Luke 2 - Iñupiatun Mumiksat Uqalugiksuat

Jesus Aniñiŋa

¹ Taipkunani uvluni Caesar Augustus pitquraliŋaruq nunam iñupayauraŋi atanniqsimakkani atchiitquvlugich.

² Taamna atchiiñiq piqqaaŋaruq Quirinius atanauraumman Syria-mi.

³ Tavra iñupayaat atchiiyaqtuaŋarut ilaisa nanmiñiq iniqpaŋmiŋñun.

⁴ Tavraptauq Joseph aullaŋammiuq Galilee-miñ, iniqpaŋmiñ Nazareth-miñ, Judea-mun iniqpaŋanun David, atiqaqtuamun Bethlehem-mik, qanuq ilaa David-gum kiŋuniġivlugu.

⁵ Joseph atchiiyyaqatigiŋagaa Mary, tuvaaqatiksrautini, siŋaiyauruaq.

⁶ Tavra tavraniillaġmiŋ, iġñiviksraŋan tikiutiŋagaa.

⁷ Tavra iġñiŋaruq aŋayukłiġmik aŋunmik aasii nimmaaŋagaa miquŋaitchuanik ukił̣haanik, aasii iḷivḷugu niġrutit niġġiviannun, qanuq iniksraiñŋarut tukkumaviŋmi.

Isaġulgich Niptaqtut Imnaiḷiqirinun

⁸ Tavra tamaani nunami imnaiḷiqirit qaunaksriŋarut imnaimiŋnik unnuami.

⁹ Tavra Atanġum isaġulgata niptaġvigiŋagai, suli qaumanġa Atanġum qaummaġiksinŋaruq avataannun, aasii iqsiḷiŋarut.

¹⁰ Tavra isaġulgum uqallautiŋagai, Iqsiñasi, qanuq uvva, quliaqtuaġutiyaqtuġivsi tusaayugaaġiksuanik iñupayaat quviasuutiqpaginiakkaŋiññik.

¹¹ Qanuq uumani unnuami aniruq annaurriksi, iniqpaŋani David, Christ-guruaq Ataniq.

¹² Aasiuvva iḷitchuqqutiksraqsi ilaagutilaaŋanik. Ilivsi paqinniaġiksi miqłiqtuuraq nimmaaŋaruaq miquŋaitchuanik ukił̣haanik, suli nalavluni niġrutit niġġivianni.

¹³ Tavra tavraŋŋatchiaq isaġulik piqasiŋagaat isaġulisalaich nanġaqługu God, suli uqaqłutiŋ,

¹⁴ Nanġaqtauli God qiḷaŋmiittuaq, suli nunami aŋuyautairrutiqaġli akunġanni iñuich ilaan iviġaumagikkaŋisa.

¹⁵ Isaġulgich qiḷaŋmuaniŋmata, imnaiḷiqirit uqaŋarut inmiŋnun, Aullaqtauvagut Bethlehem-mun tautugiaġlugu taamamna piruaq, Atanġum kilgutigikkaŋa uvaptiŋnun.

¹⁶ Tavra qilamiqsruqłutiŋ aullaŋarut, aasii paqiłługich Mary-ḷu Joseph-lu miqłiqtuuraġlu nalaruaq niġrutit niġġivianni.

¹⁷ Tavra tautuqqaaqługu, uqautigiŋagaat uqaluk uqausiusiaqtik taavrumuuna miqłiqtukun.

¹⁸ Aasii iluqaġmiŋ iñuich tusaaruat imnaiḷiqiriniñ uqaluusiamiŋnik aliuŋarut.

¹⁹ Mary-vḷiasii itqaumagiŋagai isumalaaġutigivlugich iluqaisa piruat.

²⁰ Tavra imnaiḷiqirit utiŋarut, kamanaqsiḷiqługu nanġaqługulu God iluqaisigun tusaaramikkun tautukkamikkullu uqausiusiamiktun.

