Luke 22 - Iñupiatun Mumiksat Uqalugiksuat

Sivunniuġun Tuqutchukługu Jesus

¹ Niqinaqivik Puvlaksiŋaitchuamik Punniġmik qalliŋaruq, atiqaqtuaq Itqaunmik Qulaurrusiqiviŋmun.

² Aasii aŋaiyyuliqsiqpaich iḷisaurriḷḷu pitquranik piviksraqsiuŋarut qanuġlugu tuqutchukługu Jesus, suiḷauriḷutiŋ sivuuġagivlugich iñuich.

Judas Aŋiqtuq Aitchuutigisukługu Jesus

³ Tavra Satan isiŋaruq Judas-mun taggisiqaqtuamun Iscariot-mik, iḷauruaq qulit malġuŋnun iḷitchitquranun.

⁴ Ilaa aullaŋaruq aasii uqaqatigiaqsivḷugich aŋaiyyuliqsiqpaiḷḷu atanauraŋiḷḷu aŋaiyyuvikpaum munaqsriŋisa, qanuġlugu aitchuutigisukługu Jesus iliŋiññun.

⁵ Tavra iliŋich quyatchaŋarut, suli aitchuġuŋagaat maniŋñik.

⁶ Tavra Judas aŋiŋammiuq, aasii piviksraqsiugaqsivḷuni aitchuutigisukługu Jesus ilaiññun iñuich quviġlugich.

Jesus Niġiyumiññaksaqtuq Qulaurrusiqiviŋmi

⁷ Tavra tikiñŋaruq uvlua Puvlaksiŋaitchuam Punniġum, taamna qulaurrusiqutim imnaiyaam tuqutauviksraŋa.

⁸ Tavra Jesus tiliŋagik Peter-lu John-lu uqallakłuni, Aullaġlutik itqanaiyautiyaqtuqtigut qulaurrusiqinikun niġiyumaugut.

⁹ Iliŋikta apiġiŋagaak, Sumun itqanaiyaġiaquvisiguk taavrumiŋa.

¹⁰ Ilaan kiuŋagik, Naalaġnisitchik. Aullaġitchik iniqpaŋmun, aasii paaġniaġaatik iñuum saagaqtuam qattamun imiġmik. Malikkumagiktik,

¹¹ aasii sumupayaaq isiqpan, uqallautiyumagiktik iñua iglum, Iḷisaurri uqallaktuaq, Sumiitpa tuyuġmiaqaġvik, niġġiviksraqput iḷitchitquratkalu qulaurrusiqunmik?

¹² Tavra iḷisautiniaġaatik inituruamik qiḷaguamik upaluŋaitchuamik. Tavrani itqanaiyautiyumagiptigut.

¹³ Tavra aullaŋaruk, aasii paqinŋagaak Jesus uqausiatun inmiŋnun, aasii iliŋik itqanaiyaŋaruk qulaurrusiqutiksramik.

Atanġum Nullautchiġvia

¹⁴ Tavra ikarraq tikiñman, Jesus aquvinŋaruq niġġiviŋñun piqatigivlugich tilirat iḷitchitqurani.

¹⁵ Tavra ilaan uqallautiŋagai, Piyummatigipiallakługu niġiqatigiyumaŋagivsi uumiŋa Qulaurrusiqunmik nagliksaaŋaiñŋaġma.

¹⁶ Qanuq uqallautigivsi, niġitqigñiaŋitkiga tikitchiaġilugu sivunipiaŋa atanniqsimaviani God-im.

¹⁷ Tavra ilaan tiguŋagaa qallugauraq, aasii quyaanikami God-mun, uqallaŋaruq, Tigulugu taamna, autaaqsiuŋ ilivsiññun.

¹⁸ Tavra uqallautigivsi paŋmapaŋmiñ aglaan, imiġniaŋitchuŋa uumiŋa wine-mik qaiñiŋanun aglaan atanniqsimavia God-im.

¹⁹ Jesus tiguŋagaa punniq, aasii quyaanikami God-mun, aviŋagaa aitchuutigivlugu ilaiññun uqallakłuni, Tavra taamna timiga aitchuutauruaq ilivsiññun. Taamna pisiuŋ itqaummatigilugu uvamnun.

