Mark 9 - Iñupiatun Mumiksat Uqalugiksuat

¹ Tavra Jesus uqallavsaaŋaruq. Iḷumun uqallautigivsi. Marra iñuich iḷaŋich ittut tuquniaŋitchuat tautuŋaiñŋaan kamanaqtuakun atanniqsimannigniksraŋa God-im.

Jesus Qiññaŋa Allaŋŋuqtauruq

² Tavra itchaksrat uvlut pianiŋmata, Jesus piqasiutiŋagai Peter-lu James-lu John-lu, aasii mayuutivlugich qutchiksuamun iġġimun kisiisa. Tavrani ilaan qiññaŋa allaŋuŋaruq takkuanni.

³ Suli annuġaaŋi qaummaġiksiŋarut, qatiqsipiaġataqłutiŋ aputitun, qatiqpaił̣ł̣utiŋ kialiqaa nunami salummaġumiñaiñŋagai qatiqsił̣haaġlugich.

⁴ Tavra niptaŋaruk Elijah-lu Moses-lu, aasii iliŋikta uqaqatigiŋagaak Jesus.

⁵ Tavra Peter uqallaguliqsiŋaruq Jesus-mun, Iḷisaurrii, nakuuruq maaniinnapta. Tupiqta piŋasunik iḷaŋat iliŋnun, iḷaŋat suli Moses-mun, atausiqsuli Elijah-mun.

⁶ Ilaa naluŋaruq sumik uqallautiksramik, iqsivaił̣ł̣utiŋ.

⁷ Tavra nuvuyam qulaunŋagai, aasii nuvuyamiñ iġiña, uqallaŋaruq. Uvva piviuttaġiraġa Iġñiġa. Naalaġnisiuŋ, aasii kamagilugu.

⁸ Tavra tavrauvva, alaqisanikamiŋ tautuŋaitchut iñuŋmik, aglaan Jesus kisian iliŋiḷḷu.

⁹ Tavra atqallaġmiŋ iġġimiñ, piraksriŋagai quliaqtuaquŋił̣ł̣ugich iñuŋmun sunik tautuŋakkamiŋnik, Iġñiŋa Iñuum aŋiḷġataqtillugu tuqqunmiñ.

¹⁰ Tavra quliaqtuaġiŋaitkaat taamna. Apiqsruqtuutirraqsiŋarut avanmun sumik aŋiñiq tuqqunmiñ sivuniqaġmagaan.

¹¹ Tavra apiġiŋagaat Jesus, Summan iḷisaurrit pitquranik uqaġuuvat Elijah qaiqqaaqtuksraunivḷugu qaiŋaiñŋaan Christ-guruaq?

¹² Jesus kiuŋagai, Iḷumun ittuq Elijah qaiqqaaġniaqtuq Christ-miñ aasii itqanaiġñiaġai supayaat. Aglaalli qanuq Bible uqaluŋich uqaluqaqpat Iġñiŋagun Iñuum? Inna uqaluqaqtut, nagliksaaqpaktuksraunivḷugu suli pisuŋisauluni.

¹³ Aglaalli uqallautigivsi, Elijah qaiganiŋaruq, aasii iñuich piŋagaat qanupayauraq pisukamirruŋ, nalautiłługich aglausimaruat Bible-ni ilaagun.

Jesus Iłuaqsigaa Nukatpiaġruk Ilitqusiqł̣ulik

¹⁴ Tavra Jesus tikiññami iḷitchitquramiñun pairuanun, tautuŋagai iñugiapiaġataqtuat iñusalaich avataanni iḷisaurriḷḷu pitquranik uqavaaqtuat iḷitchitquranun.

¹⁵ Tavra tavrauvvaa iluqaġmiŋ iñuich, tautukamirruŋ Jesus, atqunaqłutiŋ niġiiḷḷaqtauŋarut, aasii aqpałłutiŋ ilaanun paġlaŋagaat.

¹⁶ Tavra ilaan apiġiŋagai, Sunik uqavaaġutiqaqpisi?

¹⁷ Tavra iḷaŋata iñusalaich kiuŋagaa, Iḷisaurrii, qaġġisiŋagiga iliŋnun iġñiġa. Ilaa uqalaitchuq ilitqusiqł̣uqaqłuni.

