Luke 24 - Iñupiatun Mumiksat Uqalugiksuat

Jesus Aŋiruq Tuqqunmiñ

¹ Tavra Jew-guruat itchaksriġmata savaiññiŋat qaaŋiġman, qauksrauraqsaġataqtuami, aġnat iḷuvviviŋmuŋarut tigumiaqługich tivraġiksautit itqanaiyaatiŋ.

² Tavra iliŋisa tautuŋagaat uyaġak aksraktinŋaniqsuaq paaŋaniñ iḷuvvivium.

³ Aasii isiqamiŋ paqinŋaitkaat timaa Atanġum Jesus.

⁴ Qanuqsausiitchaġataviksillugich taavrumuuna, tavraŋŋatchiaq iññuk malġuk makinniqsuk saniġaannun qiŋŋaġnaqtuanik annuġaaqaqtuak.

⁵ Tavra iqsitchakłutiŋ aġnat punŋarut nunamun. Iññuk uqallaŋaruk ilaiññun, Summan ivaqpisiuŋ iñuuruaq akunġanni tuquŋaruat? Uvaniinŋitchuq. Aŋiŋaruq tuqqunmiñ.

⁶ Itqaqsiuŋ ilaan uqallautaa ilivsiññun Galilee-miinŋaġmi inna,

⁷ Iġñiŋa iñuum aitchuutauniaqtuq piḷuusiqirinun, aasii kikiaktuurrauluni aŋarrauramun, suli uvluk piŋayuaŋni aŋiñiaqtuq.

⁸ Tavra aġnat itqaŋagaich Jesus uqaluŋi,

⁹ aasii utiqłutiŋ iḷuvviviŋmiñ quliaqtuaġiŋagaich tamatkua iluqaisa qulit atautchimun iḷitchitquranun, iluqaiññullu iḷaŋiññun.

¹⁰ Tavra Mary Magdalene Joanna-lu Mary-ḷu aakaŋa James, allallu aġnat piqatigivlugich quliaqtuaŋarut taavrumiŋa tiliranun iḷitchitquranun.

¹¹ Aasii taapkuali tilirat iḷitchitqurat isumaŋarut aġnat asiḷiqinivḷugich, aasii ukpiġiŋaitkaich.

¹² Aglaan Peter makinŋaruq, aasii aqpamik iḷuvviviŋmukłuni. Itchuaqami, ilaan tautuŋagai ukił̣haaġiksuat iḷuvviuġutit kisiisa. Aisaŋaruq isumaaluutigivlugich tamatkua piruat.

Iññuk Emmaus-muksaqtuak

¹³ Taavrumanivsauq uvlumi malġuk iḷaŋich aullaqsaġmiñiqsuak nunaaqqimun atiqaqtuamun Emmaus-mik, tallimat malġuktun mile-tun uŋasiksigiruamun Jerusalem-miñ.

¹⁴ Suli uqaqatigiiŋaruk avanmun tamatkunuuna iluqaisigun piruatigun.

¹⁵ Tavra uqaġataviksillugik avanmun tamatkuniŋa sivuniqsiñialavlutik atautchimi, Jesus ilaa qalliḷaaġutiŋaruq aasii pisuaqasiutivlugik.

¹⁶ Tavra tautukkaluaġaak, iḷisaqsripkaqtauŋaitchuk.

¹⁷ Tavra ilaan uqallautiŋagik, Sunaimña uqaaġutigiraqtik avanmun pisuallaptik? Tavra iliŋich nutqaŋarut, qiññaqaŋaruk taapkuak ipiqtusuktuatun.

¹⁸ Tavra igḷua atiqaqtuaq Cleopas-mik uqallaŋaruq ilaanun, Uvvailivich kisivich iglaaguruatin Jerusalem-mun naluvich sunik piŋaruanik makkunani aqulliġñi uvluni?

¹⁹ Tavra ilaan apiġiŋagik. Sut piruat? Iliŋiktali kiuŋagaak, Ivrumuuna Jesus-kun Nazareth-miukun, uqaqtaagun God-im sapiġñaqtuakun savaŋniġmiñi uqaluŋmiḷu sivuġaani God-im iluqaġmiglu iñuich.

²⁰ Qanuġlu aŋaiyyuliqsiqpaptiŋnun umialiŋnanullu aitchuutigiŋatilaaŋanik tuqutaksraġuqługu, aasii kikiaktuutivlugu aŋarrauramun.

²¹ Uvagulli niġiugigaluaqtaqput ilaagunivḷugu tasuqsairuksraun Israel-guruanik. Aaŋami taapkuatualuuŋiñmiut, paŋmapak uvva uvluk piŋayuak tamatkuaqaŋa pimmata.

²² Aasiisuli iḷaŋisa aġnat iḷaptiŋni tupaimmiraatigut. Iḷuvviviŋmugniqsuat uvlaatchaurami

²³ aasii paqinŋaitkaat ilaan timaa, aasii utiqłutiŋ uqaŋarut niptaġnivḷugich isaġulgich uqaqłutiŋ iñuunivḷugu.

²⁴ Iḷavuttauq piqatauruat uvaptiŋnun iḷuvviviŋmuŋarut, aasii paqiłługu tainnatupiaġataq aġnat uqausiatitun, aglaan ilaa tautuŋisiññaqługu.

²⁵ Tavra Jesus uqallautiŋagik, Isumatuitchutik ukpikallaitchutiglu iluqaiññik uqaqtiŋisa God-im uqalugiŋaraŋiññik.

