Matthew 14 - Iñupiatun Mumiksat Uqalugiksuat

John Paptaiqsi Tuqutauruq

¹ Tavrani Herod atanaurauruaq Galilee-mi, tusaakami kamanautaanik Jesus,

² ilaa uqallaŋaruq kivgamiñun, Ammaamna John Paptaiqsi piuq, aŋiŋaruq tuqqunmiñ. Taamnauvva pisigivlugu savallaruq tamatkuniŋa aliuġnaqtuanik.

³ Qanuq Herod-gum tigupkaŋagaa John aasii qiḷiqsruipkaqługu isiqługu tigutaaġviŋmun, pisigivlugu Herodias, aniqanmi Philip nuliaŋa.

⁴ John Paptaiqsim Herod uqallautigaluamiiŋagaa, nalaunŋaitchuq ilivich tuvaaqasiutigupku aniqarvich nuliaŋa.

⁵ Tavra ilaan tuqutchukkaluaġmivḷugulu sivuuġagiŋagai iñuich, qanuq ilaisa uqaqtigiruaġiŋagaat God-mun.

⁶ Tavra Herod annivia tikiñman, pania Herodias kanaakkiuŋaruq sivuġaanni tuyuġmiami, aasii iviġaŋagaa Herod.

⁷ Tavraasii ilaa unniqsuqłiiŋaruq nalupqinaiqł̣ugu aitchuġniaġnivḷugu supayaamik apiqsrisukpan.

⁸ Pisuksaaqtiqaqłuni aakamiñik, niviaqsiaq uqallaŋaruq, Aitchuŋŋa niaquanik John Paptaiqsim uumuŋa puggutauramun ikilugu.

⁹ Tavra umialik isumaaliŋaruq. Aglaan pisigivlugich nalupqinaiqł̣ugu unniqsuqłiisini sivuġaanni tuyuġmiami, ilaa piraksriiŋaruq aitchuutigitquvlugu apiqsriaŋa.

¹⁰ Herod tilisiŋaruq aasii niaquiqsiłługu John tigutaaġviŋmi.

¹¹ Tavra ilaan niaqua qaġġisiŋagaat puggutauramun aasii aitchuutigivlugu niviaqsiamun, aasiiḷi ilaan qaġġisivlugu aakamiñun.

¹² Tavra John iḷitchitquraŋisa qaivḷutiŋ piŋagaat timaa aasii iḷuviqługu. Aasii aullaqłutiŋ quliaqtuaġutiŋagaat Jesus.

Jesus Niġipkaġai 5,000 Iñuich

¹³ Tavra Jesus tusaakamiuŋ taamna, ilaa aullaŋaruq tamaaŋŋa umiaqpaurakun iñuił̣aamun kisimġiuġukłuni. Tavra iñusalaich tusaakamirruŋ, maliŋagaat pisukataqłutiŋ nunaaqqiñiñ.

¹⁴ Tavra tulagniallaġmiŋ ilaan tautuŋagai iñusalaich, aasii nagliksratchaŋaruq ilaiññik, aasii iłuaqsiŋagai naŋittuaŋich.

¹⁵ Unnuksraaġman, iḷitchitqurat ullakługu uqallautiŋagaat, Iñuił̣aaq marra manna ini, unnuagaqsimmivḷuni, aullaqtitkich iñusalaich nunaaqqiñun tauqsiġumaut niqiksramiŋnik.

¹⁶ Jesus uqallaŋaruq, Aullaŋitkumikunnii suŋitchut, ilivsi aitchuqsigik sunik niqiksraŋiññik.

¹⁷ Ilaisa uqallautiŋagaat, Tallimanik punniġutiqaqsiññaqtugut malġugniglu iqalluŋnik.

¹⁸ Jesus uqallautiŋagai, Qaġġisisigik uvamnun.

¹⁹ Tavra ilaan piraksriŋagai iñusalaich aquvitquvlugich iviŋnun, aasii tiguvlugich tallimat punniġich malġuglu iqalluk aaġluŋaruq qiḷaŋmun, aasii quyyavigivlugu God. Tavraasii avguqługich aitchuutigiŋagai punniġich iḷitchitquranun, aasiiḷi iḷitchitqurat aitchuutigivlugich iñusalaŋnun.

²⁰ Tavra iluqaġmiŋ niġiŋarut pisuġuiqsuaqłutiŋ. Aasii iḷitchitqurat katitchiŋarut qulit malġugnik aguummagnik siḷiviłługich avguanik iḷakunik.

²¹ Aasii taapkua niġiruat 5,000 aŋutit itpalliŋarut, kisitqatigigaluaġnagich aġnat miqłiqtullu.

Jesus Pisuaqtuq Immam Qaaŋagun

²² Tavra iḷitchitqurani ikipkaŋagai umiaqpauramun aasii ayusaqtiłługich sivumiñi ikaanmun, Jesus aullaqtitchiñiaqłuni iñusalagnik.

²³ Tavra aullaqtitanikamigich iñusalaich, ilaa mayuŋaruq qimialuŋnun kisimi aŋaiyyuyaqtuqłuni. Tanuġaksimman, Jesus tavraniinŋaruq kisimi.

²⁴ Tavrali umiaqpauraq ayuuŋaruq nunamiñ qaggiuqłutiŋ, anuġim arguġiannaġuutivlugich.

²⁵ Tavra uvluyasimman, Jesus ullaŋagai iḷitchitqurani pisuaqłuni immam qaaŋagun.

²⁶ Tavra iḷitchitqurat tautukamirruŋ pisuaqtuaq immam qaaŋagun, iqsitchaŋarut uqaqłutiŋ, Ilitqusiq marra. Tavra nipaalaŋarut iqsialavlutiŋ.

²⁷ Tavra tavrauvvaa ilaan uqallautiŋagai, quviatchaktitausitchi. Uvaŋauruŋa. Iqsiñasi.

²⁸ Tavra Peter-m kiuŋagaa, Ataniiq, iliviupiaġuvich tuksiŋŋa iliŋnun qaitquluŋa immakun.

²⁹ Jesus kiuŋagaa, Qaiñ. Tavra Peter niuŋaruq umiaqpauramiñ aasii pisuaqłuni immam qaaŋagun ullaŋagaa Jesus.

³⁰ Aglaan iḷitchuġikami anuġimik naŋialiŋaruq, aasii kivisaaqsiruiññaqami nipaalaŋaruq, Ataniiq annautiŋŋa.

³¹ Jesus tavrauvvaa isaaŋagai argagni aasii tiguvlugu, uqallautivlugu, Ilivich ukpiġutikitchuatiin. Summan nalupqisukpich?

³² Tavra ikimmagnik umiaqpauramun anuġaiŋaruq.

³³ Aasii taapkua umiaqpauramiittuat sitquġvigiŋagaat kamanniuġvigivlugu uqaqłutiŋ, Iḷumun Iġñiġigaatin God-im.

Jesus Iłuaqsigai Naŋittuat Gennesaret-mi

³⁴ Tavra ikaaqamiŋ, nunaliñŋarut Gennesaret-mun.

³⁵ Tavra iñuŋi taavruma nunam iḷisaqsrikamiŋ ilaanik, tilisiŋarut uqaluŋmik nunaaqqipayauranun aasii qaġġisivlugich naŋirrutiqapayauraqtuat Jesus-mun,

³⁶ apiġipiaqługu aksiḷḷagniaqsiññaġukługuunnii siñiġutaa annuġaaŋan. Aasii iñugiaktilaamiktun aksiutiruat iłuaqsirauŋarut.