Luke 19 - Iñupiatun Mumiksat Uqalugiksuat

Jesus-lu Zacchaeus-lu

¹ Jesus tikiñŋaruq Jericho-mun aasii iglauvigiaqsivḷugu.

² Tavra iñuqaŋaruq atiqaqtuamik Zacchaeus-mik, umialguniqsuamik tax-iñik katitchirauruanun, suli suġalliruaguvluni.

³ Tavra ilaan tautuŋniataŋagaa Jesus tautulaiñmivḷugulu, iñuich iñugiakpaił̣ł̣utiŋ ilaalu mikivluni.

⁴ Tavra aqpamik isagutiŋaruq sivuniksraŋannun aasii mayuqłuni Sikamuam napaaqtuanun tautugukługu Jesus, qanuq tamaunnaaġumaaqtuq.

⁵ Tavra Jesus tikiññami tavruŋa, aaġluqłuni uqallautiŋagaa, Zacchaeus, atqaġiñ qilamik, qanuq igluŋniittuksrauruŋa uvlupak.

⁶ Tavra Zacchaeus atqaqsaaluŋaruq, aasii aiyugaaŋagaa Jesus quviasuutigivlugu.

⁷ Tavra iñuich tautukamirruŋ taamna iluqaġmiŋ uqamayurraqsiŋarut, Taamna iñuk tuyuġmiaguyyaqtuq piḷuusiqirimun.

⁸ Aglaalli Zacchaeus makiłłuni sivuġaanun uqallaŋaruq Ataniġmun, Ataniiq, avvaŋich suġaliġma aitchuutiginiaġitka iḷiappauruanun, suli saglutaġniġupku kiñapayaaq supayaakun, utiqtitchiviginiaġiga sisamaŋŋuġlugu.

⁹ Tavra Jesus uqallautiŋagaa, Taamna pisigivlugu, uvlupak una iñuk igluqatiniḷu annaurrausaqtut, ilaaptauq kiŋunġuvluni Abraham-mun.

¹⁰ Qanuq Iġñiŋa iñuum qaiŋaruq ivaġiaqługich annautiyaqtuqługiḷḷu tammaŋaruat iñuich.

Uuktuun Kaviqsuatigun Maniksigun

¹¹ Tavra tamatkua tusaaruat uqaluŋnik, Jesus quliaqtuaġutiŋagai uuktuunmik. Ilaa qalliŋaruq Jerusalem-mun, aasii iñuich isumaqaŋarut atanniqsimmataa God-im satqummiyasiñasugalugu.

¹² Tavra ilaa uqallaŋaruq, Iñuk umialiŋniñ kaŋiqaqtuaq aullaŋaruq uŋasiksuamun nunamun umialguqtitausukłuni, aasii utiġmiḷuni.

¹³ Aullaŋaiñŋaġmi qaitquŋagai qulit kivgani, aasii aitchullaavlugich atausiḷḷaanik kaviqsuanik maniŋñik, aasii uqallautivlugich, Naggutinnagniaġitchi ukuniŋa maniŋñik qaiñimnun aglaan.

¹⁴ Tavra nunatqatiŋisa uumigiŋagaat aasii tilisiŋarut kivgamik inmiŋniñ aquagun, uqaqłutiŋ, Uvagut umialigisuŋitkikput taamna iñuk.

¹⁵ Umialiguġiaqtuaq umialiguanikami utiŋaruq. Tavrauvvaa qaitquŋagai taapkua kivgani aitchuŋarani maniŋñik, iḷitchuġisukłuni qanutun naggutinnaktilaaŋannik.

¹⁶ Sivulliq kivgaq qaiŋaruq sivuġaanun uqallakłuni, Ataniiq, maniich aitchuutitin uvamnun naggutinnautigigitka qulitun maniksun.

¹⁷ Tavra umialgata uqallautiŋagaa, Piḷḷuataqtutin, kivgaġiksuatiin. Pisigivlugu piḷḷuataġniġiñ mikiruurakkaluakun, ataniġnaqutiqaġniaqtutin qulinun iniqpaŋnun.

¹⁸ Igḷua kivgam qaiŋaruq uqallakłuni, Ataniiq, maniich aitchuutitin uvamnun naggutinnautigigitka tallimatun maniksun.

¹⁹ Tavra umialgata uqallautiŋagaa, Iliviḷḷi atanniqsimaniaġitin tallimat iniqpaich.

²⁰ Tavrali allaptauq kivgaq qaiŋaruq uqaqłuni, Ataniiq, Uvva maniksin aitchuutitin uvamnun. Iriqsimaŋagitka puuqługich kakkiiyaunmik.

²¹ Sivuuġagiŋagikpiñ qanuq suamarutin. Tigusisuurutin pigiŋisaġnik, suli kivrivḷutin palauvaksranik nautchirriutigiŋisaġnik.

²² Umialgata uqallautiŋagaa, Piḷuktuatiin kivgaaq. Atuġniaġitka ilivich uqaluktin uvapkun suksraunġiutigilugich iliŋnun. Iḷisimaŋagaluaqtutin suamatilaamnik tigusisuunimniglu pigiŋisamnik, suli kivrisuuvluŋa palauvaksranik nautchirriutigiŋaisamnik.

²³ Summan aasiuvva ikuŋitpigich manitka maniqaġviŋmun, aasii qaiguma tasuġayakkatka naggutituummaisa.