²⁰ Tainnatun suli aitchuŋagai qallugauramik nullautchianikamiŋ, uqallakłuni, Una qallugauraq imaqaqtuq uvaŋa aumnik maqipkaqtauruamik pisigivlusi. Taavrumuuna God-im nalupqinaiġñiaġaa sivunniuġutini iñuŋnun.

²¹ Aglaattauq uvva iñuk uvaniittuq niġġiviŋñi aitchuutiginniktuaq uvamnik.

²² Qanuq Iġñiŋa iñuum tuqutinniaqtuq God-im sivunniutaatun, aglaan qanutun naglignaqtigiruq taamna iñuk aitchuutiginniktuaq ilaanik.

²³ Tavra apiqsruqtuutirraqsiŋarut avanmun nalliqsiŋ aitchuutiginnigniaġmagaan ilaanik.

Uqavaaġun Kamanaġugnikun

²⁴ Uqavaarraqsiŋarut iḷitchitqurat, nalliqsiŋ isumakkusiaqaġniaqtilaaksraŋanik kamanaġniqsraulugu.

²⁵ Tavra Jesus uqallaŋaruq ilaiññun, umialiŋich Jew-guŋitchuat atanniqsimasuugaich iñutiŋ suli tamatkua umialgich tairauvlutiŋ anniqsuiriñik.

²⁶ Aglaan tainna ilivsi piñiaŋitchusi. Aglaan kamanaġniqsrauruaq akunnavsiññi iḷiḷi nukaqłiqsun, suli aullarriruaq kivgatun.

²⁷ Nalliak kamanaġniqsrauva, iñuk aquppiruaq niġġiviŋñi, naagga niqłiqsuqtuaq? Taamna aquppiruaq niġġiviŋñi. Aglaan uvaŋa kivgaġimmatun itkivsiŋa.

²⁸ Ilivsi nayuŋagivsiŋa iluqaiññi uuktuaġusiamni.

²⁹ Aapamali aitchuŋammaŋa atanniqsimmanmik, tainnatulli aitchuġniaġmigivsi atanniqsimmanmik,

³⁰ aasii niġiñiaqtusi imiġlusiḷu niġġivimñi atanniqsimavimñi, suli aquppiḷusi umialgich aquppiutaŋiññi isivġiġḷugich qulit malġuk maŋŋuġiich Israel-guruat.

Jesus Uqautigigaa Piŋaiñŋaan Peter-m Piiḷaaġniksraŋa

³¹ Simon, Simon, naalaġniiñ. Satan uuktuaġumiñaqsiŋagaasi iluqasi, nunaliqiritun palauvaksranik amiġaiyairuatun.

³² Aglaan Simon, aŋaiyyutiŋagikpiñ ukpiġutaiquŋił̣ł̣utin, aasii isumalitqianikkuvich, suaŋasiḷaagaksraġigitin aniqatiitin.

³³ Tavra Peter-m kiuŋagaa, Ataniiq, itqanaitchuŋa tigutaaqtauqatigiyumiñaqłutin tuquqatigiyumiñaqłutillu.

³⁴ Jesus uqallautiŋagaa, Uqallautigikpiñ Peter, tiŋmiaq nipanniaŋitchuq uumani uvlumi, ilivich piŋasuiqsuaġlutin piiḷaaganiksiaġilutin naluniḷuŋa.

Maniqaġvik Puukataġlu Savikpaglu

³⁵ Tavra Jesus uqallautiŋagai, Taimani aullaqtinnavsi maniqaġviił̣aaqłusi puukataiḷaaqłusiḷu aluġuġutaiḷaaqłusiḷu, sumik inuqtuŋavisi? Iḷitchitqurat kiuŋagaat, Inuqtuuraŋaitchugut sumik.

³⁶ Ilaan uqallautiŋagai, Aglaan paŋmapak, kiñaliqaa maniqaġviqaqtuaq puukataqaqtuaġlu saagaġligik. Suli kiñaliqaa savikpaitchuaq tauqsiġḷi savikpaŋmik tuniḷugu quppiġaani.

