Matthew 12 - Iñupiatun Mumiksat Uqalugiksuat

Apiqqun Jew-guruat Savaiññiŋatigun

¹ Tavrani Jesus-lu iḷitchitquraniḷu pisuaŋarut palauvaksranik nautchiaqaġvikun Jew-guruat Savairvianni. Iḷitchitquraŋi kaaliŋarut, aasii nutchugairraqsiŋarut palauvaksranik aasii niġivḷugich.

² Tavra Pharisees tautukamisigik, uvyaqiŋagaat Jesus, Tautukkich, iḷitchitquratin navgirut Savaiññikun pitquraptiŋnik.

³ Tavra Jesus kiuŋagai, Nalupqinaitchuamik taiguaŋarusi qanuq David piŋatilaaŋanik kaaksiuliqamiŋ piqatiniḷu.

⁴ David isiŋaruq igluanun God-im aasii niġivḷutiŋ punniġmik aitchuutauŋaruamik God-mun, nalaunŋaitkaluaqtuamik ilaallu piqatiniḷu niġikparruŋ, kisiiññun aŋaiyyuliqsiqpaŋnun niġiñaqtuat.

⁵ Nalupqinaitchuamik taiguaŋarusi pitqurat piraksriutiŋiññik aŋaiyyuliqsiqpaŋnun ikipkaitquvlugich aitchuutinik uvlutuaqpan. Savakkaluaqamikunnii Savaitchuani aŋaiyyuvikpaŋmi, pasiraulaitchut navgiñiḷugich Savaiññikun pitquramik.

⁶ Uqallautigivsi, Iñuk imma maaniitkaluaqtuq kamanałhaaqtuaq aŋaiyyuvikpaŋmiñ.

⁷ Iñuich killukuaŋitchuat isivġiġumiñaitkaluaġisi pikpata taapkunatun iḷisimaguvsi sivuniŋiññik God-im uqaluŋisa inna uqaqtuat, “Kipiġniuġutigigiga nagliktautquvlusi ikipkautiłhiñanik aitchuiŋaiġḷusi.”

⁸ Tavraasii Iġñiŋa Iñuum ataniġnaqutiqałhaaqtuq pitquraniñ aŋalatchiruaniñ iñuŋnik Savaiññiġmi.

Iñuk Argakisuuraq

⁹ Jesus tavraŋŋa aullaŋaruq, aasii isiqłuni aŋaiyyuviannun.

¹⁰ Iñuk tavrani inŋaruq argakisuurauniqsuaq. Iñuqaŋammiñiqsuq tavrani ittuanik pasiññigumaruanik Jesus-mik killuliqiniḷugu. Tavra apiġiŋagaat, Nalaunŋava iłuaqsiriruni Savaitchuani?

¹¹ Jesus kiuŋagai, Nalliqsi ilivsiññi, atautchimik imnaiqaġniġumi katakpan iḷuqsramun Savaisillugich, qiluyumiñaitpauŋ?

¹² Iñuk piqpaŋnałhaaqtuq imnaimiñ. Tavraasii nalaunŋaruq anniqsuiruni Savaiññiġmi.

¹³ Tavrani ilaan uqallautiŋagaa iñuk, Isaakkich argaktin. Tavra isaaŋagai, aasii argaŋi iłuaqsirauŋarut igḷumiktun.

¹⁴ Tavrali Pharisees aniŋarut aasii sivunniugaqsivḷutiŋ qanuġlugu Jesus tuqutchukługu.

God-im Kivgaksraqtaaŋa

¹⁵ Jesus, iḷisimavlugu taamna, aullaŋaruq tavraŋŋa. Aasii iñugiaktuat maliŋagaat. Suli ilaan iłuaqsiŋagai iluqaisa naŋittuat.

¹⁶ Ilaan piraksriŋagai quliaqtuaġitquŋił̣ł̣uni.

¹⁷ Taamna taŋŋiutausaŋaruq God-im uqautigiŋaraiññun uqaqtimigun Isaiah-kun inna,

¹⁸ “Uvva kivgaġa piksraqtaaġiŋaraġa, piviuttaġiraġa iviġaummatigilluatakkaġa. Iḷiñiaġiga Ilitqusiġiksuaġa ilaanun, aasii ilaan quliaqtuaġutiniaġai iñupayaat uvaŋa piḷġusiġitqukkamnik.

¹⁹ Ilaa qapiqtaqłiġñiaŋitchuq saqłaurriñiaŋitchuġlu, naaggaunnii piġuqtiqsaaniaŋitchuq nipaturaġaġluni apqutini.

