Luke 23 - Iñupiatun Mumiksat Uqalugiksuat

Jesus Pilate-muurrauruq

¹ Tavra iluqaġmiŋ piqatigiich makinŋarut, aasii qaġġisivlugu Jesus Pilate-mun.

² Tavra iliŋisa uqautigirraqsiŋagaat uqaqłutiŋ, Iḷitchuġigikput una iñuk asiñuurriñiaqtuaguvlugu iñuptiŋnik, suli aitchuitquriŋił̣ł̣uni akiḷiutinik taxes-nik Caesar-mun, uqaqłuni ilaa Christ-gunivḷuni umialik.

³ Tavra Pilate-gum apiġiŋagaa Jesus, Umialigivatin Jew-guruat? Tavra ilaan kiuŋagaa, Tainna uqallaktutin.

⁴ Tavra Pilate uqallaŋaruq aŋaiyyuliqsiqpaŋnun iñusalaŋnullu, Patchisiksramik iḷitchuġiŋitchuŋa uumani iñuŋmi.

⁵ Tavra iliŋich katchuŋaiñŋarut uqaqłutiŋ, Ilaan aŋalayyauġai iñuich, iḷisaurrivḷuni iluqaani Judea-mi, Galilee-miñqaŋa uumuŋaaglaan inimun.

Jesus Herod-muutigaat

⁶ Tavra Pilate taamna tusaakamiuŋ, apiqsriŋaruq iñuk taamna Galilee-ġmiugummagaan.

⁷ Tavra Pilate iḷitchuġikami Jesus Herod atanniqsimakkaŋani inniġman, ilaan Herod-muktinŋagaa, Herod Jerusalem-miinmimman taavrumani piviksrami.

⁸ Tavra Herod tautukamiuŋ Jesus, ilaa quyapiaġataŋaruq, qanuq sivisuruami tautugumalaaŋavlugu, pisigivlugich tusaasuukkani ilaagun, suli tautugumaŋagaluaqtuq qanutchimik aliuġnaqtuamik savakpan.

⁹ Tavra Herod-gum sivisuuraqtuami apiqsruqtuŋagaa Jesus, aglaan ilaan kiulaiñŋagaa.

¹⁰ Tavra aŋaiyyuliqsiqpaich iḷisaurriḷḷu pitquranik makitaruat tamaani, suammakłutiŋ saŋunŋagaat Jesus.

¹¹ Tavra Herod-gum aŋuyaktiŋisalu aŋalataġiŋagaat pisaaŋŋatikun kipagivlugulu, kiisaimma annuġaalgitpaat annuġaaġipiaġataqtuanik umialiktun, aasii utiqtiłługu Pilate-mun.

¹² Tavraasii Herod-lu Pilate-lu avilaitqatigiiksinŋaruk avanmun taavrumanipiallak uvlumi, qanuq sivuani taavruma uumikkutiŋagaluaqtuak avanmun.

Jesus Tuquruksraġuġaat

¹³ Pilate tavrani ququaŋagai atautchimun aŋaiyyuliqsiqpaiḷḷu umialiŋnallu iñuiḷḷu,

¹⁴ aasii uqallautivlugich, Qaġġirriŋagivsiŋa uumiŋa iñuŋmik asiñuurriñiaqtualivḷugu iñuŋnik. Aasii qanuġitilaaqqaaqługu sivuqqavsiññi, iḷitchuġiŋitkiga una iñuk piḷuutiqaġlugu nalliannik unnii pasikkutivsi ilaanun.

¹⁵ Herod unnii iḷitchuġiŋiñmiuq pasikkutiksramik, qanuq utiqtisiññaŋammigaa uvaptiŋnun. Una iñuk piitchuq sumik tuqurrutauyumiñaqtuamik ilaanun.

¹⁶ Tavra ipiġaqtuqtisiññaġniaġiga aasii tigutaaqtauŋaiqsillugu.

¹⁷ [Tavra Pilate tigutaaqtauŋaiqsitchiruksrausuuruq atautchimik tigutaaqtamik niqinaqimmata qulaurrusiqiviŋmun itqaunmi.]

¹⁸ Tavra iluqaġmiŋ iñusalaich atautchikun nipaallaŋarut, Tuqutauli taamna iñuk, aasii tigutaaqtauŋaiqsillugu Barabbas.