Jesus Atchiġaat

²¹ Tavra tallimat piŋasut uvlut naanmata, nalunaiñŋutchiqsauganiŋman, atchiqsauŋaruq Jesus-mik, atchiutiksrirrutaanik isaġulgum siŋaiyaagusaŋaiñŋaan.

Jesus God-mun Aitchuutauruq Aŋaiyyuvikpaŋmi

²² Nalautinman Mary-vḷu Jesus-lu aullaġviksraŋak aŋaiyyuvikpaŋmun nalautitchiyaqtuġlutiŋ Moses pitquraŋiñik miqłiqtuq animman, Jerusalem-muŋarut aitchuutigiyaqtuqługu miqłiqtuqtiŋ Ataniġmun.

²³ Taavrumuuna aglausimaruq God-im pitquraŋiñi inna, “Aŋugaiyaaq aŋayukłiq ilaaguaqtauniaqtuq Ataniġmun.”

²⁴ Tavra tikiññamiŋ aŋaiyyuvikpaŋmun, aitchuiŋaruk ikipkautinik, Atanġum pitquraŋisa uqaluatigun, “Malġugnik nuyuaqturuagnik tiŋmiaŋnik, naagga malġugnik tiŋmiayaaŋnik nuyuitchuaŋnik.”

²⁵ Tavra iñuk inŋaruq Jerusalem-mi atiqaqtuaq Simeon-mik. Taamna iñuk nalaunŋaruaguŋaruq sivuġaani God-im, iñulluatauvluniḷu, aasii niġiuŋaruq qakugu God tilisiñiaqtilaaŋanik Annaurrimik Israel-nun, suli Ilitqusiġiksuam aŋalanŋagaa.

²⁶ Ilitqusiġiksuam iḷitchuġipkaŋagaa tuquniaŋiññivḷugu tautukkaluaġnagu Annaurri Atanġum tiliñiakkaŋa.

²⁷ Tavra Ilitqusiġiksuam isummiŋagaa aŋaiyyuviŋmuguliqsiłługu. Tavraasii aŋayuqaaguruak itqutimmatku miqłiqtuq Jesus, pisisaqtuqługu piḷġusiatigun pitqurat,

²⁸ Simeon tigumirriutiŋagaa aasii nanġaaqsivḷugu God uqaqłuni.

²⁹ Ataniiq, paŋmapak uvaŋa kivgan tuquyumiñaqsiruŋa tutqigḷuŋa, qanuq taŋŋiŋagiñ unniqsuqłiisin uvamnun.

³⁰ Qanuq uvamnik tautuanikkiga Annaurri,

³¹ ilivich tiliŋakkan annautitquvlugich iñuich sumipayaaq.

³² Tusaayugaaġiksuat ilaagun inniaqtut qaummaqtun Jew-guŋitchuanun, satqummiġḷugu iliŋiññun iḷumun ittuaq God-ikun, suli iñuktin Israel isumakkusiaqallasiḷugich qutchiksuakun.

³³ Tavra Joseph-lu Mary-vḷu aliuġiŋagaich Simeon uqautiŋi miqłiqtukun.

³⁴ Suli Simeon qiññuaġutiŋagik quviasuunmik, suli uqallautivlugu Mary aakaŋa. Sivunniutauŋaruq una miqłiqtuq agvisauniaġnivḷugu annagniksraŋannun iñugiaktuat Israel-guruani, suli iñugiaktuat tammaġniksraŋannun. Suli pisigilugu ilaan suutilaaŋa, iñugiaktuat akiḷḷiḷiqsuġniaġaat uqaluŋmiŋni,

³⁵ salapqialugu qanuq isummatiqaqtilaaqtiŋ ilaagun. Aasiiḷi ilivich isumaaġutiqpaum nagliksaaqtiniaġaatin.

³⁶ Tavraptauq aġnaq atiqaqtuaq Anna-mik inmiñiqsuq, uqaqtaa God-im pania Phanuel-gum maŋŋuqaqtuam Asher-mik. Anna aaquaŋaniqsuq, tuvaaqatiqaŋaniqsuaq tallimat malġugni ukiuni, aasii uiŋa tuquvluni.

