Mark 5 - Iñupiatun Mumiksat Uqalugiksuat

Jesus Iłuaqsigaa Iñuk Iñugiaktuanik Ilitqusiqł̣ulik

¹ Tavra ikaaŋarut taaguŋatchianun tatchim Galilee-m, nunaŋannun Gerasenes.

² Aasii niumman Jesus umiaqpauramiñ, tavrauvvaa paaŋagaa iñuum ilitqusiqł̣uqaqtuam iḷuviġniñ.

³ Taamna iñuk iñuuniqsuaq akunġanni iḷuvviviich, aasii kialiqaa qiḷiqsruiḷaiññiġaa, kalimñanikunnii.

⁴ Qanuq ilaa akulaił̣ł̣ugu qiḷiqsruigaluaġaġniġaat kalimñanik isigaŋigullu tayaġniŋigullu. Kalimñat kiktuġaaġaġniġai, suli kalimñat isigagmiñiittuat kanuqqivḷugich. Iñulimaam ittuayusipkalaiññiġaa.

⁵ Aasii ataramik unnuamiḷu uvlumiḷu qimialuŋniitkayugniqsuq iḷuvviviŋniḷu nipaalavluni, kiḷḷiaqłuni ilimiñik uyaġagnun.

⁶ Tavra ilaan tautukamiuŋ Jesus uŋasiñun, aqpanŋaruq, aasii pułłuni sivuġaanun.

⁷ Suli nipaalaqpaŋaruq, Jesus, Iġñiŋa sapiġñaġniqsrauruam God-im, suniaqpiŋa? Apiġipiaġikpiñ God-ikun, tatavsaġnaŋa.

⁸ Qanuq Jesus uqallautiŋagaa, Ilitqusiqł̣uuk anniiñ iñuŋmiñ.

⁹ Suli Jesus apiġiŋagaa, Sumik atiqaqpich? Tavra kiuŋagaa, Uvaŋa atiġa Legion, qanuq iñugiaktugut.

¹⁰ Tavra ilitqusiqł̣uqaqtuam apiġipiaġataŋagaa Jesus aullaqtitquŋił̣ł̣ugich ilitqusiqł̣uich tamattumaŋŋa nunamiñ.

¹¹ Aasii tuttuqłusalaich tavraniinniqsut qaniłłutiŋ qimialuŋni niġiñiaqtuat.

¹² Tavra ilitqusiqł̣uich iluqaġmiŋ apiġipiaġataŋagaat, Tillisigut tuttuqługnun, isiġumagivut.

¹³ Tavra tavraŋŋa Jesus aullaqtinŋagai. Aasii ilitqusiqł̣uich aniŋarut iñuŋmiñ isiqłutiŋ tuttuqługnun. Tavra tuttuqłuich paŋaliŋarut suamavlutiŋ anmun qutaŋŋiaġiksuakun immamun, aasii ipivlutiŋ. Iñugiaktilaaqaqpalliŋarut 2,000-tun.

¹⁴ Tavrali qaunaksriruat tuttuqługnik pigruŋarut, aasii quliaqtuaġivlugu taamna iniqpaŋmi nunaaqqiñiḷu. Tavra iñuich qaiŋarut tautugiaqługu suna pisilaaŋanik.

¹⁵ Tavra ullaaŋagaat Jesus, suli tautukługu ilitqusiqł̣uqaŋaruaq iñugiaktuanik, aquppiruaq annuġaaŋavluni qauriŋavluniḷu. Tavra iliŋich iqsitchaŋarut.

¹⁶ Aasii tamatkua tautuktuat quliaqtuaġutiŋagaich iñuich, qanuq pirauŋatilaaŋanik taamna ilitqusiqł̣uqaŋaruaq, tuttuqłuktigullu.

¹⁷ Tavra apiġipiaŋagaat Jesus aullaquvlugu nunamiŋniñ.

¹⁸ Tavra ikiaqsimman umiaqpauramun, taavruma ilitqusiqł̣uqaŋaruam apiġipiaŋagaluaġaa nayuġukługu.

¹⁹ Tavra Jesus pipkaŋaitkaa, aglaan uqallautiŋagaa, Aggiiñ avilaitqatiŋnun, aasii quliaqtuaġutilugich qanuq kamanaqtigiruanik Atanġum piraŋiñik iliŋnun, suli naglikkutiqaŋatilaaŋanik iliŋnun.

²⁰ Tavra iñuk aullaŋaruq, aasii quliaqtuagaqsivḷuni qulinun nunaaqqiñun qanuq kamanaqtuanik Jesus savaaġikkaŋiñik ilimiñun. Aasii iluqaġmiŋ iñuich kamasuŋarut.

Jairus Pania, Aġnaġlu Aksiuktuaq Jesus Annuġaaŋanik

²¹ Tavra Jesus ikaatqianiŋman umiaqpaurakun taaguŋatchiġmun, iñusalaich katinŋarut ilaanun. Aasii ilaa tatchim siñaaniinŋaruq.

