Leviticus 4 - Iñupiatun Mumiksat Uqalugiksuat

Aitchuutit Pisaaġiŋił̣ł̣utiŋ Piḷuksiruat Pisigivlugich

¹ Atanġum piraksriŋagaa Moses

² uqautitquvlugich Israel-gum kiŋuvaaŋich kiñaliqaa piḷuusiqiruaq suli kamagiŋiḷḷugich Atanġum piraksriutiŋich pisaaġigaluaġnani, maliġiruksraġigaich ukua maliġiraksriat.

³ Aŋaiyyuliqsiqpak piḷuusiqiniqpan aasii taputilugich iñuich, aitchuiruksrauruq immulivium aŋusalluayaaŋanik surruutaitchuamik aasii ikipkaġvikun aitchuutigilugu Ataniġmun piḷuutini pisigilugu.

⁴ Immulivium aŋusalluŋa paaŋanuutigisigaa Tupqum, argani niaquanuglugu, aasii tuqullugu tavrani Atanġum sivuġaani.

⁵ Tavraasii Aŋaiyyuliqsiqpaum Tupiġmuutiniaġaa iḷaŋa auŋa.

⁶ Tikini misuglugu auŋanun aasii siqił̣ł̣aktiġutigilugu tallimat malġugni sivuġaanun talukiyaaŋata Inim Salumaniqsram.

⁷ Tavraasii auliqsuġisigaich nagruich kaŋiġallullaaŋaniittuat tivraġiksautinun ikipkaiviuruam Tupiġmi. Kuvigisigaa iḷakua augum alliġaŋanun ikipkaivium, paaŋaniittuam Tupqum.

⁸ Taaptumaŋŋa immulivium aŋusalluaniñ piḷugu iluqaan qaunnaŋa, itchauraŋiḷḷu,

⁹ taqtuŋiglu taqtuġutiqaġlugik, takiniŋalu tiŋuum,

¹⁰ aasii taapkua iluqaisa ikipkaġlugich ikipkaivigmi, aitchuisimisun sivuani iḷammiuġnikun aitchuutauruamik.

¹¹ Aglaan pigisigaa amiŋa, iluqaan niqaa, niaqua, niuŋich, suli ilġaviŋich, iḷagilugich iŋaluaŋich,

¹² annisilugich nullaummiviuruamiñ piraġausiq nalaullugu salumaruaguruamun aġrat naavirviannun, aasii tavrani ikipkaġisigaa qiruich ikualavianni.

¹³ Iluqaġmi nunaaqqiŋat Israel-gum kiŋuvaaŋisa piḷuusiqiniqpan pisaaġigaluaġnatiŋ, pasiraulutiglu navgiñiḷugich iḷaŋannik Atanġum piraksriutaanik,

¹⁴ tavra iḷitchuġipqauraġumiŋ piḷuutautilaaŋanik, nunaaqqiuruat qaġġirrigisirut immulivium aŋusalluayaaŋanik piḷuunmun aitchuutausaġlugu. Tupiġmuutigisigaat Atanġum nayuqtauvianun;

¹⁵ aullarrauruat nunaaqqimi argatiŋ niaquanuglugich, aasii tavrani tuqullugu sivuġaani Atanġum.

¹⁶ Aŋaiyyuliqsiqpak Tupiġmuurrisaqtuq immulivium aŋusalluayaam auŋata iḷaŋanik,

¹⁷ misuglugu tikini, aasii siqił̣ł̣aktautigilugu tallimat malġugni sivuġaanun talukiyaam.

¹⁸ Auliqsuġisigaich nagruich kaŋiġallullaaŋaniittuat tivraġiksautinun ikipkaivium iḷuani Tupqum aasii kuviḷugu iḷakua alliġaŋanun ikipkaivium aitchuutauruanun, paaŋaniittuamun Tupqum.

¹⁹ Tavraasii iluqaan qaunnaŋat ikipkaġlugu.

²⁰ Ilaata tainnasuli piñiaġaa taamna aŋusalluayaaq piusimisun sivuani piḷuutinun aitchuutauruamun, aasii tainna pigumi ikipkaiḷuni aitchuutiqaġniaqtuq iñuich piḷuutiŋiñun, aasii iliŋich suliqutigiŋaiqsauniaqtut.

