Mark 14 - Iñupiatun Mumiksat Uqalugiksuat

Sivunniuġun Tuqutchukługu Jesus

¹ Tavra malġuk uvluk pianikpaŋnik tikitchumaaŋaruq Niqinaqivia Itqautim qulaurrusiqinikun iñuich niġimmata puvlaksautaitchuamik punniġmik. Tavralivsauq tainnaiḷimman aŋaiyyuliqsiqpaiḷḷu iḷisaurriḷḷu pitquranik piviksraqsiuŋarut qanuġlugu nalunautchiḷutiŋ tigutaaġukługu Jesus tuqulluguasii.

² Tavra uqaŋarut avanmun, Piraksraġiŋitkikput taamna niqinaqipkaġlugich, iñuich makivsaallautiviaġaatigut.

Jesus Tivraġiksaqtauruq Bethany-mi

³ Jesus-li Bethany-mi, igluani Simon kiḷḷiġruaqtuqtuam, aquppipkaqtillugu niġivḷutiŋ qaiŋaruq aġnaq piqaqłuni uyaġagmik misuġuqtuunmik tivraġiksaunmik akisupiaġataqtuamik atiqaqtuamik Nard. Tavra siqummaŋagaa puuŋa, aasii kuvivḷugu Jesus niaquanun.

⁴ Tavra tavraniinŋarut iñuich iḷaŋich piavsaktuat uqaqłutiŋ, Summan una asiñuksiññaqpa tivraġiksaun?

⁵ Tuniyumiñaġaluaqtuaq qaaŋiġḷugu 300 taala, aasii aitchuutigiyumiñaġlugich iḷiappauruanun. Tavra aġnaq pisaaŋaŋagaat suammativlugu.

⁶ Tavra Jesus uqallaŋaruq, Iḷaksianagu. Summan isumaalluksaaqpisiuŋ? Savaŋaruq savaalluatamik uvamnun.

⁷ Qanuq itqatigigisi iḷiappauruat ilivsiññi ataramik, aasii qakuguliqaa pisukkuvsi anniqsuġumiñaġisi. Aglaan uvaŋa nayuqtigiŋitkivsiŋa ataramik.

⁸ Aġnaq piŋaruq piyumiñakkamiñik. Ilaan tivraġiksaŋagaa timiga itqanaiyaqługu iḷuvġuniksraŋanun piviksram sivuani.

⁹ Iḷumun uqallautigivsi, Sumipayaaq manna tusaayugaaġiksuaq alġaqsruutaukpan nunapayaani, aġnam savaaġiŋaraa quliaqtuaguniaqtuq itqaummatauluni ilaanun.

Judas Aŋiqtuq Aitchuutigisukługu Jesus

¹⁰ Tavra Judas Iscariot, iḷaŋat qulit malġuk, aullaŋaruq aŋaiyyuliqsiqpaŋnun, aitchuutigisukługu Jesus iliŋiññun.

¹¹ Tavra tusaakamirruŋ, quyaŋarut, suli unniqsuqłiiŋagaat aitchuġukługu manigñik. Tavra Judas ivaqłiaŋaruq piviksramik qanuġlugu aitchuutigisukługu.

Jesus-lu Iḷitchitquraniḷu Niġirut Itqautim Qulaurrusiqiviŋmun Niqinaqiviani

¹² Sivullianni uvluŋisa Niqinaqivium Puvlaksautaitchuamik punniġmik imnaiyaaq tuqutaugayuktuq itqanaiyautauvlugu qulaurrusiqiviŋmi Niqinaqiniksramun. Taavrumani uvlumi iḷitchitqurat apiġiŋagaat Jesus, Sumi itqanaiyaquvisigut qulaurrusiqiviŋmi nullautchiġviksraġnik?

¹³ Tavra tiliŋagik malġuk iḷitchitquramiñiñ, uqallautivlugik, Aullaġitchik iniqpaŋmun, aasii paaġniaġaatik iñuum saagaqtuam qattamun imiġmik. Malikkumagiktik,

¹⁴ aasii sumupayaaq isiqpan, uqallautiyumagiktik iñua iglum, Iḷisaurri uqallaktuaq, Sumiitpa tuyuġmiaqaġvik, niġiviksraqput iḷitchitquratkalu qulaurrusiqunmik?

¹⁵ Tavra iḷisautiniaġaatik inituruamik qiḷaguamik upaluŋaitchuamik. Tavrani itqanaiyautiyumagiptigut.

¹⁶ Tavra ilaan iḷitchitqurak aullaŋaruk, aasii tikił̣ł̣utik iniqpaŋmun, paqinŋagaich supayaat uqausiatun Jesus ilimiŋnun. Suli itqanaiyaŋaruk qulaurrusiqiniksramun.

