Luke 10 - Iñupiatun Mumiksat Uqalugiksuat

Jesus Tiligai 70 Iḷitchitqurat

¹ Taavruma aquagun Ataniq piksraŋaruq 70 allanik iḷitchitquranik, aasii aullaqtiłługich sivumiñi malġuullaavlugich, nunaaqqipayaanun ilaan ullakkumakkamiñun.

² Tavra ilaan uqallautiŋagai, Iñusalaich utaqqirut tusaayumavlutiŋ tusaayugaaġiksuanik, palauvaksratun nauganiktuatun kipisałhiñaaġuqługich, aglaan savaktit iñukitchut. Tavraasii qiññuaqtuġitchi Atanġannun savaktit tilisivsaaqulugu savaktiksravsaamiñik.

³ Aullaġitchi. Uvva, tiligivsi imnaiyaatun akunġannun amaqqut.

⁴ Saagaġnasi maniqaġviŋñik, puukataniglu, aluġutiniglu, suli paġlannigḷusi iñaviqqutchiġñasi apqunmi.

⁵ Kisupayaaq iglu isiġvigiguvsiuŋ, uqallaqqaaġitchi inna, Tutqiutiqaġitchi.

⁶ Tavraasii tutqiḷḷaturuaq iñuk tavraniitpan, tutqiun inniaqtuq. Aasii tutqiutiqallaturuamik iñuitpan, tutqiun inniaŋitchuq tavrani.

⁷ Nayuutiyumausi taavrumani iglumi, niġiḷusi sunik niqiksritpasi imiġlusiḷu, qanuq savakti nalliummatiruq akiḷiusiaksramiñun. Nuktaġnasi iglumiñ iglunun.

⁸ Qakugupayaaq tikitkuvsi nunaaqqiñun aasii paġlakpasi, niġiyumausi sunik niqłiqsuqpasi.

⁹ Iłuaqsiḷugich naŋittuat taavrumani nunaaqqimi, suli uqallautilugich, God-im atanniqsimmataata qallipiaġataġaasi.

¹⁰ Aglaan qakugupayaaq tikitkuvsi nunaaqqimun aasii paġlaŋitpasi, aullaġumausi apqutiŋiññun aasii uqallaglusi,

¹¹ Avyuŋaunnii nunaaqqiunivsi niviruaq isigaptiŋnun, uvagut tilaktiġikput akiḷḷiḷiutivlugu ilivsiññun. Aglaan una iḷisimasiuŋ, God-im atanniqsimmataata qallipiaġataŋagaluaġaasi.

¹² Uqallautigivsi, uvluani isivġiġvium, God naglikkutiqałhaaġniaqtuq iñuŋiññun Sodom taavrumaŋŋa nunaaqqimiñ tukkuliiŋitchuamiñ ilivsiññik.

Ukpiŋitchuat Nunaaqqich Iḷaŋiññi

¹³ Qanutun naglignaqtigirusi ilivsi, Chorazin-miut. Qanutun naglignaqtigimmiusi ilivsi Bethsaida-ġmiut. Qanuq aliuġnaqtuat savaat savaaguruat ilivsiññi savaaguŋakpata Tyre-miḷu Sidon-miḷu, taimaniuvvaa isumalitqikkumiñaŋagaluaqtut annuġaaġlutiŋ miitchuŋnik suli aquppiḷutiŋ aġrani.

¹⁴ Tavra uqallautigivsi, uvluani isivġiġvium isivġiusiaksraŋak Tyre-vlu Sidon-lu tunikił̣haaġniaqtuq ilivsi isivġiusiaksravsiññiñ.

¹⁵ Aasii ilivsi Capernaum-miut, isumavisi tugliqsruutinasugalusi qiḷaŋmun kamanaunmi? Nunaaqqiqsi suksraunġiqsauniaqtuq. Qanuq aliuġnaqtuat savaaguruat iliŋni savaaguŋakpata Sodom-mi, napanayaġaluaqtuq uumuŋaaglaan uvlumun.

¹⁶ Tavra Jesus uqallautiŋagai iḷitchitqurani, kialiqaa naalaġnigumisi naalaġnimmigaaŋa. Suli kialiqaa pisuŋitchuam ilivsiññik pisuŋiñmigaaŋa. Aasiisuli kialiqaa pisuŋiññamiŋa, pisuŋiñmigaa tiliriga.

Utiqtut 70 Tilirauruat Iḷitchitqurat

¹⁷ Utiŋarut 70 iḷitchitqurat quviasuutiqpaqaqłutiŋ, uqaqłutiŋ, Ataniiq ilitqusiqł̣uich unnii kamagigaatigut anittaqaptigik atqiñ atuqługu.

¹⁸ Tavra Jesus uqallautiŋagai, Tautuŋagiga Satan kataktuaq igniġuuqpatittuatun qiḷaŋmiñ.

¹⁹ Uvva, suaŋŋasiŋagivsi tunmaġumiñaqsivḷusi nimiġianun igutchaqpaŋnullu kapputiliŋnun, suli payariyumiñaqsivḷugu iluqaan suaŋŋataa uumigirim, suli sum anniġumiñaitkaasi.

²⁰ Aglaattauq quviatchakpautiginagu ilitqusiqł̣uich kamaksriñiŋat ilivsiññik, aglaan quviasukpagitchi atisi aglautiŋammata qiḷaŋmi.

