Mark 4 - Iñupiatun Mumiksat Uqalugiksuat

Uuktuun Nautchiaksriqirikun

¹ Tavra Jesus iḷisaurrisatqiŋaruq tatchim siñaani, aasii tavruŋa iñusalaich katinŋarut ikillasiḷaallaan umiaqpauramun aquviłłuni. Aasii iluqaġmiŋ iñusalaich siñaaniinŋarut tatchim.

² Tavra ilaan iḷisautiŋagai iñugiaktuanik sunik uuktuutitigun. Aasii iḷisaurrunmiñi uqallautivlugich,

³ Naalaġnisiŋa. Nunaliqiri aullaqtuq kanġaksruiyaqtuqłuni nautchiaksranik palauvaksraġuġniaqtuanik.

⁴ Tavra kanġaqsruipkaqtillugu iḷaŋich kataŋarut apqutinun, aasii tiŋmiat qaivḷutiŋ niġiŋagaich.

⁵ Iḷaŋich aasii kataŋarut uyaġauruamun nunamun nunaqapiaŋitchuamun. Tavrauvvaa naurut, qanuq mapturuamik nunaitchuq.

⁶ Siqiñiq salapqiġman maŋŋuił̣ł̣utiŋ, panaqłuŋagai aasii tuquvlutiŋ.

⁷ Aasii iḷaŋich nautchiaksrat kataŋarut akunġannun kakiḷḷaġnaqtuat nauruat, aasii kakiḷḷaġnaqtuat nauvlutiŋ nagguviksraiŋagaich nautchiaksrat.

⁸ Allat kataŋarut nunagiksuamun, aasii nauvlutiŋ palauvaksrat iñugiaksivḷutiŋ. Iḷaŋich nauŋarut iñuiññaq qulinik palauvaksranik, iḷaŋich aasii piŋasukipiamik, aasii iḷaŋich tallimakipiamik.

⁹ Tavra Jesus uqallautiŋagai, Siutiqaqtusi tusaggatiksraŋnik, naalaġnisiŋa.

Sivuniŋat Uuktuutit

¹⁰ Tavra Jesus kisiŋŋuġman, tamatkua avataaniittuat piqatigivlugich qulit malġuk iḷitchitqurat apiġiŋagaat uuktuutikun.

¹¹ Tavra ilaan uqallautiŋagai, God-im kaŋiqsipkaŋagaa ilivsiññun kaŋiqsiñaiñŋaruaq atanniqsimmatini iñuŋnun. Aglaalli allat iñuich tusaqsraġigaat uuktuutitigun.

¹² Tamatkua iñuich taŋŋiġaich Isaiah-m uqaluŋi Bible-ni, “Tautukkaluaqłutiŋ iḷisaqsriḷaitchut, tusaagaluaqłutiŋ kaŋiqsiḷaitchut; Kaŋiqsiñiġumiŋ, saannasugalutiŋ God-mun, aasii ilaan suliqutigiŋaiġḷugich itqaumayumiñaiġḷugich piḷuutiŋich.”

Jesus Sivunniuġaa Uuktuun Nunaliqirikun Nautchirriiruakun

¹³ Jesus uqallautiŋagai, kaŋiqsiŋitkuvsiuŋ una uuktuun, qanuġlusi kaŋiqsiñiaqpisigik uuktuutipayaat?

¹⁴ Nunaliqiri kanġaqsruimmatun nautchiaksranik palauvaksraġuġniaqtuanik, tainnatun uqalua God-im alġaqsruutauruq iñuŋnun.

¹⁵ Nautchiaksrat iḷaŋich kataŋmatun apqutinun, tainnatuttauq iñuich iḷaŋich tusaaruat uqaluanik God-im siqquqsimmiraqtut. Tusaaganipqaġmarruŋ uqaluk Satan-gum piiguipkaġai qilamik tusaakkaŋannik.

¹⁶ Allalli iñuich ittut nautchiaksratun kataktuatun uyaġauruamun nunamun. Tusaapqauraqamirruŋ uqaluk, quyyatigivlugu akuqtuġaat.

¹⁷ Aglaan akuqtuaġiŋiññiġaat uqaluk naamasiḷugu tuniqsimmatiksraqtiŋ, nautchiaksratun maŋŋuqavigruaŋitchuatun iłłutiŋ. Tavraasii iłuiḷḷiuġutit nagliksaaqtirrusiallu, qaimmata uqaluk pisigivlugu, iliŋich tavrauvvaa nikatchaktut aasii qapiqłutiŋ.

¹⁸ Allalli iñuich ittut nautchiaksratun kataktuatun akunġannun kakiḷḷaġnat nauruat. Tamatkua iñuich tusaagaluaqtuat uqaluŋmik,

¹⁹ uŋiarrisit mattumuuna iñuuniaġnikun, piviuttaqsriñġuvlu suġaliġnik, allallu qanusipayaat kipiġniuġutit nagguviksraiġaat uqaluk, aasii iliŋisa iñuusiŋich allaŋŋuqtauŋił̣ł̣utiŋ.

²⁰ Aasiiḷi allat iñuich ittut nautchiaksratun kataktuatun nunagiksuamun. Iliŋisa tusaagaat uqaluk akuqtupiaġataqługu, aasii iñuusiŋich allaŋŋuqtauvlutiŋ, nautchiaksratun kataktuatun nunagiksuamun, aasii naurivḷuni palauvaksranik, iḷaŋiññik iñuiññaq qulitun, iḷaŋich piŋasukipiatun, suli iḷaŋich tallimakipiatun.

