Luke 17 - Iñupiatun Mumiksat Uqalugiksuat

Piḷuun

¹ Tavra Jesus uqallautiŋagai iḷitchitqurani, Nalupqinaitchuq, ikł̣igutchaktinniutit piḷuksiñiksramun qaiyumaaqtut, aglaan qanutun naglignaqtigiruq taamna iñuk patchisauruaq tamatkunuŋa.

² Kialiqaa ukpiġutaiqsitpagu iḷaŋat makua miqłiqtuuratun iḷivḷutiŋ ukpiqtuat uvamnun, iłuałhaaġayaqtuq uyaġagruaġmik quŋusiġutchiġḷugu aasii ipipkaġlugu taġiumun.

³ Qaunagisitchi. Aniqatiksi piḷuksikpan, suaksiuŋ. Aasii isumalitqikpan, suliqutigiŋaiqsiuŋ itqaumayumiñaiġḷugich.

⁴ Aasii piḷuksikpan ilivsiññun tallimat malġuiqsuaġlugu uvluq, aasii isumalitqikpan tallimat malġuiqsuaġluni uqallautilusi, Isumalitqiksuŋa. Suliqutigiŋaigaksraġigiksi.

Ukpiġun

⁵ Iḷitchitquraunikun tilirauruat uqallautiŋagaat Ataniq, Suaŋasiḷaaġuŋ ukpiġutikput.

⁶ Tavra Ataniq uqallaŋaruq, Ukpiġutiqaġuvsi nautchiaksratun mustard-tun, mikipiaġaluaqłuni naullaruatun napaaqtuqpaġuqłuni, uqallautiyumiñaġiksi manna napaaqtuq, Maŋŋupkun nusugiñ aasii nautchirriutaulutin taġiumi. Tavra kamagiyumiñaġaluaġaasi.

Kivgam Piraksriusiaŋi

⁷ Nalliqsi kivgaqaqtuaq nunaliqiruamik naagga qaunaksriruamik imnaiñik, aimman uqallautilaitkiksi inna, Aquvillutin niġiñiaġiñ.

⁸ Aglaan uqallautisuugiksi, Itqanaiyaġiñ nullautaksramnik. Saaġuaġlutin savautiŋŋa niġipkaqtilluŋa imiġluŋalu. Aasiiḷi taavruma aquagun niġiñiaqtutin imiġlutillu.

⁹ Kivgaq quyanaagaksraitchuq kamaksriñiḷugu piraksriusiamiñik.

¹⁰ Tainnatuttauq ilivsi, pianikkaluaġuvsiuŋ iluqaan piraksriusiaqsi, uqallagitchi, Uvagut nalliummatiŋitchugut kivgat, pigiññaqtugut piraksriusiaptiŋnik.

Jesus Mamititkai Qulit Iñuich Kiḷḷiġruaqtuqtuat

¹¹ Iglauyaamiñi Jerusalem-mun, Jesus akunġakkuaŋaruq Samaria-vlu Galilee-vḷu.

¹² Tavra tikitchaġataviksillugich nunaaqqiñun, paaŋagaat qulit kiḷḷiġruaqtuqtuat, qikausiŋarut uŋasiuraqłutiŋ

¹³ aasii ququulaŋarut, Jesus Ataniiq nagligitigut.

¹⁴ Tavra Jesus tautukamigich uqallautiŋagai, Aullaġitchi aŋaiyyuliqsiqpaich mamitilaaġumagaasi. Tavra iglauniallaġmiŋ maminŋarut.

¹⁵ Tavra iḷaŋat, iḷitchuġikami iłuaqsirautilaamiñik, utiqsaŋaruq, nanġaqługu God nipatuvluni.

¹⁶ Tavra punŋaruq sivuġaanun Jesus, quyyavigivlugu. Taamna iñuk Samaria-ġmiu.

¹⁷ Tavra Jesus uqallaŋaruq, quliguŋitpat ipkua mamittuat? Nauŋ ipkua quliŋŋuġutaiḷat?

¹⁸ Utiġumiñaŋagaluaġmiut quyyavigisuglugu God. Aglaan uvvauna Samaria-ġmiu utiŋaruq.

