

⁵ Ilivsiḷiasii iḷisaurrirusi iñuk piqaġniqpan sumik ikayuutigiyumiñaġaluakkamiñik aapamiñun naagga aakamiñun aglaan uqallausiġikpagu, Taamna pigigaa God-im,

⁶ ilaa pasirauyumiñaitchualigiksi ikayuŋitkaluaġumigik aapaniḷu aakaniḷu, pisigivlugu maŋŋuuvsi iḷisaurrutaat, anniqsuutauŋaiġisi uqaluŋi God-im.

⁷ Ilivsi ukpiŋŋuaqtuasii. Qanutun nalautigiŋaruq Isaiah uqaqtaa God-im uqallausiġikamisi. Ilaan aglaŋagai God-im uqaluŋi inna, “Ukua iñuich nanġaġaluaġaanŋa uqalułhiñamiŋnik, sivuniqasuŋaġnagich uqalutiŋ.

⁸ Iliŋisa iḷumutun savautiŋitkaanŋa aŋaiyyuvigiluŋalu, qanuq iḷisaurrirut iñuich pitquraliaŋiññik, God-mun pitquraġiruatun iḷivḷugich.”

⁹ Jesus uqallavsaaŋaruq, Kamagiŋitkisi God-im pitquraŋi, kamagiłhaaqługich piḷġusiḷiaŋich iñuich.

Sut Salumaiḷḷisit Iñuŋmun

¹⁰ Tavra Jesus ququaŋagai iñuich inmiñun aasii uqallautivlugich, Naalaġnisiŋa kaŋiqsiḷusiḷu.

¹¹ Taavruma qaniġmuktuam niġiruatun piḷuksipkalaitkaa iñuk, aglaan taavruma aniruam qaniġmiñ, uqaluum piḷuksipkaġumiñaġaa iñuk.

¹² Iḷitchitquraŋisa ullakługu uqallautiŋagaat, Iḷisimavigich Pharisees piavsaktilaaŋat tusaakamirruŋ taamna uqallautin?

¹³ Ilaan kiuŋagai, Nautchiapayaaq qiḷaŋmiittuam Aapama nautchirriutiŋaisaŋa nusuktauniaqtuq.

¹⁴ Ilimiktun piḷich. Aullarrirut ayauŋaruatun iñuktun. Aasii ayauŋaruam iñuum aullatikpauŋ ayauŋaruaq iñuk, iluqatik qargisaġniaqtuk.

¹⁵ Tavra Peter-m uqallautiŋagaa, Sivunniuġuŋ uvaptiŋnun taamna uuktuun.

¹⁶ Ilaalli uqallautiŋagai, Ilivsivsauq kaŋiqsisaiñmivisi?

¹⁷ Kaŋiqsiŋaitpisiuŋ sunapayaaq qaniġmuktuaq aqiaqqumuguuruq, aasii anivḷuni timimiñ.

¹⁸ Aglaan suna pigiitchuaq uqaluk aniruaq qanikun aullaqivluni isumaqaġvianiñ, taavruma piḷuksipkaġaa iñuk.

¹⁹ Qanuq iñuum isumaqaġvianiñ salapqiġuurut pigiitchuat isumat piḷġusiġiitchuallu, iñuaġutit, allatuutit, tigligautit, saglutiginnigniġich, tiġlirautit.

²⁰ Tamatkua tamarra piḷuksipkaġaat iñuk, aglaan niġiruni iqaġigaluaġnagich argaich piḷuksisauŋitchuq iñuŋmun.

Aġnam Ukpiġutaa

²¹ Tavra Jesus aullaŋaruq tavraŋŋa aasii aullaqłuni nunaaqqiŋiñun Tyre-m Sidon-lu.

²² Tavra aġnaq Canaan-miu iñuuruaq tamaani ullautiŋaruq nipimigun, Naglikkutiqaġiñ uvamnun Ataniiq, Iġñiŋa David. Paniga atqunaqługu ilitqusiqł̣uqaqtuq.

²³ Tavra Jesus kiuŋaitkaa uqaluuramikunnii. Tavra iḷitchitquraŋisa ullakługu apiġipiaŋagaat, Aqpikkuuŋ una aġnaq, qanuq uvva małakkaatigut nipimigun.