²⁶ Qanuq uqautigiŋagaat taimani Christ nagliksaaqtuksraunivḷugu aasii God-im kamanaqsipkaġlugu.

²⁷ Tavra Jesus kaŋiqsipkaġniaŋagik uqaluŋnik inmigun iluqaiññi Bible-niittuanik, isagutivluni aglaaŋiñiñ Moses aglaaŋiññiglu iluqaiññik uqaqtiŋisa God-im.

²⁸ Tavra qalliŋarut nunaaqqimun ullaukkamiŋnun. Jesus qiññaqaŋaruq qaaŋiġñiaqtuatun.

²⁹ Tavra iliŋikta arapiaŋagaak uqaqłutik, Nayuqtiguk, qanuq uvva unnugiaqtuq suli uvluq taaqsiaqsiruq. Tavraasii ilaan isiqatigiŋagik.

³⁰ Tavra Jesus niġiqatigisaaqsikamigik, tiguŋagaa punniq aasii aŋaiyyuqqaaqłuni aviŋagaa punniq, aasii aitchuutigivlugu iliŋiŋnun.

³¹ Tavra iliŋikta iḷisaġiŋagaak, aasii ilaa qiñiġnaiŋaruq iliŋiŋniñ.

³² Tavra iliŋik uqaurrutirraqsiŋaruk avanmun, Qaariŋaitpiñuk iḷuptiŋni ilaan uqautiugaġmatiguk iglaullapta, kaŋiqsipkaġniaqługich Bible uqaluŋich?

³³ Tavra iliŋik utiqsautigillaan piŋaruk Jerusalem-mun, aasii kasuŋagaich qulit atautchimik iḷitchitqurat kasimaruat atautchimi tamatkualu piqatiŋich.

³⁴ Aasii taapkua kasimaruat uqaŋarut, Ataniq iḷumun aŋiŋaruq, aasii niptaqłuni Simon-mun.

³⁵ Tavrali iliŋik quliaqtuarraqsiŋaruk sum pisilaaŋanik apqunmi, qanuġlu Jesus iḷisaġipkaqtilaaŋanik inmiŋnun avikamiuŋ punniq.

Jesus Niptaqtuq Iḷitchitquramiñun

³⁶ Taavrumiŋa uqaġataviksillugik, Jesus ilaa makinŋaruq akunġannun, aasii uqallautivlugich, Tutqiutiqaġitchi.

³⁷ Tavra iliŋich tupaŋarut iqsitchakłutiglu, isumavlutik aliuqtuġasugalutiŋ.

³⁸ Tavra Jesus uqallautiŋagai, Summan isumaalukpisi? Summallu nalupqisukpisi isumavsiññi?

³⁹ Tautuksigik argatka isigatkalu, uvaŋapiaġatauruŋa. Savitchiŋa iḷitchuġiyumausi, qanuq ilitqusiq timaitchuq saunġitchuġlu tautuusivsisun uvamnik timiqaqtuatun.

⁴⁰ Tavra taamna uqallausiġiqqaaqługu, ilaan qiñiqtinŋagai argaŋmiñik isigaŋmiñiglu.

⁴¹ Tavra ukpiŋaitkaluallaġmiŋ quviasugataviksillugich aliuqłutiglu, ilaan apiġiŋagai, Sumik niġiñaġumiñaqtuamik piqaqpisi?

⁴² Tavra aitchuŋagaat iḷaviñiŋanik uunŋaruam iqaluum.

⁴³ Aasii ilaan tiguvlugu niġiŋagaa takkuanni.

⁴⁴ Tavrani ilaan uqallautiŋagai, Tamarra uqalutka uqautigiŋaratka ilivsiññun nayuŋŋavsi, supayaat aglausimaruat uvapkun pitqurani qaisauŋaruani Moses-kun, uqaqtiŋisigullu God-im, Psalms-niḷu nalauttuksraupiaġnivḷugich.

⁴⁵ Tavra Jesus kaŋiqsiyumiñaqsiŋagai Bible uqaluŋiññik,

⁴⁶ aasii uqallautivlugich, Inna aglausimaruq, Christ nagliksaaqtuksraunivḷugu aasii uvluk piŋayuaŋni aŋiluni tuqqunmiñ.

⁴⁷ Aasii pisigilugu ilaan piraŋa, tusaayugaaġiksuat God-im suliqutigiŋaiġutaagun itqaumayumiñaiġḷugich piḷuutit isumalitqiksuanun alġaqsruutigiraksrauvlugu nunapayaanun aullaqilugich Jerusalem-miñ.

⁴⁸ Ilivsi tautuŋaruasii tamatkuniŋa quliaqtuaġiniaġisi.

⁴⁹ Aasiuvva, uvaŋa tiliñiaġiga ilivsiññun unniqsuqłiisaa Aapama. Aglaan utaqqiruksraurusi iniqpaŋmi, God-im suaŋŋataa atqaqsiaġilugu ilivsiññun.

Jesus Mayuurrauruq Qiḷaŋmun

⁵⁰ Tavra Jesus aullatiŋagai iniqpaŋmiñ Bethany-munaglaan, suli isaaqługich argaŋni aŋaiyyutiŋagai.

⁵¹ Aŋaiyyutiniallaisa, ilaa mayuurrauŋaruq ilaiññiñ qiḷaŋmun.

⁵² Ilaisa qiksigivlugu nanġaŋagaat, aasii utiqłutiŋ Jerusalem-mun quviasuutiqpaqaqłutiŋ.

⁵³ Suli ataramik aŋaiyyuvikpaŋmiinŋarut nanġaqługu quyyavigivlugulu God.