Qulliq Ataani Utkusium

²¹ Qulliq inimuutisuuvarruŋ matusukługu utkusiŋmik, naagga atautitchukługu siñigviŋñun? Naumi. Iḷisuugaat qulliqaġviŋmun.

²² Sunapayaaq matutuqtuaq paŋmapak sivunniqsauŋaruq salapqiġumaaqługu taimanigu, suli sunapayaaq iḷisimapkaqtauŋitchuaq paŋmapak sivunniqsauŋaruq iḷitchuġipkaqtauyumaaqługu iñupayaanun taimanigu.

²³ Taamna pisigilugu, siutiqaqtusi tusaggatiksraŋnik naalaġnisiŋa.

²⁴ Jesus uqallautivsaaŋagai, Naalaġnimmaġiksaaqsiuŋ tusaakkaqsi. Qanutun kaŋiqsisilaaqsi aktilaaqaqtuq naammaŋatun naalaġniḷḷuataqtilaavsi, suli kaŋiqsisaiññaġniaqtusi.

²⁵ Qanuq iñuk naalaġniḷḷuataqtuaq kaŋiqsipkavsaaqtitauniaqtuq, aasiiḷi iñuk naalaġniḷḷuatalaitchuaq tammaiñiaqtuq kaŋiqsił̣auraġaluakkamiñik.

Uuktuun Nauniŋagun Nautchiaksram

²⁶ Suli Jesus uqallavsaaŋaruq, God-im atanniqsimmataa iñuŋnun arriliñaġumiñaqtuq nunaliqirimun, palauvaksranullu nautchirriutikkaŋiñun.

²⁷ Nunaliqiri siñiksaġaktuq unnuaġman, aasii itiqami uvluġman kukiḷuaqsivḷuni. Aasiivsauq tainna pipkaqługu, palauvaksrat nauyugaqtut nakautchivḷutiŋ. Nunaliqirim nalugai qanuqłutiŋ nautilaaŋat.

²⁸ Nunam naupkaġai iñugiaksipkaqługich palauvaksrat atautchimiñ palauvaksramiñ. Qitutuuraq nakautaq nausaqqaaġaqtuq, nakautami nauraqtuq puuŋa palauvaksram, aasii iḷuani puuŋan nauraksraiqsuat palauvaksrat itkayuktut.

²⁹ Palauvaksrat nauganigluataġmata iñuk kivriñmiñik kivrisaġaqtuq palauvaksranik qanuq kivrivikaaq tikitchuq.

Uuktuun Nautchiaksrakun Atiqaqtuakun Mustard-mik

³⁰ Tavra Jesus uqallaŋaruq, Sumun arriḷiñiaqpigu God-im Atanniqsimmataa iñuŋnun? Sumik uuktuusiġñiaqpigu nausaiññaġniŋa?

³¹ Arriqaqtuq mustard-mik nautchiaksramik, mikiniqsrapiaġataŋannik nautchiaksrat. Nunaliqirim nautchirriutigaa nunamun.

³² Qakugulimman nauruq taaniqtusił̣haaqłuni nauriapayaaniñ. Qisiqsiutiġluksivaił̣ł̣uni tiŋmiat ugluliuġvigiŋagaich qisiqsiutiŋi.

³³ Tavra Jesus alġaqsruituiññaŋaruq iñuŋnun, atuqłuni iñugiaktuanik uuktuutinik allaniglu taapkunatun. Uqautiŋagai kaŋiqsiyumiñaqtilaaŋatiktun.

³⁴ Uqautilaiñŋagai uuktuutaiḷḷuni. Aglaan kisiŋŋuqamiŋ supayaat uqautini sivunniuġaġigai iḷitchitquramiñun.

Jesus Quunniġuqtitkaa Imaq

³⁵ Tavra taavrumanisuli uvlumi, unnuksaġman, Jesus iḷitchitqurani uqallautiŋagai, Ikaaqta auŋatchianun tatchim.

³⁶ Tavra qimaŋagaich iñusalaich, aasii aullautiŋagaat Jesus umiaqpauramun ikianiŋman. Tavraptauq tuvaaqatiqaŋammiut allanik umiaqpauranik.

³⁷ Tavra anuqqakpaŋaruq, suli malgich iksruġaŋagaat umiaqpauraq, siḷivitkaqsivḷugu.

³⁸ Tavra Jesus aquaniinŋaruq umiaqpauram, siñikłuni akisiqaqłuni. Aasii itiqsaŋagaat, uqallautivlugu, Iḷisaurrii, suliqutigiŋitpiuŋ ipigupta?

³⁹ Tavra makinŋaruq, suli suaŋagaa anuġi uqallakłuni, Anuġaiġiñ, uqallakłuniḷu immamun, Quunniġuġiñ. Tavra anuġaiŋaruq, quunniġuqłuni.

⁴⁰ Tavra ilaan uqallautiŋagai, Summan iqsisuvaitpisi? Qanuqimña ukpiġutaitpisi?

⁴¹ Tavra iliŋich aliuŋarut atqunaqłutiŋ, suli uqaqłutiŋ avanmun, Qanusiq una Iñuk? Anuġimunnii immavlu kamagillavatku.