Luke 11 - Iñupiatun Mumiksat Uqalugiksuat

Jesus Iḷisaurriruq Aŋaiyyuniġmik

¹ Tavra Jesus iḷaanni aŋaiyyuŋalgitchuq, aasii aŋaiyyuaniŋman iḷaŋata iḷitchitquraŋisa uqallautiŋagaa, Ataniiq, iḷisauttutigut aŋaiyyuniġmik, John-tuttauq iḷisaurriruatun iḷitchitquraġmiñik aŋaiyyuniġmik.

² Tavra Jesus uqallautiŋagai, Aŋaiyyuyumausi inna, Aapavut qiḷaŋmiittuatiin, iñuich qiksigilisin. Ilivich Atanniqsimakkich iñupayaat. Ilivich pisuutin taŋŋiqsauli nunami iluqaani qiḷaŋmi pimmatun.

³ Aitchuqtigut uvluġaġimman niqiksraptiŋnik.

⁴ Suli suliqutigiŋaikkich itqaumayumiñaiġḷugich piḷuutivut, qanuqtauq suliqutigiŋaiġuummigivut itqaumayumiñaiqł̣ugich iñupayaat piḷuutiŋich uvaptiŋnun. Ikł̣igutchaktinniaqtinnatigut, [annautilutalu piḷuktuamiñ.]

⁵ Tavra Jesus uqallautiŋagai iḷitchitqurani, Nalliqsi avilaitqatiqaqtuaq ullautiyumiñaqpa ilaanun unnuam qitqani aasii uqallautilugu, Avilaitqaan, atukkiñŋa piŋasunik punniġnik,

⁶ qanuq amma avilaitqatiga iglaaq tikitchuaq, aasii niqłiqsuutiksraitchuŋa.

⁷ Aasii ilaan kiulugu tatqamaŋŋamiñ. Iḷaksianaŋa. Upkuaq pitchiġiiyaŋaruq, miqłiqtutkalu uvaŋalu tuttaaŋarugut. Makitiġniaŋitchuŋa aitchuġuglutin supayaamik.

⁸ Uqallautigivsi, makitiġniaŋiññiḷuqtum unnii aitchuġuglugu supayaamik avilaitqatigigiññaġniḷugu, aglaan pisigilugu katchuŋaiññiŋa, ilaa makitiġniaqtuq aasii aitchuġlugu qanutupayauraq piqaġuktilaaŋatun.

⁹ Aŋaiyyuguvsi, qapiŋaiḷḷusi qiññuaqtuġitchi aitchuusiaqaġniaqtusi, qapiŋaiḷḷusi ivaqłiasitchi paqinniaġiksi ivakkaqsi, qapiŋaiḷḷusi tigluktuġitchi aasii upkuiġutiniaġaasi.

¹⁰ Qanuq iñupayaaq qiññuaqtuqtuiññaqtuaq aitchuusiaqallaruq, suli ivaqłiatuiññaqtuaq paqitchivḷuni, iñuk suli tigluktuqtuiññaqtuaq upkuiġurriqaġniaqtuq.

¹¹ Iḷasi aapaurut. Iġñisi apiqsrikpata iqaluktuġuglutiŋ, aitchuġniaŋitkisi nimiġiamik.

¹² Naagga apiqsrikpata manniksuġuglutiŋ, aitchuġniaŋitkisi igutchaqpaŋmik kapputiliŋnik.

¹³ Tavraasii ilivsi, nakuuŋitkaluaŋŋavsi, aitchuisuurusi nakuuruamik miqłiqtuvsiññun, qanutułhaaq aasii Aapari qiḷaŋmiittuaq aitchuiyumiñaqtigiruq Ilitqusiġiksuamik tamatkunuŋa apiqsriruanun inmiñun.

Jesus-lu Beelzebul-lu

¹⁴ Tavra Jesus anitchiŋaruq ilitqusiqł̣uŋmik uqalaitchuamik. Aasii ilitqusiqł̣uk animman uqalaitchuaq iñuk uqallasiŋaruq, aasii iñuich aliuŋarut.