¹⁸ Ilitqusiqł̣uum aŋalataġirraqsimmagu, ilaan iqł̣ataġiraġigaa, innuliqiraqtuġlu, tiriqtitakługiḷḷu kigutini, tiggaqsivluniḷu. Aasii apiġiŋagaluaġitka iḷitchitquratin ilaiññun anitquvlugu ilitqusiqł̣uk aasii anilaiñŋagaat.

¹⁹ Jesus uqallautiŋagai, qanutun uvva ukpiġutaisigirusi iñuich. Qanutun sivisutigiruamik nayugaksraġivisi ukpiliġataqtillusi? Qanutun igḷutugaksraġivisi? Qaġġitchuuŋ nukatpiaġruk uvamnun.

²⁰ Tavra ilaisa qaġġisiŋagaat Jesus-mun. Tautugmagu Jesus, tavrauvvaa ilitqusiqł̣uum qiiqsruqtinŋagaa, aasii ulġuŋaruq nunamun, suli aksralikłuni innuliqivluni qaniġmiñi.

²¹ Tavra Jesus apiġiŋagaa aapaŋa, Qaŋaaglaan tainnaiḷiŋava? Ilaan kiuŋagaa, Miqłiqtuurauniġmiñiñaglaan.

²² Akulaitchuami ulġuttaġigaa igniġmun, immamullu, tuqutchukługu. Piḷḷaguvich supayaamik, nagligilunuk ikayuqtiguk.

²³ Jesus kiuŋagaa, Apiqsrivich piḷḷatilaamnik? Supayaaq piḷḷaruq ukpiġutiqaqtuamun.

²⁴ Tavra tavrauvvaa aapaŋa miqłiqtum uqallaŋaruq nipatuvluni, Ataniiq, ukpiqtuŋa. Ikayuŋŋa ukpilivsaaquluŋa.

²⁵ Tavra Jesus tautukamigich iñuich qairuat aqpamik atautchimun, ilaan suaŋagaa ilitqusiqł̣uk, Ilivich ilitqusiqł̣uuk, uqalaisitchiruatiin tusaalaisitchiruatiillu anitqugikpiñ nukatpiaġruŋmiñ. Isitqigñak ilaanun.

²⁶ Tavra ilitqusiqł̣uk nipaalaŋaruq, suli iqł̣ataġiqqaaqługu atqunaq nukatpiaġruk, aniŋaruq ilaaniñ. Tavra iḷiŋaruq tuquŋaruatun iñugiaktuat uqallallasivḷugich, Tuquruq.

²⁷ Tavra Jesus tiguŋagaa argaŋigun, aasii ikayuqługu makitiłługu, aasii makinŋaruq.

²⁸ Tavra Jesus isiġman iglumun, iḷitchitquraŋisa apiġiŋagaat suiḷaurivḷutiŋ, Summan uvagut ilitqusiqł̣uk anilaitpisigu?

²⁹ Jesus kiuŋagai, Aŋaiyyutim kisimi anillagaa tainnasiq ilitqusiqł̣uk, sum allam piyumiñaitkaa.

Jesus Uqautigivsaaġaa Tuqqutini

³⁰ Tavra aullaŋarut tavraŋŋa, aasii iglauvlutiŋ Galilee-kun. Ilaan iñupayaamun iḷisimatquŋaitkaa sumiitilaani,

³¹ qanuq iḷisautiŋagai iḷitchitqurani, suli uqallautiŋagai, Iġñiŋa Iñuum aitchuutauniaqtuq iñuŋnun, aasii tuqunniaġaat. Tuqutauganikkumi, ilaa aŋiñiaqtuq piŋayuagni uvluk.

³² Tavra kaŋiqsiŋaitkaat taamna uqaluk, suli taluqsraŋarut apiġiniaġniksraŋagun.

Kiña Kamanaġniqsrauva?

³³ Tavra tikiñŋarut Capernaum-mun. Iglumiillaġmiŋ Jesus apiġiŋagai, Sumik uqavaaġutiqaqtuasii avanmun iglaullapta?

³⁴ Iḷitchitqurat kiuŋaitkaat, qanuq iglaullaġmiŋ uqaŋarut avanmun kiña kamanaġniqsrauniaġmagaan.

