Mark 6 - Iñupiatun Mumiksat Uqalugiksuat

Jesus Ukpiġiŋitkaat Nazareth-mi

¹ Tavra Jesus aullaŋaruq tavraŋŋa, aasii tikił̣ł̣uni nunamiñun. Suli iḷitchitquraŋisa maliŋagaat.

² Tavra Jew-guruat Savaiññiŋat tikiñman, iḷisaurrirraqsiŋaruq aŋaiyyuviŋmi. Tavra iñugiaktuat tusaavlugu kamasuŋarut, uqaqłutiŋ, Sumiñ una iḷisimmatinikpa? Qanuqłuni isumattutinikpa? Qanuqłuni suli aliuġnaqtuanik piva?

³ Kaamniġuŋitpauna, Mary-m iġñiŋa, aapiyaŋa James-gum Joses-lu Judas-lu Simon-lu? Aasiisuli nayaaluŋi uvaniinŋitpat itqatigivluta? Tavra iliŋich qanuqpaaŋaliŋarut ilaanun.

⁴ Aasiiḷi Jesus uqallautiŋagai, God-im uqaqtaa nanġausiaqallaruq sumiḷiqaa, nunamiñiaglaan iḷamiñiḷu.

⁵ Tavra Jesus tavrani savakkumiñaiñŋaruq aliuġnaqtuanik, aglaan aksiuŋagai iñukitchuat naŋittuat aasii iłuaqsivḷugich.

⁶ Pisigivlugu ilaisa arguasuutaat, Jesus aliuŋaruq. Aasii Jesus kukiḷuŋaruq nunaaqqiñi iḷisaurrivḷuni.

Jesus Tiligai Qulit Malġuk Iḷitchitqurat

⁷ Tavra qaitquŋagai ilimiñun qulit malġuk iḷitchitqurat, aasii aullaqtitchaaqsivḷugich malġuullaavlugich. Ilaan suaŋŋasiŋagai ilitqusiqł̣uiyaiḷḷasivḷugich.

⁸ Suli piraksriŋagai upaluŋaiyaquŋił̣ł̣ugich sunik iglauniksramiŋnun, aglaan ayauppiuraq kisian, puukataiḷaaġlugich, taquagiḷaaġlugich, maniiḷaaġlugich maniqaġviŋmiŋni,

⁹ aluġutiqaquvlugich, aglaan malġugnik qaliġuuraqaquŋił̣ł̣ugiḷḷu.

¹⁰ Jesus uqallautivsaaŋagai, Nunaaqqiñun tikitkuvsi tukkuġiyumagisi iñuich aiyugaaqtisi aullaġataġnivsiññun aglaan.

¹¹ Aasii iñuich paġlaŋitpasi naalaġnisuŋitpatigiglu uqalusi, qimakkisigiksi taamna ini aasii piiyaġlugu avyuq isigavsiññiñ. Taamna kilgutauniaqtuq ilaiññun pisuŋisilaaŋanik tusaayugaaġiksuaq.

¹² Tavra aullaŋarut, aasii alġaqsruivḷutiŋ iñuich isumalitqiksuksraunivḷugich piḷuunmiŋniñ.

¹³ Suli anittaiŋarut iñugiaktuanik ilitqusiqł̣uŋnik, suli uqsruqtiqługich olive uqsruanik iñugiaktuat naŋittuat iłuaqsivḷugich.

Tuqutauniŋa John Paptaiqsim

¹⁴ Tavra umialik Herod tusaaŋaruq iluqaiññik tamatkuniŋa, qanuq Jesus uqautigivlugu uqaluk siaminŋaruq sumulliqaa. Iñuich iḷaŋich uqaŋarut, John Paptaiqsi aŋiruq tuqqunmiñ, Tainnaqłuni aliuġnaqtuanik piḷḷaruq.

¹⁵ Allalli uqaŋarut Elijah-univḷugu. Allallivsauq uqaŋarut, uqaqtigigaa God-im, iḷaŋatitun taipkua iŋiḷġaan kamanaqtuat uqaqtiŋisun God-im.

¹⁶ Tavrali Herod tusaakami uqallaŋaruq, John-guruq aŋiruq tuqqunmiñ, niaquiŋakkaġa.

¹⁷ Qanuq Herod tilisivḷuni aŋuyaktinik tigupkaŋagaa John, aasii qiḷiqsruivḷugu tigutaaġviŋmi pisigivlugu Herodias, aniqanmi Philip nuliaŋa, ilaan nulialiutikkani.

