Matthew 10 - Iñupiatun Mumiksat Uqalugiksuat

Jesus Piksraqtuq Qulit Malġugnik Tilirauruanik

¹ Tavra Jesus qaitquŋagai inmiñun qulit malġuk iḷitchitqurani aasii suaŋŋasiŋagai ilitqusiqł̣uiyaiḷḷasivḷugich, suli iłuaqsiriyumiñaqsivḷugich naŋirrutipayaanik suaŋairrutipayaaniglu.

² Atiŋich qulit malġuk tilirauruat uvva, sivulliq, Simon tairauruaq Peter-mik, Andrew-lu ilaan aniqataa, James-lu, John-lu iġñiŋik Zebedee-m,

³ Philip-lu, Bartholomew-lu, Thomas-lu, Matthew-lu tax-nik katitchiri, James-lu iġñiŋa Alphaeus, Thaddaeus-lu,

⁴ Simon-lu Zealot-guruaq, Judas-lu Iscariot, aitchuutiginniktuaq Jesus-mik.

Piraksriusiaŋat Qulit Malġuk

⁵ Taapkua qulit malġuk Jesus tiliŋagai piraksriqł̣ugich inna, Aullaqqayaanasi sumupayaaq Jew-guŋitchuanun, suli isiġnagich nunaaqqipayaaŋich Samaria-ġmiut,

⁶ aglaan aullaqsiññaġitchi tammaŋaruatun imnaisun ittuanun Israel-guruani.

⁷ Aasii alġaqsruiḷusi iglaullavsi uqaġlusi, Taamna qiḷaŋmiittuaq atanniqsimanniksaaqsiruq iñuŋnik.

⁸ Iłuaqsisigik naŋittuat, aŋipkaqsigik tuquruat, mamititchigik kiḷḷiġruaqtuqtuat, anittaqsigik ilitqusiqł̣uich. Suaŋŋasiqsauŋarusi akiḷiġaluaġnagu, aasiiḷi atuqsiuŋ suaŋŋan akiiḷaaġlugu.

⁹ Saagaġnasi maniqaġvivsiññi maniŋmik kaviqsuamik qatiqtuamiglu, naagga unnii kannuyamik.

¹⁰ Puukataiḷaaġlusi iglauguvsi, naaggaunnii annuġaatqiusiraaġnasi, aluġusiraaġnasiḷu, naagga ayauppialiraaġnasi. Savaktauruaq piqaqtitaksrauruq pigiraksraġikkaŋiñik.

¹¹ Suli kisupayaamun nunaaqqimun tikitkuvsi, iḷitchuġiyumausi iñuŋmik tukkuliiyumaruamik tavrani, aasii tukkuġilugu aullaġnivsiññunaglaan.

¹² Isiġuvsi iglumun, uqallakkumausi inna, Tutqiutiqaġitchi.

¹³ Aasii taapkua iñuich paġlakpasi, tutqiutiqaġniaqtut. Aglaan paġlaŋitpasi, tutqiutiqaġumiñaitchut.

¹⁴ Tavra kialiqaa tukkuliŋitpasi naagga naalaġnisuŋitpatigik uqalusi, piiyaqsiuŋ avyuq isigavsiññiñ aniñiallavsi iglumiñ naagga nunaaqqimiñ.

¹⁵ Iḷumun uqallautigivsi, uvluani isivġiġvium, God naglikkutiqałhaaġniaqtuq iñuŋiññun Sodom-lu Gomorrah-vlu taavrumaŋŋa nunaaqqimiñ tukkuliiŋitchuamiñ ilivsiññik.

Nagliksaaqtirrutiksrautit

¹⁶ Uvva, aullaqtitkivsi imnaisun akunġannun amaqqut, iḷimasuktuaġitchiasii nimiġiatun suli anniaqłiŋisigilusi tiŋmiatun.

¹⁷ Nipuŋairvigilugich iñuich, qanuq aitchuutigiraġaġniaġaasi uqaqsitaaġviŋñun, suli ipiġaqtuġlusi aŋaiyyuviŋmiŋni.

¹⁸ Suli pisigiluŋa qaġġirrauniaqtusi sivuġaŋiññun kavanauruat umialgiḷḷu, uqaqulusi tusaayugaaġiksuanik inmiŋnun Jew-guŋitchuanullu.

¹⁹ Ilaisa tigutaaqpasi, uŋiariñasi qanuq uqaġniaqtilaavsiññik naagga sunik uqautiqaġniaqtilaavsiññik, qanuq uqaluksriusiaqaġniaqtusi tavraġuqpan.

²⁰ Qanuq ilivsiuŋitchuq uqaqtuaq, aglaan Ilitqusiġiksuaŋa Aapavsi uqaqtuq ilivsigun.

²¹ Iñuich aitchuutiginiaġaich aniqatitiŋ tuqutautqulugich. Suli aapauruat tainnatun pipkaġniaġmigaich miqłiqtutiŋ. Suli miqłiqtut makivsaallagniaqtut aŋayuqaamiŋnun aasii aŋayuqaatiŋ tuqutillugich.

²² Suli iñupayaat uumikkiutiniaġaasi pisigilugu uvaŋa pigikavsi. Aglaan iñuk igḷutuutiruaq nagliksaaqtitauniġmik iñuuniqtutilaamisun, annaurrauniaqtuq.