¹⁷ Tavra unnuksraaġman Jesus tikiñŋaruq piqatigivlugich qulit malġuk.

¹⁸ Tavra niġiḷḷaġmiŋ niġġiviŋñi, Jesus uqallaŋaruq, Iḷumun uqallautigivsi, Iḷavsi niġiqatigikkaġma aitchuutiginiaġaaŋa.

¹⁹ Tavra isumaalirraqsiŋarut, aasii apiqsruqtuaqsivḷugu ilaanun atausiullaavlutiŋ, Uvaŋauva? Allat suli uqaqłutiŋ, Sivuniġiviŋa uvaŋa?

²⁰ Tavra Jesus kiuŋagai, Iḷagigiksi qulit malġuk, misuksiqatauruaq punniġmik uvamnun puggutauramun.

²¹ Iġñiŋa Iñuum tuquniaqtuq taŋŋiġḷugich aglausimaruat inmigun Bible-ni. Aglaan isumaaġutiqpaqaġli taamna iñuk aitchuutiginniktuaq Iġñiŋanik Iñuum. Iłuałhaaŋanayaqtuq taamna iñuk iñuuŋaitkumi.

Atanġum Nullautchiġvia

²² Tavra niġiñiallaġmiŋ Jesus tiguŋagaa punnik, aasii aŋaiyyuvluni quyyatigivlugu, suli avikługu aitchuutigivlugu iḷitchitquramiñun, uqallakłuni, Tigulugu niġġisiuŋ tavra timiga.

²³ Suli ilaan tiguŋagaa qallugauraq, aasii quyaanikami God-mun, ilaan aitchuutigiŋagaa ilaiññun. Aasii iluqaġmiŋ imiġvigiŋagaat.

²⁴ Suli Jesus uqallautiŋagai, Tavra auga maqipkaqtauyumaaqtuaq iñugiaktuanun. Taavrumuuna God-im nalupqinaiġñiaġaa sivunniuġutini iñuŋnun.

²⁵ Iḷumun uqallautigivsi, Imitqigñiaŋitchuŋa siiġñaŋan ivsaŋaniñ napaaqtuayaam, tikiḷġataqtillugu taamna uvluq imiġniksraġa nutaulugu God-im atanniqsimaviani.

²⁶ Tavra atuanikamiŋ aŋaiyyunmik, aullaŋarut iġġianun Olives.

Jesus Uqautigigaa Piŋaiñŋaan Peter-m Piiḷaaġniksraŋa

²⁷ Tavra Jesus uqallautiŋagai, Iluqasi qimagniaġivsiŋa suksraaġluŋa uumani unnuami. Aglausimaruq Bible-ni God uqallagnivḷugu inna, “Uvaŋa tuqunniaġiga imnaiḷiqiri aasii imnaich siamillutiŋ.”

²⁸ Aasii aŋianikkuma, aullaġniaqtuŋa sivuvsiññi Galilee-mun.

²⁹ Tavra Peter uqallaŋaruq ilaanun, Iluqaġmiŋ qimakkaluaqpatin uvaŋa qimakkumiñaitkikpiñ suksraaġlutin.

³⁰ Tavra Jesus uqallautiŋagaa, Iḷumun uqallautigikpiñ, Anaqapak uvva piiḷaaġianiŋniaġiŋma piŋasuiqsuaġlutin naluniḷuŋa, tiŋmiaq malġuiqsuaġluni nipanŋaiñŋaan.

³¹ Tavra Peter uqallaŋaruq qapiŋaivsaaqłuni, Tuquqatigiraksraġigupkiñunnii, piiḷaaġiyumiñaitkikpiñ sumikunnii. Tainnatuttauq iluqaġmiŋ iḷitchitqurat uqallaŋarut.

Jesus Aŋaiyyuruq Gethsemane-mi

³² Tavra tikiñŋarut inimun atiqaqtuamun Gethsemane-mik, aasii Jesus uqallaŋaruq iḷitchitquramiñun, Aquvittitchi uvuŋa, aŋaiyyuyaqtuqtilluŋa.

³³ Tavra piqasiutiŋagai ilimiñun Peter-lu James-lu John-lu, Suli atqunaq iłuiḷḷiurraqsiŋaruq, ipiqtusuliqpakłuniḷu,

³⁴ aasii uqallautiŋagai, Isumaaliqpaił̣ł̣uŋa tuquaqsiruatununnii iḷiruŋa. Tavraniittitchi aasii quviqtaiḷiḷusi.