³⁷ Taimaŋŋaaglaan iñuuŋaruq uiḷgaŋavluni, aasii sisamakipiaq sisamanik ukiuniŋaruq. Aŋaiyyuvikpaŋmiñ piiḷaiḷaaguŋaruq unnuakkaluami uvlukkaluamiḷu niġiḷaiḷaaguraġaluni nanġaqługu aŋaiyyuvigivlugu Ataniq.

³⁸ Aasii tavruŋa ullakługich taavrumanivsauq ikarraġmi, quyyavigiŋagaa God. Quliaqtuaġisaġataŋagaa miqłiqtuq iluqaiññun Jerusalem-miittuanun niġiuktuaguruanun annaunmik.

Utiqtut Nazareth-mun

³⁹ Tavra taŋŋianikamitkik supayaurat pitquraŋiguaqtuat Atanġum, utiŋarut Galilee-mun, aimaaġviŋmiŋnun Nazareth-mun.

⁴⁰ Tavra miqłiqtuq Jesus agliŋaruq saŋŋisivḷuniḷu, isumattusiqpakłuniḷu. Suli God-im iviġaummatigiŋagaa.

Nukatpiaġruk Jesus Aŋaiyyuvikpaŋmiittuq

⁴¹ Tavra Jesus aŋayuqaak aullaġaqtuk Jerusalem-mun ukiutuaġman niqinaqiviani Qulaurrusiqutikun Itqautim.

⁴² Tavra Jesus qulit malġugnik ukiuniŋman, aullaŋalgitchuk piḷġusikaamiktun niqinaqiyaqtuqłutiŋ.

⁴³ Tavra niqinaqivik isukłiñman, utiqsaġmaŋnik nukatpiaġruk Jesus qimaktinŋaruq Jerusalem-mun. Aŋayuqaak aasii naluŋaruk.

⁴⁴ Tavra isummatigivlugu iglaani iglauqataunasugivlugu, iglauŋaruk uvluqtutilaaŋatun, aasii ivaŋagaluaġaak nanmiñiġmiŋni aunniuġusimakkamiŋniḷu.

⁴⁵ Tavraasii paqinŋisanikamitku, utiqsaŋaruk Jerusalem-mun ivaqługu.

⁴⁶ Uvlut piŋasut pianiŋmata paqinŋagaak aŋaiyyuvikpaŋmi, aquppiruaq akunġanni iḷisaurrit pitquranik, naalaġnivḷugich apiqsruqtuqługiḷḷu.

⁴⁷ Tavra iluqaġmiŋ tusaaruat ilaanik kamasuŋarut kaŋiqsisuġniŋanik kiggutiŋiñiglu.

⁴⁸ Tavra aŋayuqaakisa tautukamitku, niġiiḷḷaqtauŋaruk. Aasii aakaŋata uqallautiŋagaa, Iġñiiŋ, summan inna piŋiksraqtitpisiguk? Uvva, aapallu uvaŋalu ivaŋagiptigiñ uŋiarrisigivlutin.

⁴⁹ Tavra Jesus kiuŋagik, Qanuq imña ivaġniqpisiñŋa? Puttuqsriŋayumiñaŋagaluaqtutik ittuksrautilaamnik Aapama igluani.

⁵⁰ Tavra kaŋiqsiŋaitkaak ilaan uqallautaa inmiŋnun.

⁵¹ Tavra Jesus utiqatigiŋagik Nazareth-mun. Suli kamakkutiqaŋaruq iliŋiŋnun, aasiiḷi aakaŋan tamatkua iluqaisa itqagiŋagai.

⁵² Tavra Jesus isumatusisaiññaŋaruq aglivḷuniḷu, suli iñuuŋaruq nalaunŋaruakun iviġaumavlugu God iñuiḷḷu.