Leviticus 8 - Iñupiatun Mumiksat Uqalugiksuat

Ilaaguaqtauvlugich Aŋaiyyuliqsiqpaguqsaġmatigik Aaron-lu Iġñiŋiḷḷu

¹ Atanġum uqallautiŋagaa Moses,

² “Aaron-lu iġñiŋiḷḷu paaŋanuutikkich Tupqum nayuqtauvigma aasii qaġġisilugich aŋaiyyuliqsiqpaich annuġaaŋich, uqsruqtaaġullu, aŋusalluayaamik piḷuutinun aitchuutiksramik, malġuk imnaik aŋusalluuk, punniġniglu puvlaksautaiḷaanik aguummagmiittuanik.

³ Aasii atautchimuktillugich iluqaisa nunaaqqimiittuat tavruŋa paaŋanun tupqum.”

⁴ Moses piŋaruq tainna Atanġum piraksriutaatun, aasii nunaaqqim iñuŋich katinmata,

⁵ uqallautiŋagai, “Uvva taamna piñiaqtaġa Atanġum piraksriutaa.”

⁶ Moses-gum sarvaqtinŋagaich Aaron-lu iġñiŋiḷḷu aasii piraġausiq nalaułługu ivvaqługich.

⁷ Annuġaaŋagaa qaliġuuramiglu qaliġuamiglu Aaron aasii ukiłhaaġiksuamik tavsivḷugu. Aŋaiyyuliqsiqpaum kiapiġutaa atipkaŋagaa aasii qiḷilluataqługu qitiŋanun qupalluataŋaruamik tavsimik.

⁸ Satqagusiŋagaa aasii Urim-lu Thummim-lu iḷivḷugik satqagunmun.

⁹ Nimmaaŋaruamik nasautchiġaa, aasii sivuġaanun nasautam iḷisivḷuni kaviqsuamik manigmik qiñiyunaqunmik, nalunaiñŋutaŋanik qaisimaniġum, Atanġum piraksriutaatun.

¹⁰ Tavra Moses-gum uqsruqtaaġun pivḷugu uqsruqtaaġniġaa Tupqa Atanġum nayuqtauvia suli sunapayauraq tavraniittuaq, aasii tainnaqami ilaaguaqtaġiniġaa iluqaan qaił̣ł̣ugu Ataniġmun.

¹¹ Ikipkaivik siqił̣ł̣aktiŋagaa tallimat malġugni uqsrum iḷaŋanik, taputivlugich suġauttaŋich, iqaqqivik, alliġaŋalu, ilaaguaqługich qaisaġisaqługich Ataniġmun.

¹² Ilaan ilaaguaqtaġiŋagaa Aaron kuvivḷugu iḷaŋa uqsruqtaaġutim niaquanun.

¹³ Moses-gum sarvaqtaaqtinŋagaich iġñiŋich Aaron aasii qaliġuuraqługich, tavsiaqługich, nasautaqługiḷḷu, Atanġum piraksriutaatun.

¹⁴ Tavraasii Moses-gum qaġġisiŋagaa aŋusalluayaaq piḷuunmun aitchuutiksraq, aasii Aaron-lu iġñiŋisalu argatiŋ niaquanuŋagait.

¹⁵ Moses-gum tuqułługu aŋusalluayaaq, auksraqłuni iḷaŋanik, tikimiñik auliqsuŋaġaich nagruich kaŋiġalluŋit ikipkaivium, salumaruaġuqsaqługu. Tavraasii kuvivḷugu iḷakua augum alliġaŋanun ikipkaivium. Tainnaqami tavra ilaaguaġaa suli salumaruaġuqługu.

¹⁶ Moses-gum pivḷugu iluqaan itchauraŋat ilaġviŋisa, takiniŋalu tiŋuata, suli taqtuŋik qaunnaqaqługik, aasii ikipkaqługu iluqaan ikipkaivigmi.

¹⁷ Aŋusalluayaaq, amiŋalu, niqaalu, iŋaluaŋiḷḷu ikipkaŋagaich siḷataani nullaummivium, Atanġum piraksriutaatun.

¹⁸ Tainnaanigman, Moses qaġġirriŋaruq aŋusallumik imnaimik ikipkaġlugu aitchuutiksramik, aasii Aaron-guvlu iġñiŋisalu argatiŋ niaquanugniġait.

¹⁹ Moses-gum tuqunŋagaa aasii siqił̣ł̣aqtautigiŋagaa auŋa iluqaiññun saniġaŋiññun ikipkaivium.