³⁵ Tavra ilaa taikuŋaqtaallaŋaruq, aasii isumaaqpaił̣ł̣uni ulġuŋaruq nunamun aasii aŋaiyyuvluni, Piñaġumiñaqpan, nagliksaaġuŋitkaluaqłuni.

³⁶ Tavra ilaa uqallaŋaruq, Aapaaŋ, supayaat piḷḷagitin. Piiġuŋ nagliksaaġutiqpak uvamniñ. Aglaattauq uvaŋa pisuutiŋił̣aapkun, aglaan ilivich pisuutipkun.

³⁷ Jesus utiŋaruq piŋasunun iḷitchitquramiñun, aasii tautukługich siñiktuat. Peter uqallautiŋagaa, Simon, siñikpich? Quviqtaiḷiyumiñaiñŋavich atautchimiunnii ikarraġmi?

³⁸ Quviqtaiḷisitchi aŋaiyyusitchiḷu, iḷaanni payarirauviaqtusi ikł̣igutchaktinniaġunmun. Iḷumun ilitqusisi piyummatiqaġaluaqtut, timisi sayaitchut.

³⁹ Tavra Jesus aullatqiŋaruq, aasii aŋaiyyuvluni taapkuniŋasuli uqaluŋnik.

⁴⁰ Tavra utiqami, ilaan tautuŋagai siñiktuat suli qanuq pillitchiŋarut. Suli iḷisimaŋaitchut kiggutiksramiŋnik ilaanun.

⁴¹ Tavra qaiŋaruq piŋayuaŋni, aasii uqallautivlugich, Siñikpisisuli unaŋuiqsiqł̣usiḷu? Siñikpaaniktusi. Uvva aitchuutauniksraŋa Iġñiŋan Iñuum tikitchuq aŋalataġiyumiñaqsivḷugu piḷuktuanun iñuŋnun.

⁴² Makittitchi. Aullaqta. Tautuksiuŋ uvva. Aitchuutiginniktuaq uvamnik tikitchuq.

Tigurauruq Jesus

⁴³ Tavra tavrauvvaa uqaġniaqtillugusuli, qairuq Judas, iḷaŋat qulit malġuk. Piqatigiŋagai iñusalaich savikpaliraqtuat anauttaksraligaaqtuallu, tiliraŋich aŋaiyyuliqsiqpaich iḷisaurriḷḷu pitquranik umialiŋnallu.

⁴⁴ Tavra taavruma aitchuutiginniktuam ilaanik nalunaiñŋutaksriñŋagai, uqaqłuni, Kiñaliqaa kunikkaġa taamna ilaaguruq. Tigugisigiksi aasii aullatilugu qaunagilugu.

⁴⁵ Tavra Judas tikipqauraqami, tavrauvvaa ullaŋagaa Jesus aasii uqallakłuni, Iḷisaurrii. Suli kuniŋagaa.

⁴⁶ Tavra tiguniqłaŋagaat.

⁴⁷ Tavra iḷaŋata qikaqtuat tamaani amuŋagaa savikpak, aasii anauvlugu kivgaŋa aŋaiyyuliqsiqpaich qaukłiata aasii siutaiqł̣ugu.

⁴⁸ Tavra Jesus uqallautiŋagai, Qaivisi tigligayuktimun pimmatun, savikpaqaqłusi anaullautiniglu tiguyaqtuqłuŋa?

⁴⁹ Uvaŋa uvlutuaġman piqatigigivsi aŋaiyyuvikpaŋmi iḷisaurrivḷuŋa, aasii tigulaitkivsiŋa. Aglaan Bible uqaluat nalauttuksrauruq.

⁵⁰ Tavra iluqaġmiŋ iḷitchitqurat qimagruiññaqługu pigruŋarut.

⁵¹ Tavra nukatpiam Jesus maliŋagaa ukił̣haaġiksuamik uligaaqtuqłuni annuġaiññami. Tavra tiguŋagaluaġmigaat,

⁵² aglaan ilaan qimaŋagaa uligaani, aasii pigruqłuni iliŋiññiñ annuġaiḷaq.

Jesus Apiqsruqtuġaat Uqaqsitaaġviŋmi

⁵³ Tavra aullautiŋagaat Jesus aŋaiyyuliqsiqpaich qaukłiata igluanun, suli piqatigivlugu kasimaŋarut iluqaġmiŋ aŋaiyyuliqsiqpaiḷḷu umialiŋnallu iḷisaurriḷḷu pitquranik.

