Leviticus 7 - Iñupiatun Mumiksat Uqalugiksuat

Nunuurautikun Aitchuutit

¹ Ukua uvva maliġiraksriagurut nunuurautikun aitchuutitigun, salumapiaġataqtuagurut.

² Niġrun taaptumuŋa aitchuutauniaqtuaq tuqutkisigaat salliani ikipkaivium, tuqutchiviat niġrutinik aitchuutauniaqtuanik, aasii auŋa siqił̣ł̣aqtiġutigilugu saniġaŋiññun ikipkaivium.

³ Qaunnaŋa iluqaan piiġḷugu aasii aitchuutigilugu ikipkaivigmi: quiñiruaq pamiuŋa, itchauraŋich ilġaviŋisa qaunnaŋat,

⁴ taqtuŋik, itchauraŋich, takiniŋalu tiŋuata.

⁵ Aŋaiyyuliqsiqpaum ikipkaġniaġaa iluqaan qaunnaq ikipkaivigmi niqi aitchuun Ataniġmun. Nunuurautikun aitchuutauruq.

⁶ Nallipayaaŋata aŋutit aŋaiyyuliqsiqpauruat qitunġaġiiñi niġiyumiñaġaa, aglaan niġiraksraġigaa salumaruami inimi, salumapiaġataqtuagurukkii.

⁷ Maliġiaksraqaqtuq tunŋaruamik iluqaigñun piḷuunmun aitchuutauruaq nunuuraunmullu aitchuunmun: niqaa piginiaġaa aŋaiyyuliqsiqpauvluni aitchuipkairuam ikipkaqługu.

⁸ Aŋaiyyuliqsiqpak aitchuiruaq ikipkautikun kiapayaaq aitchuutaanik, ilaan piginiaġaa amiŋa aitchuutigiraġmi.

⁹ Palauvaksraq aitchuutaupayaaqtuaq igavlugu punnilivikun naakka siḷaavyiutikun piginiaġaa aŋaiyyuliqsiqpaum aitchuiruam God-mun.

¹⁰ Aglaan iluqaisa igaŋaitchuat palauvaksrat aitchuutauniaqtuat, akunŋavlugu uqsrumik naakka paliumavlugu, piginiaġaat Aaron iġñiŋisa aŋaiyyuliqsiqpaich suli autaaqtaksraġigaat atunim ilimignun.

Iḷammiuġutikun Aitchuutauruat

¹¹ Ukua uvva maliġiraksriat iḷammiuġun pisigilugu aitchuutauniaqtuanun Ataniġmun.

¹² Taamna aitchuun qaitkuvsiuŋ quyanaaġutaulugu God-mun, qaitkisigiksi, iḷaqaġlugu niġrunmik ikipkaaksramik, aitchuun punniġmik igaŋaruamik imaksrautaiḷaaqługu, suli tugliŋich maptukiḷḷugich punniġich uqsruqtiŋalugich olive uqsruanik, piŋayuiŋich aasii mapturuagulugich punniġich piḷiat palauvak akullugu olive uqsruanik.

¹³ Iḷaqaġlugusuli, aitchuiḷusi punniġnik piḷiaguruanik imaksraqaġlugich.

¹⁴ Qaitchiḷusi aviktamik punnillaamiñ ilaaguaqtaulugu qaisaksramik Ataniġmun; piginiaġaa aŋaiyyuliqsiqpaum niġrutim auŋanik auguaqtairuam ikipkaivigmik.

¹⁵ Niqaa niġrutim niġiraksrauruq uvlumi aitchuutauviŋani; iḷaŋaunnii iḷakuniaŋitkiksi uvlaakulġataqtillugu.

¹⁶ Qaġġirriguvsi iḷammiuġniq pisigilugu aitchuunmik taŋŋiutausaġlugu unniqsuqłiisigiŋaravsiññun naakkaunnii ilvich piyummatigivlugu aitchuisaġuvich, iluqaan niġiŋitparruŋ unnii uvlumi aitchuutauviani suŋitchuq, aglaan iḷakuqaġniqpan niġiyumiñaġaat uvlaakukpan.

¹⁷ Niqi iḷakuqaqpansuli piŋayuanni uvlut ikipkaqtaksrauruq.

¹⁸ Iḷaŋa niġiñiqparruŋ piŋayuanni uvlut, God-im akuqtuġniaŋitkaa aitchuutiksi. Aitchuun kisiuqatauniaŋitchuq iliŋniñ qaisauniḷugu aglaan salumaitchuaguniaqtuq, aasii kialiqaa niġiñiqpagu, aquvaaŋa igḷutuaġiniaġaa.

