Luke 15 - Iñupiatun Mumiksat Uqalugiksuat

Imnaiq Tammaqtuaq

¹ Iḷaanni tax-iñik katitchirit piḷuusiqirillu qaiŋarut Jesus naalaktuaġukługu.

² Tavra Pharisees iḷisaurriḷḷu pitquranik uqamayuŋarut uqaqłutiŋ, Uuma iñuum paġlasuugai piḷuusiqirit niġiqatigivlugiḷḷu.

³ Tavra Jesus uqautiŋagai uumiŋa uuktuunmik.

⁴ Nalliqsi qanuġayaqpa tallimakipiamik imnaiqaqtuaq tammaigumi atautchimik? Qimakkayaġai tallimakipiaġuutaitchuat, aasii ivaaqsiḷugu atausiq tammaqtuaq imnaiq paqilġataġlugu.

⁵ Tavraasii paqinnamiuŋ quviasukpaŋaruq. Aasii iqsriutivlugu aggisivlugu.

⁶ Tavra aikami, ququaŋagai atautchimun avilaitqatini siḷalliñiḷu, uqallautivlugich, Quviasuqasiqsiŋa, qanuq paqinŋagiga imnaiġa tammaŋaruaq.

⁷ Tavra Jesus uqallaŋaruq, Uqallautigivsi, tainnatuttauq quviasuutigiłhamaaġniaġaat qiḷaŋmi atausiq piḷuusiqiri isumalitqiksuaq taapkunaŋŋa tallimakipiaġuutaitchuaniñ nalaunŋaruaniñ iñuŋniñ isumalitqiaksraitchuaniñ.

Maniuraq Tammaqtuaq

⁸ Naagga aġnaq qanuġayaqpa qulinik maniuraqaqtuaq tammaigumiuŋ atausiq iḷaŋat maniŋmi? Ikinnayaġaa qulliq aasii tilaiḷugu igluni ivammaġiksaapiaġataġlugu paqilġataġlugu.

⁹ Aasii paqitanikamiuŋ, ququaqługich atautchimun avilaitqatini siḷalliñiḷu uqallakłuni, Quviasuqasiqsiŋa qanuq paqinŋagiga maniuraq tammaikkaġa.

¹⁰ Tavra Jesus uqallaŋaruq, Uqallautigivsi tainnatuttauq quviasuŋmiut isaġuliŋi God-im pisigivlugu atausiq piḷuusiqiri isumalitqiŋman.

Iġñiq Tammaqtuaq

¹¹ Jesus uqallavsaaŋaruq, Iñuk malġugnik iġñiqaŋaruq.

¹² Nukaqłiq uqallaŋaruq aapamiñun, Aapaaŋ, aitchuŋŋa kiŋuvaannaktaaksrautimnik. Tavra Aapaŋakta autaaŋagai suġaliġni iġñagmiñun.

¹³ Uvliupasakkaluaġnani, nukaqłium tuniŋagai autaaġusiani maniŋñun, aasii aullaqłuni uŋasiksuamun nunamun. Taamaniasii kinniqutigiaqsivḷugich maniŋñi iñuumaqłuktaqłuni.

¹⁴ Tavra suiġutianiŋmiuġlu, kaaksiuqparraqsiŋarut taavrumani nunami, aasii ilaa suiġutiŋaruq.

¹⁵ Tavra ilaa aullaqłuni iḷaliutiŋaruq iḷaŋannun nutim iñuŋisa taavruma nunam, aasii taavruma iñuum tiliŋagaa nautchiaqaġviŋmiñun qaunaksritquvlugu tuttuqłuŋnik.

¹⁶ Tavra kaaliqpaił̣ł̣uni niġiyumiñaġaluaġaqtuq tuttuqłuich niqiŋiññik, suli iñuich aitchulaitkaat.

¹⁷ Tavra qauriḷġataqami uqallaŋaruq, Qanutun iñugiaktigiruanik aapaga akiññagniaqtuanik kivgaqaqtuq niqaiḷḷisaaŋitchuanik aitchuutiksraqallavlutiglu, uvvaliasiuvaŋa maani paniaqsiruŋa.

¹⁸ Aiñiaqtuŋa aapamnun aasii uqallautilugu, Aapaaŋ, piḷuksiŋaruŋa God-mun iliŋnullu.

¹⁹ Tavraŋŋaaglaan nalliummatiŋaiqsuŋa iġñiġuyumiñaġluŋa iliŋnun. Aŋalataġiŋŋa iḷaŋatitun akiññagniaqtuat kivgavich.

²⁰ Tavra ilaa utiqsaŋaruq aapamiñun. Tavrali uŋasisugruktillugusuli, aapaŋan tautuŋagaa aasii naglikkiutivlugu, aqpamik iqimmaaġiaqtuŋagaa iġñini kunikł̣ugulu.

²¹ Tavra iġñiŋan uqallautiŋagaa, Aapaaŋ, piḷuksiŋaruŋa God-mun iliŋnullu. Nalliummatiŋaiqsuŋa iġñiġuyumiñaġluŋa iliŋnun.

²² Tavra aapaŋa uqallaksiññaŋaruq kivgamiñun, Qilamik qaġġirisitchi annuġaaġigñiqsranik, aasii atipkaġlugich ilaanun, qitiqłiaġusiġḷugulu anŋiqpaglugulu.

²³ Suli qaġġirisitchi quiññaksaqtamik tuttuqpaiyaamik aasii tuqullugu, niġiyumaugut aliasuŋiḷḷutalu.

²⁴ Qanuq uvvauna iġñiġa tuquŋaruatun itkaluaqtuaq iñuusatqiksuq, tammaŋagaluaqtuaq paqitauruq. Tavra niqinaqirraqsiŋarut.

²⁵ Tavra aŋayukłiq iġñiŋa nautchiaqaġviŋmiinŋaruq. Tavraasii aiñiallaġmi qallikami iglumun, tusaaŋaruq atuqtuuraqpaaluŋmik kanaakkiuruaniglu.

²⁶ Tavra ilaan qaitquŋagaa kivgat iḷaŋat aasii apiġivlugu summagaisa.

²⁷ Aasii kivgam kiuŋagaa, Aniqatin airuaq aasii aapan tuqutchiruaq quiññaksaqtamik tuttuqpaiyaamik, pisigivlugu aiñiŋa sugaluaġnani.

²⁸ Tavra aŋayukłiq qinnaliŋaruq isiġunġiqł̣uniḷu. Aapaŋata anivḷuni arakkaluaġmigaa isiquvlugu.

²⁹ Tavra ilaan aapani kiuŋagaa, Uvva, aippaapak savautiŋagaluaġikpiñ kivgatun iḷivḷuŋa, aasii sumikunnii kipuqłaŋaitkaluaġiga piraksriutin, naaggauvva aitchuŋaitkiŋmaunnii imnaiyaamik nagruliŋmik, quviasuqatiqaquluŋa avilaitqatimnik.

³⁰ Aasiuvvauna iġñiġiñ qaimman, kinniqutigiqqaaqługich suġaliqtin akiitchunullu, tuqutchisiŋagiñ quiññaksaqtamik tuttuqpaiyaamik.

³¹ Tavra aapaŋan kiuŋagaa, Iġñiiŋ, ataramik nayuġiŋma, suli sunapayaaq piga pigimmigiñ.

³² Nalautittuq quviasualaniksraqput quyaniksraqpullu, qanuq aniqatin tuquŋaruatun itkaluaqtuaq iñuusatqiksuq, suli tammaŋagaluaqtuaq paqitauruq.