¹⁹ Barabbas tigutaaqtauruaq pisigivlugu tuavaallaktitchiŋaniŋa iniqpaŋmi iñuaqłuniḷu.

²⁰ Pilate-gum nivliutitqikkalualgitkai atausivsaami, kipiġniuġaluaqłuni tigutaaqtauŋaiqsitchukługu Jesus.

²¹ Tavra iliŋich saqłarraqsigiññaŋarut, Kikiaktuutili, kikiaktuutili aŋarrauramun.

²² Piŋayuaŋni Pilate-gum uqallautigalualgitkai, Summan? Sumik pigiitchuamik piŋava? Iḷitchuġiŋitchuŋa ilaani qanusipayaamik patchisiksramik tuqurrutauyumiñaqtuamik. Tavra ipiġaqtuqtisiññaġlugu tigutaaqtauŋaiqsinniaġiga.

²³ Tavra iñuich katchuŋaiñŋarut, saqłakłutiŋ Jesus kikiaktuutiraksraupiaġnivḷugu aŋarrauramun. Kiisaimmaa saqłakłutiŋ akimavut.

²⁴ Tavra Pilate sivunniiŋaruq piruksraġuqługu kipiġniuġutaat.

²⁵ Tavra ilaan tigutaaqtauŋaiqsinŋagaa iñuk isiqtitauruaq tigutaaġviŋmun tuavaallaktitchiñikun iñuaġnikullu, ilaisa apiqsriaġikkaŋat, aglaan Jesus ilaan aitchuutigiŋagaa ilaiññun qanuq pisukparruŋ pitquvlugu.

Jesus Kikiaktuurrauruq Aŋarrauramun

²⁶ Tavra aullautisaġniallaan Jesus, paaŋagaat iñuk Simon Cyrene-miu, tikitchaġataviksuaq iniqpaŋmun. Tigguġluŋagaat aasii iqsriqł̣ugu aŋarrauramik, iqsruquvlugu aquagun Jesus.

²⁷ Tavra iñusalaich, maliŋagaat aquagun aġnallu qiaqpakługu Jesus.

²⁸ Tavra Jesus kiŋiaqługich uqallautiŋagai, Aġnaat Jerusalem-mi, qirratigiŋaiqsiŋa uvaŋa. Qirratigisitchi ilivsiññun miqłiqtuvsiññullu.

²⁹ Qanuq uvlut tikiññiaqtut iñuich uqallagniaġmata, Quviasuglich miqłiqsiḷaitchuat, siŋaiyaulaitchuallu, miluktitchiŋaitchuallu qaŋaunnii.

³⁰ Taimanigu iñuich uqaġniaqtut iġġiñun, Kattaqisigut, Qimiqqamullu iriqtigut.

³¹ Qanuq tainna pikparruŋ iñuk patchisaitchuaq paŋmapak, qanutun piñiaġmivat iñuŋnun taimanigu?

³² Malġuktauq allak, pitquranik kamaksriŋitchuaq, tuqutauruksraġuŋammigaich piqatigilugu Jesus.

³³ Tavra tikiññamik inimun atiqaqtuamun Niaquġruamik, tavrani kikiaktuutiŋagaat Jesus aŋarrauramun, malġuglu pitquranik kamaksriḷaitchuak ilaan avatiŋnun.

³⁴ Tavra Jesus uqallaŋaruq, Aapaaŋ, suliqutigiŋaiġuŋ itqaumayumiñaiġḷugu piḷuutaat, qanuq nalurut suliqitilaamiŋnik. Suli saaptautigiŋagaich autaaġukługich ilaan annuġaaŋi.

³⁵ Tavra iñuich makitaŋarut tamaani takunnaqłutiŋ. Aglaalli Jew-guruat umialiŋnaŋich kipakłiŋarut ilaanik uqaqłutiŋ, Ilaa annaurriŋaruq allanik, annautimmiḷi inmiñik, ilaa Christ-gugumi God-im Piksraqtaaŋa.

³⁶ Aŋuyaktit kipagiŋammigaat, ullakługu aitchuŋagaat wine-mik,

³⁷ uqallautivlugulu, Umialigikpatin Jew-guruat, annauttuiñ iliŋnik.