³⁷ Qanuq uqallautigivsi, Bible uqaluat sivuniqaqtuaq uvamnik inna nalauttuksrauruq, “Ilaa kisiuqatauŋaruq piḷuusiqirinun.” Suli supayaat aglausimaruat Bible-ni uvapkun taŋŋiġñiaqtut.

³⁸ Tavra iḷitchitqurat uqallaŋarut, Tautugiñ Ataniiq, uvva malġuk savikpaak. Ilaan uqallautiŋagai, Naamaruk.

Jesus Aŋaiyyuruq

³⁹ Tavra Jesus aniŋaruq, aasii aullaqłuni piḷġusikaamisun iġġimun atiqaqtuamun Olives-mik. Iḷitchitqurat maliŋammigaat.

⁴⁰ Tavra tikiññami inimun ilaan uqallautiŋagai, Aŋaiyyusitchi payaritquŋiḷḷusi ikł̣igutchaktinniaġunmun.

⁴¹ Tavra ilaa taikuŋaqtaallavsaaŋaruq iliŋiññiñ uyaġaŋmik miḷuqsalgutilaavalliqsun, aasii sitquqłuni aŋaiyyuŋaruq.

⁴² Aapaaŋ, pisuutigigupku, piiġuŋ nagliksaaġutiqpak uvamniñ. Aasiivsauq uvaŋa pisuutiŋiḷaaptun, aglaan ilivich pisuutin piḷi.

⁴³ Tavra tavrani isaġulik qiḷaŋmiñ niptaŋaruq ilaanun aasii suaŋŋasiqł̣ugu.

⁴⁴ Aasii iłuiḷḷiuġutiqpaqaqłuni ilaa aŋaiyyuŋaruq qapiŋaipiaġataqłuni, suli ilaan siiqsipkaġniŋa kutaaŋaruq nunamun auktun kusiqsuatun.

⁴⁵ Tavra makinnami aŋaiyyuŋaiqł̣uni, ilaan ullaŋagai iḷitchitqurat suli tautuŋagai siñiktuat, isumaaqpaił̣ł̣utiŋ.

⁴⁶ Tavra ilaan uqallautiŋagai, Summan siñikpisi? Makillusi aŋaiyyusitchi payariŋitchumagaasi ikł̣igutchaktinniaġutim.

Tigurauruq Jesus

⁴⁷ Tavra Jesus uqaġniaqtillugusuli, iñusalaich qaiŋarut, suli taamna Judas-mik atilik, iḷaŋat qulit malġuk iḷitchitqurat, aullarrivḷuni iliŋiññik. Ilaan ullaŋagaa Jesus kunigiaqługu.

⁴⁸ Tavra Jesus uqallaŋaruq ilaanun, Judas, aitchuutigiyumaviuŋ Iġñiŋa iñuum kunigḷugu?

⁴⁹ Tavra iḷitchitqurat avataaniittuat Jesus, iḷitchuġikamiŋ suna piaqsisilaaŋanik, uqallaŋarut, Ataniiq, savikpagaġniaqpisa?

⁵⁰ Tavra iḷaŋata anauŋagaa aŋaiyyuliqsiqpaum kivgaŋa, aasii siutaiqł̣ugu taliqpianik.

⁵¹ Tavra Jesus iñiqtiŋagai, Tavraaġitchi. Aasii ilaan aksiuŋagaa siutaa iłuaqsivḷugu.

⁵² Tavra Jesus uqallaŋaruq aŋaiyyuliqsiqpaŋnun atanauraŋiññullu aŋaiyyuvikpaum munaqsriŋisa umialiŋnanullu tiguriyaqtuqtuanun inmiñik, Qaiŋavisi tigligayuktimik pisaġmatun, savikpaŋnik anauttaniglu satkuqaqłusi tigusaqtuqłuŋa?

⁵³ Nayuqtigiraġikavsi uvlumiñ uvlumun aŋaiyyuvikpaŋmi tigulaitkivsiŋa. Aglaan piviksraqsi nalautittuq, taavrumalu suaŋŋataata taaqtuam.

