Luke 13 - Iñupiatun Mumiksat Uqalugiksuat

Isumalitqiŋisuaġuvsi Suksraunġiġñiaqtusi

¹ Jesus uqaġataviksillugu iñuich tavraniinŋarut. Iḷaŋisa uqallautiŋagaat Jesus Galilee-ġmiutigun Pilate tuqunŋaraŋigun aitchuipkaqtillugich ikipkautinik God-mun, auŋich iḷḷativlugich niġrutit auŋiññun.

² Tavra ilaan kiuŋagai, Isumavisi taapkua Galilee-ġmiut piḷułhaaġasugalugich iluqaiññiñ Galilee-ġmiuniñ, tainna tuqutaummata?

³ Naumi, aglaalli uqallautigivsi, ilivsi isumalitqiŋisuaġuvsi iluqasi, tainnatun suksraunġiġñiaġmiusi.

⁴ Qanuqtauq aasii taipkua 18-guruat kattaqikkaŋi nasiqsruġviata Siloam tuqułługich, Isummatigivisigik piḷułhaaqłutiŋ tuqutaunasugalugich iluqaiññiñ iñuuruaniñ Jerusalem-mi?

⁵ Naumi. Uqallautigivsi, ilivsivsauq isumalitqiŋisuaġuvsi iluqasi, tainnatun suksraunġiġñiaġmiusi.

Uuktuun Siiġñiḷaitchuakun Fig-nik Napaaqtuq

⁶ Tavra Jesus quliaqtuaġutiŋagai uumiŋa uuktuunmik sivuniġivlugu uqautigianikkani. Iñuk fig napaaqtuanik nautchirriŋaruq siiġñaqaġviŋmiñun, aasii qaivḷuni ivaqłiavigiŋagaa siiġñanik aasii paqinŋaitchuq.

⁷ Tavra ilaan uqallautiŋagaa napaaqtumik qaunaksri, Uvva, piŋasuni ukiuni ullaguugaluaġiga ivaqłiavluŋa siiġñanik mattumaŋŋa fig napaaqtuaniñ, aasii paqilaitchuŋa. Kippuuŋ. Summan nunaiġutchautauniaqpa?

⁸ Tavra qaunaksrim napaaqtunik kiuŋagaa, Aŋuun, iḷaksianagu ukiivsaallagli. Nivaŋniaqtuŋa avataagun aasii iḷḷiqilugu nagguksautinik.

⁹ Aasii siiġñikpan ukiutqigu piḷḷuataġniaqtuq, aglaan siiġñiŋiḷgitpan, kipiyumiñaġniaġiñ.

Jesus Iłuaqsigaa Qilluutituqtuaq Aġnaq Savaisillugich

¹⁰ Tavra iḷaŋanni Jew-guruat savaiññiŋata Jesus iḷisaurriŋaruq aŋaiyyuviŋmi.

¹¹ Tavra tavraniinŋaruq aġnaq ilitqusiqł̣uqaqtuaq naŋititchiruamik ilaanik 18 ukiuni. Taamna aġnaq isivilaiñŋaniqsuq tainnatun sivisutigiruamik.

¹² Tavra Jesus tautukamiuŋ aġnaq, ququaŋagaa aasii uqallautivlugu, Aġnaaq, atanġiqsitaurutin naŋirrutiŋniñ.

¹³ Tavra Jesus aksiŋagaa aġnaq, aasii tavrauvvaa isivvaġiksiŋaruq, suli nanġaŋagaa God.

¹⁴ Tavrali umialiŋnaŋa aŋaiyyuvium, piavsaŋaruq pisigivlugu Jesus iłuaqsiriñiŋa Jew-guruat savaiññiŋanni. Tavra ilaan uqallautiŋagai iñuich, Itchaksrat uvlut ittut savagviksravut, qairaġutitchi taapkunani uvluni iłuaqsirauyaqtuġlusi, savaiññiġum uvluŋiḷaaŋiñi.

¹⁵ Tavra Atanġum kiuŋagaa, Ilivsi ukpiŋŋuaqtuasii, atausiullaavlusi savaitchuani pituiqł̣ugich qimuktisi naagga kakaktisi niġrutiqaġviŋmiñ tasikuaqługich imiqtitchaqtuġuugisi savaitchuani.

¹⁶ Aasiiḷivsauq una aġnaq, Abraham kiŋuniŋa, Satan-gum nagliksaaqtinŋaraŋa 18 ukiuni, atanġiqsitaksrauŋitpa nagliksaaqtitauniŋaniñ savaitchuani?

¹⁷ Taamna uqallausiġimmagu iluqaġmiŋ akiḷḷiḷiqsuqtiŋi kanŋutchaŋarut aasiiḷi iñuich iluqaġmiŋ quviasukpaŋarut pisigivlugich iluqaisa quvianaqtuat sut ilaan savaaġiŋaraŋi.

