Luke 14 - Iñupiatun Mumiksat Uqalugiksuat

Jesus Iłuaqsigaa Naŋittuaq Iñuk

¹ Iḷaŋanni Jew-guruat savairvianni, Jesus niġiqatauyaqtuġman igluanun atanaurauruam iḷauvluni Pharisee-ñun, iñuich Jesus naipiqtupiaŋagaat.

² Tavra tavrani, iñuk qaiŋaruq Jesus-mun immaqaġniqsuaq iluqaani timimiñi.

³ Tavra Jesus apiġiŋagai pitquranik iḷisaurrich Pharisee-ḷḷu, uqallakłuni, Nalaunŋava iłuaqsiriruni Savaiññiġmi, naagga nalaunŋaitpa?

⁴ Tavra kiuŋaitkaat. Tavraniasii Jesus aksiuŋagaa naŋittuaq aasii iłuaqsivḷugu aullaqtiłługulu.

⁵ Tavra Jesus uqallautiŋagai iñuich, Nalliqsi iġñiqaġumi naagga qimuktiqaġumi kataktuamik nivviamun savaiññivsiññi, tavrauvvaa nuqitchaqtuġniaŋitpauŋ?

⁶ Iliŋisa kiuŋaitkaat taavrumuuna.

Tukkuliiñiq Kamanaġniaŋiññiġlu

⁷ Tavra Jesus iḷitchuġivlugich iḷaŋich aiyugaaqtauruat, iniksraqtuqtuat inigigñiqsranik, quliaqtuaġutiŋagai uuktuunmik iluqaisa.

⁸ Qakuguliqaa aiyugaaqpasi katirrusiqivlutiŋ niqinaqiruat, aquvinnasi inigigñiqsramun. Iḷaanni naumalluktuat ilivsiññiñ aiyugaaŋaviaġmigai.

⁹ Aasii taimma taavruma aiyugaaqłiŋaruam iluqavsiññik ullaglusi uqallautilusi, Iniksritchiuŋ una iñuk, taimaasii ilivsi kanŋutchautigillaan inillaaqsiḷusi kamanaiññiqsramun inimun.

¹⁰ Aglaan aiyugaaqtauguvsi, aquvitchumausi kamanaiññiqsramun inimun, taavruma aiyugaaqtivsi qaiḷuni uqallautiyumagaasi, Avilaitqaan, qaiḷaaġiñ inigipayaamun. Tavraniasii kamanaqsiḷaaqtauniaqtutin takkuanni iluqaġmiŋ aiyugaaqtauruat.

¹¹ Qanuq kiñaliqaa kamanaqsiḷiqtuaq inmiñik kamanaiqsauniaqtuq, suli kiñaliqaa kamasaaŋitchuaq inmiñi kamanaqsiḷiqtauniaqtuq.

¹² Jesus suli uqallautiŋagaa aiyugaaqtini, Niġipkaiguvich naagga niqinaqurriguvich, aiyugaaġnagich avilaitqatitin naagga aniqatiitin, naagga nanmiñiq iḷatin naagga suġalliruat siḷallisin, ilaisaptauq aiyugaaqpiaġmigaatin paaqłiqsaġlutin.

¹³ Aglaan niqinaqurriguvich, aiyugaakkich iḷiappaich, qilluutituqtuat, tusiattuat, ayauŋaruat,

¹⁴ aasii quviatchaktitauniaqtutin, qanuq ilaisa paaqłiġumiñaitkaatin. Tavra God-im paaqłiġñiaġaatin aŋikpata tuqqunmiñ nalaunŋaruat.

Uuktuun Niqinaqiqpaktuatigun

¹⁵ Tavra iḷaŋata niġġiviŋñi aquppiqatauruam Jesus-mun tusaakamiuŋ taamna, uqallaŋaruq ilaanun, Quviasuglich iñuich niġiyumiñaġniaqtuat God-im atanniqsimaviani.

¹⁶ Tavrali Jesus kiuŋagaa uuktuusiqł̣uni, Iñuk iḷaanni niqinaqusiuqpaŋaruq, aasii aiyugaaqługich iñugiaktuat iñuich.

¹⁷ Tavra piñaqsimman niqinaqiniksraq, ilaan tiliŋagaa kivgani uqallautitquvlugich aiyugaaqtauŋaruat, Qaiñaqsigaasi. Supayaat paŋmapak itqanaiqsut.

¹⁸ Tavra iluqaġmiŋ atisivḷutiŋ patchisiqsurraqsiŋarut. Sivulliq uqallaŋaruq kivgamun, Nunasiŋaruŋa, aullaqtuksraupiaqtuŋa tautugiaġlugu. Apiġigikpiñ suliqutiginaŋa.

