Luke 18 - Iñupiatun Mumiksat Uqalugiksuat

Uuktuun Uiḷgaŋaruakun Isivġiqsikullu

¹ Tavra Jesus quliaqtuaġutiŋagai uumiŋa uuktuunmik, iḷisautisaqługich ataramik aŋaiyyuruksraunivḷugich nikatchalaiḷḷutiŋ.

² Ilaa uqallaŋaruq, Iniqpaŋmi isivġiqsiqaŋaruq qiksiksrautaitchuamik God-mun naaggaunnii suliqutiksraaqtuaŋitchuamik iñuŋnik.

³ Tavra inŋaruq uiḷgaŋaruaq taavrumani iniqpaŋmi ullaaġautiruaq isivġiqsimun nalaunŋaruakun ikayuquvluni iñuŋmiñ ivayaġniaqtimiñiñ.

⁴ Sivisuuraqtuami isivġiqsi pisuŋiñŋaruq. Aglaan aquvatigun isumallaktuq inna, Qiksigiŋiḷḷuġigaunnii God naagga suliqutigiŋił̣ł̣ugich iñuich,

⁵ pisigigiññaġlugu uuma uiḷgaŋaruam iḷaksianniŋniŋa uvamnik, ikayuġniaġiga nalaunŋaruakun ilaanun, qanuq ikayuŋisuaġupku piḷaiqsinniaġaaŋa ataramik qaiguġluni.

⁶ Tavra Ataniq uqallaŋaruq, Isummatigisiuŋ qanuq nalaunŋaitchuaq isivġiqsim isumallautaa.

⁷ Tainnatuttauq God isivġiiñiaqtuq pisilugich ilaan iñuksraqtaani nipauqtuat inmiñun ikayuqtaiḷiqivlutiŋ uvlukkaluami unnuamiḷu. Ikayukallaŋisauraaġniaqpagich?

⁸ Uqallautigivsi, ilaa isivġiiñiaqtuq qilamik pisilugich iñuksraqtaani. Aglaattauq, Iġñiŋa iñuum qaikpan nunamun, qanutun iñugiaktigiruat ukpiġutiqaġniaqpat aŋaiyyuuqtuagulutiglu?

Uuktuun Pharisee-kun Tax-iliqirikullu

⁹ Jesus quliaqtuavsaaŋammiuq uumiŋa uuktuunmik iñuŋnun nalupqisuŋitchuanun nalaunŋanivḷutiŋ aasii suuŋiḷaqsruqługich allat iñuich.

¹⁰ Malġuk iññuk aŋaiyyuvikpaŋmuŋaruk aŋaiyyuyaqtuqłutik. Igḷua Pharisee aasii igḷua tax-iñik katitchiri.

¹¹ Pharisee makitavluni aŋaiyyuŋaruq inna, God, quyanaaġikpiñ iñuusiqaŋiññama allatun iñuktitun, piḷḷaturuatun, pitqiksiġaqtitun, allatuqtitun, naaggaunnii uumatun tax-iñik katitchiritun.

¹² Niġiḷaitchuuruŋa aŋaiyyuuġnimni malġuiqsuaqługu savaiññaak akunġak. Aitchuisuummiuŋa quliŋŋuġutiŋiññik supayaat piġġaktaaġma.

¹³ Tavrali tax-iñik katitchiri, makitavluni taavanisaaq, aaġluqsausiiñŋaruq unnii qiḷaŋmun, aglaan patiksiññaqługu satqani aŋaiyyuŋaruq inna, God nagligiŋŋa uvaŋa piḷuusiqiri.

¹⁴ Tavra Jesus uqallaŋaruq, Uqallautigivsi, taamna tax-iñik katitchiri airuq nalaunŋasivḷuni God-mun igḷumiñiñ, qanuq kiñaliqaa kamanaqsiḷiqtuaq inmiñik kamanaiqsauniaqtuq, suli iñuk kamasaaŋitchuaq inmiñi kamanaqsipkaqtauniaqtuq.

Jesus Aŋaiyyutigai Miqłiqtuurat

¹⁵ Tavrani iñuich iḷaŋisa qaġġisiŋagaich miqłiqtuuratiŋ Jesus-mun, aksiuquvlugich ilaanun. Tavra iḷitchitqurat tautukamisigik, suaŋagaich iñuich.

¹⁶ Tavra Jesus qaitquŋagai miqłiqtut inmiñun, uqallakłuni, Miqłiqtuurat qaipkaqsigik uvamnun, suli pitquŋiññagich. Tainnaiḷiŋaruat God-im atanniqsimagai.

¹⁷ Iḷumun uqallautigivsi, Kialiqaa ukpiġiŋitpagu God miqłiqtuuram ukpiqsrausiatun, isiġumiñaitchuq God-im atanniqsimavianun.

Suġalliruaq Iñuk

¹⁸ Tavra Jew-guruat umialiŋnaŋata apiġiŋagaa Jesus, Iḷisaurrigiksuatiin, sumik piñiaqpik isuitchuamik iñuggutinnagugluŋa?