Uuktuun Nautchiaksrakun Atiqaqtuaq Mustard-mik

¹⁸ Tavra Jesus uqallautiŋagai, Sutun itpa God-im atanniqsimmataa iñuŋnun? Sumik uuktuusiġñiaqpigu nausaiññaġniŋa?

¹⁹ Arriqaqtuq mustard-mik nautchiaksramik mikiniqsrapiaġataŋannik nautchiaksrat. Nunaliqirim nautchirriutigaa nunamiñun, kanġaqsruutigivlugu nautchiaqaġviŋmiñun, aasii nauŋaruq napaaqtuqpaġuqłuni, aasii tiŋmiat ugluliuqłutiŋ qisiqsiutiŋiñun.

Uuktuun Imaksrakun

²⁰ Suli Jesus uqallatqiŋaruq, Sutun itpa God-im atanniqsimmataata nausaiññaġniŋa?

²¹ Arriqaqtuq imaksratun aġnam akutaŋatun palauvaŋmun. Imaksram puvlaktitkaa iluqaan akutaq.

Niġukitchuaq Isiġiaq

²² Jesus iglauŋaruq nunaaqqisigun nunaaqqiuratigullu iḷisaurrivḷuni, suli iglauvluni tuŋaanun Jerusalem.

²³ Tavra iñuum uqallautiŋagaa, Ataniiq, annaurrauruat iñukitchumaaqpat? Tavra Jesus uqallautiŋagai,

²⁴ Isiġniaġniq qiḷaŋmun ittuq isiġniataŋmatun kapittuakun isiġiakun. Isiġniḷupiaġitchi kapittuakun isiġiakun, qanuq uqallautigivsi, iñugiaktuat isiġniaqsaaniaġaluaqtut isiġumiñaiññiaqtut.

²⁵ Taimanigu piñiaqtuq iñuktun igluqpiraqtuatun makinniaqtuatun aasii umiglugu upkuaq. Upkuaqpagu makitasaġataġniaqtusi siḷami aasii tigluktuaqsiḷusi upkuamun uqaġlusi, Ataniiq, upkuiġuttutigut. Ilaan kiuniaġaasi, Nalugivsi sumiŋŋaqtuagutilaavsiññik.

²⁶ Tavraasii kiuniaġiksi, Niġisuusugaugut imiqłutalu piqatigivlutin, suli iḷisaurrivḷutin nunaaqqivsiŋni.

²⁷ Ilaa uqallatqigñiaqtuq, Uqallautigivsi, nalugivsi sumiñ qairuagutilaavsiññik. Aullaġitchi uvamniñ, iluqasi piḷuusiqirit.

²⁸ Tavrani qianiaqtusi suli tiriqtillugich kigutisi, tautukkuvsiuŋ Abraham Isaac-lu Jacob-lu iluqaisalu uqaqtiŋi God-im atanniqsimaviani God-im, ilivsiḷi siḷamiutaupkaġlusi.

²⁹ Suli iñuich qaiñiaqtut nunapayauraniñ aasii aquvitqataulutiŋ niġġiviŋñun God-im atanniqsimaviani.

³⁰ Tavraasii, iḷaŋich aqulliurut paŋmapak isiqqaaġniaqtuat qiḷaŋmun, suli iḷaŋich sivulliurut aqulliuniaqtuat.

Jesus Piviuttaġigaa Jerusalem

³¹ Taavrumanipiallak ikarraġmi iḷaŋich Pharisees qaiŋarut, aasii uqallautivlugu Jesus, Aullaġiñ maaŋŋa, qanuq amma Herod tuqutchukkaatin.

³² Tavra ilaan uqallautiŋagai, Aullaġlusi uqallautiyaqtuqsiuŋ taamamna pisukkaaq, anittaiñiḷuŋa ilitqusiqł̣uŋnik suli iłuaqsiriñiḷuŋa naŋirrutinik uvlupak uvlaakullu, aasii uvluk piŋayuaŋni naallugu savaaġa.

³³ Iglauruksraupiaqtuŋa Jerusalem-mun uvlupak uvlaakullu uŋaliagullu, qanuq uqaqtaa God-im tuqutauruksrauŋitchuq uniuġlugu Jerusalem.

³⁴ Jerusalem-miut. Yaqhii Jerusalem-miuguruasii, tuquġairuasii uqaqtiŋiñik God-im uyaġagniglu miḷḷuuqługich tamatkua God-im tiliraŋi iliŋnun. Qanutun akulaisigilugu katitchumiñaġaluaġaġigivsi iluqasi atautchimun, tiŋmiatun katitchiruatun piayaamiñik isaqquŋmi ataaŋnun, aasii tainna pitqulaitchusi.

³⁵ Uvva, iglusi suksraaqtaupiallaŋniaqtut. Aasii uqallautigivsi, taututqikkumiñaitkivsiŋa uqallakkumiñaqsiḷġataġlusi, God-im piḷḷuataqtilliuŋ iñuk qairuaq pisivlugu Ataniq.