Luke 21 - Iñupiatun Mumiksat Uqalugiksuat

Uiḷgaŋaruam Aitchuutaa

¹ Jesus qiviaqłuni tautuŋagai suġalliruat iksriruat aitchuunmiŋnik aŋaiyyuvikpaum maniqaġvianun.

² Suli tautuŋammigaa iḷiappauruaq uiḷgaŋaruaq iksriruaq malġugnik kannuyaŋnik maniuraŋnik.

³ Tavra Jesus uqallaŋaruq, Iḷumun uqallautigivsi, una iḷiappauruaq uiḷgaŋaruaq ikisił̣hamaaqtuq iluqaiññiñ allaniñ iñuŋniñ.

⁴ Qanuq iluqaġmiŋ ikisiŋarut piukkaġniġmiŋniñ, aasii ilaa pisuksiuniġmiñiñ ikisiŋaruq iluqaanik pimiñik, iñuusautiksratualuŋmiñikunnii.

Jesus Uqautigigaa Suksraunġiqsauniksraŋa Aŋaiyyuvikpaum

⁵ Tavra iñuich iḷaŋisa uqallausiġimmarruŋ aŋaiyyuvikpak, qanutun qiñiyunaġniŋa uyaġagruaġiksuanik aitchuutiniglu God-mun piqaqłuni, Jesus uqallaŋaruq,

⁶ Tautuksigik tamatkua iluqaisa. Taimanigu kisiŋŋuqtaqaġumiñaitchuq uyaqqaŋnik qaliġiiksuaŋnik ulġutauniaŋitchuaŋnik.

Iłuiḷḷiuġutit Nagliksaaqtirrusiallu

⁷ Tavra ilaisa apiġiŋagaat, Iḷisaurrii, qakugu taamna piñiaqpa? Suli sumik nalunaiñŋutaqaġniaqpa taamna piyumaagaqsikpan?

⁸ Tavra Jesus uqallaŋaruq, Qaunagisitchi. Iñuŋmun sagluqipkaġnasi. Qanuq iñugiaktuat iñuich qaiñiaqtut uvaŋauŋŋuaqtuat uqaġlutiŋ, Uvaŋa Christ-guruŋa, uqaġlutiglu, Tavraġuutigaatigut. Ilivsi malignagich.

⁹ Suli tusaaguvsi aŋuyaŋnik suli piallakłutiŋ sivuniksraiḷḷitchuanik, iqsiñasi, qanuq tamatkua piqqaaqtuksraurut, aglaan isuksraq tikiñŋaitchuq suli.

¹⁰ Tavra Jesus uqallautivsaaŋagai, Nunauruat aŋuyaŋniaqtut allanun nunauruanun. Suli umialiqaqtuat aŋuyaŋniaqtut allanun umialiqaqtuanun.

¹¹ Nunalu aulaviñaqtaġniaqtuq, suli sumiḷiqaa inini niqaiḷḷiuqtaġniaqtut naŋirrutiqpaiḷḷu, suli piñiaqtut iqsiñaqtuat kamanaqtuallu allayuaġnaqtuat siḷami.

¹² Aglaan tamatkua iluqaġmiŋ sivuanni, iñuich tiguniaġaasi nagliksaaqtillusiḷu. Aitchuutiginiaġaasiḷu aŋaiyyuviŋñun tigutaaġviŋñullu, qaġġirrauraġaġniaġmiusi sivuġaannun umialgich atanaurallu pisigiluŋa.

¹³ Tavrani nalautinniaqtuq ilivsi quliaqtuaġviksraqsi tusaayugaaġiksuanik.

¹⁴ Tigukpasi uŋiarrisiginagu sivuani qanuq uqaġniksraqsi.

¹⁵ Qanuq aitchuġniaġivsi uqaluksravsiññik isumattutiksravsiññiglu. Nalliataunnii uumigirivsi igḷutuġumiñaisaŋannik qapiqtaġumiñaisaŋanniglu.

¹⁶ Aitchuutigiraġaġniaġaasi unnii aŋayuqaavsi aniqatiivsiḷu nanmiñikkaluavsiḷu avilaitqatikkaluavsiḷu, aasiisuli iḷasi tuqunniaġaich.

¹⁷ Uumiginiaġaasi iñupayaat pisigiluŋa.

¹⁸ Aglaan nalupqinaitchuamik annaurrauniaqtusi, nusaqsiunnii atausiq tammaŋiñmatun.

¹⁹ Qapiġnasi suuramik-unnii, qanuq qapiŋitkuvsi, annautiniaġisi iñuggutisi.

