Matthew 11 - Iñupiatun Mumiksat Uqalugiksuat

John Paptaiqsim Tiligik Iḷitchitquragni Jesus-mun

¹ Tavra Jesus naatchikami iḷisaurrunmiñik qulit malġuk iḷitchitquramiñun, tavraŋŋa aullaŋaruq iḷisaurriyaqtuqłuni alġaqsruiyaqtuqłuniḷu nunaaqqiñun tamaaniittuanun.

² Tavra John tusaakami tigutaaqtaullaġmi savaaŋigun Christ, tilisiŋaruq uqaluŋmik iḷitchitquramigun

³ aasii apiġivlugu Jesus, Taivrumiŋauvich qaiyumaaqtuaguruaq, naagga niġiugniaqpisasuli allamik?

⁴ Tavra Jesus kiuŋagik, Aullaġlutik quliaqtuaġutiyaqtutku John sunik tusaaravsiññik tautukkavsiññiglu.

⁵ Ayauŋaruat tautullasirut, tusiattuallu pisuaqtut, kiḷḷiġruaqtuqtuat mamititaurut, tusiḷḷaqtuatsuli tusaallasirut, tuquŋaruallu aŋipkaqtaurut, suli piqaqtuksrauruat tusaayugaaġiksuanik alġaqsruusiaqaqtut.

⁶ Aasii quviasugli iñuk ukpiŋaiŋitchuaq uvamnun.

⁷ John-gum iḷitchitquraŋik utiqsaġmaŋnik, Jesus uqautisarraqsiŋagai iñusalaich John-kun. Tautugiaqavsiuŋ John nunagluktuamun, sumik tautugniaġasugiraġivisi? Tautugiaqtaqpisiuŋ iñuk maliksuktaqsiññaqtuaq ivigruatun anuġim aulataġikkaŋatun? Naumi.

⁸ Summanmi aullaġuuniqpisi? Tautugiaqpisiuŋ iñuk annuġaaqaqtuaq akisuruanik annuġaanik? Iḷisimarusi tamatkua akisuruanik annuġaaqaqtuat umialgich igluqpaŋiññiittut.

⁹ Summanmi ullautiraġivisi? Tautugiaqpisiuŋ uqaqtaa God-im? Aaŋ, uqallautigivsi nalupqinaitchuq, kamanałhaaqtuq unnii uqaqtiŋiññiñ God-im.

¹⁰ John taimñauruq aglausimaruaq Bible-ni inna, “Uvva tiligiga kivgaġa sivuŋni, itqanaiyaġniaġai iñuich akuqtuiyumiñaqsiḷugich iliŋnik.”

¹¹ Iḷumun uqallautigivsi, John Paptaiqsi kamanaġniqsrauruq iñuŋniñ aniŋaruaniñ nunami. Aglaattauq uvva paŋmapaŋmiñaglaan iñuk kamanaiññiqsrauruaq tamatkunaŋŋa atanniqsimapkaqtuaniñ God-mun kamanałhaaqtuq John-miñ, qanuq iḷitchuġiłhaaġniaqtuq sunik God-im salapqiġñiakkaŋiñik uvapkun.

¹² Alġaqsruisaġniŋaniñ John Paptaiqsim paŋmapaŋmunaglaan, piyumalaaqtuat iñuich siġġaqiŋarut God-mun atanniqsimatquvlutiŋ.

¹³ Qanuq Moses aglaaŋisa iluqaġmiglu God-im uqaqtiŋisa John-munaglaan uqautigiŋagaat sivuani tikiñŋaiñŋaan God-im atanniqsimmataa.

¹⁴ Aasii ukpiġisukkuvsiuŋ uqaluat, ukpiġiyumiñaġiksi John-gutilaaŋanik sivuani uqautigikkaŋat qaiñiaġnivḷugu inniaqtuaq Elijah-tun.

¹⁵ Siutiqaqtusi tusaggatiksragnik, naalaġnisiŋa.

¹⁶ Aglaan sumun arriḷisiginiaqpik ukua paŋmapak iñuuruat? Miqłiqtutun ittut avutqautiruatun piuraaqłutiŋ kasimaraġaġviŋñi, katirrusiqiŋŋuaqłutiglu, tuquruaniglu aŋaiyyurriŋŋuaqtuatun.