¹⁹ Jesus kiuŋagaa, Summan taiviŋa nakuuruamik. Nakuuruagitchuq iñuŋmik God kisimi.

²⁰ Iḷisimagitin Pitqurat, Allatuġnak, Iñuaġnak, Tiglignak, Saglutiginniŋnak, Suuŋiḷaġinagik aapallu aakallu.

²¹ Tavra umialiŋnam kiuŋagaa, Tamatkua iluqaisa kamagiŋagitka nutaġaunnamniñ.

²² Tavra Jesus taamna tusaakamiuŋ, ilaan uqallautiŋagaa, Atautchimik piraksraqavsaaqtutin suli. Aullaġiñ, tunikkich supayaat pisin, aasii aitchuutigilugich maniich iḷiappauruanun, tavra piiḷḷiuġniaŋitchutin qiḷaŋmi. Aasii qaiḷutin maliŋŋa.

²³ Tavra taamna tusaakamiuŋ ipiqtutchaŋaruq, qanuq suġalliqpaktuaguvluni.

²⁴ Jesus qiviaqługu ilaa uqallaŋaruq, Qanutun siġḷiġnaqtigiva tamatkunuŋa suġalliruanun isiġniaġniksraq God-im atanniqsimavianun.

²⁵ Siġḷiġnaił̣haaqtuq pikukturuaq kakakti iraaguaġumi mitqutim, suġalliruam isiġniaġniksraŋaniñ God-im atanniqsimavianun.

²⁶ Iñuich tusaaruat taavrumiŋa uqallaŋarut, Kiñami annaurrauniaġniqpa?

²⁷ Tavrani Jesus kiuŋagai, Suna iñuich piyumiñaisaŋat God-im piḷḷagaa.

²⁸ Tavra Peter uqallaŋaruq, Uvva, uvagut qimaŋagivut aimaaġvivut maliġuaġuqłutin.

²⁹ Tavrali Jesus uqallautiŋagai, Iḷumun uqallautigivsi, Iñuk kiñaliqaa qimairuaq aimaaġviŋmiñik, naagga nuliamiñik naagga aniqatiimiñik naagga aŋayuqaamiñik naagga miqłiqtumiñik, pisigivlugu God-im atanniqsimmataa,

³⁰ aitchuusiaqaġniaqtuq iñugiaksił̣haasugruglugich paŋmapaŋmi, suli taimanigu iñuggutinnagniaqtuq isuitchuamik.

Jesus Piŋatchiġik Uqaġniŋni Tuqqunmigun

³¹ Tavra asivaqtaaġutivlugich qulit malġuk iḷitchitqurat, Jesus uqallautiŋagai, Uvva, Jerusalem-muksaaqsirugut, aasii supayaat uqaqtiŋisa God-im aglaaġiŋaraŋich Iġñiŋagun iñuum nalautitauniaqtut.

³² Tavra ilaa aitchuutauniaqtuq Jew-guŋitchuanun, suli kipaginiaġaat kanŋunaqsipiaġlugu aŋalataġilugu tivvuaqtuġlugulu.

³³ Ipiġaqtuġniaġaat suli tuqullugu, aasii uvluk piŋayuaŋni ilaa aŋiñiaqtuq.

³⁴ Tavra iḷitchitqurat kaŋiqsiŋaitkaich nalliat unnii tamatkua uqaluich, taamna uqaluk kaŋiqsiŋaitkaat sumik sivuniqaqtilaaŋa, puttuqsriŋiḷḷakkaat sumik Jesus uqautiqaqtilaaŋanik.

Jesus Iłuaqsigaa Ayauŋaruaq Piatchiaqtaqti

³⁵ Tavra Jesus qallimmiuġlu Jericho-mun, ayauŋaruaq aquppiŋaruq apqutit saniġaanni piatchiaqtaqłuni.

³⁶ Tavra tusaavlugich iñusalaich tamaunnaaqtuat, ilaa apiqsriŋaruq summagaisa.

³⁷ Ilaisa uqallautiŋagaat, Jesus Nazareth-miu tamaunnaaqtuq.

³⁸ Tavra ilaa nipaalaŋaruq, Jesus, Iġñiġuruatiin David-mun, nagligiŋŋa.

³⁹ Tavra tamatkua salliuruat suaŋagaat, uqallautivlugu nipaisaaquvlugu. Tavra ilaa nipattuvsaaqsiññaŋaruq, Iġñiġuruatiin David-mun, nagligiŋŋa.

⁴⁰ Tavra Jesus nutqaŋaruq, aasii piraksriivḷuni qaġġisitquvlugu inmiñun. Tavra qallimman Jesus apiġiŋagaa,

⁴¹ Sumik pisitquvich uvamnun. Ilaa uqallaŋaruq, Ataniiq, tautuksiḷḷasisuktuŋa.

⁴² Tavra Jesus uqallautiŋagaa, Tautuksiḷḷasiiñ, ukpiġurvich iłuaqsipkaġaatin.

⁴³ Tavra tavrauvvaa ilaa tautullasiŋaruq aasii Jesus malikługu, nanġaqługu God. Tavra iluqaġmiŋ iñuich tautukamirruŋ, God nanġaŋagaat.