¹⁹ Niqi aksiutiniqpan sumun salumaitchuamun piraġausiq nalaułługu, niġiruksraġiŋitkaat, aglaan ikipkaqtuksrauruq. Nallisi piraġausiq nalaullugu salumaruagukpata niġiyumiñaġaat niqi,

²⁰ aglaan nallisi salummaqtauŋaitchuat niġiñiqpata, iḷauŋaiqsitaksraurut Israel-guqatimigniñ.

²¹ Aasiisuli, niġiñiġuvich taaptumaŋŋa aitchuutauruamiñ aksiqqaaŋaguvit piraġausikun salumaitchuaguruamik, iñugmiŋŋaqtaugaluaqpan naakka niġrutimiñ, iḷauyumiñaiġñiaqtutin God-im iñuŋiññun.

²² Atanġum aitchuŋagaa Moses ukuniŋa maliġiraksraŋiññik

²³ Israel-gum kiŋuvaaŋiññun. Qaunnaŋich pamiqsaat, imnaich, naaggaunnii nagrulgich niġiyumiñaitkisi.

²⁴ Qaunnaŋa niġrutim tuquruam tuqqusikaamiktun naakkaunnii niġrułłuum tuqunŋaniqpagu niġiraksrauŋitchuq, aglaan allanun sunun atuġnaġumiñaqtuq.

²⁵ Kiñaliqaa niġiruaq qaunnaŋanik niġrutim aitchuutauniaqtuam niqinun aitchuutauluni Ataniġmun iḷauŋaiġñiaqtuq God-im iñuŋiññi.

²⁶ Sumi iñuuniaġaluaqpata Israel-gum kiŋuvaaŋich, niġiruksraġiŋitkaat auŋa tiŋmiallu niġrutillu.

²⁷ Iñuum kamagiŋitpauŋ taamna pitquraq iḷauŋaiġñiaqtuq God-im iñuŋiññi.

²⁸ Atanġum aitchuŋagaa Moses ukuniŋa maliġiraksranik

²⁹ Israel-gum kiŋuvaaŋiññun. Nallisi aitchuutiqaġniqpata iḷammiuġunmun aitchuunmik qaġġisuutiruksraġigiksi iḷaŋa ilaaguaqtaulugu aitchuun Ataniġmun,

³⁰ tigumiaġilugu niqikun aitchuutausaġlugu. Aasii qaġġisilugich qaunnaŋiḷḷu sakiaŋiḷḷu qaiḷḷugich ilaaguaqtaulugich Ataniġmun.

³¹ Aŋaiyyuliqsiqpaum ikipkaġisigaa qaunnaq ikipkaivigmi, aglaan sakiaŋich piginiaġaich aŋaiyyuliqsiqpaich.

³² Taliqpik ukpataa niġrutim aitchuutigigisigaat ilaaguaqtaulugu

³³ aŋaiyyuliqsiqpagmun aitchuiruamun augmiglu qaunnaġmiglu iḷammiuġniġmun aitchuikpata.

³⁴ Sakiaŋa niġrutim nuimanaqłuni aitchuutauruq, aasii taliqpianiñ ukpataa nuimanaqłuni qaisauruaq, Atanġum piraŋa Israel-gum kiŋuvaaŋiññiñ, aasii qaił̣ł̣ugu aŋaiyyuliqsiqpagnun. Tavra taamna Israel-gum kiŋuvaaŋisa qaisaksraġisuuniaġaat aŋaiyyuliqsiqpagnun taimuŋaaglaan.

³⁵ Tavra taamna iḷagigaat niqit aitchuutauruat Ataniġmun qaisauŋaruaq Aaron-mun iġñiŋiñullu uvlumi ilaaguaqtauvlutiŋ aŋaiyyuliqsiqpaguqsaġmata.

³⁶ Tavrani uvlumi Atanġum piraksriŋagaich Israel-gum kiŋuvaaŋich aitchuqsaqługich taaptumiŋa iḷaŋannik aitchuiñiġum. Taamna maliġiraksriaguruaq kamagiruksraġiniaġaat Israel-gum kiŋuvaaŋisa taimuŋaaglaan.

³⁷ Taapkua, tainnamik, maliġiraksriagurut ikipkaivḷutik aitchuutitigun, palauvaksrat aitchuutauruanun, piḷuun pisigilugu aitchuutauruanun, nunuurautikun aitchuutauruanun, ilaaguaqtaummata aitchuutauruanun, suli iḷammiuġniq pisigivlugu aitchuutiqaġmata.

³⁸ Tavrani Mount Sinai-mi nunagluktuami, Ataniq qaitchiŋaruq piraksranik Moses-mun uvlumi uqautimmagich Israel-gum kiŋuvaaŋich aitchuutiqaquvlugich.