¹⁸ John Paptaiqsim Herod uqallautigaluamiiŋagaa, Nalaunŋaitchuq ilivich tuvaaqasiutigupku aniqarvich nuliaŋa.

¹⁹ Herodias isumamaqłuutiqaŋaruq John-mun tuqutitchumaliqsaallaan. Aglaan Herod-mik piñaiḷutaqaŋaruq.

²⁰ Qanuq Herod-gum John sivuuġagiŋagaa, iḷisimavluni iñulluatautilaaŋanik suli nalaunŋavluni iñuk, piyaqquqtaiḷiŋagaa. Herod-gum John naalaġniḷḷatuŋagaa tutqiiḷiqpaguugaluaŋŋaġmi naalaktuapayauraqamiuŋ.

²¹ Kiisaimmaa Herodias piviksraŋa nalautitpuq. Herod annivia tikiñman niqinaqutimmagich iluqaisa qaukłiich kavamauruat, aŋuyaktillu qaukłiŋich, suġalliruallu Galilee-mi.

²² Tavra Herodias pania isiqłuni kanaakkiumman, Herod iviġaktauŋaruq tuyuġmianiḷu. Aasii umialik uqallaŋaruq niviaqsiamun, Sumik piqaġukkaluaqpich? Aitchuġumiñaġikpiñ supayaamik pigisukkaġnik.

²³ Tavra unniqsuqłiiŋagaa nalupqinaiqł̣ugu, Supayaamik apiqsriguvich uvamniñ, aitchuutiginiaġiga iliŋnun, avvaġiluġaa unnii umialgunma.

²⁴ Tavra niviaqsiaq aniŋaruq, aasii uqallautivlugu aakani, Sumik piqaġugniaqpik? Tavra Herodias uqallaŋaruq, Niaquanik John Paptaiqsim.

²⁵ Tavra utiŋaruq qilamiqsruqłuni umialiŋmun, aasii apiqsrivḷuni, Aitchuŋŋa akkupak niaquanik John Paptaiqsim puggutauramun.

²⁶ Tavra umialik atqunaqłuni isumaaŋaruq, aasii unniqsuqłiisini pisigivlugu, pisigivlugiḷḷu tuyuġmiani, ilaan itigaurraqtitchumiñaiñŋagaa.

²⁷ Tavra tavrauvvaa umialik tilisiŋaruq qaunaksrimik, piraksriivḷuni John niaqua qaġġisitquvlugu. Tavra aullaqłuni, niaquiŋagaa John tigutaaġviŋmi.

²⁸ Aasii qaġġisivlugu niaqua puggutauramun, aitchuutigiŋagaa niviaqsiamun, aasiiḷi niviaqsiam aitchuutigivlugu aakamiñun.

²⁹ Tavra John iḷitchitquraŋi tusaakamiŋ taavrumiŋa, qaivḷutiŋ piŋagaat timaa aasii iḷuviqługu.

Jesus Niġipkaġai 5,000 Iñuich

³⁰ Tavra tilirauŋaruat iḷitchitqurat utiŋarut Jesus-mun, aasii quliaqtuaġutivlugu supayaanik, savaamiŋniglu, suniglu iḷisaurrutigikkamiŋnik.

³¹ Iñugiaktuat iñuich qairaġaŋarut aullaqsimmaġmiglu niġiḷḷaiqsitaallaisa Jesus-lu iḷitchitquraniḷu kiisaimmaa Jesus uqallautivai iḷitchitqurani, Aullallakta sumun iñuił̣aamun kisimġiuqtuallakkumaugut piḷaiŋaiqsiallagluta.

³² Tavra aullaŋarut umiaqtuqłutiŋ iñuił̣aamun kisimiŋ.

³³ Iñugiaktuat iñuich tautukługich aullaġmata, iḷisaġiŋagaich kitkuutilaaŋat. Tavraasii iñuich aullaaŋarut iluqaiññiñ nunaaqqiñiñ aqpamik qutaaguqłutiŋ, aasii tikitqaaqłutiŋ inimun sivulikługich Jesus-lu iḷitchitquraniḷu.

³⁴ Jesus niukami, tautuŋagai iñusalaich suli nagliksratchaŋaruq iliŋiññik, qanuq imnaisun inŋarut munaqsraitchuatun. Tavra ilaan iḷisautirraqsiqpaŋagai.

³⁵ Tavra uvlukłiaqsimman iḷitchitquraŋisa ullakługu uqallautiŋagaat, uvlukłivigruaqtuq nunaaqqiiñmiuq maani.

