Matthew 1 - Iñupiatun Mumiksat Uqalugiksuat

Jesus Maŋŋuŋi

¹ Uvva aglaich maŋŋuŋigun Jesus Christ, kiŋunġuruam David-mun, Abraham-mullu.

² Abraham aapagigaa Isaac-gum. Isaac-li aapagigaa Jacob-gum. Jacob-li aapagigaat Judah-vlu aniqatiiŋisalu.

³ Judah aapaŋak Perez-guvlu Zerah-vlu. Taapkuak aakaŋak Tamar. Perez aapaŋa Hezron-gum, Hezron-li aapaŋa Ram-gum.

⁴ Ram-li aapagigaa Amminadab-gum. Amminadab-li aapagigaa Nashan-gum. Nashan-li aapagigaa Salmon-gum.

⁵ Salmon-li aapagigaa Boaz-gum, Rahab-mik aakaqaqtuam. Boaz-li aapagigaa Obed-gum, aakaqaqtuam Ruth-mik. Obed-li aapagigaa Jesse-m.

⁶ Jesse aapagigaa Umialgum David. David-li aapagigaa Solomon-gum, aakaqaqtuam Uriah-m nuliakkaluaŋanik.

⁷ Solomon aapagigaa Rehoboam-gum, Rehoboam-li aapagigaa Abijah-m, Abijah-li aapagigaa Asa-m,

⁸ Asa-li aapagigaa Jehoshaphat-gum, Jehoshaphat-li aapagigaa Joram-gum, Joram-li aapagigaa Uzziah-m,

⁹ Uzziah-li aapagigaa Jotham, Jotham-li aapagigaa Ahaz-gum, Ahaz-li aapagigaa Hezekiah-m,

¹⁰ Hezekiah-li aapagigaa Manasseh-m, Manasseh-li aapagigaa Amos-gum, Amos-li aapagigaa Josiah-m,

¹¹ Josiah-li aapagigaa Jechoniah-vlu aniqatiŋisalu. Taimani iñuich Israel-guruat aullaurrausaġmata Babylon-mun.

¹² Iñuich aasii aullaurrauganiŋmata Babylon-mun ukuali aniŋarut. Jechoniah aapagigaa Shealtiel-gum. Shealtiel-li aapagigaa Zerubbabel-gum.

¹³ Zerubbabel aapagigaa Abiud-gum, Abiud-li aapagigaa Eliakim, Eliakim-li aapagigaa Azor-m.

¹⁴ Azor-li aapagigaa Zadok-gum, Zadok-li aapagigaa Achim, Achim-li aapagigaa Eliud-gum.

¹⁵ Eliud aapagigaa Eleazar-m, Eleazar-li aapagigaa Matthan, Matthan-li aapagigaa Jacob-gum,

¹⁶ Jacob-li aapagigaa Joseph-gum, uiŋa Mary-m aakaŋa Jesus Christ-guruam.

¹⁷ Tavra kiŋuniġiich Abraham-miñ David-mun akimiaġuutaiḷauŋarut. Suli David-miñ aullaurrauniŋannunaglaan Babylon-mun kiŋuniġiich akimiaġuutaiḷauŋarut. Aasiiḷi aullaurrauniŋanniñaglaan akimiaġuutaiḷauŋammiut kiŋuniġiich aniñiŋanunaglaan Christ-guruam.

Aniñiŋa Jesus Christ

¹⁸ Tavra aniñiŋa Jesus Christ piŋaruq inna. Aakaŋa Mary piksrausiutauganikami Joseph-mun, tuvaaqatigiiksinŋaiñŋaġmik, iḷitchuġiŋaruq siŋaiyautilaamiñik Ilitqusiġiksuakun.

¹⁹ Aasii uiksrautauruaq Joseph, nalaunŋaruaguvluni, Kanŋunaqsiḷiġuŋił̣ł̣ugu Mary iñuŋnun, sivunniŋaruq avitchukługu nalunaqtuakun.

²⁰ Tavra taavrumiŋa isumalaaġutiqaqtillugu, Atanġum isaġulga niptaŋaruq ilaanun siññaktukun, aasii uqaqłuni, Joseph, kiŋunġuruatiin David-mun, sivuuġanak Mary-mik tuvaaqatiniksaġnipkun, qanuq ilaa siŋaiyaupkaŋagaa Ilitqusiġiksuam.

²¹ Iġñiqaġniaqtuq, aasii atchiġisigiñ Jesus-mik, qanuq ilaan annautiniaġai iñuŋni piḷuutiŋiññiñ.

²² Tamatkua iluqaġmiŋ piŋarut taŋŋiqsaqługu Atanġum uqautigiŋaraa ilaan uqaqtimigun inna.

²³ “Aŋusiuŋaitchuaq siŋaiyauniaqtuq aasii iġñiqaġluni, aasii atiqaġniaqtuq Emmanuel-mik, sivuniqaqtuamik, God-im itqatigigaatigut.”

²⁴ Joseph itiqami, piŋaruq pitqutaagun isaġulgata Atanġum. Ilaan tuvaaqasiutiŋagaa Mary.

²⁵ Aglaan aŋalanŋaitkaa nuliaġiruatun iġñianigataqtillugu aŋunmik, aasii Joseph-gum atchiŋagaa Jesus-mik.