Mark 2 - Iñupiatun Mumiksat Uqalugiksuat

Jesus Iłuaqsigaa Aulalaitchuaq Iñuk

¹ Tavra Jesus utitqiŋaruq Capernaum-mun uvluġaaġruurat pianiŋmata. Aasii tusaaŋaniġaat aiŋatilaaŋanik.

² Tavra iñugiaktuat katinŋarut atautchimun, sumikunnii iniksraiġutivlutiŋ, paakkaluamiunnii. Tavra alġaqsruiŋaruq ilaiññun.

³ Tavra iñuich qaiŋarut ilaanun, qaġġisivlugu naŋittuaq avatiŋi tuquŋavlutiŋ, akigaqługu sisamat iñuich.

⁴ Aasii qaninŋaġumiñaiññiqamirruŋ Jesus tativlutiŋ iñuich, qiḷaiŋagaat iglum qiḷaŋa nalaagun Jesus. Tavra qiḷaiganikamirruŋ niŋinŋagaat nalaruaq ikuvġamiñi aulasuił̣ł̣uni.

⁵ Jesus puttuqsrikamiuŋ ukpiġutaat, uqallautiŋagaa aulalaitchuaq, Iġñiiŋ, piḷuutitin suliqutigiŋaiqsaurut itqaumayumiñaiqł̣ugich.

⁶ Iḷaŋich iḷisaurrit pitquranik aquppiruat tavrani isummatiqaŋarut inna,

⁷ Qanuqłuniuna uqaġumiñaqpa tainna God-itun? Kiñaliqaa suliqutigiŋaiqsiyumiñaitchuq piḷuutinik itqaumayumiñaiġḷugich aglaan God kisimi.

⁸ Tavra tavrauvvaa Jesus puttuqsrikami tainna isumaniġmata, uqallautiŋagai, Summan isumavisi tamatkuniŋa?

⁹ Nalliak siġḷiġnaitpa uqallaksaqtuni, Piḷuutitin suliqutigiŋaiqsaurut iliŋnun, naaggaunnii uqallaktuni, Makittin, tigulugich ikuvġatin, pisuaġiñ?

¹⁰ Tavraasii ukpiġnaqsiḷiġniaġiga ilivsiññun Iġñiŋa Iñuum ataniġnaqutiqaqtilaaŋanik nunami suliqutigiŋaiġumiñaqługich piḷuutit. Ilaan aasii uqallautiŋagaa aulalaitchuaq iñuk,

¹¹ Uqallautigikpiñ, Makittin. Tigulugich ikuvġatin, aggiiñ iglugnun.

¹² Tavra tavrauvvaa ilaa makinŋaruq, tiguvlugich ikuvġani, aniŋaruq takkuanni iluqaġmiŋ. Iluqaġmiŋ kamasuŋarut, suli nanġaŋagaat God uqaqłutiŋ, Qaŋaunnii innatchimik tautuŋaitchugut.

Jesus Ququaġaa Levi

¹³ Tavra Jesus saavitqiŋaruq tatchim siñaanun, aasii iluqaġmiŋ iñusalaich ullautiŋarut ilaanun. Tavrani ilaan iḷisautiŋagai.

¹⁴ Pisuallaġmi Jesus tautuŋagaa tax-nik katitchiri, Levi iġñiŋa Alphaeus, aquppiruaq akiḷiiviŋmi tax-iñik. Jesus uqallaŋaruq ilaanun, Maliŋŋa. Levi-m makiłłuni maliŋagaa Jesus.

¹⁵ Qakugulimman Jesus niġiyaqtuŋaruq Levi-m igluanun. Tavrani iñugiaŋarut tax-nik katitchirit piḷuusiqirillu maliktuat Jesus-mun, aasii iḷaŋisa niġiñiaqasiqł̣ugu ilaa iḷitchitquraŋiḷu.

