Mark 7 - Iñupiatun Mumiksat Uqalugiksuat

Iḷisaurrutaat Maŋŋuuruat

¹ Tavra Pharisees-lu iḷisaurriḷḷu pitquranik qairuat Jerusalem-miñ katirvigiŋagaat Jesus.

² Tavra tautuŋagaich Jesus iḷitchitquraŋisa iḷaŋich niġiruat iqaġiqqaaġaluaġnagich argatiŋ Pharisees piraksriutaatitun iñuŋnun.

³ Qanuq Pharisees, iluqaġmiglu Jews, Iqaġigaluamiiŋaunnagich argatiŋ, niġiḷaitchut, kamagivlugu taimaŋŋaqtaq iḷisaurrutaat maŋŋuuruat.

⁴ Aasii tauqsiġñiaġviŋñiñ aikamiŋ niġiḷaitchut iqaġiŋaunnatiŋ. Suli iñugiaktuat allat akuqtuaġiŋagaich piḷġusiġisukługich, iqaġiniŋich qallugaurat, niuqqiutillu, uvluyuiḷallu utkusiich.

⁵ Tavra Pharisees-lu iḷisaurriḷḷu pitquranik Jesus apiġiŋagaat, Summan iḷitchitquravich kamagilaitpatigik iḷisaurrutiŋich maŋŋuupta, niġivḷutiŋ iqaġiqqaaġaluaġnagich argatiŋ?

⁶ Jesus kiuŋagai, Ilivsi ukpiŋŋuaqtuasii. Qanutun nalautigiŋaruq Isaiah uqaqtaa God-im uqallausiġikamisi. Ilaan aglaŋagai God-im uqaluŋi inna, “Ukua iñuich nanġaġaluaġaanŋa uqalułhiñamiŋnik, sivuniqasuŋaġnagich uqalutiŋ.

⁷ Iliŋisa iḷumutun savautiŋitkaanŋa aŋaiyyuvigiluŋalu, qanuq iḷisaurrirut iñuich pitquraliaŋiññik, God-mun pitquraġiruatun iḷivḷugich.”

⁸ Jesus uqallavsaaŋaruq, Kamagiŋitkisi God-im pitquraŋi, kamagiłhaaqługich piḷġusiḷiaŋich iñuich.

⁹ Suli uqallautivsaaqługich, Ayyaksaasuġisi pitquraŋi God-im piupkaġniałhaaqługich ilivsi iḷisaurrutisi.

¹⁰ Moses piraksriiŋaruq, Suuŋiḷaġinagik aapallu aakallu. Kiñaliqaa uqallautiqaqtuaq pigiitchuamik aapamigun naagga aakamigun tuqutaksraupiaqtuq.

¹¹ Ilivsiḷiasii iḷisaurrirusi iñuk piqaġniqpan sumik ikayuutigiyumiñaġaluakkamiñik aapamiñun naagga aakamiñun, aglaan uqallausiġikpagu, Taamna Corban-guruq, sivuniqaqtuamik taamna God-im pia,

¹² ilaa pasirauyumiñaiññigiksi ikayuŋitkaluaġumigik aapaniḷu aakaniḷu.

¹³ Tainna pikavsi, God-im uqalua anniqsuutauŋaiġiksi taimaŋŋaqtatigun iḷisaurrutivsigun iḷisaurrutigikkavsigun. Suli tainnatchiñik iñugiaktuanik piusi.

Sut Salumaiḷḷisit Iñuŋmun

¹⁴ Tavra ququaganikamigich iluqaisa iñuich ilimiñun, Jesus uqallautiŋagai, Naalaġnisiŋa iluqapayauravsi, kaŋiqsiḷusiḷu.

¹⁵ Sumik piitchuq siḷataaniñ iñuum, niġikkaŋatun, isiqtuamik ilaanun piḷuksipkaġumiñaġlugu, aglaan aniaruam iñuum iḷuaniñ, uqaluusiatun piḷġusiatullu, tamatkua iñuk piḷuksipkaġumiñagaat.

¹⁶ [Taamna pisigilugu, siutiqaqtusi tusaggatiksraŋnik naalaġnisiŋa.]

¹⁷ Tavra iñuich qimakługich isiġman iglumun, iḷitchitquraŋisa apiġiŋagaat taavrumuuna uuktuutikun.