¹⁷ Piuraallaġmiŋ ququullativlutiŋ avanmun inna, atuqtuurautigaluaġivsi uaminŋitchusi. Kiŋunġuŋŋuaqłuta qiaŋŋuaqapta, qiaŋitchusi.

¹⁸ John Paptaiqsi qaikami niġiḷaitqataŋaruq imiġaluaġnaniḷu wine-mik, aasii uqautigigiksi ilaa ilitqusiqł̣uqaġnivḷugu.

¹⁹ Iġñiŋa Iñuum qaiŋaruq niġivḷuni imiqłuniḷu allatun iñuktitun, aasii uvyauġiksi, Marra niġġiqsuruaq wine-tuqtiqpaglu, avilaitqataat tax-iñik katitchirit, piḷuusiqirillu. Suliqutauŋitchuq qanuq uqaġaluaġuvsi, qanuq isumaturuat iñuich puttuqsriḷḷagaat God-im isumattutaa.

Ukpiŋitchuat Nunaaqqich Iḷaŋiññi

²⁰ Tavra Jesus suarraqsiŋagai iñuich nunaaqqiñi iñuuruat savagvigiŋarani iñugiagniqsranik aliuġnaqtuanik, qanuq isumalitqiŋiñmata.

²¹ Qanutun naglignaqtigirusi ilivsi, Chorazin-miut. Qanutun naglignaqtigimmiusi ilivsi Bethsaida-ġmiut. Qanuq aliuġnaqtuat savaat savaaguruat ilivsiññi savaaguŋakpata Tyre-miḷu Sidon-miḷu, taimaniuvva isumalitqikkumiñaŋagaluaqtut annuġaaġlutiŋ miitchugnik suli aquppiḷutiŋ aġrani.

²² Tavra uqallautigivsi, uvluani isivġiġvium isivġiusiaksraŋat Tyre-vlu Sidon-lu iñuŋisa tunikił̣haaġniaqtuq ilivsi isivġiusiaksravsiññiñ.

²³ Aasii ilivsi Capernaum-miut, isumavisi tugliqsruutinasugalusi qiḷaŋmun kamanaunmi? Nunaaqqiqsi suksraunġiqsauniaqtuq. Qanuq aliuġnaqtuat savaaguruat ilivsiññi savaaguŋakpata Sodom-mi, napanayaġaluaqtuq uumuŋaaglaan uvlumun.

²⁴ Aglaan uqallautigivsi, tunikił̣haaġniaqtuq isivġiusiaksraŋat iñuŋisa Sodom, uvluani isivġiġvium ilivsiññiñ.

Qaiḷusi Uvamnun Unaŋuiqsiġitchi

²⁵ Tavrani Jesus uqallaŋaruq, Quyyavigigikpiñ, Aapaaŋ, Atanġuruatiin qiḷaŋmun nunamullu, iriqsimaŋakapkich iḷumun ittuat pisin isumatunasugiruaniñ iḷisimanasugiruaniḷḷu, aasii satqummiqł̣ugich iñuŋnun miqłiqtutun ittuanun.

²⁶ Aaŋ, Aapaaŋ. Tainna pisuutigiŋagiñ iviġaumagivlugu.

²⁷ Aapama supayaat qaiñŋagai uvamnun, aasii kialiqaa iḷisimaŋitkaa Iġñiq aglaan kisimi Aapam. Kialiqaa suli iḷisimmaġiitkaa Aapa aglaan Iġñiġum kisimi, kiapayaaġlu Iġñiġum iḷitchuġipkakkaŋa Aapamik.

²⁸ Iluqasi uqumaiḷḷiraqtuasii uŋiarrisaġivlugich piḷuutisi akuqtuqtauniksraqsiḷu God-mun, qaisitchi uvamnun unaŋuiqsiqsitchumagivsi.

²⁹ Anuqasiutisitchi uvamnun, aasii iḷisaġlusi uvamniñ, qanuq uvaŋa piaqłuktaŋitchuŋa qimmaksaliyaitchuŋalu, aasii unaŋuiqsiġñiaqtusi.

³⁰ Qanuq anu aitchuutiga ilivsiññun naammaktuq, aasiisuli savaaksraq piraksriutiginiakkaġa ilivsiññun nagniġutauniaŋitchuq.