¹⁶ Tavra iḷisaurrit pitquranik Pharisee-guruat tautukługu niġiqatiqaqtuaq tax-nik katitchirinik, piḷuusiqiriniglu, uqallautiŋagaich iḷitchitquraŋi, Qanuqłuni niġiqatiqaqpa imiqatiqaqpalu tax-nik katitchirinik piḷuusiqiriniglu?

¹⁷ Jesus tusaakamiuŋ taamna, uqallaŋaruq ilaiññun, Surruitchuat taaktituaksraitchut, aglaan naŋittuat. Qaiŋaitchuŋa ququaġiaġlugich nalaunŋaruat iñuich aglaan piḷuusiqirit isumalitqiquvlugich.

Apiqqun Niġiḷaiḷaġnikun Aŋaiyyuuqłuni

¹⁸ Iḷaanni qakugumman iḷitchitquraŋi John Paptaiqsim Pharisee-ḷḷu niġiḷaitkayuktut aŋaiyyuuqłutiŋ. Iñuich iḷaŋich ullautiŋarut Jesus-mun aasii apiġivlugu, Summan iḷitchitquraŋi John Paptaiqsim Pharisee-ḷḷu iḷitchitquraŋich niġiḷaitchuuvat aŋaiyyuuqłutiŋ, aasii ilivich iḷitchitquratin tainna piḷaił̣ł̣utiŋ?

¹⁹ Jesus kiuŋagai, Isummatigivisigik tuyuġmiat katirrusiqiruani niġiḷaitquvlugich? Sivisutilaaŋatun uiksrautim nayuutiniŋata iliŋiññun, niġiḷaiññiaŋitchut.

²⁰ Aglaan uiksrautim aullaurrauviksraŋa tikitchumaaqtuq, aasii taimanigu niġiḷaitpaallugniaqtut.

²¹ Iñuk iḷaaqtuutiqalaitchuq iḷiġniġmik nutauruamik ugliŋaitchuamik ukił̣haamik annuġaaluŋmun, qanuq nutauruaq iḷiġniq iḷaaġutauruaq ugligluni aligaaġutiniaqtuq utuqqauruamiñ annuġaamiñ, aasii allaq aglił̣haaġluni.

²² Iñuum suli immiutilaitkaa nutauruaq wine puuġruanun, qanuq nutauruam wine-gum puvlagluni qaaġniaġaa puuġruaq, aasii wine maqiluni asiñun, aasiiḷi puut maqulutiŋ. Aglaan nutauruaq wine puugaksraupiaqtuq nutauruanik puunik.

Apiqqun Jew-guruat Savaiññiŋatigun

²³ Savairvianni Jew-guruat, Jesus pisuaŋaruq palauvaksranik nautchiaqaġvikun, aasii iḷitchitquraŋi iglaullaġmiŋ nutchugairraqsiŋarut palauvaksranik.

²⁴ Pharisees uqallautiŋagaat, Tautukkich. Iḷitchitquratin navgirut Savaiññikun pitquraptignik.

²⁵ Jesus kiuŋagai, Taiguaġiŋaitpisiuŋ qaŋaunnii qanuq David piŋatilaaŋa, ilaalu iñuŋniḷu piiḷḷiuliqł̣utiŋ kaaksiuliqamiŋ?

²⁶ David isiŋaruq igluanun God-im aasii niġivḷugu punniq aitchuutauŋaruaq God-mun. Taamna piŋaruq Abiathar aŋaiyyuliqsiqpaumman. Pitqurat uqaluatigun aŋaiyyuliqsiqpaich kisimiŋ niġiyumiñakkaŋat taamna punniq.

²⁷ Jesus suli uqallaŋaruq, Savaiññiq savaaguruq anniqsuqsaqługu iñuk, iñuk savaaguŋaitchuq pisigilugu Savaiññiq.

²⁸ Iġñiŋa Iñuum ataniġnaqutiqałhaaqtuq pitquraniñ aŋalatchiruaniñ iñuŋnik Savaiññiġmi.