²¹ Tavra immulivium aŋusalluayaaŋa annisiniaġaa nullaummivigmiñ aasii ikipkaġlugu, ikipkausimisun aŋusalluayaamik aitchuutauruamun ilaata nanmiñiq piḷuutimiñun. Taamna tavra aitchuutauruq piḷuutaiqsaqługu nunaaqqiuruaq.

²² Aullarriuruaġli piḷuusiqiniġumi pisaaġigaluaġnani aasii pasirauluni navginiḷugu Atanġum piraksriutaanik,

²³ tavra iḷitchuġipqauraġumi piḷuusiqitilaamiñik, qaġġirrigisiruq aitchuutigilugu aŋusalluq nagrulik surruutaitchuaq.

²⁴ Argani niaquanuglugu nagruligum aasii tuqullugu ikipkaivium salliñaaŋani, niġrutit aitchuutiksrat ikipkaaksrat tuqurvianni. Taamna aitchuutauniaqtuq piḷuutaiqsaġlugich.

²⁵ Aŋaiyyuliqsim misuglugu tikini auŋanun niġrutim, auguaqtaġniaġaich nagruich kaŋiġallullaaŋaniittuat ikipkaivium, aasii kuviḷugu iḷakua alliġaŋanun ikipkaivium.

²⁶ Tavraasii ikipkaġisigaa iluqaan qaunnaŋa, ikipkausimisun qaunnaŋannik niġrutit tuquttaŋisa iḷammiuġunmun aitchuutauruanun. Tainna tavra aŋaiyyuliqsiqpaum ikipkaġlugu aitchuutiginiaġaa piḷuutaa pisigilugu aullarriuruam, aasii ilaa suliqutigiŋaiqsauniaqtuq.

²⁷ Nalliqsi piḷuusiqikpan pisaaġigaluaġnani aasii pasirauluni navginiḷugu iḷaŋannik Atanġum piraksriutiŋisa,

²⁸ tavra iḷitchuġipqauraġumi piḷuusiqitilaamiñik, qaġġirrigisiruq aitchuutiksramiñik aġnasallumik nagruligmik surruutaitchuamik.

²⁹ Argani niaquanuglugu tuqutkisigaa salliñaaŋani ikipkaivium, niġrutinik ikipkaġlugich aitchuutiksranik tuqutchivianni.

³⁰ Aŋaiyyuliqsim misuglugu tikini auŋanun niġrutim, auguaqtaġisigaich nagruich kaŋiġallullaaŋaniittuat ikipkaivium, aasii iḷakua kuviḷugu alliġaŋanun ikipkaivium.

³¹ Tavraasii qaunnaŋa iluqaan piiġñiaġaa, qaunnaŋat piiġusiatitun niġrutit tuqunmatigik iḷammiuġunmun aitchuutauniaqtuat, aasii aŋaiyyuliqsiqpaum ikipkaġniaġaa ikipkaivigmi tipaa iviġaumanaġniaġmiuq Ataniġmun. Tainna tavra aŋaiyyuliqsiqpaum aitchuutiginiaġaa iñuum piḷuutiŋiñun, suli ilaa suliqutigiŋaiqsauniaqtuq.

³² Imnaimik qaġġirrigumi piḷuunmun aitchuutausaġlugu, aġnasalluuruksrauruq surruutaiḷḷuni.

³³ Argani niaquanugulugu aasii tuqullugu salliñaaŋani ikipkaivium, niġrutinun ikipkaqługich aitchuutauniaqtuanun tuqutchivianni.

³⁴ Aŋaiyyuliqsim misuglugu tikini auŋanun niġrutim, auguaqtaġniaġaich nagruich kaŋiġallullaaŋaniittuat ikipkaivium, aasii kuviḷugu iḷakua alliġaŋanun ikipkaivium.

³⁵ Tavraasii iluqaan qaunnaŋa piiġisigaa, qaunnaŋa piiġmatun imnaimiñ tuquttaŋanniñ iḷammiuġunmun aitchuutausaqługu, aasii ikipkaġisigaa ikipkaivigmi iḷagilugich niqit aitchuutauruat Ataniġmun. Tainna tavra pigumi aŋaiyyuliqsiqpaum aitchuutiginiaġaa ikipkaġlugu piḷuutiŋanun, aasii suliqutigiŋaiqsauniaqtuq.