Mark 13 - Iñupiatun Mumiksat Uqalugiksuat

Jesus Uqautigigaa Suksraunġiqsauniksraŋa Aŋaiyyuvikpaum

¹ Tavra Jesus aniñiaqtillugu aŋaiyyuvikpaŋmiñ, iḷaŋat iḷitchitquraŋisa uqallaŋaruq ilaanun kamatchakłuni, Iḷisaurrii, tautukkich, qanutun kamanaqtigirut makua uyaġaich. Qanutun qiñiyunaqtigirut init aŋaiyyuvikpaŋmi.

² Tavra Jesus kiuŋagaa, Tautukpigich tamatkua kamanaqtuat init aŋaiyyuvikpaŋmi? Kisiŋŋuqtaqaġumiñaitchuq uyaqqagnik qaliġiiksuagnik ulġutauniaŋitchuagnik.

Iłuiḷḷiuġutit Nagliksaaqtirrusiallu

³ Tavra Jesus aquppiŋaruq iġġiani Olives qiñiqługu aŋaiyyuvikpak. Peter-lu James-lu John-lu Andrew-lu ullautiŋarut ilaanun iñuiġman.

⁴ Uqallauttutigut qakugu tamatkua piñiaqpat? Suna suli iḷitchuqłiutauniaqpa iluqaġmiŋ tamatkua nalautkaqsikpata?

⁵ Tavra Jesus uqautirraqsiŋagai, Qaunagisitchi. Iñuŋmun sagluqipkaġnasi.

⁶ Qanuq iñugiaktuat iñuich qaiñiaqtut uvaŋauŋŋuaqtuat uqaġlutiŋ, Uvaŋa Christ-guruŋa, aasii iñugiaktuat sagluqilugich.

⁷ Tusaaguvsi aŋuyaktuanik qanitkaluaqpata naagga uŋasikkaluaqpata iłuiḷḷiuġutiginagich. Tamatkua piruksraurut, aglaan sivuniġiŋitkaat isuksraq tikiññiḷugu.

⁸ Nunauruat aŋuyagniaqtut allanun nunauruanun. Suli umialiqaqtuat aŋuyagniaqtut allanun umialiqaqtuanun. Nunasuli aularaġaġniaqtuq sumipayaaq, iñuiḷḷu paniġniaqtut niqaiḷḷiuġlutiŋ. Tamarra tamatkua aullaqisaaŋich isumaaġutit piruksrauruat Christ-guruaq qaiŋaiñŋaan.

⁹ Aasii qaunagiyumausi ilivsiññun, qanuq aitchuutiginiaġaasi uqaqsitaaġviŋñun, suli Jew-guruat aŋaiyyuviŋiññi anaullaqtauniaqtusi, suli qaġġirrauraġaġniaqtusi sivuġaŋiññun atanaurallu umialgiḷḷu pisigiluŋa, ilivsi quliaqtuaġumiñaqsiḷusi tusaayugaaġiksuanik iliŋiññun.

¹⁰ Christ-guruaq qaiŋaiñŋaan, tusaayugaaġiksuaq alġaqsruutauqqaaqtuksrauruq iñupayaanun.

¹¹ Tavraasii tigutaaqpasi, aullautilusi uqaqsitaaġviŋñun, uŋiarrisaqaġnasi sivuani piviksram sunik uqaluksravsiññik. Uqaġnaqsikpasi uqaġumausi qanupayaaq uqaluksriusiavsiññik tavraġuqpan. Qanuq uqaluginiakkasi ilivsi uqalugiŋitkisi, aglaan uqaluksriusiaġiniaġisi Ilitqusiġiksuamiñ.

¹² Tavra iñuich aniqatitiŋ aitchuutiginiaġaich tuqutautqulugich. Suli tainnatun aapauruam iġñini. Suli miqłiqtut makivsaallaktaġniaqtut aŋayuqaamiŋnun, aasii tuqutillugich.

¹³ Suli uumigitchiġñiaqtusi iñupayaaniñ pisigiluŋa, aasii iñuk igḷutuutiruaq nagliksaaqtitauniġmik iñuuniqtutilaamisun, annaurrauniaqtuq.

Naġġutchautiqpak

¹⁴ Taiguaqtuaq iñuk ukuniŋa kaŋiqsiḷi. Tautukkuvsiuŋ naġġutchagnapiaġataqtuaq salumaiḷḷisauluni inillaummiruaq aŋaiyyuvikpaŋmi iniksraġiŋisamiñi, tamatkua iñuuruat Judea-mi pigruġlich iġġiñun.

¹⁵ Iñuksuli aniiqsuaqtuaq iglumi qaaŋani iñaviqqutchiġñani atqaġluni saagaksraisuqsaġluni sumik iglumi iḷuaniñ.