Peter-m Piiḷaaġigaa Jesus

⁵⁴ Tavra ilaisa tigutaaŋagaat Jesus suli aullautivlugu aŋaiyyuliqsiqpaum igluanun. Peter maliġuaŋaruq aquatigun uŋasikł̣uni.

⁵⁵ Tavraasii igniqsuaniŋmata qitqanun siḷalliata kasimavium suli aquptaaqłutiŋ atautchimun, Peter aquvinŋammiuq akunġannun.

⁵⁶ Tavrani niviaqsiam kivgam, tautukługu Peter aquppipkaqtillugu igniġum qaummaŋani uqallaŋaruq, Una iñuk tuvaaqatauŋammiruaq Jesus-mun.

⁵⁷ Tavra Peter-m piiḷaaġiŋagaa taamna uqallakłuni, Aġnaaq, ilaa uvaŋa nalugiga.

⁵⁸ Akkuliurallaksiññaġman iñuum tamaaŋŋa tautulgitkaa Peter aasii uqallakłuni, Ilivich uvva iḷagimmigaatin. Tavra Peter uqallaŋaruq, Aŋuun, iḷagiŋitkaanŋa.

⁵⁹ Taavruma aquagun ikarraq pianikpalliġman, allasuli iñuk katchuŋaiqsruqłuni uqallaŋaruq, Nalupqinaitchuamik una iñuk piqatauŋaruq Jesus-mun qanuq Galilee-ġmiugummiuq.

⁶⁰ Tavra Peter uqallaŋaruq, Aŋuun, naluruŋa sumik uqautiqaqtilaaġnik. Tavra tavrauvvaa, uqaġniaqtillugusuli, tiŋmiaq nipanŋaruq.

⁶¹ Aasiisuli Ataniq qiviaqłuni qiñiŋagaa Peter. Tavra Peter itqaiŋaruq uqaluanik Atanġum uqallautaanik inmiñun, Sivuani tiŋmiam nipanniksraŋan uvlupak, piiḷaaġiniaġiŋma piŋasuni naluniḷuŋa.

⁶² Tavra Peter aniŋaruq aasii qiapiaġataŋaruq.

Jesus Kipagigaat Anaumikł̣ugulu

⁶³ Tavra taapkua munaqsriruat Jesus-mik kipagiŋagaat anaullaqługu.

⁶⁴ Suli irrak mattutchiqł̣ugik apiġiraġaŋagaat, Kia qakiqpatin? Nalautchaġiñ.

⁶⁵ Suli iliŋich uqallaŋarut iñugiaktuanik uqaluŋnik pisaaŋavlugu uqamaqłuutivlugulu.

Jesus Apiqsruqtuġaat Uqaqsitaaġviŋmi

⁶⁶ Tavra uvluġman, umialiŋnaŋich Jew-guruat aŋaiyyuliqsiqpaiḷḷu iḷisaurriḷḷu pitquranik katinŋarut atautchimun, aasii qaġġisiŋagaat Jesus uqaqsitaaġviŋmiŋnun.

⁶⁷ Apiġiŋagaat, Ilivich Christ-guvich? Uqallautitigut. Tavra Jesus kiuŋagai, Uqallautigaluaġuvsi ukpiġiniaŋitkivsiŋa.

⁶⁸ Suli apiġigaluaġmiguvsi kiummagaaġma, kiuniaŋiñmigivsiŋa nalaunŋaruamik.

⁶⁹ Aglaan paŋmapaŋmiñ Iġñiŋa iñuum aquppiutchiqsauniaqtuq taliqpiata tuŋaanun Sapiġñaqtuam God-im.

⁷⁰ Tavra iluqaġmiŋ uqallaŋarut, Uvvailivich Iġñiġivatin God-im? Tavra Jesus kiuŋagai, Uqallaktusi Iġñiġinivḷuŋa.

⁷¹ Tavra iliŋich uqallaŋarut, Iñuvsaanik pasiññiktuksranik ilaanik piqaqtuksrauŋaiqsugut. Uvagut paŋmapak tusaaganikkivut ilaan uqaluŋi Iġñiġinivḷuni God-mun.