¹⁹ Allasuli uqallaŋaruq, Tauqsiŋaruŋa tallimaiñik igḷugiiñik qimuktinik, aullaqtuksrauruŋa uuktuaġiaġlugich. Apiġigikpiñ suliqutiginaŋa.

²⁰ Allasuli uqallaŋaruq, Nuliaqqammiqsuŋa. Taamna pisigivlugu, aiyugaaqtauyumiñaitchuŋa.

²¹ Tavra kivgam utiqami quliaqtuaġiŋagai taapkua ataniġmiñun. Tavrani atanġa iglum qinnaliŋaruq aasii uqallakłuni kivgamiñun, Aullaġiñ qilamik apqutiŋiñun apqugauraŋiñullu iniqpaum, aasii qaġġisilugich iḷiappauruat qilluutituqtuallu ayauŋaruallu tusiattuallu.

²² Tavra kivgam utiqami uqallautiŋagaa, Ataniiq, piraksriutin pianiktuq, aasii iniqaqtuq suli.

²³ Tavra atanġa uqallaŋaruq kivgamun, Aullavsaaġiñ apqutinun apqugauranullu siḷataanun iniqpaum aasii araglugich iñuich qaipkakkich, igluga siḷivitchumauq iñuŋnik.

²⁴ Uqallautigivsi, nalliat unnii taipkua aiyugaaqtaugaluaqtuat niġiyumiñaiññiaqtut niqinaqusiuqtamnik. Tainna piñiaġmiuq God-im atanniqsimaviani.

Siġḷiġnaġaluaqtuq Iḷitchitqurauniq Jesus-mun

²⁵ Tavra iñugiapiaġataqtuat iñusalaich iglauqasiŋagaat Jesus, aasii ilaan kiŋiaqługich uqallautiŋagai,

²⁶ Kiñaliqaa qairuaq uvamnun iḷitchitquraġiyumiñaitkiga piviuttaġiłhaaġumiñaitpaŋa ilaan aapamiñiñ, aakamiñiḷḷu, nuliamiñiḷḷu, miqłiqtumiñiḷḷu, aniqatiimiñiḷḷu, inmiñiñunniiḷu.

²⁷ Kialiqaa iqsriutiŋitkumiuŋ aŋarraurani tuqutauyumaliġḷuniunnii pisigiluŋa, nalliummatiŋitchuq iḷitchitqurauyumiñaġluni uvamnun.

²⁸ Qanuq nalliqsi, nappaiyumaalliġumi nasiqsruġviŋmik, aquptaaġluni kisitchiqqaaġniaŋitpa qanutun akisutilaaksraŋanik naamaniaġaluaġmagaaġmi naatchumiñaġlugu?

²⁹ Tainna piŋisuaġumi, maŋŋuliqsiññaġlugu naatchiyumiñaiññiqpan, iñuich tautukkumirruŋ kipautigirraqsiñiaġaat,

³⁰ uqaġlutiŋ, Iñugliuna nappaisaġaluaqłuni, naatchiyumiñaiḷḷaġmi pimmiñiqsuq.

³¹ Naagga kisu umialik, aŋuyaqatiqaqsaġumaagaqsigumi allamik umialiŋmik, naipiqtuqqaaġniaŋitpa isumalaaġutigiaqsiḷugu igḷutuutiyumiñaġniaqtilaamiñik 10,000-mik aŋuyaktiqaġluni 20,000-mik aŋuyaktiqaqtuamun.

³² Igḷutuutiyumiñaiññiaġumi, uŋasisugruŋŋaan akiḷḷiñi, ilaa tilisiñiaqtuq kivgamik umialiŋmun apiqsrisaqłuni aŋuyaŋirrutiksramik.

³³ Tavra Jesus uqallaŋaruq, Tainnatun kiñaliqaa ilivsiññi suksraaġiŋitkumi supayaanik pigikkaġmiñik, iḷitchitqurauyumiñaitchuq uvamnun.

Anniqsuutauŋitchuaq Taġiuq

³⁴ Taġiuq nakuuruq, aglaattauq taġiuq taġiuġniiġumi, qanuġlugu taġiuġniḷitqikkumiñaitchuq.

³⁵ Anniqsuutauyumiñaitchuq nunamun naagga nagguksautauyumiñaġluni nunamun. Aglaan naavitaksrauruq asiñun. Ilivsi iḷitchitquratka taġiutun ittusi nunam iñuŋiñun. Tavraasii siutiqaqtusi tusaggatiksragnik, Naalaġnisiŋa.