^20-21 Piḷaŋagaa aŋusalluq imnaiq, aasii uaqtiqługich immamik ilġaviŋiḷḷu kiŋulliiglu niuŋik, aasii ikipkaqługich niaqua, qaunnaŋa, iluqaallu aŋusalluq imnaiq ikipkaivigmi, Atanġum piraksriutaatun. Taamna ikipkaqtaŋat niqauvluni aitchuutauruq, aasii tipaa iviġaumagiŋagaa Atanġum.

²² Tavra Moses-gum qaġġisiŋagaa tuglia aŋusalluq imnaiq, ilaaguaġlugich aŋaiyyuliqsiqpaguqsaqpata nalautitaksraŋat, aasii Aaron iġñiŋisalu argatiŋ niaquanuŋagaich.

²³ Moses-gum tuqunŋagaa aasii auŋata iḷaŋa nanukługu Aaron-gum taliqpiata siutaata nuvua, taliqpiata kuvlua, taliqpiatalu putuguŋa.

²⁴ Tavraasii Aaron iġñiŋich sarvaqtinŋagaich aasii auguaqtaqługich taliqpianni siutiŋisa nuvuŋich, taliqpianni kuvluŋich, taliqpianniḷu putuguŋich. Moses-gum aasii siqił̣ł̣aqtautigiŋagaa iḷaku auk iluqaiññun saniġaŋiññun ikipkaivium.

²⁵ Qaunnaiyaŋagaa aŋusalluq imnaiq, pamiugiqł̣ugu, itchauraiyaqł̣ugich ilġaviŋich, takiniŋalu tiŋuata piiqł̣ugu, taqtuiqł̣ugulu qaunnaqtuummaigñik, taliqpiatalu mumiŋa piiqł̣ugu.

²⁶ Tavraasii punniksraqłuni atausimik aguummagmiñ puvlaksautaitchuamik aitchuutauŋaruamik Ataniġmun, atausiq uqsruligaaq olive-gum uqsruaniñ, aasii atausiq maptukitchuaq punniq, iḷiŋagaich qaaŋannun itchaurat, mumiŋanullu taliqpiata.

²⁷ Iḷiŋagaich iluqaisa niqit argaŋiñun Aaron-guvlu iġñiŋisalu, aasii iliŋisa maniŋagaat nuimaruaġivlugu aitchuun Ataniġmun.

²⁸ Tavra Moses-gum niqit pivḷugich iliŋiññiñ ikipkaŋagaich ikipkaivigmi, qaaŋanukługich ikipkaqtat aitchuutit, ilaaguaqtauruanun. Taapkua niqauvlugich aitchuutauŋarut. Tipaat iviġaumagiŋagaa Atanġum.

²⁹ Tavraasi Moses-gum sakiaŋich aitchuutigiŋagaich nuimaruaġivlugich Ataniġmun. Taamna iḷagigaa aŋusallum imnaim autaaġusiaġiraa Moses-gum. Moses-gum savaaġiŋagaa iluqaan Atanġum piraksriutaa.

³⁰ Moses uqsruksraqhuni iḷaŋanik uqsruqtaaġutim suli iḷaŋanik augum ikipkaivigmiittuam siqił̣ł̣aqtiŋagai Aaron-guvlu iġñiŋisalu annuġaaŋich. Tavra tainna pikami ilaaguaqtaġiŋagaich taputivlugich annuġaaŋich Ataniġmun.

³¹ Moses-gum uqallautiŋagai Aaron-lu iġñiŋiḷḷu, “Niqi paaŋanuutisiuŋ Tupqum Atanġum nayuqtauviata, qalatillugu, aasii niġiḷugu tavrani, punniġlu aguummaŋmiittuaq ilaaguaqtauniġmun aitchuutiksrani, Atanġum piraksriutaatun.

³² Ikipkaġlugu niqipayaaq naakka punniq iḷakuuruaq.

³³ Aullaġniaŋitchusi tavraŋŋa paaŋaniñ Tupqum tallimat malġugni uvluni, naalġataġlugich aŋaiyyuliqsiqpaguqsaġnivsiññi piraksrauruat.

³⁴ Atanġum piraksriŋagaatigut uvlupak savaaġiraptinnik, piḷuutisi piiqsaqługich.

³⁵ Tupqum paaŋaniittuksraurusi uvlumiḷu unnuamiḷu tallimat malġugni uvluni, kamagilugu Atanġum piraksriutaa. Tainna piŋisuaġuvsi, tuquniaqtusi. Tavra taaptumiŋa Atanġum piraksriŋagaaŋa.”

³⁶ Tavraasii Aaron-guvlu iġñiġutiiŋisalu kamagiŋagaat Atanġum piraksriutaa Moses-kun.