¹⁹ Tavra Jesus uqallautiŋagaa, Makillutin aullaġiñ. Ukpiġurvich iłuaqsipkaġaatin.

Qaiñiksraŋa God-im Atanniqsimmataata Iñuŋnun

²⁰ Iḷaŋisa Pharisees apiġiŋagaat Jesus qakugu atanniqsimmataa God-im isagutiniaġmagaan. Ilaan kiuŋagai, Atanniqsimmataa God-im isagutiyumaaŋitchuq tautuŋnaġluni.

²¹ Naaggaunnii uqallagniaŋiñmiut, Uvva uvaniittuq. Naagga taikka taikaniittuq, qanuq atanniqsimmataa God-im ittuq uvaniittuani kamaksriruani.

²² Tavra Jesus uqallaŋaruq iḷitchitquramiñun, Uvlut qaiyumaaqtut kipiġniuliġviksrautisi tautugumaliġḷugu atanniqsimmataa Iġñiŋan iñuum nunami, aglaan tautukkumiñaitkiksi.

²³ Tavraasii iñuich uqallautiniaġaasi qaiñiḷuŋa aasii amaniinniḷuŋa naagga maaniinniḷuŋa. Ukpiġinagich, ivaqsaġnaŋa.

²⁴ Qanuq igniġuuqpatittuaq qaummaatinmatun qaummaġiksiviñaqługu qiḷak igḷuaniñ igḷuanun, tainnatun piñiaqtuq Iġñiŋa iñuum qaigumi.

²⁵ Aglaan nagliksaaqqaaqtuksrauniaqtuŋa iñugiaktuatigun sutigun suli pisuŋiḷḷuŋa iñuich paŋmapak iñuuruat.

²⁶ Taimani Noah iñuumman iñuuruatitun, tainnatuttauq iñuusiqaġniaġmiut qaiyasikpan Iġñiŋa iñuum.

²⁷ Iñuich niġigayuktut, imiqłutiglu katirrusiqivlutiglu Noah isiġataqtillugu umiaqpaŋmiñun, aasii uliqpaum tuqunŋagai iluqaisa.

²⁸ Tainnatuttauq iñuumman Lot, niġigayuŋammiut imiqłutiglu tauqsiqsuqłutiglu tuniuqqaivḷutiglu nautchirriqsuivḷutiglu igluqpiuqłutiglu

²⁹ aullaġataqtillugu Lot Sodom-miñ. Tavra igniq tivluktuaġlu isiq sialuuŋaruk qiḷaŋmiñ aasii tuqułługich iluqaisa iñuŋi Sodom.

³⁰ Tavra tainnatun piñiaqtuq Iġñiŋa iñuum qiñiġnaqsikpan.

³¹ Taimanigu iñuk aniiqsuaqtuaq iglumi qaaŋani atqaġnani suġauttani iglum iḷuaniittuat aisuglugich. Tainnatuttauq iñuk nautchiaqaġviŋmiittuaq utiqsaġnani iglumiñun.

³² Itqaumasiuŋ suna piruaq Lot-gum nuliaŋanun.

³³ Kialiqaa annautiniaqsaagumigich iñuuniutini tammaiñiaġaa iñuggutini, aglaan kialiqaa tammaigumigich iñuuniutini annautiniaġaa iñuggutini.

³⁴ Uqallautigivsi, taavrumani unnuami malġuk aŋutik inniaqtuk atautchiiñi siñigviŋñi, igḷua aullaurrauniaqtuq aasii igḷua qimaktauluni.

³⁵ Malġuk aġnak palauvaksiuġniaġmiuk atautchimi, igḷua aullaurrauniaqtuq aasii igḷua qimaktauluni.

³⁶ Malġuk aŋutik nautchiaqaġviŋmi savaŋniaqtuk, igḷua aullaurrauniaqtuq aasii igḷua qimaktauluni.

³⁷ Tavra iḷitchitqurat apiġiŋagaat, Ataniiq, sumun aullaurrauniaqpat? Jesus kiuŋagai, Sumipayaaq siḷu inman, tavrani tiŋmiaqpaich katitchuurut.