Mark 11 - Iñupiatun Mumiksat Uqalugiksuat

Jesus Isiqtuq Jerusalem-mun Kakaksiqł̣uni Umialiktun

¹ Tavra qallivḷutiŋ Jerusalem-mun tikiñŋarut Bethphage-mullu Bethany-mullu maniñġaniittuagnun iġġim Olives. Jesus tiliŋagik malġuk iḷitchitquraŋni sivumiŋni,

² aasii uqallautivlugik, aullaġitchik ininun sivuniptiŋnun. Aasii tikipqaġuptik, paqinniaqtutik kakaktim nuġġaŋanik pituqaqtuamik, iñuum kakaksiġvigiŋaisaŋanik. Pituiġḷugu qaġġisiyumagiktik.

³ Aasii iñuum apiġikpatik, Summan tainna pivisik? Uqallakkumautik, Atanġum atuġukkaa, tavrauvvaa utiqtinniaġaa atuanikkumiuŋ.

⁴ Tavra aullaŋaruk sivuniġmiŋnun. Suli paqinŋagaak kakaktim nuġġaŋa pituqaqtuaq siḷami apqutini saniġaani upkuam. Pituiġñiaqsaqtillugu,

⁵ iḷaŋisa qikaqtuat tavrani uqallautiŋagaik, Summan pituiqpitku kakaktim nuġġaŋa?

⁶ Tavra iliŋikta uqallautiŋagaich, Jesus piraksriutaatun. Tavra iliŋisa aullaqtinŋagaich.

⁷ Tavra Jesus-mun qaġġisiŋagaak kakaktim nuġġaŋa. Aasii iḷiŋagaich annuġaatiŋ kakaktimun, tavra Jesus kakaksirraqsiŋaruq.

⁸ Tavra iñugiaktuat iñuich isivinŋagaich annuġaatiŋ apqunmun. Allalli kivriŋarut qisiqsiutinik napaaqtuniñ, aasii iḷiuqqaqługich apqutinun.

⁹ Tavra iñuich sivulliuruat, aquaguaqtuallu nipaallaŋarut, Hosanna, nanġaqtauli God. God-im piḷḷuataqtilliuŋ qairuaq pisivlugu Ataniq.

¹⁰ God-im piḷḷuataqtilliuŋ atanniqsimannikkumaaqtuaq maŋŋuptiktun David-tun. Nanġaqtauli God.

¹¹ Tavra Jesus tikiñŋaruq Jerusalem-mun, aasii isiqłuni aŋaiyyuvikpaŋmun. Tavra qiñiġaaganikami supayaanun aniŋaruq. Tanuġaksivḷuni, aullaŋaruq Bethany-mun piqatigivlugich qulit malġuk iḷitchitqurat.

Jesus Tuqulipkaġaa Fig-nik Siiġñalik Napaaqtuq

¹² Tavra uvlaakumman, qaikamiŋ Bethany-miñ, Jesus kaaliŋaruq.

¹³ Tavra tautukługu fig napaaqtuat uŋasiñiñ akutuqpalik, ilaan ullaŋagaa, iḷaanni paqinnasugaluni fig-nik tavraŋŋa. Tavra tikiññamiuŋ paqinŋaitchuq sumik, aglaan akutuqpaich, qanuq nauviksraŋat fig-gich tikiñŋaitchuq.

¹⁴ Tavra Jesus uqallautiŋagaa, Iñupayaam siiġñaqtuġvigiŋaiḷḷisin tavraŋŋaaglaan. Iḷitchitquraŋisa tusaaŋagaat uqallaŋman.

Jesus Aŋaiyyuvikpaŋmuktuq

¹⁵ Tavra tikiñŋarut Jerusalem-mun, aasii Jesus isiŋaruq aŋaiyyuvikpaŋmun. Ilaan anittaŋagai tuniuqqairuat tauqsiqsuqtuallu aŋaiyyuvikpaŋmi, suli ulġuuŋagai aglagviŋich maniḷiqirit, aquppiutaŋiḷḷu tuniuqqairuat tiŋmianik.

¹⁶ Suli iñupayaaq saagaqtitchumiñaiñŋagaa supayaamik aŋaiyyuvikuaġlugu.

