Luke 16 - Iñupiatun Mumiksat Uqalugiksuat

Suġautchiqiri Pitqiksiġaqtuaq

¹ Jesus uqallautivsaaŋagai iḷitchitqurani uuktuusiqł̣uni, Iñuqaŋaruq suġalliruamik suġautchiqiriqaqtuamik. Aasii uqallautiŋagaat suġalliruaq suġautchiqiriŋa aŋalatchiḷḷuataŋiññivḷugu maniŋiñik.

² Tavra suġalliruam ququaqługu uqallautiŋagaa, Sunaimña tusaavigu ilipkun? Qaitkich aglaich suġautchiqiraunipkun, qanuq tavraŋŋaaglaan suġautchiqirigiŋaiġñiaġikpiñ.

³ Tavra suġautchiqiri isumalaaŋaruq, Suniaqpik? Umialiŋma anitkaqsigaaŋa savaamniñ. Kurriḷguiñmiuŋa, kanŋugimmigiga piatchiaqtaġniq.

⁴ Sivunnianiktuŋa suniaqtilaaksramnik, savaagiġuma avilaitqatiqaġumiñaqsiḷuŋa paġlariksramnik aimaaġviŋiññun.

⁵ Tavra qaitquŋagai umialiŋmi akiiḷaqtuqtiŋi atausiullaavlugich. Sivulliq uqallautiŋagaa, Qanutun akiiḷaqpiuŋ umialiga?

⁶ Ilaa uqallaŋaruq, Tallimakipiatun qattaġruayaanik olive uqsrunik. Tavra suġautchiqirim uqallautiŋagaa, Uvva akiiḷatin, aquvillutin qilamik aglakkich akiiḷatin avvaŋich piiyaġlugich.

⁷ Tavra uqallautilgitkaa alla, Qanutulli akiiḷaqaqpich? Ilaa uqallaŋaruq, 1,000-tun bushels palauvaksranik. Suġautchiqirim uqallautiŋagaa, Iḷaŋich piiyaġlugich aglagiñ 800-mik.

⁸ Tavra atanġata pisaasuġniŋagaa pitqiksiġayuktuaq suġautchiqiri sivunniuġutaagun. Iñuŋi mattuma nunam aŋalatchisułhaaqtut suġaliġmiŋnik ukpiqtuaniñ.

⁹ Tavra Jesus uqallavsaaŋaruq, Uqallautigivsi, avilaitqasiuġitchi ilivsiññun nagliktuġlugich iñuich suġalivsiññiñ. Tavraasii suġalisi nuŋukpata, paġlapiaġniaġaasi isuitchuamun aimaaġviŋmi.

¹⁰ Kiñaliqaa ukpiġnaqtuaq mikiruurakkaluakun, ukpiġnaqtuagummiuq aŋiruakun. Aasiivsauq kiñaliqaa pitqiksiġaġuuruaq mikiruurakkaluakun, pitqiksiġaqtuagusuummiuq aŋiruatigun.

¹¹ Tavraasii ilivsi ukpiġnaġniaŋaitkuvsi aŋalatchiñivsiññi nunami suġaliġnik, qanuġlusi ukpiġnaġniaqpisi aŋalatchisaġuvsi qiḷaum iḷumun ittuanik suġaliŋiñik?

¹² Suli ukpiġnaŋaitkuvsi aŋalatchiñivsigun God-im piŋiñik maani, aitchuusiaqaġniaŋitchusi ilivsi pivsiññik taimanigu.

¹³ Kiñaliqaa savakkumiñaitchuq malġugnik ataniqaġluni atautchikun, qanuq ilaan uumiginiaġaa igḷua aasii piviaġilugu igḷua. Naaggaunnii qiksiksrautiqaġluni igḷuanun aasii suuŋiḷaġilugu igḷua. Savautiyumiñaitkiksi God suġallagniaġniġlu atautchikun.

Iḷaŋat Jesus Uqaluŋisa

¹⁴ Pharisees piqpaksriruat maniŋmik, tusaaŋagaich taapkua iluqaisa uqaluich aasii ilaisa Jesus kipagiŋagaat.

¹⁵ Tavra ilaan uqallautiŋagai, Ilivsi patchisaiññisuurusi takkuanni iñuich, aglaan God-im iḷisimapiaġai iñuutchisi, qanuq suna kamanaqsiḷiqtauruaq akunġanni iñuich naġġugipiaġataġaa God-im.

