Mark 16 - Iñupiatun Mumiksat Uqalugiksuat

Jesus Aŋiruq Tuqqunmiñ

¹ Tavra Jew-guruat Itchaksriġmata Savaiññiŋat qaaŋiġman, Mary Magdalene Mary-ḷu aakaŋa James Salome-ḷu tauqsianiŋaniqsut tivraġiksautinik iḷuvviuġutikaanik, iḷuvviuġutigisukługich Jesus timaanun.

² Tavra uvlaatchaurami Savaitchuani, iḷuvviviŋmuŋarut siqiñiq nuisaġataġman.

³ Taapkua aġnat uqaŋarut ilimiŋnun, Kia aksraktitchisiniaqpatigut uyaġagmik paaŋaniñ iḷuvvivium?

⁴ Taamna uyaġak aŋitaktuaŋaruq. Tavra qiviaqamiŋ, tautuŋagaat uyaġak aksraktinŋaruaq.

⁵ Tavra isiqłutiŋ iḷuvviviŋmun, tautuŋagaat nukatpiaq aquppiruaq taliqpiata tuŋaani, annuġaaqaqłuni akuqturuamik qatiqtuamik, aasii iqsitchakłutiŋ.

⁶ Tavra ilaan uqallautiŋagai, Iqsitchagnasi. Ivaġiksi Jesus Nazareth-miu, kikiaktuurrauŋaruaq, aŋiŋaruq. Uvaniinŋitchuq. Tautuksiuŋ uvva inaa iḷuviġmarruŋ.

⁷ Aullaqsiññaġitchi uqallautiyaqtuqsigik iḷitchitquraŋi Peter-lu ayuniḷugu Galilee-mun. Taamani tautugniaġiksi, uqallausiatun ilivsiññun.

⁸ Tavra aniŋarut qilamik, suli pigruŋarut iḷuvviviŋmiñ. Iqsitchakpaił̣ł̣utiŋ uuliksiŋarut, quliaqtuaġniugaŋaitchullu supayaamik kimulliqaa iqsitchakpaił̣ł̣utiŋ.

Jesus Niptaqtuq Mary Magdalene-mun

⁹ [Tavra Jesus aŋikami uvlaatchaurami Savaiññiġmi, niptaqqaaŋaruq Mary Magdalene-mun, ilitqusiqł̣uikkamiñun tallimat malġugnik.

¹⁰ Aasii Mary-m aullaqłuni uqallautiŋagai tuvaaqatigiŋakkaŋi Jesus. Taapkua kiŋuvġuŋarut qiavlutiglu.

¹¹ Tavrali iḷitchitqurat tusaakamiŋ iñuunivḷugu tautuŋnimmagulu, ukpiŋaitchut.

Jesus Niptaqtuq Malġugnun Iḷitchitquraŋnun

¹² Taavruma aquagun Jesus niptaŋaruq allauvluni malġugnun iḷaŋiññun, pisuaqtillugik nunaaqqimuksaqłutiŋ.

¹³ Tavra iliŋik utiŋaruk aasii quliaqtuaġivlugu Jesus allanun. Naaggasuli ukpiġiŋaitkaich.

Jesus Niptaqtuq Qulit Atautchimun Iḷitchitquranun

¹⁴ Aquvatigun Jesus niptaŋaruq qulit atautchimun niġiñiaqtillugich. Aasii suaŋagai arguasuutaatigun ukpiġuŋirrutaatigullu, qanuq ukpiġiŋaitkaich tautuŋaruat ilaanik aŋianiŋman.

¹⁵ Tavra ilaan uqallautiŋagai, Aullaġitchi nunapayaanun, aasii alġaqsruutigilugu tusaayugaaġiksuaq iñupayaanun.

¹⁶ Iñuk ukpiqtuaq tusaayugaaġiksuamik suli paptaiqsauruaġlu annaurrauniaqtuq, aglaan ukpiŋitchuaq suksraunġiqsauniaqtuq.

¹⁷ Tamatkua ukpiqtuat piqaġniaqtut makkuniŋa nalunaiñŋutaŋiñik suaŋŋatim. Anittaġniaġaich ilitqusiqł̣uich uvaŋa atipkun, uqaġniaqtullu uqautchiñik nalukkamiŋnik,

¹⁸ tiguniaġaich nimiġiat tuqunaqaqtuat, suli imiġaluaġumiŋ qanusiḷimaamik tuqunamik, anniġumiñaitkai.

Jesus Mayuurrauruq Qiḷaŋmun

¹⁹ Tavra Atanġum Jesus uqaqatigianikamigich iḷitchitqurani, mayuurrauŋaruq qiḷaŋmun aasii aquviłłuni taliqpiata tuŋaanun God-im.

²⁰ Iḷitchitqurat aullaqłutiŋ alġaqsruiŋarut sumiḷiqaa. Aasii Atanġum savaqatigiŋagai ukpiġnaqsiḷiqługu alġaqsruiñiŋat iḷumun itilaaŋanik aliuġnaqtuatigun savaaŋisigun.] Amen.