¹⁶ Aasiivsauq iñuk nautchiaqaġviŋmi savaktuaq iglumiñuŋnani saakkiutiyaqtuġuglugu annuġaani.

¹⁷ Taipkua uvlut tikitpata, yaqhiikkaluaq aġnaq siŋaiyauniġumi, miqłiqtuuraqaqtuaġlu piḷgusiŋaitchuanik.

¹⁸ Aŋaiyyutitchi pigruġniksraqsi ukiukuaquŋiḷḷugu.

¹⁹ Taipkunanikiataŋ uvluni iñuich nagliksaałhamaaġniaqtut qaŋapaŋmiñ God-im qaŋa savaŋmagu nuna. Aasii tainnatun nagliksaaqtigitqikkumiñaiñmiut aquagun taavruma.

²⁰ Aasii Atanġum iñukłiḷaaŋisuaqpagich taipkua uvlut, kiñaliqaa iñuuyumiñaitchuq. Aglaan pisigilugich God-im piksraqtaani, ilaan iñukłiḷaaġniaġai uvlut.

²¹ Tavraasii iñuum uqallautikpasi, Tautuksiuŋ, uvva Christ, naagga, Tautuksiuŋ, ikaniittuq, ukpiġinagu,

²² qanuq Christ-guŋŋuaqtuat, uqaqtauŋŋuaqtuallu God-mun iñukpalliġñiaqtut savaglutiŋ aliuġnaqtuanik nalupqinaiġñiaqługu kiutilaaqtiŋ, asiñuutiniaqsaalugich God-im piksraqtaaŋi, sagluqiyumiñaġumisigik.

²³ Aglaan nipuŋaitchitchi ilivsi. Kilikkivsi sivuani supayaanik piŋaiñŋaisa.

Qaiñiksraŋa Iġñiŋata Iñuum

²⁴ Tavra taipkunani uvluni, pianikpan taamna iłuiḷḷiuġutiqpak, siqiñiq taaksiñiaqtuq, tatqiġḷu qaummaġiŋaiġñiaqtuq.

²⁵ Suli uvluġiat katagniaqtut, suli qaummatit siḷamiittuat uniuqtinniaqtut inimiŋniñ.

²⁶ Tavra iñuich tautugniaġaat Iġñiŋa Iñuum qairuaq nuvuyani kamanaqtuamik suaŋŋatiqaġluni qaumaniqaġluniḷu.

²⁷ Tavra tiliñiaġai isaġuliŋni, aasii katillugich atautchimun ilaan piksraqtaani sumiḷḷiqaa nunapayauraniñ.

Iḷisaksraq Fig Napaaqtumiñ

²⁸ Fig-nik siiġñaqaqtuamiñ napaaqtumiñ iḷitchisitchi. Qisiqsiutiŋi qituglimmata, akutuqpalivḷuniḷu iḷisimarusi upinġaam qallisilaaŋanik.

²⁹ Tavra ilivsi tainnatuttauq, tautukkuvsigik tamatkua nalaurraqsikpata, iḷisimaniaqtusi Iġñiŋa Iñuum qallisilaaŋanik, qallipiaġataqtilaaŋanik.

³⁰ Iḷumun uqallautigivsi, ukua iñuich tuquanigniaŋitchut, iluqaisa tamatkua nalaunŋaunnagich.

³¹ Qiḷaglu nunalu piiġñiaqtuk, aglaan uqalutka piiġumiñaitchut.

Iñupayauram Nalugaa Uvluq Ikarraġlu

³² Iñupayaam nalugaa taimña uvluq ikarraġlu tamatkua nalaurviksrautaat. Isaġulgich unnii qiḷaŋmiittuat, Iġñiġuvlu nalugaat. Aapam kisimi iḷisimagaa.

³³ Qaunakkutitchi, quviqtaiḷisitchiḷu, qanuq iḷisimaŋitchusi qakugu taimña uvluq tikisilaaksraŋanik.

³⁴ Qanuq Iġñiŋa Iñuum ittuq iñuktun uŋasiksuamun iglauruatun. Qimaaqsikamiuŋ igluni kivgani savaaksriḷḷaaŋagai, suli piraksriqł̣ugu upkuamik qaunaksri quviqtaiḷitquvlugu utiqtilaaksramiñun.

³⁵ Quviqtaiḷisitchiḷi, qanuq iḷisimaŋitchusi qakugu atanġa iglum qaiñiaqtilaaŋanik, tanuġaksiruami, naagga unnuaq qitiqqaqpan, naagga qauyasiaqsikpan, naagga uvlaami.

³⁶ Iḷaanni qaił̣ł̣agluni siñiktillusi qaiviaqtuq.

³⁷ Aasii uqallautiga ilivsiññun, uqallausiġigiga iluqaiññun, Quviqtaiḷisitchi.