¹⁵ Tavrali iḷaŋich iñuich uqallaŋarut, Jesus anittairuq ilitqusiqł̣uŋnik suaŋŋataagun Beelzebul, umialgata ilitqusiqł̣uich.

¹⁶ Allalli uuktuqsiññaqługu apiġiŋagaat aliuġnaqtuamik tautuktitquvlutiŋ qiḷaŋmiñ, iḷisimanaqsisaġlugu God-mun iviġaumagitilaaŋa.

¹⁷ Tavra Jesus puttuqsrivḷugich isumaŋich, uqallautiŋagai, Nunauruat atinġiqł̣utiŋ aŋuyautikamiŋ inmiŋnun suksraunġiġuurut. Qitunġaġiich atinġiqamiŋ inmiŋni suksraunġiġñiaqtut inmiŋnik.

¹⁸ Tainnatuttauq Satan ilitqusiqł̣uŋi atinġiġumiŋ piyuutilutiŋ avanmun, Satan suaŋŋataa isukłiññayaqtuq. Ilivsi uqaqtusi anittaiñivḷuŋa ilitqusiqł̣uŋnik suaŋŋataagun Beelzebul.

¹⁹ Aasii uvaŋa anittaġupkich ilitqusiqł̣uich Beelzebul-kun, kikulli maliġuaqtivsi anittaġuuvatigik? Tavra iliŋich isivġiqsiginiaġisi iḷisimanaqsiḷugu killukuapiaġataqtilaaqsi.

²⁰ Tavraaglaan anittaikama ilitqusiqł̣uŋnik suaŋŋataagun God-im, nalupqinaitchuq God-im atanniqsimmataa maaniittuq.

²¹ Suaŋaruam iñuum, satkuaġigḷuataqłuni ittuam, munaġigaa igluqpakpani, aasii ilaan suġaliŋi iñuich iḷaksianiaŋitkaich.

²² Aglaattauq iñuum saŋŋił̣haaqtuam ilaaniñ aŋuyakpagu payariḷugu, aatchumiñaġaa satkuŋiñik arguaŋŋatigikkaŋiñiglu, autaaġmiḷugich suġaliŋi piqatimiñun.

²³ Iñuk piqatauŋitchuaq uvamnun akiḷḷiuruq uvamnun, iñuktun ittuq kivriñaqsimman palauvaksranik, katitchiqataugaluaġnani siavsigiññaqtuatun.

Ilitqusiqł̣uk Utiqtuq

²⁴ Ilivsi pigiitchuasii iñuuruat paŋmapak ittusi iñuktun ilitqusiqł̣uqaqtuatun. Ilitqusiqł̣uk anikami iñuŋmiñ, ilaa kukiḷuktuq imiġitchuakun nunakun ivaqłiavluni piḷaiŋaiqsiaġviksramiñik, aasii paqitchiŋitchuq. Tavraniasii uqallaktuq, Utiġniaqtuŋa iñuŋmun, annivimñun.

²⁵ Tavra utiqami paqitkaa inigiŋakkani imaiḷaaq, tilaiŋaraatchiaq, sut iłuaqsruqtat.

²⁶ Tavraasii aullaqłuni qaġġirriruq tallimat malġugnik allanik ilitqusiqł̣ugnik pigiił̣haaqtuanik inmiñiñ, aasii isiqłutiŋ iñuuvigiaqsivḷugu. Tainna pimmata, iñuk taamna pigiiḷił̣haaŋaruq aqulliġmi sivulliġmiñ.

Iḷumun Ittuaq Quviasuun

²⁷ Taavrumiŋa Jesus uqaġniaqtillugu, aġnaq nivliŋaruq nipatusivḷuni akunġanniñ iñuich uqallakłuni ilaanun, Quviasugli aġnaq taimña aniaqaqtuaq iñukkuksaaqaqtuaġlu iliŋnik.

²⁸ Tavra Jesus kiuŋagaa, Quviasułhaaġlich iñuich tusaaruat God-im uqaluŋiññik kamagivlugiḷḷu.