²² Tavra qaiŋaruq iḷaŋat umialiŋnaŋat Jew-guruat aŋaiyyuviata, Jairus-mik atilik. Aasii tautukamiuŋ Jesus punŋaruq sivuġaanun.

²³ Aasii qiññuaqtupiaŋaruq uqaqłuni, Paniuraġa amma tuquaqsiuraqtuq. Qaiḷutin aksiugiapiaqugiga iliŋnun iłuaqsitquvlugu iñuuyumauq.

²⁴ Tavra Jesus piqasiŋagaa. Suli iñugaaġruich malikługu tatiŋagaat.

²⁵ Tavra aġnaq suniġluqaqtuaq auŋmik qulit malġugni ukiuni tamaaniinŋaruq.

²⁶ Taamna aġnaq nagliksaaqtuaq sapunniaqtiqaŋagaluaqtuq iñugiaktuanik taaktinik. Ilaa maniiġutiŋagaluaqtuqunnii nakuusipayaaŋaitchuq, aglaan pigiiḷisaiññaŋaruq.

²⁷ Tusaaganiŋavluni Jesus-mik, qaiŋaruq tatiruatigun tunuaniñ, aasii aksiukługu Jesus annuġaaŋa,

²⁸ isumavluni, aksiuksiññaġupkich unnii annuġaaŋi, iłuaqsiyumiñaqtuŋa.

²⁹ Tavra aksiuŋagaa Jesus annuġaaŋa, aasii aunaaqsruŋaiqł̣uni tavrauvvaa. Timimiñi iḷitchuġigaa iłuaqsisilaani naŋirrunmiñiñ.

³⁰ Tavra Jesus, tavrauvvaa iḷitchuġivluni ilimiñiñ suaŋŋan aullaqtilaaŋanik, kiŋiaŋaruq tatiruani, aasii uqallakłuni, Kia aksiukpagich annuġaatka?

³¹ Tavra iḷitchitquraŋisa kiuŋagaat, Tautukkitin iñusalaich tatiruat iliŋnun. Summan aasii apiqsrivich kimun aksiuŋmagaaqpich?

³² Tavra alaqiñŋaruq avanmun tautugniaqługu kimun aksiuktilaani.

³³ Tavra aġnaq sivuuġallaġmi uulillaġmiḷu, qaiŋaruq Jesus-mun iḷisimavluni iluaqsisilaamiñik, aasii pułłuni sivuġaanun, uqautivlugu iluqaanik iḷumun ittuamik.

³⁴ Tavra ilaan uqallautiŋagaa, Paniuruatiin, ukpiġurvich iłuaqsipkaġaatin. Aullaġiñ tutqiksiḷutin, suli iłuaqsiraulutin naŋirrutiŋniñ.

³⁵ Jesus uqaġniaqtillugu, qaiŋarut iḷaŋich kivgat Jairus igluaniñ aasii uqallautivlugu, Paniiñ tuquaniktuq. Iḷaksiaŋaiġuŋ Iḷisaurri.

³⁶ Tavra Jesus suliqutigisuŋaġnagu uqallautaat, uqallautiŋagaa umialiŋnaq, Iqsiñak, ukpiqsiññaġiñ.

³⁷ Tavra Jesus iñuŋmun maliktinŋaitchuq, aglaan Peter-mun James-mullu John-mullu aniqataanun James.

³⁸ Tavra ilaa tikiñŋaruq igluanun umialiŋnaŋata aŋaiyyuvium, aasii tautukługich tuavaalaruat, tamatkualu qiaqpaktuat.

³⁹ Tavra isiqami ilaan uqallautiŋagai, Summan inna pivisi qiavisiḷu? Niviaqsiaġruk tuquŋaitchuq. Siñiksiññaqtuq.

⁴⁰ Tavra iglautigiŋagaat kipagivlugu. Aasii ilaan anitanikkamigich iluqaisa, piŋagik aapaŋalu aakaŋalu niviaqsiaġruum, taapkualu piŋasut iḷitchitqurani, aasii isiqłutiŋ niviaqsiaġruum irvianun.

⁴¹ Tavra Jesus tiguŋagaa niviaqsiaġruk argaŋigun, aasii uqallautivlugu, Talitha koum, sivuniqaqtuamik, Niviaqsiaġruuk, uqallautigikpiñ, makittin.

⁴² Tavra tavrauvvaa niviaqsiaġruk makinŋaruq, aasii pisuaqłuni. Ukiuqaŋaruq qulit malġugnik. Tavra kamasupiaġataŋarut iñuich.

⁴³ Tavra uqautipiaŋagai iñuŋmun iḷitchuġitquŋił̣ł̣ugu. Aasii niġipkaquŋagaa.