⁵⁴ Tavra Peter-m maliŋagaa Jesus aquagun uŋasikł̣ugu aasii isiqłuni siḷallianun igluata aŋaiyyuliqsiqpaich qaukłiata. Tavruŋa aquvinŋaruq piqatigivlugich munaqsrich pasiaqłuni igniġmi.

⁵⁵ Tavra aŋaiyyuliqsiqpaich iluqaġmiglu uqaqsitaaqtitchirit pasikkutiksraqsiuŋagaat Jesus tuqutchumiñaqsisukługu. Aglaan paqitchiḷaiñŋarut.

⁵⁶ Iñugiaktuat iñuich sagluuŋarut iḷisimaniruat ilaagun pasikkutiksranik. Suli uqaluŋich atilaiñŋarut.

⁵⁷ Tavra iñuich iḷaŋich makinŋarut, aasii saglunik uqaqłutiŋ ilaagun.

⁵⁸ Tusaaŋagikput uqallaŋman, Suksraunġiġñiaġiga una aŋaiyyuvikpak savaaŋat iñuich, aasii uvlut piŋasut sippiġaluaġnagich savagniaqtuŋa allamik aŋaiyyuvikpaŋmik iñuich savaaġiŋisaŋannik.

⁵⁹ Naaggaptauqsuli uqaluŋich atiŋaitchut.

⁶⁰ Tavra aŋaiyyuliqsiqpaich qaukłiat makinŋaruq qitqannun, aasii apiġivlugu Jesus, Kiggutiksraitpich ukua iñuich uqaluŋiññun ilipkun?

⁶¹ Tavra Jesus nivliŋaitchuq, suli kiuŋaitkaa sumik. Aŋaiyyuliqsiqpaich qaukłiata apiġitqiŋagaa, Ilivich Christ-guvich, Iġñiŋa Nanġaqtauruam?

⁶² Jesus uqallaŋaruq, Tavrauruŋa. Aasii ilivsi tautugniaġiksi Iġñiŋa Iñuum aquppiruaq taliqpiata tuŋaani Sapiġñaqtuam, suli qairuaq nuvuyaŋigun qiḷaum.

⁶³ Tavra aŋaiyyuliqsiqpaich qaukłiata aliktuŋagai annuġaani suli uqaqłuni, Iñuvsaanik pasiññiktuksranik ilaanik piqaqtuksrauŋaiqsugut.

⁶⁴ Tusaaganikkiksi God-itun iḷiuqtuaq inmiñik. Qanuq sivunniqpisiuŋ? Tavra iluqaġmiŋ sivunniŋagaat tuqutauruksraġuqługu.

⁶⁵ Tavra iñuich iḷaŋisa tivvuaqturraqsiŋagaat Jesus, suli matuvlugu kiiñaŋa qakiqtaqługu uqaqłutiŋ, Nalautchaġiñ kimun qakiqtilaaġnik. Suli qaunaksrit tiguvlugu pattaŋagaat.

Peter-m Piiḷaaġigaa Jesus

⁶⁶ Tavra Peter siḷalliġmiitillugusuli, iḷaŋat Aŋaiyyuliqsiqpaich qaukłiata niviaqsiaq kivgaŋa tavruunnaaŋaruq.

⁶⁷ Aasii tautukamiuŋ Peter pasiaqtuaq, takunnaŋagaa aasii uqallautivlugu, Ilivitchauq piqatigimmikkan Jesus Nazareth-miu.

⁶⁸ Tavra Peter piiḷaaŋaruq, Nalugiga. Kaŋiqsiŋitchuŋaunnii sumik uqaqtilaaġnik. Tavra aniŋaruq aniiġviŋmun, aasii tiŋmiaq nipanŋaruq.

⁶⁹ Tavra niviaqsiam kivgam taututqiŋagaa, aasii uqautiaqsivḷugich tamaani qikaqtuat, Unauvva iḷaŋat.

⁷⁰ Tavra Peter piiḷaatqiŋaruq. Suli akkuliurallaŋman, tamatkua qikaqtuat saniġaani uqallatqiŋarut Peter-mun, Iḷumun iḷagigaatin, qanuq Galilee-ġmiugummiutin.

⁷¹ Tavra Peter suammakłuni uqallaŋaruq, God-im tatavsaġliŋa uqaŋitkuma iḷumun ittuamik. Nalugiga kiutilaaŋa iñuk uqautigikkaqsi.

⁷² Tavra tiŋmiam nipannini aippiŋagaa. Aasii Peter-m itqaŋagaa uqalua Jesus inmiñun inna, Tiŋmiaq nipatkaluaqtinnagu malġugni, ilivich piiḷaaġiniaġiŋma piŋasuni. Tavra taamna itqaqamiuŋ, ilaa qiaġutiŋaruq.