Jesus Aliuġnaqtuamik Savaqurauruq

²⁹ Iñuich iñugiaksisaiññaaqsimmata, Jesus uqarraqsiŋaruq, Ukua iñuuruat paŋmapak pigiitchuagurut, apiqsrirut aliuġnaqtuamik tautugukłutiŋ nalupqinaiyautiksramik God-mun iviġaumagitilaamnik. Aliuġnaqtuatualuk savaaguniaqtuaq piñiaqtuq Jonah-mun piŋaruatun.

³⁰ Nineveh-mi iñuuŋaruatitun iḷitchuġivlugu aliuġnaqtuaq God-im Piŋaraŋa Jonah-mun, tainnatun iñuich paŋmapak iñuuruat iḷitchuġiniaqtut God-im aliuġnaqtuamik savaaŋanik Iġñiŋanun iñuum.

³¹ Isivġiġviŋmi aġnam umialgum akiḷḷiḷiġñiaġai iñuich iñuuruat paŋmapak aasii pasirauyumiñaqsiḷugich. Qanuq ilaa qaiŋaruq uŋallam tuŋaaniñ nunamiñ uŋasiksuamiñ tusaayaqtuqługu isumattutaa Solomon. Uqallautigivsi, aasiimma iñuk maaniittuq kamanałhaaqtuaq Solomon-miñ.

³² Isivġiġviŋmi iñuŋisa Nineveh-m akiḷḷiḷiġñiaġaasi ilivsi iñuuruasii paŋmapak aasii pasirauyumiñaqsiḷusi, qanuq iliŋich isumalitqiŋavlutiŋ alġaqsruimman Jonah, aasiimma iñuk kamanałhaaqtuaq Jonah-miñ maaniittuq.

Qaumman Timimun

³³ Kialiqaa ikitanikamiuŋ qulliq matulaitkaa, naagga inillalaitkaa utkusium ataanun, aglaan iḷisuugaa qulliqaġviŋmun, tamatkua isiqtuat qaummaġiquvlugich.

³⁴ Irisi nannisun ittut timivsiññun. Irisi surruitpata tautullagiksi pisuaġviksi. Aglaan irisi inŋitpata surruiḷḷutiŋ, tautukkumiñaitkiksi pisuaġviksi. Tainnatun ittut isumasi. Isumasi surruitpata, iñuulluataġumiñaġniaqtusi.

³⁵ Qaunagisitchi kaŋiqsiḷḷuataġuglugu iñuulluataġniksraqsi.

³⁶ Tavraasii iñuulluataġuvsi, timisi inniaqtut imaqaqtuatun qaummaġmik, taaqtuamik piiḷḷuni. Kaŋiqsiḷḷuataġniaqtusi, naniqaqtuatun qaummatiksramik iglauviksravsiññun.

Jesus Pasigai Pharisees Iḷisaurriḷḷu Pitquranik

³⁷ Jesus uqaaniŋman taapkuniŋa, Pharisee-m tuyuġmiaqsaŋagaa niġiqatigitquvluni. Tavra isiqłuni aquvinŋaruq niġisaqłutiŋ.

³⁸ Tavra Pharisee allasuŋaruq Jesus iqaġiqqaaġaluaġnagich argagni niġisaġumaaqsimman, tuvraġaluaġnagu Pharisees piḷġusiat.

³⁹ Tavra Ataniq uqallaŋaruq ilaanun, Ilivsiuvva Pharisees salummaisuurusi kisianik qaaŋanik timivsi, salummaġmatun qallugauram, naagga puggutauram qaałhiñaŋa. Aasii piḷḷatupiaġataqtusi, pigiipiaġataqłusiḷu.

⁴⁰ Isumalluaġiitchuasii. Puttuqsriŋaitpisiuŋsuli God savaŋaruaq iñuich timiŋiññik savaŋatilaaŋaniktauq uummatiŋiññik.

⁴¹ Savaaġisigik nagliktuiñisi uummativsiññiñ iluqaaniñ. Tainna piguvsi, iḷisimanaqtinniaġiksi uummativsi salumatilaaŋa.