²⁴ Ilaa uqallaŋaruq, Tilirauŋaruŋa kisiiññun Israel-guruanun imnaisun tammaŋaruatun ittuanun.

²⁵ Tavra aġnaq qaivḷuni sitquŋaruq sivuġaanun uqaqłuni, Ataniiq, ikayuŋŋa.

²⁶ Tavra ilaan kiuŋagaa, Nalaunŋaŋitchuq tigulugu miqłiqtut niqaat aitchuutigiruni qimmiñun.

²⁷ Aġnaq uqallaŋaruq, Aaglukiaq Ataniiq, naaggaptauq marra qimmich unnii niġisuummiut kanġallugnik kataktuanik iñuŋmiŋ niġġiviŋiññiñ.

²⁸ Tavra Jesus kiuŋagaa, Aġnaaq, kamanapaluktuq ukpiġutin. Taŋŋiġḷi kipiġniuġutin. Tavra pania iłuaqsirauŋaruq tavrauvvaa.

Jesus Iłuaqsigai Iñugiaktuat Iñuich

²⁹ Tavra Jesus aullalgitchuq tavraŋŋa aasii iglauvluni siñiqsraqługu tasia Galilee-m. Tavra ilaa mayuŋaruq qimialuŋnun, aasii aquviłłuni tamauŋa.

³⁰ Tavra iñugiapiaġataqtuat iñuich ullautiŋarut ilaanun, qaġġirrivḷutiŋ tusiapiktaqtuanik, qilluutiqaqtuanik, ayauŋaruanik, uqalaitchuanik, suniglu iñugiaktuanik allanik naŋirrutiliŋnik, aasii iḷivḷugich sivuġaanun, tavra ilaan iłuaqsiŋagai.

³¹ Tavraasii iñusalaich kamasuŋarut, tautukamisigik uqalaiḷat uqaaqsimmata, qilluutituqtuat iłuaqsiraummata, tusiattuat pisuaġmata, suli ayauŋaruat tautullasimmata. Tavra ilaisa nanġaŋagaat God-iŋat Israel.

Jesus Niġipkaġai 4,000 Iñuich

³² Tavrani Jesus ququaŋagai iḷitchitqurani inmiñun aasii uqallautivlugich, Nagliksraliqsuŋa iñusalaŋnik, pisigivlugu nayuutiniŋat uvamnun paŋmapak piŋasuni uvluni, aasii paŋmapak niqiksraiqsut. Aullaqtitchumaŋitkitka kaaŋŋaisa, sayaiġñiaqtutkiataŋ apqunmi.

³³ Tavra iḷitchitqurat apiġiŋagaat, Sumiñ niqiksranigniaqpisa naamaruamik nunagluktuami niġipkaġumiñaġlugich innatun iñugiaktigiruat?

³⁴ Tavra Jesus apiġiŋagai, Qavsiñik punniġutiqaqpisi? Ilaisa kiuŋagaat, Tallimat malġugnik, iñukisuuraniglu iqaluuranik.

³⁵ Tavra Jesus piraksriiŋaruq iñusalaich aquvitquvlugich nunamun.

³⁶ Ilaan tiguŋagai tallimat malġuk punniġich iqaluiḷḷu, aasii quyaanikami God-mun avguqługich qaiñŋagai iḷitchitquranun, aasiiḷi iḷitchitqurat qaił̣ł̣ugich iñusalaŋnun.

³⁷ Tavra iluqaġmiŋ niġiŋarut pisuiqsuaqłutiŋ. Aasii iḷitchitqurat katitchiŋarut tallimat malġugnik aguummakpagnik siḷiviłługich iḷakunik kisiŋŋuqtanik.

³⁸ Tamatkua niġiruat 4,000-tun iñugiaktigiŋarut, aġnat miqłiqtullu kisitqatigigaluaġnagich.

³⁹ Aasii aullaqtitanikługich iñusalaich, ilaa ikuŋaruq umiaqpauramun aasii aullaqłutiŋ nunaaqqiŋiññun Magadan.