²⁰ Ilaan suksraunġiġñiaŋitkai pasiñaqtuat iñuich, ivigruatun ittuat navviraliŋaruatun ataiḷaisaŋatun iñuum, naaggaunnii qamiyasiuraqtuaq qulliq iñuum qamilaiñmatun. God-im pitqiksiġautairrutaa akimmatitchiaġilugu,

²¹ suli iñuich iluqaġmiŋ annautitquyumaniaqtut ilaanun.”

Jesus-lu Beelzebul-lu

²² Tavrani ayauŋaruaġlu uqalaitchuaġlu ilitqusiqł̣ulik qaġġisiŋagaat Jesus-mun aasii ilaan iłuaqsiŋagaa. Uqalaitchuaq iñuk uqallasiŋaruq tautuksiḷḷasivḷuniḷu.

²³ Tavra iñuich iluqaġmiŋ aliuŋarut, suli uqallakłutiŋ, Uvvauna kiŋuniġiŋitkaluaqpauŋ David-gum, Christ-guruaq?

²⁴ Tavrali Pharisees tusaakamirruŋ taamna uqallaŋarut, Kisiagun Beelzebul-kun, umialgatigun ilitqusiqł̣uich, taamna iñuk anittairuq ilitqusiqł̣ugnik.

²⁵ Jesus iḷisimavlugich isumaŋich, uqallautiŋagai, Nunauruat atinġiqł̣utiŋ aŋuyautikamiŋ inmiŋnun suksraunġiġuurut. Suli iniqpakkaluaq naaggaunnii igluqpaum iñuŋi atinġiqamiŋ suksraunġiġñiaqtut inmiŋnik.

²⁶ Tainnatuttauq Satan ilitqusiqł̣uŋi atinġiġumiŋ piyuutilutiŋ avanmun, ilaan suaŋŋataa isukłiññayaqtuq.

²⁷ Aasii uvaŋa anittaġupkich ilitqusiqł̣uich Beelzebul-kun, kikulli maliġuaqtivsi anittaġuuvatigik? Tavra iliŋich isivġiqsiginiaġisi iḷisimanaqsiḷugu killukuapiaġataqtilaaqsi.

²⁸ Aglaan Ilitqusiġiksuaŋagun God-im uvaŋa anittaiguma ilitqusiqł̣ugnik, nalupqinaiqsuq God-im atanniqsimasaanikkai iñuich akunnavsiññi.

²⁹ Iñuk suaŋarualuk qiḷiqsruiqqaaġlugu iglua pakagnaġniaqtuq suġauttaiġḷugulu. Tainnatuttauq Satan payariraksrauqqaaġniaqtuq ilitqusiqł̣uŋi anitauniaqpata.

³⁰ Iñuk piqatauŋitchuaq uvamnun akiḷḷiuruq uvamnun, iñuktun ittuq kivriñaqsimman palauvaksranik katitchiqataugaluaġnani siavsigiññaqtuatun.

³¹ Tavraasii uqallautigivsi, God-im suliqutigiŋaiġumiñaġai itqaumayumiñaiġḷugich iluqaisa iñuich piḷuutiŋich iluqaisalu pigiitchuat uqallautiŋich, aglaan iñuk uqaqtuaq pigiitchuamik Ilitqusiġiksuakun, sumikunnii suliqutigiŋaiqsauyumiñaitchuq.

³² Suli kiñapayaaq uqallakkumi pigiitchuamik Iġñiŋagun iñuum suliqutigiŋaiqsauyumiñaqtuq itqaumayumiñaiġḷugu, aglaan kiñaliqaa uqallaqtuaq pigiitchuamik Ilitqusiġiksuakun suliqutigiŋaiqsauyumiñaitchuq, paŋmapak isuitchuamullu.

Napaaqtuq Siiġñaŋiḷu

³³ Napaaqtuq iḷitchuġinaġmatun nakuutilaaŋanik naagga pigiisilaaŋanik siiġñiaŋigun, tainnaptauq iñuich iḷisimanaġmiut.

³⁴ Ilivsi tuqunalgich nimiġiat. Qanuġlusi uqaluqaġniaqpisi nakuuruamik piḷullavsi? Iñuum salapqiagaa irrusipiani uqaluŋmigun.

³⁵ Iñulluataq uqaqami salapqiiruq nakuutilaamiñik, aasiiḷi pigiitchuaq iñuk uqaqami salapqiimmiuq pigiisilaamiñik.