²³ Nagliksaaqtitpasi nunaaqqimi, pigruġitchi tuglianun. Qanuq iḷumun uqallautigivsi, naatchianiŋniaŋitchusi savaavsiññik iluqaiññi nunaaqqiŋiññi Israel qaigaluaqtinnagu Iġñiŋa Iñuum.

²⁴ Iḷitchitquraq kamanałhaaŋitchuq iḷisaurrimiñiñ, naaggaunnii kivgaq ataniġmiñiñ.

²⁵ Naamaruq iḷitchitquraq itkumi iḷisaurrimisun, suli kivgaq ataniġmisun. Taiguġuugumiñŋa Beelzebul-mik Ataniġikkavsiŋa, qanutułhaaq iliŋisa atiġiił̣haaqtuanik taiguġniaġaasi uvaŋa kivgatka.

Iñuich Sivuuġagiłhaaġnagich

²⁶ Tavra sivuuġaginagich iñuich. Suna matuqaqtuaq matuiġñiaqtuq, aasii nalunautchiapayaaq iḷitchuġipkaqtauniaqtuq.

²⁷ Sut uqallautitka ilivsiññun taaġmi, iḷitchuġipkaqsigik iñuŋnun uvlumi, suli uqautitka ilivsiññun kisivsiññun, quliaqtuaġisigik iglut qaaŋiññiñ.

²⁸ Suli sivuuġaginagich iñuich tuqutchiruat timimik qanuq suksraunġiġumiñaitkaat ilitqusiq, sivuuġagiłhaaqsiuŋ God suksraunġiiḷḷaruaq iluqaagnik ilitqutchimiglu timimiglu nagliksaaġviŋmi.

²⁹ Iḷisimarusi malġuk tigmiaġruurak tunisuuruk maniuramun atautchimun. Naaggauvva nalliak unnii katakkumiñaitchuq nunamun uniuġlugu Aapavsi pisuutaa.

³⁰ Ilivsivsauq nutchasiunnii niaquvsiññi iluqaisa God-im iḷisimagai iñugiaktilaaŋat.

³¹ Tavraasii sivuuġanasi, piqpaŋnałhaaqtusi iñugiaktuaniñ tiŋmiaġruuraniñ.

Quliaqtuaqaġniq Christ Annaurriginivḷugu

³² Tavra kialiqaa quliaqtuaġigumiŋa iñuŋnun piginiḷuni uvamnun, uvaŋaptauq tainnatun piñiaġmigiga Aapamnun qiḷaŋmiittuamun.

³³ Aglaattauq kialiqaa piiḷaaġikpaŋa iñuŋnun pigiŋiññiḷuni uvamnun, uvaŋaptauq piiḷaaġiniaġmigiga Aapamnun qiḷaŋmiittuamun.

Qaġġirriŋitchuŋa Aŋuyautairrunmik Aglaan Atiŋirrunmik

³⁴ Isumanasi qaiŋanasugaluŋa iñupayaurat atisipkaġiaġlugich. Qaiŋaitchuŋa atisipkaġiaġlugich, aglaan qaiŋaruŋa atinġiquvlugich.

³⁵ Qanuq qaiñiġma atiŋaiqsinniaġai iġñiġuruat aapatiglu, suli paniuruat aakatiglu, suli ukuaguruat aakaruatiglu.

³⁶ Suli iñuich akiḷḷiġiliutiniaġaich ilaisa igluqatitiŋ.

³⁷ Iñuum piviuttaġiłhaaġumiuŋ aapani naagga aakani uvamniñ nalliummatiŋitchuq uvamnun, suli iñuum piviuttaġiłhaaġumiuŋ iġñini naagga paniñi uvamniñ nalliummatiŋitchuq uvamnun.

³⁸ Suli iñuum iqsriutiŋitkumiuŋ aŋarraurani tuqutauyumaliġḷuniunnii pisigiluŋa, nalliummatiŋitchuq uvamnun.

³⁹ Iñuk iñuullatuvaił̣aktuaq tammaiñiaqtuq iñuggunmiñik, aglaalli iñuk sullatuaġumiḷu atiruaq tuqqutiyumiñaġluŋaunnii, tammaiyumiñaipiaġaa iñuggutini.

Akiḷiusiaksrat

⁴⁰ Iñuum paġlagumisi paġlammigaaŋa, suli iñuum paġlaruam uvamnik paġlammigaa tilisiŋaruaq uvamnik.

⁴¹ Iñuk paġlaruaq uqaqtaanik God-im pisigivlugu uqaqtauniŋa God-mun aitchuusiaqaġniaqtuq uqaqtaata God-im akiḷiusiaŋatun. Suli iñuk paġlaruaq nalaunŋaruamik iñuŋmik pisigivlugu nalaunŋaniŋa, aitchuusiaqaġniaqtuq nalaunŋaruam iñuum akiḷiusiaŋatun.

⁴² Suli kiñaliqaa aitchuiruaq atautchimununnii makua kamanaiññiqsrat maliġuaqtima iḷaŋannun qallugauram imałhiñaŋanikunnii nigliñaqtuamik imiġmik pisigivlugu iḷitchitquraunini, iḷumun uqallautigivsi, akiḷiusiaqaġniaqtuq.