²⁴ Tavra umialik uqallaŋaruq tamatkunuŋa makitaruanun saniġaani, Pisigik kaviqsuat maniich ilaaniñ, aasii qaiḷḷugich taavrumuŋa kivgamun qulinik maniqaqtuamun.

²⁵ Tavra kivgat uqallautigaluaġaat, Umialiik, qulitun maniqaaniŋaruq.

²⁶ Umialgata kiuŋagai, Uqallautigivsi, iñupayaaq aŋalatchiḷḷuataqtuaq aitchuusiaqavsaaġniaqtuq, aglaan taamna naurrutinnaŋitchuaq mikiruuraqunnii pigikkaŋa, piiqsauniaqtuq ilaaniñ.

²⁷ Taipkualiasii uumigiritka, umialiqaġuŋitchuat uvamnik, uvuŋautisigik aasii tuquġaġlugich sivuqqamni.

Jesus Isiġman Jerusalem-mun Kakaksiqł̣uni Umialiktun

²⁸ Taamna uqausiġianikamiuŋ, Jesus aullaqivsaaŋaruq Jerusalem-mun sivuanni iñuich.

²⁹ Tavra qallikami Bethphage-mun Bethany-mullu, tikiññamiŋ iġġimun atiqaqtuamun Olives, ilaa tilisiŋaruq malġugnik iḷitchitquramiñiñ,

³⁰ aasii uqallautivlugik, Aullaġitchik ininun sivuniptiŋnun. Aasii tikipqaġuptik, paqinniaqtutik kakaktim nuġġaŋanik pituqaqtuamik, iñuum kakaksiġvigiŋaisaŋanik. Pituiġḷugu qaġġisiyumagiktik.

³¹ Iñuum kialiqaa apiġikpatik, Summan pituigaqsivitkuuna, uqallautiyumagiktik inna, Atanġum atuġukkaa.

³² Tavra taapkuak tilirauruak aullaŋaruk aasii paqinŋagaak Jesus uqausiatun inmiŋnun.

³³ Tavra pituiqsisaġniaqtillugik kakaktimik, iñuŋisa kakaktim uqallautiŋagaik, Summan pituigaqsivitku kakakti?

³⁴ Tavra iliŋik uqallaŋaruk, Atanġum atuġukkaa.

³⁵ Tavra iliŋikta qaġġisiŋagaak kakakti Jesus-mun, aasii iñuich qalliqsuutivlugich annuġaatiŋ kakaktimun, Jesus kakaksirraqsiŋaruq.

³⁶ Tavra kakaksiqsillugu, iñuich siaminŋagaich annuġaatiŋ apqutinun.

³⁷ Tavra qallimman Jerusalem-mun, atqaġiaŋanun iḷimman iġġimun Olives-mun, iñusalaich iḷitchitquraŋi quviatcharraqsiŋarut suli nanġaqługu God nipatuvlutiŋ, pisigivlugich iluqaisa kamanaqtuat savaat tautuŋaratiŋ,

³⁸ uqaqłutiŋ, God-im piḷḷuataqtilliuŋ Umialik qairuaq pisivlugu Ataniq. Nanġaqtauli God qiḷaŋmiittuaq tutqiutiqaqtitchiruaq.

³⁹ Tavra iḷaŋisa Pharisees iñusalaŋniittuat uqallautiŋagaat Jesus, Iḷisaurrii, suakkich iḷitchitquratin nipaisaaqulugich.

⁴⁰ Ilaan kiuŋagai, Uqallautigivsi, ukua nipaiġaluaqpata, uyaġaich nipaallakkumiñaqtut.

Jesus Qirratigigaa Jerusalem

⁴¹ Tavra Jesus qallikami tautukługu iniqpak qirratigiŋagai Jerusalem iñuŋi,

⁴² uqaqłuni, Uvvaunnii uvlupak puttuqsriyumiñaġaluaqtusi suruksrautilaavsiññik tutqiutiqaġukkuvsi. Aglaan paŋmapak puttuqsriŋitchusi.

⁴³ Qanuq uvlut tikiññiaqtut uumigirivsi avanniaġaat iniqpaksi, saulugu avatiksi aniyumiñaiyaġlusi, quġġutilusiḷu sumiḷḷiqaa.

⁴⁴ Aasii iliŋisa suksraunġipiallagniaġaasi iniqpaksiḷu, katchisiḷu, suli uyaġak atausiq unnii nuunniaġaat inaaniñ, qanuq puttuqsriŋaitkiksi God qaigaluaġman annautisukłusi.

Jesus Aŋaiyyuvikpaŋmuktuq

⁴⁵ Tavra Jesus isiŋaruq aŋaiyyuvikpaŋmun, aasii anittaaqsivḷugich tamatkua tauqsiqsuqtuat,

⁴⁶ uqallautivlugich, Aglausimaruq Bible-ni God-im uqallautaa inna, “Uvaŋa igluqpaga taggisiqaġniaqtuq iñupayaat aŋaiyyuyaqtuġviannik.” Aglaalli ilivsi iriqtuġviḷiutiŋagiksi tigligayuktinun.

⁴⁷ Tavra Jesus iḷisaurriraqtuq uvlutuaġman aŋaiyyuvikpaŋmi. Aŋaiyyuliqsiqpaich iḷisaurriḷḷu pitquranik umialiŋnaŋisalu iñuich tuqutchukkaluaŋagaat,

⁴⁸ aglaan qanuġlugu pisausiiñŋagaat, qanuq iluqaġmiŋ iñuich masaġnisigiŋagaich ilaan uqaluŋi.