Leviticus 5 - Iñupiatun Mumiksat Uqalugiksuat

Piḷuun Pisigilugu Ikipkaiñiq Aitchuutinik

¹ Piḷuutit pisigilugich ikipkairuksraurut aitchuutinik inna pigumiŋ. Apiġirauguvich atanauraniñ iḷisimaraġnik uqaqulutin uqaqsitaaġvigmi aasii uqautigiŋiḷḷugu qiñiŋaran naakka tusaaŋaran, tavra tatavsaqtauruksrauniaqtutin.

² Pisaaġigaluaġnak aksigñiġupku suna piraġausikun salumaitchuaguruaq, tuquŋaratun niġrutitun, tavra salumaiḷiŋarutin aasii pasiñaqsivḷutin iḷitchuġipqauraġavich tainna pianiktilaaġnik.

³ Aksigñiġupku pisaaġigaluaġnagu sunaliqaa iñugmiñ qairuaq salumaitchuaq, suugaluaġniqpan, tavra pasirauniaqtutin iḷitchuġipqauraġuvich tainna pianiktilaaġnik.

⁴ Isumalaaġaluaġnak unniqsuqłiiñiġuvich God-im atqagun, sukun itkaluaqpan, patchisaurutin kaŋiqsipqauraqavich qanuq pitilaaġnik.

⁵ Patchisauniġuvich tamatkunuuna, quliaqtaksraġigiñ piḷuusiqiaġiran,

⁶ akiḷiutigisaġlugu piḷuutignun qaġġirriruksraurutin Ataniġmun aġnasallumik imnaimik naakkaqaa nagruligmik aitchuutigisaġlugu. Aŋaiyyuliqsim aitchuutiginiaġaa ikipkaġlugu piḷuutin pisigilugu.

⁷ Aitchuutiksraiññiġuvich imnaimik naakka nagruligmik, qaġġirrigisirutin malġugnik tiŋmiaŋnik naakka malġugnik pigeon-nik Ataniġmun, akiḷiutigisaġlugik piḷuusiqiaġnun, igḷua piḷuunmun aitchuutausaġlugu aasii igḷua ikipkaġlugu aitchuutausaġlugu.

⁸ Aŋaiyyuliqsimuutigisigikkiñ, aitchuutigiqqaaġniaġaa sivulliulugu tiŋmiaq piḷuunmun aitchuutausaġlugu. Quŋusiŋa navigniaġaa niaquiġaluaġnagu

⁹ aasii siqił̣ł̣aqtautiginiagaa iḷaŋa auŋata saniġaŋanun ikipkaivium. Iḷakua auk maqipkaġniaġaa alliġaŋanun ikipkaivium. Tavra taamna aitchuutauruq piḷuutaiqsaġlugu.

¹⁰ Tavraasii aitchuutigimmiḷugusuli igḷua tiŋmiaq ikipkaġlugu aitchuutausaġlugu, kamagilugich maliġiraksriaguruat. Tainnaġluni tavra malġugnik tiŋmiaŋnik naakka malġugnik pigeon-nik aŋaiyyuliqsiqpaum aitchuutiginiaġaa ikipkaġlugu aitchuun piḷuutin pisigilugu, aasii suliqutigiŋaiqsauniaqtutin.

¹¹ Aitchuutiksraiññiġuvich malġugnik tiŋmiaŋnik naakka pigeon-nik, qaġġirrigisirutin malġuktun pounds-tun uqumaisigilugu palauvagmik piḷuunmun aitchuutiksramik. Uqsriġñiaŋitkin olive uqsruanik naakka ikipkaqlugu tivraġiksaunmik, piḷuunmunkii aitchuutauruq, palauvaksrauŋitchuq aitchuutiksraq.

¹² Aŋaiyyuliqsimuutisaġiñ, argani immiġḷugu tavraŋŋa ilaaguaqtausaġlugu aitchuutautilaaŋanik Ataniġmun, aasii ikipkaġniaġaa ikipkaivigmi niqaulugu aitchuutauruaq. Aitchuutauruq tavra piḷuun pisigivlugu.

¹³ Tainnaġlugu tavra aŋaiyyuliqsiqpaum aitchuutiginiaġaa ikipkaġlugu piḷuutit pisigilugich, aasii suliqutigiŋaiqsauniaqtutin. Iḷakua aasii palauvaum piginiaġaa aŋaiyyuliqsiqpaum, tainna pimmatun palauvaksramik aitchuutiqaġmata.

Nunuurautikun Aitchuutit

¹⁴ Atanġum aitchuŋagaa maliġiraksranik Moses ukuniŋa.

¹⁵ Nallisi piḷuksiñiqpata pisaaġigaluaġnagu qaiñŋiḷḷugich akiḷiutiksrat salumaruaguruat Ataniġmun, akiḷiutiksraġnik qaġġirrigisirutin aitchuutinik Ataniġmun aŋusallumik imnaimik naakka nagruligmik surruutaitchuamik. Akisutilaaŋa iḷitchuġilugu inillaŋaruakun uuktuutikun.

¹⁶ Akiḷiŋaisaġnik akiḷiiruksraurutin, iḷalugu iñuiññaŋannik (20%) akiŋata, aasii qaiḷḷugich aŋaiyyuliqsiqpagmun. Ilaata aitchuutiginiaġaa imnaiq piḷuutaiġutausaġlugu. Tavraasii suliqutigiŋaiqsauniaqtutin.

¹⁷ Nallisi piḷuusiqiniqpata pisaaġigaluaġnagu kamaksriŋiḷḷutiŋ Atanġum piraksriutiŋiñik, tavra piḷuusiqirusi aasii akiḷiqtuksraġigiksi tatavsausiaq.

¹⁸ Aŋaiyyuliqpagmuurriruksraurusi nunuurautikun aitchuunmik surruutaitchuamik aŋusallumik imnaimik naakka nagruligmik. Akisutilaaŋa iḷitchuġilugu inillaŋaruakun uuktuutikun. Aŋaiyyuliqsiqpaum aitchuutiginiaġaa ikipkaġlugu piḷuusiqiaġiravsiññun pisaaġigaluaġnagu, aasii suliqutigiŋaiqsauniaqtusi.

¹⁹ Tavra nunuuraun aitchuutauruq piḷuusiqiaġiravsiññun paaqłakługu Ataniq.