³⁶ Uqallautigivsi, uvluani isivġiġvium iñuich pasirauniaqtut anniqsuutauŋitchuatigun uqalupayauratigun uqallausiġikkamikkun.

³⁷ Qanuq uqaluvsigun patchisaiqsauniaqtusi, suli uqaluvsigun pasirauniaqtusi.

Jesus Aliuġnaqtuamik Savaqurauruq

³⁸ Tavrani iḷaŋich iḷisaurrit pitquranik iḷaŋiḷḷu Pharisees uqallaŋarut Jesus-mun, Iḷisaurrii, tautugukkiptigiñ aliuġnaqtuamik savaglutin nalupqinaiyautiksramik kiutilaaġnik.

³⁹ Tavra ilaan kiugiññaŋagai, Qanutun pigiisigirut god-aitchuat makua iñuich savaquriruat uvamnik aliuġnaqtuanik. Aliuġnaqtuatualuk savaaguniaqtuaq piñiaqtuq Jonah-tun uqaqtiŋatun God-im.

⁴⁰ Qanuq tainnatuttauq Jonah-m uvluni piŋasuni unnuaniḷu piŋasuni iḷuaniinmatun aġviġum, Iġñiŋaptauq iñuum nunam iḷuaniinniaġmiuq piŋasuni uvluni piŋasuniḷu unnuani.

⁴¹ Isivġiġviŋmi iñuŋisa Nineveh-m akiḷḷiḷiġñiaġaasi ilivsi iñuuruasii paŋmapak aasii pasirauyumiñaqsiḷusi, qanuq iliŋich isumalitqiŋavlutiŋ alġaqsruimman Jonah, aasii imma iñuk kamanałhaaqtuaq Jonah-miñ maaniittuq.

⁴² Isivġiġviŋmi suli aġnam umialgum akiḷḷiḷiġñiaġaasi ilivsi iñuuruasii paŋmapak, aasii pasirauyumiñaqsiḷusi. Qanuq ilaa qaiŋaruq uŋallam tuŋaaniñ nunamiñiñ uŋasiksuamiñ tusaayaqtuqługu isumattutaa Solomon. Aasii imma iñuk maaniittuq kamanałhaaqtuaq Solomon-miñ.

Ilitqusiqł̣uk Utiqtuq

⁴³ Ilivsi pigiitchuasii iñuuruat paŋmapak ittusi iñuktun ilitqusiqł̣uqaqtuatun. Ilitqusiqł̣uk anikami iñuŋmiñ, ilaa kukiḷuktuq imiġitchuakun nunakun ivaqłiavluni piḷaiŋiaqsiaġviksramiñik, aasii paqitchiŋitchuq.

⁴⁴ Tavraniasii uqallaktuq, Utiġniaqtuŋa iñuŋmun, annivimñun. Tavra utiqami paqitkaa inigiŋakkani imaiḷaaq, tilaiŋaraatchiaq, sut iłuaqsruqtat.

⁴⁵ Tavraasii aullaqłuni qaġġirriruq tallimat malġugnik allanik ilitqusiqł̣ugnik pigiił̣haaqtuanik inmiñiñ, aasii isiqłutiŋ iñuuvigiaqsivḷugu. Tainna pimmata, iñuk taamna pigiiḷił̣haaŋaruq aqulliġmi sivulliġmiñ. Tainnaġniaġmiusi pigiitchuasii iñuuruasii paŋmapak.

Jesus Aakaŋalu Aniqatiiŋiḷu

⁴⁶ Jesus uqaġniaqtillugusuli iñuŋnun, aakaŋalu aniqatiiŋiḷu makitaŋarut siḷami, apiqsrivḷutiŋ uqaqatigisukługu.

⁴⁷ Iñuich iḷaŋata uqallautiŋagaa, Aakallu aniqatiitillu qaŋma makitarut aniiqł̣utiŋ, apiqsrirut uqaqatigisukłutin.

⁴⁸ Tavra Jesus kiuŋagaa iñuk uqallaurriñi, Kisuuva aakaga? Suli kisuuvat aniqatitka?

⁴⁹ Tavra isaaqługich argagni tuŋaannun iḷitchitqurami, ilaa uqallaŋaruq, marra makua aakagimmatullu aniqatigimmatullu itkitka.

⁵⁰ Qanuq kiñaliqaa nalautchiruaq pisuutaanik Aapama qiḷaŋmiittuam aniqatigigiga, aakagigigalu.