¹⁶ John Paptaiqsim alġaqsruisaġniŋanun aglaan, Moses aglaaŋi uqaqtiŋisalu God-im uqaluŋich aŋalatigiŋagisi. Aglaan John aullaqisaaŋagai tusaayugaaġiksuat God-im atanniqsimmataagun qaigaqsiruakun. Aasii paŋmapak piyumalaaqtuat iñusalaich siġġaqiŋarut God-mun atanniqsimatquvlutiŋ.

¹⁷ Aglaan siġḷiġnaił̣haaqtuq qiḷaglu nunalu piiqsaqpaŋnik, atausiuraqunnii God-im pitquraŋiñi naumaŋiññiqsrauruaq piiġñiksraŋaniñ.

¹⁸ Kiñaliqaa avittuaq nuliamiñiñ aasii tuvaaqasitqikł̣uni allamik allatuqtuaguruq, suli iñuk tuvaaqasiqsuaq aġnamik avitaŋanik uiŋata, allatuqtuaguruq.

Suġalliruaġlu Lazarus-lu

¹⁹ Suġalliruaqaŋaruq annuġaaqaqtuamik akisupiaġataqtuanik, suli uvlutuaġman niqinaqiugaqłuni iḷaŋaniñ.

²⁰ Aasii iñuk iḷiappak kiḷḷiġruaqtuqtuaq atiqaqtuaq Lazarus-mik, qaġġisisuuniġaat uvlutuaġman paaŋanun suġalliruam.

²¹ Niġiyumasuugaluaġniqsuq kataktuanik unnii suġalliruam niġġiviŋiñiñ. Aasii qimmich qaimmiraġniqsut aluktuqługich kiḷḷiŋi.

²² Tavra iḷiappauruaq iñuk tuquŋaruq suli isaġulgich aullautiŋagaat Abraham saniġaanun niqinaqiruanun qiḷaŋmi. Suġalliruaq tuquŋammiuq aasii iḷuviŋagaat.

²³ Tavra Nagliksaaġviŋmi nagliksaaqłuni, aaġluŋaruq aasii tautukługu Abraham uŋasiñun Lazarus-lu saniġaaniittuaq.

²⁴ Tavra ilaa ququulaŋaruq, Aapauruatiin Abraham, nagligiŋŋa. Tilliuŋ Lazarus misullagiaqulugu argani imiġmun aasii niglaqtaaġlugu qaniġa, qanuq uvva iłuiḷḷiuqpaktuŋa uumani igniġmi.

²⁵ Tavra Abraham uqallaksiññaŋaruq, Iġñiiŋ, itqaġiñ iñuuniġni aitchuusiaqaġuuruatiin nakuuruanik sunik, aasiiḷi Lazarus tainnatuttauq pigiitchuanigli. Aasii paŋmapak quviasaaġusiaqaqtuq uvani, aasiiḷi ilivich nagliksaaġnami ittutin.

²⁶ Aasii taamnatualuuŋitchuq, akunnaptiŋni uvagullu iliviḷḷu kamanaqtuaq qutaiḷaq ittuq savaaq, tamatkua ikaaġukkaluaqtuat maaŋŋa ilivsiññun piyumiñaiqsaqługich, suli kiñaunnii ikaaġumiñaiqł̣ugu ilivsiññiñ uvaptiŋnun.

²⁷ Tavra suġalliruaq uqallaŋaruq, Tainnaitpan aapauruatiin, qiññuaġvigigikpiñ tilitquvlugu Lazarus aapama igluanun,

²⁸ qanuq samma tallimanik aniqatiqaqtuŋa, ilaan kiliktuġumagai, iḷaanni uvuŋaqpiaġmiut nagliksaaġviŋmun.

²⁹ Tavra Abraham uqallautiŋagaa, Aniqatiivich pigigaich aglaaŋi Moses uqaqtiŋisalu God-im kiliktuiruat iliŋiññik. Aniqatiivich naalaġniḷisigik taiguaqpatigik.

³⁰ Suġalliruam kiuŋagaa, Aapauruatiin Abraham, naalaġniyumiñaitchut, aglaan iñuk ullautikpan inmiŋnun tuquŋaruaniñ aŋiluni, isumalitqigñiaqtut.

³¹ Abraham kiuŋagaa, kamagiyumiñaitkumisigik aglaaŋi Moses uqaqtiŋisalu God-im, qanuqpisiiḷḷirauyumiñaiñmiut iñuk aŋigaluaqpan tuqqunmiñ.