Leviticus 6 - Iñupiatun Mumiksat Uqalugiksuat

¹ Atanġum maliġiraksranik aitchuŋagaa Moses.

² Aitchuutiqaqtuksrauniaqtusi piḷuusiqiniġuvsi paaqłaglugu Ataniq, utiqtitchuŋiḷḷugu iñuuqativsi qaunagipkaqtaŋa, naakka tigligaiguvsi allamiñ, naakka ivayaqtuiguvsi,

³ naakkaunnii paqitchiguvsi tammaŋaruamik aasii saglutigilugu paqinŋaiññiḷugu, naakkaunnii allanik tainnaittuanik piḷuusiqiguvsi.

^4-5 Piḷuksiñiġuvich nalliŋisigun taapkua, utiqtittuksraġigiñ piññaktaaġiŋaran ivayaqtuutikun. Tavra taaptumani uvlumi paqitauniġuvich pasiraulutin, utiqtitchivigiruksraġigiñ iñua iluqaanik, iḷalugu iñuiññaŋatun.

⁶ Aŋaiyyuliqpagmuurrigisirutin nunuuraunmun aitchuutiksramik Ataniġmun surruutaitchuamik aŋusallumik imnaimik naakka nagruligmik. Akisutilaaŋa iḷitchuġilugu inillaŋaruakun uuktuutikun.

⁷ Aŋaiyyuliqsiqpaum aitchuutiginiaġaa ikipkaġlugu piḷuutin pisigilugu, aasii tavra suliqutigiŋaiqsauniaqtutin.

Ikipkaqtat Suġaił̣ł̣ugich

⁸ Atanġum piraksriŋagaa Moses

⁹ qaitchitquvlugu Aaron-mullu iġñiŋiñullu maliġiraksraŋiñik ikipkaġlugich aitchuutiksratigun. Ikipkaqtaq aitchuun ikipkaivigmiittuksrauruq unnuapak, qamipkaġaluaġnagu.

¹⁰ Tavraasii aŋaiyyuliqsiqpak, ukił̣haaġiksuamik qaliġuamiñik atuġluni ukił̣haaġiksuagniglu naitchuagnik kamikłuugnik, aasii iḷiḷugich aġrat uqsriñŋaruat ikipkaimmata saniġaanun ikipkaivium.

¹¹ Tavraasii annuġaatqigḷuni aġrat annisuutilugich nullaummavigmigniñ piraġausimiktun naavillugich salumaruamun iniŋannun.

¹² Igniŋa ikipkaivium ikumaruksrauruq ataramik qamipkaġaluaġnagu. Uvlaatuaġaġikpan aŋaiyyuliqsiqpaum qirriḷḷaaniaġaa, iluaqsruġlugiḷḷu aitchuutit tavrani, aasii ikipkaġlugu qaunnaŋa iḷammiuġunmun aitchuutauruam.

¹³ Igniŋa ikipkaivium ikualaruksrauruq ataramik qamipkaġaluaġnagu.

Palauvaksrat Aitchuutit

¹⁴ Ukua uvva maliġiraksriagurut aitchuiruni palauvaksranik. Aaron iġñiŋisa, aŋaiyyuliqsiqpauruat, qaiññiaġaa palauvaksraq aitchuun Ataniġmun, sivuġaani ikipkaivium.

¹⁵ Tavraasii argagmiñun palauvagmik piḷuni uqsrumiglu, iḷalugulu tivraġiksaunmik, ikipkaġlugu ikipkaivigmi, nalunaiqsaġlugu tavra iluqaan aitchuutauŋatilaaŋa Ataniġmun. Tipaa taaptuma aitchuutauruam iviġaumagigaa Atanġum.

^16-17 Aŋaiyyuliqsiqpaich niġigisigaat iḷakua taaptuma. Punniliuġlugu imaksrautaiḷaamik aasii niġiḷugu salumaruami siḷalliġuaŋani Tupiŋata Atanġum. Uvaŋa, Atanġum, qaiñŋaratka aŋaiyyuliqsiqpagnun niqinik aitchuiraġimmata. Salumaruagupiaġataqtuq, piḷuutikullu nunuurautikullu aitchuutauruatun.

¹⁸ Taimuŋaaglaan aŋutauruat kiŋuniiŋisa Aaron-gum niġisuuniaġaich autaaġusiaġilugich niqiniñ aitchuutauruaniñ Ataniġmun. Allam aksigñiqpagich niqit aitchuutauruat tatavsaqtauniaqtuq suaŋŋataagun salumaniŋata.

¹⁹ Atanġum aitchuŋagaa Moses ukuniŋa maliġiraksranik

²⁰ ilaaguaqtausaqpan Aaron iġñiŋisa iḷaŋat, aŋaiyyuliqsiqpaguqsaġlugu. Taaptumani uvlumi ilaaguaqtauniŋani, aitchuutiqaġisiruq Ataniġmun malġuktun pounds-tun uqumaisigilugu palauvak (aktilaaġisuuraatun uvlutuaġman palauvaksram aitchuutikaaŋata), avvaŋa uvlaami aasii avvaŋa anaqami.

²¹ Akullugu uqsrumik aasii uullugu siḷaavyiutikun aasii siquvyaaqqaaġlugu aitchuutigilugu palauvaksrauruaq aitchuun, taaptuma tipaa iviġaumagigaa Atanġum.

²² Taimuŋaaglaan taamna aitchuutigisuuniaġaat Aaron-mik maŋŋuqqaqtuat Aŋaiyyuliqsiqpaugumik. Iluqaan ikipkaġlugu aitchuutausuuniaqtuq Ataniġmun.

²³ Palauvaksraq aitchuutiksriaŋa aŋaiyyuliqsiqpaum niġiraksrauŋitchuq; iluqaan ikipkaqtuksrauruq.

Piḷuun Pisigilugu Aitchuutauruat

²⁴ Atanġum piraksriŋagaa Moses

²⁵ aitchuquvlugu Aaron iġñiŋiḷḷu, ukuniŋa maliġiraksranik piḷuunmun aitchuutiksratigun. Tuqunniaġaat niġrun aitchuutiksraun ikipkaġlugu salliñaaŋani ikipkaivium, tuqutchivianni; taamna salumaruagupiaġataqtuq aitchuun.

²⁶ Aŋaiyyuliqsiqpaum ikipkaqługu aitchuiruam niġrunmik niġiñiaġaa salumaruami inimi, siḷagauraŋani Tupqum Atanġum nayuqtauviata.

²⁷ Allam aksigñiqpauŋ niqaa niġrutim tatavsaqtauniaqtuq suaŋŋataagun salumaniŋata, aasii auŋanik niġrutim siqił̣ł̣aqparruŋ annuġaaq, iqaġiruksraġiniaġiksi salumaruami inimi.

²⁸ Qiku utkusik niqimun qalatchiiviuruaq navguqtaksrauruq, aasii uvluyuiḷamik utkusigmik atuġniqpata, salummautinik salummaqtaksrauruq suli uaqtimmaġiksiḷugu imiġmik.

²⁹ Kiñapayaaq aŋun aŋaiyyuliqsauruaniñ qitunġaġiiñi iḷauruaq niġiyumiñaqtuq taaptumaŋŋa aitchuutauruamiñ; salumapiaġataqtuq.

³⁰ Aglaan aitchuutauruam auŋa Tupiġmuutiniqparruŋ aasii piraġausimi atuġlugu piḷuutaiġutaukpan, taamna niġrun niġiruksraġiŋitkaat; ikipkaqtuksrauruq.