³⁸ Ukua uqaluich aglautiŋammigaich qulaanun, Unauvva Umialgat Jew-guruat.

³⁹ Igḷuata pitquranik kamaksriḷaitchuam niviŋaruam pisaaŋaŋammigaa, uqaqłuni, Christ-guguvich, annautuiñ iliŋnik uvaguglu annautilunuk.

⁴⁰ Tavra igḷuata suaŋagaa igḷuni uqaqłuni, Sivuuġagiŋitpiuŋ God tainnatuttauq tuquaqsiḷḷamnuk?

⁴¹ Uvaguk iḷumun piḷḷuataġaatiguk, qanuq aitchuusiaqaqtuguk nalaunŋaruamik savaaptiŋnun, aglaan una iñuk piŋaitchuq sumik pigiitchuamik.

⁴² Tavra ilaa uqallaŋaruq Jesus-mun, Jesus, itqaumayumagiŋma qaiguvich umialiguġlutin.

⁴³ Tavra Jesus kiuŋagaa, Iḷumun uqallautigikpiñ, uvlupak itqatiginiaġiŋma Nakuuvlutiŋ Ayuruat Irvianni.

Jesus Tuquruq

⁴⁴ Tavra uvluq qitiqqaqpalliġman siqiñiq taaqsiŋaruq nunalu iluqani piŋasunugataqtillugu.

⁴⁵ Tavra talukiyaaŋa aŋaiyyuvikpaum aliŋaruq malġuułłuni.

⁴⁶ Tavrani Jesus nipatusivḷuni uqallaŋaruq, Aapaaŋ, qaitkiga ilitqusiġa iliŋnun munaġitquvlugu. Aasii taamna uqallausiġianikługu aniġniġiŋaruq.

⁴⁷ Tavra aŋuyaktit atanauraŋata iḷitchuġikami taapkuniŋa piruanik, ilaan nanġaŋagaa God uqallakłuni, Nalupqinaitchuamik una iñuk patchisaiñŋaruq.

⁴⁸ Tavra iluqaġmiŋ iñusalaich kasimaruat qiñiqtuaġiaqłutiŋ, tautuanikamiŋ taapkuniŋa piruanik, utiŋarut aiyaavlutiŋ, atqunaq iłuiḷḷiuġutiqaqłutiŋ.

⁴⁹ Suli iluqaġmiŋ Jesus aunniuqsimakkaŋisa, aġnallu maliktuat ilaanik Galilee-miñ, makitaŋarut taavaniqpani qiñiqłutiŋ tamatkuniŋa.

Jesus Iḷuvviuġaat

^50-51 Tavra iñuqaŋammiuq atiqaqtuamik Joseph-mik qairuamik Jew-guruat nunaaqqianniñ Arimathea-miñ. Ilaa iḷaugaluaqłuni aŋaiyyuvikpaum uqaqsitaaqtitchiriŋiñun, iviġaumagiŋaitkaa sivunniutaat savaaŋallu. Joseph iñulluatauŋaruq isumakkusiaqaġluataqłuniḷu niġiugivlugulu tikiññiksraŋa God-im atanniqsimmataa nunami.

⁵² Taamna iñuk ullautiŋaruq Pilate-mun aasii apiqsriaġivlugu Jesus timaa.

⁵³ Tavra ilaan atqaŋagaa timaa, aasii nimaaqługu ukił̣haaġiksuamik iḷuvviuġunmik, aasii iḷuviqługu uyaġagruakun iḷuvviviḷiamun, iñuum qaŋaunnii iḷuviqtauvigiŋaisaŋanun.

⁵⁴ Taamna uvluq Jew-guruat Itqanaiyaġviat, savaiññiq isagutiaqsivḷuni.

⁵⁵ Tavra aġnat maliŋaruat Jesus-mik Galilee-miñ piqasiŋagaat Joseph, aasii tautukługu iḷuvvivik, qanuġlu Jesus timaa iḷisilaaŋanik.

⁵⁶ Tavraniasii aiŋarut, aasii itqanaiyaqłutiŋ tivraġiksautinik uqsruġutiniglu atugaksramiŋnik Jesus timaanun. Savairraqsimmata iliŋich minġuiqsiŋarut kamagivlugich pitqurat.