³⁶ Aullaqtitkich iñuich, aullaġlutiŋ nunaaqqiñun qanipayaaqtuanun tauqsiġumaut niqiksramiŋnik.

³⁷ Jesus kiuŋagai, ilivsi niġipkaqsigik. Ilaisali apiġiŋagaat, Aullaquvisigut tauqsiġiaquluta 200 taalatun niqiksraŋiññik aasii niġipkaġlugich?

³⁸ Jesus apiġiŋagai, Qavsiñik punniġutiqaqpisi? Tautugiaqsigik. Tavra iḷitchuġianikamiŋ uqallaŋarut, Tallimanik iqallugniglu malġugnik.

³⁹ Jesus uqallautiŋagai iḷitchitqurani, Qavsiuttaaġlugich aquvititquvlugich iñuich suŋaaqtuanun iviŋnun.

⁴⁰ Tavra aquptiŋarut qavsiuttaaqłutiŋ, tallimakipiaguttaqłutiglu, malġukipiaq quliguttaqłutiglu.

⁴¹ Tavra tiguanikamigich tallimat punniġich iqalluglu, aaġluŋaruq qiḷaŋmun, aasii quyyavigivlugu God. Aasii avguqqaaqługich punniġich, qaiñŋagai iḷitchitquramiñun, niqłiqsuutigitquvlugich iñuŋnun. Iqalluk autaaŋammigik iluqaiññun.

⁴² Iluqaġmiŋ niġiŋarut, niqinŋuġataqłutiŋ.

⁴³ Tavra iḷitchitqurat katitchiŋarut qulit malġugnik aguummaŋnik siḷiviłługich iḷakunik punniġnik iqallugniglu.

⁴⁴ Aasii taapkua niġiruat 5,000-guŋarut aŋutit.

Jesus Pisuaqtuq Immam Qaaŋagun

⁴⁵ Tavra tavrauvvaa Jesus ikitqupiaŋagai iḷitchitqurani umiaqpauramun ayutquvlugich Bethsaida-mun, tatchim taaguŋatchianun, ilaa iñuŋnik aullaqtitchipkaqtilluni.

⁴⁶ Tavra iñuich aullaqtitanikamigich, ilaa aullaŋaruq iġġimun aŋaiyyuyaqtuqłuni.

⁴⁷ Tanuġaksimman, umiaqpauraq qitqanuiḷiŋaruq tatchim, aasii Jesus kisimġiuqłuni nunami.

⁴⁸ Tautuŋagai iḷitchitqurani siġġaqiruat ipuqsruqłutiŋ anuġi arguġiannaqłuni. Tavra uvluyasimman ilaan ullaŋagai pisuaqłuni immam qaaŋagun. Qaaŋiqsaġumaruatun piŋagai.

⁴⁹ Tavra tautukamirruŋ pisuaqtuaq qaaŋagun immam, ilitqusiunasugiŋagaat, aasii nipaalavlutiŋ.

⁵⁰ Qanuq iluqaġmiŋ tautuŋagaat, aasii iqsitchapiaġataŋarut. Tavra tavrauvvaa ilaan uqallautiŋagai, Quviatchaktitausitchi. Uvaŋauruŋa. Iqsiñasi.

⁵¹ Tavra ikiŋaruq umiaqpauramun, suli anuġaiŋaruq. Tavra iḷitchitquraŋi kamanniupiaġataŋarut sivuniksraqsiḷḷaiŋarut,

⁵² qanuq kaŋiqsiŋaitkaat sivuniŋa aliuġnaqtuaq savaaŋa punniġnik, ukpiġilguił̣ł̣ugu.

Jesus Iłuaqsigai Naŋittuat Gennesaret-mi

⁵³ Tavra ikaaganikamiŋ, tikiñŋarut nunaŋannun Gennesaret aasii tulakłutiŋ nunamun.

⁵⁴ Tavra niuganiŋmata umiaqpauramiñ, tavrauvvaa iñuich iḷisaġiŋagaat Jesus.

⁵⁵ Aasii aqpanŋarut iluqaagun nunakun sumulliqaa, qaġġisivḷugich nallaviksuummaisa naŋittuat, tusaaraġikamiŋ sumiitilaaŋanik.

⁵⁶ Tavra sumupayauraq Jesus tikiñman, nunaaqqiñun, naagga iniqpaŋnun, naaggaunnii nautchialiqirinun, iñuich naŋittuat iḷiŋagaich apqutinun, aasii apiġipiaġataqługu aksiullagukługuunni annuġaaŋan siñiġutaa. Aasii iluqaġmiŋ aksiuktuat ilaanik iłuaqsiŋarut.