Luke 4 - Iñupiatun Mumiksat Uqalugiksuat

Jesus Ikł̣igutchaktinniaġusiaŋa

¹ Tavra Jesus aŋalałługu Ilitqusiġiksuam, aullaŋaruq kuugmiñ Jordan-miñ aasii Ilitqusiġiksuam aullaqtinŋagaa

² nunagluktuamun. Tavrani ikł̣igutchaktinniaŋagaa tuunġaum malġukipiani uvluni. Aasii taapkunani uvluni, niġiŋaitchuq sumikunnii. Aasii isukłiñmata, Jesus kaaliŋaruq.

³ Tuunġaum uqallautiŋagaa, Iġñiġipiaqpatin God-im, una uyaġak punniġuquuŋ.

⁴ Jesus kiuŋagaa, Aglausimaruq Bible-ni, Iñuk iñuuniaŋitchuq niqikun kisiagun, [aglaallu ukpiġilugich uqalupayaaŋi God-im.]

⁵ Tavrasuli tuunġaum mayuutiŋagaa qutchiksuamun iġġimun, aasii satqummiutivlugu iluqaiññik umialgutiŋiñik nunam akkupauraq.

⁶ Aasii uqallautivlugu, iliŋnun aitchuutiginiaġiga iluqaan taamna ataniġnaqun kamanautaallu, qanuq aitchuutauŋaruq uvamnun, aasii kimulliqaa pisukkuma aitchuutigiyumiñaġiga.

⁷ Tavraasii ilivich sitquġlutin aŋaiyyuvigigumŋa, iluqaisa aitchuutiginiaġitka tamatkua iliŋnun.

⁸ Tavra Jesus kiuŋagaa, [Aullaġiñ Satan.] Aglausimaruq Bible-ni inna, Aŋaiyyuvigisaġiñ Ataniq God-in, suli kisian savautilugu.

⁹ Tavra Tuunġaum aullautiŋagaa Jerusalem-mun, aasii inillakługu nuvuquyuanun aŋaiyyuvikpaum, aasii uqallautivlugu, Iġñiġipiaqpatin God-im, tavraŋŋa nautkiaġiñ,

¹⁰ qanuq aglausimaruq Bible-ni inna, “God-im tiliñiaġai isaġuliŋni munaġitqulutin.”

¹¹ Aasii isaġulgich qaunaginiaġaatin piyaqququŋiḷḷutin.

¹² Tavra Jesus kiuŋagaa, Uqallautauŋaruq Bible-ni, Uuktuġniaŋitkiñ Ataniq God-in.

¹³ Tavra Tuunġaum aġiuganikkamigich iluqaisa ikł̣igutchaktinniutit, ilaa qimautiŋaruq ilaaniñ nalautitchiaġisaqługu uuktuatqigviksrani.

Jesus Aullaġniigaa Savaani Galilee-mi

¹⁴ Tavra Jesus aŋalałługu Ilitqusiġiksuam Galilee-mun utiŋaruq aasii quliaqtuaġiŋagaat nunaaqqipayaanun sumulliqaa.

¹⁵ Tavra ilaa iḷisaurriŋaruq aŋaiyyuviŋiññi, aasii iluqaġmiŋ iñuich nanġaŋagaat.

Jesus Ukpiġiŋitkaat Nazareth-mi

¹⁶ Tavra Nazareth-muŋaruq iñuguġviŋmiñun, aasii aŋaiyyuviŋmuŋaruq piḷġusikaamisun Jew-guruat savairvianni. Tavra makinŋaruq taiguaġniaqłuni.

¹⁷ Aasii qaiñŋagaich makpiġaaŋi Isaiah-m uqaqtaata God-im. Ilaan isivinŋagai makpiġaat aasii paqiłługu aglausimaruaq inna,

¹⁸ “Ilitqusiġiksuaŋan Atanġum aŋalatkaaŋa, qanuq ilaan nalunaiqsaġiŋagaaŋa alġaqsruitquvluŋa tusaayugaaġiksuanik kamasaaŋitchuanun. [quviasaaquvlugiḷḷu isumaaġutituqtuat.] Ilaan tiliŋagaaŋa quliaqtuaġitquvlugich tamatkua aŋalatittuat piḷuunmun annaurrauyumiñaġnivḷugich, suli qiñillasiḷugich ayauŋaruat, atanġiqsitautquvlugiḷḷu tamatkua nagliksaaqtitauruat piḷuun pisigivlugu.

¹⁹ Ilaan suli tiliŋagaaŋa quliaqtuaġutitquvlugich iñuich paŋmapak akuqtuġumiñaġniḷugich Ataniġmun.”

²⁰ Tavra Jesus imuŋagai makpiġaat, aasii utiqtiłługich kivgamun tutququvlugich, aasii aquviłłuni. Tavrani iluqaġmiŋ iñuich aŋaiyyuviŋmiittuat takunnaakkiutiŋagaat.

²¹ Tavra uqautirraqsiŋagai, Uvlupak taamna tusaakkaqsi Bible-niñ taŋŋiqsauganiktuq.

²² Tavra iluqaġmiŋ uqautigilluataŋagaat, suli kamasuutigiŋagaich uqalulluatat uqautigiraŋi. Uqallaŋammiut, Uvvauna Joseph-gum iġñiġigaa.