³⁵ Tavra aquvinŋaruq, aasii qaitquŋagai qulit malġuk iḷitchitqurat, aasii uqallautivlugich, Kiñaliqaa iluqaiññiñ kamanaqsił̣haaġukkumi, kamanaił̣haaqtuksrauruq inmiñik, kivgaliutiluni iluqaiññun.

³⁶ Tavra ilaan tiguŋagaa miqłiqtuq, aasii inillakługu akunġannun, aasii saġlirriutianikamiuŋ, uqallautiŋagai,

³⁷ Iñuum paġlakpauŋ miqłiqtuuraq uvaŋa pisigiluŋa, uvaŋa paġlagaaŋa. Kialiqaa paġlakamiŋa uvaŋałhiñaq paġlaŋitkaaŋa aglaallu tilisiŋaruaq uvamnik.

Akiḷḷiḷiqsuutiŋitchuaq Uvaptiŋnun Iḷagigikput

³⁸ Tavra John uqallautiŋagaa Jesus, Iḷisaurrii, tautuktuaguut iñuŋmik anittairuamik ilitqusiqł̣uŋnik atuqługu atqiñ, aasii iñiqtikkaqput, qanuq uvaptiŋnun piqatauŋiñman.

³⁹ Tavra Jesus uqallaŋaruq, Iñiqtiġnagu. Qanuq aliuġnaqtuamik savakkumiñaqtuamik iñuitchuq atuġlugu atiġa, pigiitchuamik uqautigiyumiñallaġmiŋa.

⁴⁰ Qanuq akiḷḷiḷiqsuutiŋitchuaq uvaptiŋnun iḷagigikput.

⁴¹ Kialiqaa aitchuġumisi qallugauramun imiġmik imigaksravsiññik Christ pigimmasi, iḷumun uqallautigivsi, akiḷiusiaqaġniaqtuq.

Piḷuksipkaqtinniaġutit

⁴² Kialiqaa piḷuksipkaqpauŋ iḷaŋat makua miqłiqtuuratun iḷivḷutiŋ ukpiqtuat uvamnun, iłuałhaaġayaqtuq uyaġagruamik quŋusiġutchiġḷugu taamna iñuk igitaukpan taġiumun.

⁴³ Argakpich piḷuksipkaqpatin, iñuugiñ argaiqsuatun piḷutin. Iłuałhaaġayaqtuq isiġuvich atanniqsimavianun God-im atautchimikunnii argaqaġlutin, iluqaaktun argaqaġniġmiñ aasii nagliksaaġviŋmuktitaulutin, igniġmun qamilaił̣aamun.

⁴⁴ [Taavrumani inimi, qupilġut niġiruat tuqulaitchut, suli igniq sumikunnii qamilaitchuq.]

⁴⁵ Tainnatun suli isigakpich piḷuksipkaqpatin, iñuugiñ isigaiqsuatun piḷutin. Iłuałhaaġayaqtuq isiġuvich atanniqsimavianun God-im isigaitkaluaŋŋaqpich malġugnik isigaqaġniġmiñ aasii nagliksaaġviŋmuktitaulutin.

⁴⁶ [Taavrumani inimi, qupilġut niġiruat tuqulaitchut, suli igniq sumikunnii qamilaitchuq.]

⁴⁷ Suli irivich piḷuksipkaqpatin, iñuugiñ iraiqsuatun piḷutin. Iłuałhaaġayaqtuq isiġuvich God-im atanniqsimavianun iriqaġlutin atautchimik malġugnik iriqaġniġmiñ aasii nagliksaaġviŋmuktitaulutin.

⁴⁸ Taavrumani inimi qupilġut niġiruat timiŋiññik tuqulaitchut, suli igniq sumikunnii qamilaitchuq.

⁴⁹ Iñupayaaq nakuqsiḷaaqtauyumiñaqtuq igḷutuiḷuni nagliksaaġutinik, tapiglautimmatun ignikun.

⁵⁰ Taġiuq niqimun tivraġiksiḷaaġutauruq, aglaan taġiuq taġiuġniiqpan, qanuq taġiuġniḷiġñiaqpisiuŋ? Taġiuġniiġñasi ilivsiññi, suli uqavaaġutaiḷḷusi avanmun.