Luke 5 - Iñupiatun Mumiksat Uqalugiksuat

Jesus Ququaġai Sivulliich Iḷitchitqurat

¹ Tavra Jesus makitaŋaruq siñaani tasiata Gennesaret. Tavrani iñuich katilġataviŋarut naalagumavlutiŋ uqaluanik God-im.

² Tavra Jesus tautuŋagik malġuk umiaqpaurak amummiruak. Iqaluŋniaqtit qimakkaŋich salummaivḷutiŋ kuvranik.

³ Ikivluni igḷuanun umiaqpauram Simon pigikkaŋanun, Jesus apiġiŋagaa kaimitaallaquvlugu nunamiñ. Aasii ilaa aquptaaqłuni iḷisautirraqsiŋagai iñuich umiaqpauramiñ.

⁴ Tavra Jesus uqaŋaiqami, uqallautiŋagaa Simon, Saavittitchi itiruamun aasii niŋillugich kuvraŋi qaaksaġlusi.

⁵ Tavra Simon-gum kiuŋagaa, Iḷisaurrii iqaluŋniallakkaluaqtugut tavra unnuaqtutilaaŋatun aŋiiññallaktugut. Aglaan uqallautin pisigilugu kuvriġñiaqtuŋa.

⁶ Tavra kuvrianikamiŋ, qaaŋagaich iqalusalaich, aasii kuvraŋich aligaġnialaŋarut.

⁷ Nuluġaŋagaich alġaisiŋ igḷuani umiaqpauramiittuat qaiḷugich ikayuġiaquvlutiŋ. Aasii qaivḷutiŋ usiḷḷiŋagaik iluqaaktun umiaqpaurak, pukłipiaġataqługik.

⁸ Tavra Simon Peter-m iḷitchuġikamiuŋ taamna, sitquŋaruq sivuġaanun Jesus aasii uqallakłuni, Aullaġiñ uvamniñ Ataniiq, qanuq uvaŋa piḷuktuaguruŋa iñuk.

⁹ Qanuq ilaalu taapkualu piqatini niġiiḷḷaqtauŋarut taapkunuuna iqaluktamikkun.

¹⁰ Taapkuagluami James-lu John-lu iġñiŋik Zebedee-m alġaiguruak Simon-mun. Tavra Jesus uqallautigaa Simon, Iqsiñak. Iqalugniaġusiqsun, tavraŋŋaaglaan iñunnagniaġniaqtutin.

¹¹ Tavra amuanikamisigik umiaqpauratik, qimaŋagaat sunapayaaq aasii malikługu Jesus.

Jesus Mamititkaa Kiḷḷiġruaqtuqtuaq

¹² Tavra Jesus itillugu iniqpaich iḷaŋanni, iñuk qaiŋaruq kiḷḷiġruaqtuqpaktuaq. Tautukamiuŋ Jesus sitquŋaruq sivuġaanun aasii apiġivlugu, Ataniiq, pisukkuvich mamititchumiñaġiŋma.

¹³ Tavra Jesus isaaqłuni aksiuŋagaa uqallakłuni, Piyummatiqaqtuŋa. Mamittin. Tavraŋŋatchiaq kiḷḷiġruaŋi maminŋarut.

¹⁴ Tavra Jesus uqaullaapiaŋagaa quliaqtuaquŋił̣ł̣ugu kimulliqaa, aglaan uqallautivlugu, Aŋaiyyuliqsiqpaŋmugiñ qanuqitilaaġiaġlutin, aasii aitchuiḷutin ikipkautinik Moses piraksriutiŋiñik, ukpiġnaqsisaaġlugu paŋmapak salumasisilaan.

¹⁵ Tavra siamiłhaaqsiññaŋaruq uqaluk ilaagun, aasii iñugiapiaġataqtuat iñuich katinŋarut naalagiaqłutiŋ suli iłuaqsipkaġiaqłutiŋ naŋirrutimiŋniñ.

¹⁶ Tavra Jesus aullaġuuruq iñuił̣aamun aŋaiyyuyaqtuqłuni.

Jesus Iłuaqsigaa Aulalaitchuaq Iñuk

¹⁷ Tavra tamatkua uvlut iḷaŋanni, Jesus iḷisaurripkaqtillugu, iḷaŋich Pharisees-lu iḷisaurriḷḷu pitquranik aquppiŋarut saniġaani, qaiŋaruat nunaaqqipayaaŋiñiñ Galilee-m Judea-vlu, Jerusalem-miḷḷu, tavra Atanġum God-im suaŋŋasiŋagaa Jesus iłuaqsiyumiñaqsivḷugich naŋittuat.

¹⁸ Tavraptauq iñuich iḷaŋich qaġġirriŋarut aulalaitchuamik nalaruamik ikuvġamiñi, aasii itqutisaġaluaŋagaat iglumun iḷisukługu sivuġaanun Jesus.

¹⁹ Aasii itqutiyumiñaiññamirruŋ, iñuich tativlutiŋ, mayuŋarut iglum qaaŋanun, qiḷaŋa aasii aŋmaqqaaqługu niŋiłługu ikuvġaqtuummaan qitqannun iñuich sivuġaanun Jesus.