²³ Tavra uqallautiŋagai, Nalupqinaitchuamik uqallagviginiaġivsiŋa uumiŋa uqalugaamik. Taaktii, iliŋnik iłuaqsiiñ. Tusaaŋaravut kamanaqtuat savaatin Capernaum-mi maaniḷu savaaġikkich ilivich nunaŋni.

²⁴ Jesus uqallavsaaŋaruq, Iḷumun uqallautigivsi, uqaqtaa God-im akuqtuqtaulaitchuq nanmiñiq iñuŋmiñi.

²⁵ Aglaan iḷumun uqallautigivsi, iñugiaktuat uiḷgaŋaruat iñuuŋarut Israel-mi Elijah iñuumman. Sialulaiñŋaruq ukiuni piŋasuni itchaksraniḷu tatqiñi, kaaksiuqpaŋmata iñuich iluqaani nunaŋanni.

²⁶ Tavra Elijah tilirauŋaitchuq nalliannun unnii taapkua iñuich, aglaan uiḷgaŋaruamun Jew-guŋitchuamun, iñuuruamun Zarepheth-mi nunaaqqimi Sidon-miittuami.

²⁷ Suli God-im uqaqtaa Elisha iñuumman iñugiaŋarut kiḷḷiġruaqtuqtuat Israel-mi, aasii nalliŋich unnii iłuaqsirauŋaitchut. Aglaan Naaman, Syria-ġmiu kisimi iłuaqsirauŋaruq.

²⁸ Tavra tusaakamirruŋ taamna, iluqaġmiŋ aŋaiyyuviŋmiittuat qinnapiaġataŋarut.

²⁹ Tavra iliŋich maksriŋarut aasii tiguniqłakługu annisiŋagaat Jesus iniqpaŋmiñ, saqigrugivlugu siñaanun qimiqqam siŋitchukługu. Iniqpaŋat ittuaq qimiqqam qaaŋani.

³⁰ Tavra akunniraqługich iñusalaich, Jesus aullaŋaruq.

Iñuk Ilitqusiqł̣ulik

³¹ Tavra Jesus Capernaum-muŋaruq iniqpaŋmun Galilee-mi. Tavraasii ilaan iḷisautiŋagai Jew-guruat savairvianni.

³² Tavra iñuich kamasuutiqaŋarut iḷisaurriñiŋanik, qanuq ilaan uqaluŋi kamanaŋarut.

³³ Tavra aŋaiyyuviŋmi inŋaruq iñuk ilitqusiqł̣uqaqtuaq, aasii nipatutilaamisun nivliŋaruq,

³⁴ uqaqłuni, Jesus Nazareth-miu, summan iḷaksiavisigut? Uvaniitpich suksraunġiġuqłuta? Iḷisimagiga kiutilaan. Ilaa Piḷuutaitchuaq God-im pia.

³⁵ Tavra Jesus suaŋagaa uqallautivlugu, Nipaisaaġiñ. Anniiñ ilaaniñ. Tavra ilitqusiqł̣uum ulġutqaaqługu sivuġaanun Jesus, aniŋaruq ilaaniñ anniġaluaġnagu.

³⁶ Tavra iluqaġmiŋ aliuŋarut aasii avanmun uqaagaqsivḷutiŋ, Sunauna uqallaun? Qanuq sumiñ ataniġnaqutiqaqłuni suaŋŋatiqaqłuniḷu piraksriḷḷagai ilitqusiqł̣uich, aasii ilaisa kamagillavlugu.

³⁷ Tavra uqaluk ilaagun siaminŋaruq inipayaanun tamatkunani nunani.

Jesus Iłuaqsigai Iñugiaktuat Iñuich

³⁸ Tavra Jesus anivḷuni aŋaiyyuviŋmiñ Simon aimaaġvianuŋaruq. Tavra Simon aakaruaŋa naŋinŋaruq uunnautiqpaqaqłuni, aasii ilaisa ikayuqtaiḷiqutiŋagaat ilaanun.

³⁹ Tavra Jesus makitchaqtuŋaruq siñigviŋisa saniġaannun, aasii suakługu uunnautaa, aasii uunnautaiŋaruq. Tavrauvvaa makiłłuni niqłiuġutirraqsiŋagai.

⁴⁰ Tavra siqiñiq nipisaġataaqsimman, iluqaġmiŋ tamatkua naŋittuaqaqtuat qanusiḷimaanik naŋirrutinik qaġġisiŋagaich Jesus-mun. Tavra ilaan aksiuŋagai iluqaisa aasii iłuaqsivḷugich.

⁴¹ Suli ilitqusiqł̣uich unnii animmiraqtut iñugiaktuaniñ iñuŋniñ nipaalavlutiŋ, Ilivich Iġñiġigaatin God-im. Tavra Jesus suagaġigai, suli uqaqtitchaiḷivḷugich, qanuq iḷisimagaat Christ-gutilaaŋanik, Iġñiŋa God-im.

Jesus Alġaqsruiruq Judea-mi

⁴² Tavra uvlaaġmagu Jesus aullaŋaruq aasii iñuił̣aamukłuni. Tavra iñuich ivaŋagaat. Aasii paqinnamirruŋ, qimaktaiḷiŋarut ilaanun.

⁴³ Tavra ilaan uqallautiŋagai, Alġaqsruiruksrauruŋa tusaayugaaġiksuanik atanniqsimmataata God-im, allanullu iniqpaŋnun, qanuq God-im tiliŋagaaŋa taamna savaaġitquvlugu.

⁴⁴ Tavra ilaa alġaqsruiŋaruq aŋaiyyuviŋiññi Judea-m.