¹⁸ Aasii ilaan uqallautiŋagai, Kaŋiqsisaiñmivisivsauq? Kaŋiqsiŋitpisi? Supayaam iḷuanuktuam iñuum siḷanmiñ piḷuksiŋitkaa,

¹⁹ qanuq isiŋitchuq isumaqaġvianun aglaan aqiaġuanun, aasii anivḷuni timaaniñ. Tainna uqallakami, Jesus niġiñaqtualigai niqipayaurat.

²⁰ Suli uqallavsaaŋaruq, Sum aniruam iñuŋmiñ, pigiitchuakun uqaluan piḷġusiġiitchuavlu, piḷuksipkaġaa,

²¹ qanuq qamaŋŋamiñ iñuum isumaqaġvianiñ salapqiġaqtut piḷuktuat isumat, tigligaġniġich, iñuaġniġich,

²² allatuutit, Kaviuqqutit, pigiitchualiqutit, sagluqqutit, pitquraiḷaġniġich, killuqsraġniġich, uqautikłiġñiġich pigiitchuamik, kamasaaġun, isumalluaġiirrun.

²³ Tamatkua iluqaġmiŋ pigiitchuat qairut iñuum iḷuaniñ, aasii piḷuksipkaqługu.

Aġnam Ukpiġutaa

²⁴ Tavra tavraŋŋa Jesus aullaŋaruq nunaŋiññun Tyre-vlu Sidon-lu. Isiqami iglumun iḷisimatquyumaŋaitkaluaġaa sumiitilaani. Iñuich aasii iḷisimaŋagaat sumiitilaaŋa.

²⁵ Tavra tamaani aġnaq paniqaġniqsuaq ilitqusiqł̣uqaqtuamik tusaakami Jesus-mik, ullaŋagaa tavrauvvaa, aasii pułłuni sivuġaanun.

²⁶ Taamna aġnaq Jew-guŋitchuq, aniŋaruaq Phoenicia-mi Syria-miittuami. Ilaan apiġipiaŋagaa Jesus anitquvlugu ilitqusiqł̣uk paniŋmiñiñ.

²⁷ Tavra Jesus uqallaŋaruq ilaanun, Miqłiqtut Jew-guruat niqiksritqaaġlavut, qanuq nalaunŋaitchuq aitchuutigiruni miqłiqtum niqautaa qimmiñun.

²⁸ Tavra aġnam kiuŋagaa, Aaŋ iḷisaurrii, qimmich niġisuummiut niġġiviich ataanni miqłiqtut iḷakuŋiññik.

²⁹ Jesus uqallautiŋagaa aġnaq, Pisigilugu kiggutin, aggiiñ. Ilitqusiqł̣uk aniŋaruq paniŋniñ.

³⁰ Tavra aġnaq aikami, tautuŋagaa paniñi nalaruaq siñigviŋñi, ilitqusiqł̣uk aniŋavluni ilaaniñ.

Jesus Iłuaqsigaa Tusaalaitchuaq Uqalaitchuaġlu Iñuk

³¹ Tavra Jesus aullaŋaruq Tyre-miñ Sidon-kuaqłuni aasii tavraŋŋa tasianun Galilee-m apqusaaqługich qulit nunaaqqich.

³² Tavra iñuich qaġġisiŋagaat Jesus-mun tusiḷḷaqtuaq, iptuġiqł̣uniḷu. Aasii apiġipiaŋagaat Jesus aksiuquvlugu.

³³ Tavra Jesus asivaqtaaġutiŋagaa iñusalaŋniñ, aasii iḷiŋagai argagni siuttaŋnun, suli tivvuaqqaaqłuni, aksiuŋagaa uqaŋa.

³⁴ Tavra aaġluqłuni qiḷaŋmun, Jesus aniqsaapaŋaruq aasii uqallautivlugu, Ephphatha, sivuniqaqtuamik, aŋmaġiñ.

³⁵ Tavra tavrauvvaa siuttak aŋmaŋaruk, suli uqaŋa iłuaqsivḷuni, aasii uqaŋaruq kaŋiqsiñaqsivḷuni.

³⁶ Tavra piraksriŋagai quliaqtuaquŋił̣ł̣ugich iñuŋmun, tavra piraksrimmaġiksaaġuraġniaġmatiŋ, tainnatułhaavsaaq atqunaqługu quliaqtuaġiŋagaat.

³⁷ Iluqaġmiŋ tusaaruat kamasupiaġataŋarut, uqaqłutiŋ, Ilaa savaŋaruq supayaanik piḷḷuataqługich. Ilaan tusiḷḷaqtuat tusaallasigai, uqayuitchuallu uqallasivḷugich.