¹⁷ Tavra ilaan iḷisautiŋagai iñuich, Aglausimaruq Bible-ni God-im uqallautaa inna, “Uvaŋa igluqpaga taggisiqaġniaqtuq iñupayaat aŋaiyyuyaqtuġviannik.” Aglaalli ilivsi iriqtuġviḷiutiŋagiksi tigligayuktinun.

¹⁸ Tavra pitquranik iḷisaurrit, aŋaiyyuliqsiqpaiḷḷu taamna tusaaŋagaat, aasii ivaqłiaŋarut qanuġlugu tuqutchukługu sivuuġagiliqł̣ugu, qanuq iñupayaat aliuŋarut iḷisaurrutiŋigun.

¹⁹ Tavra tanuġaksimman, Jesus-lu iḷitchitquraniḷu aullaŋarut iniqpaŋmiñ.

Iḷisaksraq Fig-nik Siiġñaliŋmiñ Napaaqtumiñ

²⁰ Tavra uvlaami, nalautchaaqługu fig napaaqtuq tautuŋagaat tuquliŋaruaq maŋŋuġmiñunaglaan.

²¹ Tavra Peter-m itqautivlugu uqallautiŋagaa, Iḷisaurrii, tautuguŋ, fig napaaqtuq tuquliŋaruq uqallautiŋaran siiġñaqtuġvigitquŋił̣ł̣ugu tavraŋŋaaglaan.

²² Tavra Jesus kiuŋagaa, God-mun ukpiġutiqaġitchi.

²³ Qanuq iḷumun uqallautigivsi, kialiqaa uqallautikpagu una iġġiq, Nuuttin, igitaugiñ taġiumun. Nalupqisuŋipiaġuvich, aglaan ukpiġlutin tamatkua sut uqallausiġikkatin nalaunniaġniḷugich, tavra taamna pirauniaqtuq iliŋnun.

²⁴ Tavraasii uqallautigivsi, supayaat kipiġniuġutigikkasi, aŋaiyyutigiguvsigik ukpiġitchi aitchuusiaġiniḷugich, tavra piginiaġisi.

²⁵ Suli qikaqavsi aŋaiyyuvlusi, suliqutigiŋaiġñigitchi itqaumayumiñaiġḷugich sunŋutiqaġuvsi kimulliqaa, Aapavsivsauq qiḷaŋmiittuam suliqutigiŋaiġumagai piḷuutisi itqaumayumiñaiġḷugich.

²⁶ [Ilivsi suliqutigiŋaiġñiŋitkuvsi itqaumayumiñaiġḷugich, Aapavsivsauq qiḷaŋmiittuam suliqutigiŋaiġñiaŋiñmigai itqaumayumiñaiġḷugich piḷuutisi.]

Jesus Apiqsruqtauruq Ataniġnaqutaagun

²⁷ Utiġmata Jerusalem-mun, Jesus pisuaqtillugu aŋaiyyuvikpaŋmi, qaiŋarut ilaanun aŋaiyyuliqsiqpaich, iḷisaurriḷḷu pitquranik, umialiŋnallu,

²⁸ aasii apiġivlugu, Sum ataniġnaqutaagun tamatkua pivigich? Kia taavrumiŋa ataniġnaqusiqpatin tamatkua pitquvlugich?

²⁹ Tavra Jesus kiuŋagai, Apiqsriñiaqtuŋalivsauq ilivsiññiñ atautchimik apiqqunmik. Kiuguvsiŋa, uqallautiniaġivsi qanutchikun ataniġnaqutikun uvaŋa pisilaamnik tamatkuniŋa.

³⁰ Kia ataniġnaqutiksriñŋavauŋ John paptaiqsiñiksraŋagun, God-im naagga iñuum?

³¹ Tavra uqavaaŋarut avanmun uqaqłutiŋ, Uqallakkupta God-miŋŋaqtauniḷugu ilaa uqallagniaqtuq, Summanmi ilivsi John ukpiġiŋaitpisiuŋ?

³² Suli uqaġumiñaitchugut ataniġnaqutaa iñuŋniñ piñiḷugu. Iliŋisa sivuuġagiŋagaich iñuich, qanuq iñupayaat nalupqigiŋaitkaat John God-mun uqaqtautilaaŋa.

³³ Tavra Jesus kiuŋagaat, Nalurugut. Aasii Jesus uqallautiŋagai, Uqallautiyumiñaiñmigivsivsauq kimun ataniġnaqutiksrisilaamnik tamatkuniŋa piyumiñaqsivḷuŋa.