Leviticus 9 - Iñupiatun Mumiksat Uqalugiksuat

Aaron Aitchuimman Ikipkaqtanik

¹ Uvlaakumman ilaaguaqtaunikun piraġausiŋich naanmata, Moses-gum ququaŋagai Aaron-lu iġñiŋiḷḷu suli aullarriŋich Israel-gum kiŋuvaaŋich.

² Uqallautigaa Aaron, “Aŋusalluayaamiglu aŋusallumiglu imnaimik qaġġisuurriḷutin surruutaitchuagnik aitchuutigikkik Ataniġmun, aŋusalluayaaq taamna piḷuun pisigilugu aitchuutigilugu aasii aŋusalluq imnaiq ikipkaġlugu aitchuutaulugu.

³ Aasii uqallautilugich Israel-gum kiŋuvaaŋich piksraqulugich aŋusallumik nagruligmik piḷuunmun aitchuutauniaqtuamik, aasii atausimik ukiuqtutigiruamik nuġġaġmik, suli atausimik ukiuqtutigiruamik imnaiyaamik surruutaitchuagnik ikipkaġlugik aitchuutiksrak,

⁴ suli pamiqsaamiglu aŋusallumiglu imnaimik iḷammiuġniq pisigilugu aitchuutiksraġnik. Ikipkaġlugich aitchuutigigisigaich Ataniġmun iḷaqaġlugich palauvaksramik aitchuunmik akurrusiġḷugu uqsrumik. Tainna piruksraurut qanukkiuvva Atanġum niptaġviginiaġaich uvlupak.”

⁵ Qaġġirriŋarut sivuġaanun Tupqum supayaanik Moses-gum piraksriutigiraŋiñik, suli iluqaġmiŋ nunaaqqim iñuŋich katinŋarut tavruŋa nanġaġiaqługu Ataniq.

⁶ Moses uqallaktuq, “Atanġum piraksriŋagaasi tamatkua iluqaisa tuvraquvlugich, qaumaniŋa nayuqtauniŋata niptaquvlugu ilivsiññun.”

⁷ Tavraasi uqallautiŋagaa Aaron, “Ikipkaivigmuglutin aitchuutigiuŋ piḷuunmun aitchuun suli ikipkaġlugu aitchuun piḷuutisi piiqsaġlugich piḷuutiŋiḷḷu iñuich. Taamna aitchuutigilugu piḷuutaiqsaġlugich iñuich, Atanġum piraksriutaatun.”

⁸ Aaron ikipkaivigmuŋaruq aasii tuqutchivḷuni aŋusalluayaamik ilaata piḷuutimiñun aitchuutigisaqługu.

⁹ Iġñiŋisa auk ilaanuutiŋagaat, aasii misukługu tikini tavruŋa, auliqsuqługich nagruŋich kaŋiġalluŋiñiittuat ikipkaivium; aasii kuvivḷugu iḷakua alliġaŋanun ikipkaivium.

¹⁰ Tavraasii ikipkaŋagaa ikipkaivigmi qaunnaŋa, taqtuŋik, suli tiŋuata takiniŋa, Atanġum piraksriutaatun Moses-mun.

¹¹ Aglaan ikipkaŋagaik niqiŋalu amiŋalu siḷataani nullaummivium.

¹² Tuqunŋagaa niġrun ilaata aitchuutigisaqługu ikipkaqługu. Iġñiŋisa aatchiŋagaat niġrutim auŋanik, aasii siqił̣ł̣aqtautigivlugu saniġaŋiññun ikipkaivium.

¹³ Iġñiŋisa qaiñŋagaich niaqualu allallu avguŋaruat niġrunmiñ, aasii ikipkaŋagai ikipkaivigmi.

¹⁴ Tavraasii iġġuŋagai ilġaviŋich suli kiŋulliik niuŋik aasii ikipkaqługich ikipkaivigmi qaaŋanni allat aitchuutaummiruat.

¹⁵ Taamna pianigman, qaitchiŋaruq iñuich aitchuutiŋiññik. Nagrulik pivḷugu aitchuutauniaqtuaq iñuich piḷuutiŋiñun, tuqułługu, aasii aitchuutigivlugu, aitchuigusiġmisun ilaata piḷuutini pisigivlugich.

¹⁶ Niġruntauq ikipkaġlugu aitchuutiksraq qaġġisimmiñiġaa aasii aitchuutigivlugu maliġiraksriat nalaułługich.

¹⁷ Maniŋagaa palauvaksraq aitchuun aasii argagmiñun palauvaksraqłuni ikipkaqługu ikipkaivigmi. (Taamna iḷavlugu uvlutuaġaġimman ikipkaqługich aitchuutauruanun.)

¹⁸ Tuqunŋagaik pamiqsaaġlu imnaiġḷu aŋusalluq iḷammiuġunmun aitchuutigisaqługu iñuich pisigivlugich. Iġñiŋisa pamiqsaavlu imnaivḷu aŋusalluuruam auŋak ilaanuutiŋagaat, aasii siqił̣ł̣aqtautigiŋagaa saniġaŋiññun ikipkaivium.

¹⁹ Aaron-gum iḷiŋagaich qaunnaŋich pamiqsaavlu imnaivḷu aŋusalluum

²⁰ qaaŋannun sakiaŋisa niġrutit aasii iluqaisa ikipkaivigmuutivlugich. Ikipkaŋagaa qaunnaŋat ikipkaivigmi

²¹ aasii qaił̣ł̣ugich sakiaŋiḷḷu taliqpiatalu kiŋulliik niuŋik nuimagivlugich aitchuutauruat Ataniġmun aŋaiyyuliqsiqpagnun pigipkaqsaqługich, Moses piraksriutaatun.

²² Aaron-gum naalġataqamigich iluqaisa ikipkaqługich aitchuutauruat, isaaŋagaik argagni qulaatigun iñuich quviasuusiaqaquvlugich, aasii atqaqhuni.

²³ Moses-lu Aaron-lu Tupqanuŋaruk isiqłutik Atanġum nayuqtauvianun, aasii anigamik, quviasaaġusiŋagaich iñuich, aasii tavra qaumanġa Atanġum nayuqtauniŋata niptaŋaruq iluqaiññun iñugnun.

²⁴ Tavraŋŋatchiaq Ataniq qaipkaiŋaruq igniġmik, aasii ikipkaqługich aitchuutauruat qaunnaviñġiḷḷu ikipkaivigmiittuat. Iñuich tautukkamirruŋ avaallaŋarut aasi punŋarut kiiññatiŋ aksiutivlugich nunamun.