Jesus Quviatchakpaktuq

²¹ Taavrumani ikarraġmi Ilitqusiġiksuam quviatchaktinniġaa Jesus, aasii uqallaktiłługu, Aapaaŋ, Atanġuruatiin qiḷaŋmun nunamullu, quyyavigigikpiñ tamatkua iriqsimaŋakapkich isumaturuaniñ kaŋiqsisiqaqtuaniḷḷu, aasii satqummiqł̣ugich iñuŋnun ukpiġutiqaqtuanun miqłiqtutun. Aaŋ, Aapaaŋ, taamna piŋagiñ ilivich pisuutigivlugu iviġaumagivlugulu.

²² Aapama supayaat qaiñŋagai uvamnun, aasii kialiqaa iḷisimaŋitkaa Iġñiq aglaan kisimi Aapam. Kialiqaa suli iḷisimaaġiŋitkaa Aapa aglaan Iġñiġum kisimi, kiapayaaġlu Iġñiġum iḷitchuġipkakkaŋa Aapamik.

²³ Tavrani qiviaqługich iḷitchitqurani Jesus uqallautiŋagai iñuił̣aami, Quviasugitchi tautukavsi tautuavsiññik.

²⁴ Qanuq uqallautigivsi, iñugiaktuat uqaqtiŋisa God-im umialgiḷḷu kipiġniuŋagaluaqtut tautugukługich ilivsi tautukkasi, aasii tautuŋaitkaich, suli tusaayumavlugich sut tusaakkasi, aasii tusaaŋaitkaich.

Uuktuun Iñulluatakun Samaria-ġmiukun

²⁵ Tavra pitquranik iḷisaurri makinŋaruq uuktuaqsaqługu, apiġivlugu Jesus, Iḷisaurrii, sumik piruksrauvik iñuuyumiñaqsisaġluŋa isuitchuamun?

²⁶ Jesus kiuŋagaa, Qanuq God-im pitquraŋi iñuutqurivat? Sunik taiguaġuuvich taapkunani?

²⁷ Ilaan kiuŋagaa, Piviuttaġipiaqsaġiñ Ataniq God-igikkan, piviuttaġilugu iḷuŋniñ, iluqaaniḷu iñuuniaġniġni, iluqaaniḷu piḷġusiġñi, iluqaaniḷu isumaniġni, suli piviuttaġiraksraġigiñ siḷalliñ iliktun iḷiuġlugu.

²⁸ Tavra Jesus kiuŋagaa, Kiggutin nalaunŋaruq. Tainna iñuuniaġiñ aasii iñuuniaqtutin isuitchuamun.

²⁹ Tavra iḷisaurri pitquranik, kipiġniuqłuni patchisaitchukłuni inmiñi, apiġiŋagaa Jesus, Kiuva siḷalliġa?

³⁰ Jesus kiuŋagaa, Iñuk aullaŋaruq Jerusalem-miñ Jericho-mun. Aasii kasuivḷuni tigligayuktinik, ilaisaasii annuġaiyaŋagaat anaumikł̣ugulu aasii qimakługu tuquanŋuqługu.

³¹ Tavra aŋaiyyuliqsiqpak iglaummiñiqsuq tamatkunuuna apqutitigun, aasii tautukamiuŋ ikiḷik iñuk, qaaŋiqsaaŋagaa taavuunatchikun.

³² Tainnatun suli Levite, tikiññami tavruŋa qiñiqtuallakkaluaqamiuŋ, qaaŋiqsaaŋaruq taavuunatchikun.

³³ Tavrali Samaritan-guruaq, iglauniallaġmi tikiññiqsuq ikiḷiŋmun iñuŋmun, aasii tautukługu nagliksratchaŋaruq.

³⁴ Aasii ullakługu mamitaqtuŋagai kiḷḷiaġniŋi, kuviġaqługich uqsrumik wine-miglu, aasii qakiłługu kakaktimiñun, qaġġisiŋagaa tukkumaviŋmun, aasii qaunagiaqsivḷugu.

³⁵ Uvlaakumman tigusiŋaruq malġugnik maniuraŋnik aasii aitchuutigivlugik tukkumavium qaunaksriŋanun uqallautivlugu, Qaunagiyumagiñ, aasii qanutupayaaq maniksuutigigupku, utiqtitchiviginiaġikpiñ utiġuma.

³⁶ Tavra Jesus apiġiŋagaa, Isummatigiviuŋ nalliat taapkua piŋasut iñuich nalupqinaiqpa siḷalliutilaamiñik iñuŋmun kasuiruamun tigligayuktinik?

³⁷ Iḷisaurri pitquranik uqallaŋaruq, Taamna nagliktuiruaq ilaanik. Tavra Jesus uqallautiŋagaa, Aullaġlutin tainnatulli piyaqtuġiñ.

Jesus Isiqattaaqtuq Martha-mun Mary-mullu

³⁸ Tavra Jesus iḷitchitquraniḷu iglauvlutiŋ suli tikiñŋarut nunaaqqimun. Tavrani aġnam atiqaqtuam Martha-mik paġlaŋagaa aimaaġviŋmiñun.

³⁹ Aasii aniqatiqaŋaruq atiqaqtuamik Mary-mik. Mary aquppiŋaruq sivuġaani Atanġum naalaġnivḷuni iḷisaurrutiŋiñik.

⁴⁰ Tavrali Martha isumanŋutaniŋaruq pisigivlugu atqunaq savaŋnini, aasii ullakługu uqallautiŋagaa, Ataniiq, suliqutigiŋitpiuŋ aniqanma kisima savaurripkaġmaŋa? Tilliuŋ ikayuquluŋa.

⁴¹ Tavra Atanġum kiuŋagaa, Martha, Martha, uŋiarirutin isumaalukpaitchutillu sutigun iñugiaktuatigun.

⁴² Atausiq piraksraupiaqtuq. Mary-m piksraqtaaġiŋagaa nalaunŋaruaq. Piiġumiñaitchuq ilaaniñ.