⁴² Naglignaqtusiuvva ilivsi Pharisees, qanuq aitchuisuurusi God-mun quliŋŋuġutiŋiññik mikiniqsraqpiatchiat nauriavsi niġiñaqtuat, aasii naluruuraaġisi pitqiksiġautairrullu piviuttaqsriñiġlu God-mik. Taapkuak piraksraġigisi, aasii aitchuimmiḷusi quliŋŋuġutinik.

⁴³ Naglignaqtusiuvva ilivsi Pharisees, qanuq aquppiḷḷaturusi kamanaqtuat aquppiutaŋiññi aŋaiyyuviŋñi, paġlalluataquvlusiḷu tauqsiqsuġviŋñi inini.

⁴⁴ Naglignaqtusiuvva ilivsi Pharisees, qanuq iḷuvviviktun ittusi nalunaiñŋutaitchuatun. Iñuich pisuaġvigikkaŋisun qaaŋatigun naluvlugich, aasii salumaiḷivḷutiŋ pitqurat uqaluatigun. Ukpiŋŋuaġnivsigun asiñuutigisi iñuich.

⁴⁵ Iḷaŋata iḷisaurrich pitquranik uqallautiŋagaa, Iḷisaurrii, uqallakkavich tainna pisaaŋammigiptigut.

⁴⁶ Tavra Jesus uqallaŋaruq, Naglignaqtusi ilivsi iḷisaurrich, qanuq iḷisaurrutisi God-im pitquraŋigun siġḷiġnaqsisuugisi iñuich kamaksriñiksraŋannun iluqaiññik, ikayuġniuraġniaġnagich suuramik-unnii kamagitqulugich God-im pitquraŋi. Ikayulaipiaġisi.

⁴⁷ Naglignaqtusi ilivsi, qanuq qaunagilluatapiaġisi iḷuviŋich uqaqtiŋisa God-im, iñuktaġikkaŋisa maŋŋuuvsi.

⁴⁸ Iḷisimaraurusi iviġaumagigisiḷu maŋŋuuvsi pikkaŋich, qanuq ilaisa iñuktaġiŋagaluaġaich, ilivsiḷi qaunagilluataġisi iḷuvviviŋich.

⁴⁹ Taamna pisigivlugu God isumaturuaq uqallaŋaruq inna, Tilisiñiaqtuŋa iliŋiññun uqaqtimnik alġaqsruiriñiglu. Iḷaŋich ilaisa iñuktaġiniaġaich, suli nagliksaaqtillugich iḷaŋich.

⁵⁰ God-im tatavsaġniaġaasi iluqasi iñuuruasii paŋmapak, qanuq pasiñaġumiñaqtusi iluqaisigun uqaqtiŋigun God-im, iñuktauruatigun nunaqaŋa isagutimman.

⁵¹ Pasiraurusi iluqaisigun nalaunŋaruatigun iñuktauruatigun, Abel-miñqaŋa Zechariah-mun, tuqutauruaq akunġagni ikipkaiviuvlu inivḷu ilaaguaqtauruam God-mun. Uqallautigivsi taavrumiŋa, qanuq iñuktauruat iluqaisa pisigilugich, tatavsaqtauniaqtusi iñuuruasii makkunani uvluni.

⁵² Naglignaqtusiuvva ilivsi iḷisaurrich pitquranik. Qanuq ilivsi nalaullugu kaŋiqsiŋaitkiksi, iḷisaurrutigiŋaitkiksiḷu isumattutaa God-im. Ilivsi iñuuŋaitchusi God-im isumattutaagun, aasii piñaiḷutchiqsuġmivḷugich iñuusukkaluaqtuat God-im isumattutaagun.

⁵³ Tavra aullaġman tavraŋŋa, iḷisaurriḷḷu pitquranik Pharisees-lu suammautiniarraqsiŋagaat, suli alapitinnialavlugu apiqsruqtuqługu iñugiaktuanik apiqqutinik.

⁵⁴ Taamna piŋagaat uqallaktinniaġaluaqługu killukuaŋaruamik, iliŋisa pasisukługu.