Jesus Uqautigigaa Suksraunġiqsauniksraŋa Jerusalem

²⁰ Tavraaglaan tautukkuvsiuŋ Jerusalem avanniqparruŋ aŋuyaich, tavrani iḷisimayumausi suksraunġiqsauniksraŋa qallisilaaŋanik.

²¹ Tavraniasii tamatkua Judea-miittuat pigruġlich iġġiñun, suli tamatkua iniqpaŋmiittuat aullaġlutiŋ, suli tamatkua nunamiittuat isiġnagu iniqpak.

²² Qanuq tavrani isagutiniaqtut tatavsausiaksraŋich iñuich nalautitchaġlugich iluqaisa Bible uqaluŋich.

²³ Qanutun naglignaqtiginiaqtut aġnat siŋaiyauruat, aakauruallu miqłiqtuuraqaqłutiŋ. Qanuq kamanaqtuaq iłuiḷḷiuġutiqpak qaiñiaqtuq nunamun qinnautaalu God-im ukunuŋa iñuŋnun.

²⁴ Iñuich savikpaŋnik tuquġaġniaġaich, suli iñuich tigutaaqtaulutiŋ nunapayaani. Suli Jerusalem aŋalanniaġaat Jew-guŋitchuat, piviksraŋat Jew-guŋitchuat nalaulġataqtillugu.

Qaiñiksraŋa Iġñiŋata Iñuum

²⁵ Tavra siqiñiġmi tatqimiḷu uvluġianiḷu allanaqtuat piyumaaqtut kiliktuutit iñuŋnun. Suli nunami iluqaani nunauruat tutqiiḷiñiaqtut qanuqsausiiġḷutiglu sutigun iqsitchautaullaruatigun ulivrigaqpaktuatun taġiutun qasaqtaqtuatullu qaiḷḷiqsun.

²⁶ Iñuich sayaiġñiaqtut sivuuġavaiḷḷutiŋ sutigun piruatigun nunami iluqaani, qanuq qaummatit siḷamiittuat uniuqtinniaqtut inimiŋniñ.

²⁷ Tavraniasiiñ tautugniaġaat Iġñiŋa iñuum qairuaq nuvuyakun suaŋŋatiqaġluni suli kamanaqtuamik qaumaniġmik.

²⁸ Tavra tamatkua piraġaaqsikpata, qiviaġitchi qunmun suli aaġluġlusi, qanuq annaurrauniksraqsi qalliruq.

Iḷisaksraq Fig Napaaqtumiñ

²⁹ Tavra Jesus quliaqtuaġutiŋagai uuktuunmik. Tautuksiuŋ fig napaaqtua, iluqaisalu napaaqtut.

³⁰ Tavra tautukavsigik napaaqtut akutuqpaŋich nausaġataaqsimmata, iḷisimarusi upinġayasisilaaŋanik.

³¹ Tainnatuttauq, tautukkuvsigik tamatkua iqsiñaqtuat nalaurraqsikpata, iḷisimaniaqtusi God-im atanniqsimmataa qallisilaaŋanik.

³² Iḷumun uqallautigivsi, ukua iñuich tuquaniŋniaŋitchut iluqaisa tamatkua nalaunŋaunnagich.

³³ Qiḷaglu nunalu piiġñiaqtuk, aglaan uqalutka piiġñiaŋitchut.

Qaunagisitchi

³⁴ Aglaan qaunagisitchi ilivsiññun. Aptatiqaġnasi niqinaqivaił̣aglusi imiŋasiḷusiḷu, suli uŋiarrisigilugich iñuggutisi, qanuq iḷaanni taamna uvlua Atanġum qaiñiaqtuq tavraŋŋatchiaq niġiuŋisillusi.

³⁵ Qanuq taamna uvluq qaiyumaaqtuq iluqaiññun iñupayaanun nunamiittuanun, niġiiḷḷautiluni naniġiaq umiksaġmatun.

³⁶ Aglaan ilivsi quviqtaiḷiyumausi ataramik, aŋaiyyuuġlusi suaŋŋatiqaġuglusi pillukkumiñaġlugich sugaluaġnasi iluqaisa tamatkua piyumaaqtuat, suli makitayumiñaġuglusi sivuġaani Iġñiŋata iñuum.

³⁷ Tavra Jesus uvlutuaġman iḷisaurriŋaruq aŋaiyyuvikpaŋmi, aasii unnuaġmagu unnuiyaqtuqłuni iġġimun atiqaqtuamun Olives-mik.

³⁸ Aasii uvlaatchaurami iñuich iluqaġmiŋ ullagaġigaat aŋaiyyuvikpaŋmun naalagiaqługu.