²⁰ Tavra Jesus puttuqsrikamiuŋ ukpiġutaat taapkua iñuich, ilaa uqallaŋaruq aulalaitchuamun, Iñuuk, piḷuutitin suliqutigiŋaiqsaurut itqaumayumiñaiqł̣ugich.

²¹ Tavra iḷisaurriḷḷu pitquranik Pharisees-lu apiqsruqtuutirraqsiŋarut avanmun, Kiñauna iñuk uqaqpa tainna God-itun? Kiñaliqaa suliqutigiŋaiqsiyumiñaitchuq itqaumayumiñaiġḷugich piḷuutinik aglaan God kisimi.

²² Tavra Jesus puttuqsrikami tainna isumaniġmata, uqallautiŋagai, Summan isumavisi tamatkuniŋa?

²³ Nalliak siġḷiġnaił̣haaqpa uqallaktuni, Piḷuutitin suliqutigiŋaiqsaurut iliŋnun, naagga uqallaktuni, Makillutin pisuaġiñ?

²⁴ Ukpiġnaqsiḷiġniaġiga ilivsiññun Iġñiŋa iñuum ataniġnaqutiqaqtilaaŋanik nunami suliqutigiŋaiġumiñaqługich piḷuutit. Tavrani uqallautiŋagaa iñuk aulalaitchuaq, uqallautigikpiñ, makittin. Tigulugich ikuvġatin, aggiiñ.

²⁵ Tavra tavrauvvaa ilaa makinŋaruq sivuġaanni, aasii tiguvlugich ikuvġani aiŋaruq nanġaqługu God.

²⁶ Tavra iñuich aliuġutchapiaŋarut kamatchakłutiŋ, nanġaŋagaat God uqaqłutiŋ, Qiñiŋarugut aliuġnaqtuanik sunik uvlupak.

Jesus Ququaġaa Levi

²⁷ Taavruma aquagun Jesus aniŋaruq, aasii tautuŋagaa tax-iñik katitchiri atiqaqtuaq Levi-mik, aquppiñiqsuaq tax-iḷiqiviŋmi. Tavra Jesus uqallautiŋagaa, Maliŋŋa.

²⁸ Tavra Levi-m makiłłuni qimaŋagai supayaat, aasii malikługu Jesus.

²⁹ Tavra Levi-m niqinaqusiuġutiqpaŋagaa Jesus iglumiñi. Aasii tavrani iñusalaich inŋarut tax-iñik katitchirit iḷaqaqłutiŋ allaniglu aquppiqatauruanik niġġiviŋñi piqatigivlugich.

³⁰ Tavra Pharisees iḷisaurriŋiḷḷu pitquranik uqamayuutiŋagaich Jesus iḷitchitquraŋi, Summan niġiqatiqaġuuvisi imiqatiqaqłusiḷu tax-iñik katitchirinik piḷuusiqiriniglu?

³¹ Tavra Jesus kiuŋagai, Surruitchuat taaktituaksraitchut, aglaan naŋittuat.

³² Qaiŋaitchuŋa ququaġiaġlugich nalaunŋaruat iñuich, aglaan piḷuusiqirit isumalitqiquvlugich.

Apiqqun Niġiḷaiḷaġnikun Aŋaiyyuuqłuni

³³ Tavra iñuich iḷaŋisa uqallautiŋagaat Jesus, John-gum iḷitchitquraŋi akulaitchuami niġiḷaitchuurut aŋaiyyuuqłutiŋ, tamatkualu iḷitchitquraŋich Pharisees, aasiiḷi ilivich iḷitchitquratin niġiugaqtut imiqłutiglu.

³⁴ Tavrali Jesus kiuŋagai, Isummatigivisigik tuyuġmiat katirrusiqiruani niġiḷaitquvlugich sivisutilaaŋatun uiksrautim nayuutiniŋata iliŋiññun? Tainna piñiaŋitchut.

³⁵ Aglaan uiksrautim aullaurrauviksraŋa tikitchumaaqtuq, aasii taimanigu niġiḷaitpaallugniaqtut.

³⁶ Jesus uqautivsaaŋammigai uuktuunmik. Kiñaliqaa aliksiḷaitchuq iḷaviñiŋanik nutauruam annuġaam aasii iḷaaġutivlugu annuġaaluŋmun. Tainna pigumi, aligniaġaa nutauruaq annuġaaq, suli iḷaaksraqtaaguruaq nutauruamiñ annuġaamiñ allakaagusugniaġmiuqsuli utuqqauruamiñ.

³⁷ Iñuum suli immiutilaitkaa nutauruaq wine puuġruanun, qanuq nutauruam wine-gum puvlagluni qaaġniaġaa puuġruaq, aasii wine maqiluni asiñun, aasiiḷi puut maqulutiŋ.

³⁸ Aglaan nutauruaq wine puugaksraupiaqtuq nutauruanik puunik.

³⁹ Suli iñuktun kipiġniuŋitchuatun imiġugluni nutauruamik wine-mik imianiŋavluni utuqqauruamik wine-mik, tainnatun iñuich uqaġuurut utuqqauruat piḷġutchich nakuułhaaġnivḷugich nutauruaniñ piḷġutchiñiñ.