Leviticus 27 - Iñupiatun Mumiksat Uqalugiksuat

Pitqurat Ataniġmun Aitchuutitigun

¹ Atanġum uqallautiŋagaa Moses

² ukuniŋa maliġiraksraŋiñik Israel-gum kiŋuvaaŋisa. Nalliqsi qaisauŋakpan Ataniġmun taŋŋiqsaġlugu ilaaguaŋaruaq unniqsuqłiiñ, atanġiqsitauyumiñaqtusi akiḷiiḷusi ukunatun aktigiruanik manigñik,

^3-7 maliġilugu inillaŋaruaq uuktuun: qatqiñŋaruaq aŋun, ukiuqaqtuaq iñuiññamiñ (20) piŋasukipiamuaglaan (60): malġukipiaq qulinik (50) aviktanik qatiqtuanik manigñik; qatqiñŋaruaq aġnaq: iñuiññaq qulinik (30) aviktanik qatiqtuanik manigñik; qatqiñŋaitchuaq aŋun, tallimaniñ iñuiññamuaglaan (20) ukiuqtutigiruaq: iñuiññanik (20) aviktanik qatiqtuanik manigñik; qatqiñŋaitchuaq aġnaq: qulinik aviktanik qatiqtuanik manigñik; miqłiqtuq aŋutaiyaaq tallimatun ukiuniŋaitchuaq: tallimanik aviktanik qatiqtuanik manigñik; miqłiqtuq aġnaiyaaq: piŋasunik aviktanik qatiqtuanik manigñik; aŋun ukiuqtutilaaqaqtuaq qaaŋiqł̣ugu piŋasukipiaq (60): akimianik (15) aviktanik qatiqtuanik manigñik; aġnaq ukiuqtutilaaqaqtuaq piŋasukipiaq (60) qaaŋiqł̣ugu: qulinik aviktanik qatiqtuanik manigñik.

⁸ Nalliqsi unniqsuqłiiŋakpan aasii piiḷḷiuqpaiḷḷuni akiḷiġumiñaitpagu inillaŋaruaq akiksraq, taamna iñuk aŋaiyyuliqsiqpagmuutigisigiksi, aasii aŋaiyyuliqsiqpaum akikłiḷaaġutiniaġaa, akiḷiġumiñaqtaŋatun.

⁹ Unniqsuqłiisiksi niġrutikun aitchuutauyumiñaqtuaguluni Ataniġmun itpan, tavra aitchuutipayaaq qaisauruaq Ataniġmun salumaruaguruq,

¹⁰ aasii allamik niġrunmik simmausiġñiaŋitkiksi. Tainna piñiġuvsi, iluqatik niġrutik pigigaik ilaata Atanġum.

¹¹ Aglaan unniqsuqłiiŋamaguvsi salumaitchuamik niġrunmik, akuqtuġnaġumiñaitchuamik aitchuutauniaqpan Ataniġmun, aŋaiyyuliqsiqpagmuutisaġiksi.

¹² Aŋaiyyuliqsiqpaum akiksriġñiaġaa, irrusiagun nakuuruaŋisigullu naakka pigiiññiŋisigullu, aasii akiksriqpagu qanutun tavra akiginiaġaa.

¹³ Tauqsitqigugniġupku, akiḷiqsaksraġigiñ akiŋa naggusiġḷugu tallimaŋatun.

¹⁴ Nallivsi igluni qaisaġiniqpagu Ataniġmun, aŋaiyyuliqsiqpaum akiksriġñiaġaa qanuqitilaaqqaaġlugu iglu, akiksriutaa aŋaiyyuliqsiqpaum akiginiaġaa.

¹⁵ Tasuġugniġupku iglun, akiḷiqsaksraġigiñ akiŋa naggusiġḷugu tallimaŋatun.

¹⁶ Nallivsi qaisaġiniqpauŋ iḷaŋa nunami Ataniġmun, akiksriġñiaġaat iñugiaktilaaŋisitun kanġaqsruutimiŋ nautchirriikamiŋ, akisutigilugu akiŋatun atausim bushel-gum barley-m qulitun qatiqtuatun maniktun.

¹⁷ Aitchuutigiguvsiuŋ nuna Ukiuŋa Utiqtitchivium qaaŋiġḷuqqaaqtuq, akiksrautaa allaŋŋuġniaŋitchuq.

¹⁸ Aitchuutigiguvsiuŋ aquvatigun, aŋaiyyuliqsiqpaum miksrautchaġniaġaa akiksraŋa qavsiutilaaqqaaġlugich ukiut tikiññiaqtuat Ukiuŋanun Utiqtitchivium, aasii akikłiḷaaġlugu.

¹⁹ Tauqsitqigugniġuvsiuŋ nautchiiviksi, akiḷiqtuksraġigiksi akiŋagun iḷavsaaġlugu tallimaŋatun.

²⁰ Tuniguvsiuŋ nunaksi allamun iñugmun tauqsitqikkaluaġnagu Ataniġmiñ, tauqsitqiḷḷaniksran tammaiñiaġiñ.

²¹ Ukiuŋa Utiqtitchivium tikitqikpan nuna Atanġum iñiġlugu pigiliutiniaġaa; aŋaiyyuliqsiqpaich piginiaġaat.

²² Aitchuutiqaġuvsi Ataniġmun nautchiivigmik tauqsiŋaravsiññik,

²³ aŋaiyyuliqsiqpaum miksrautchaġlugu akiksriġñiaġaa qavsiutilaaŋatitun ukiut tikiḷġataqtillugu Ukiuŋa Utiqtitchivium, aasii akiḷiqtaksraġiniaġiñ taaptumani uvlumi; maniŋa pigigaa Atanġum.

²⁴ Ukiuŋa Utiqtitchivium tikitpan nuna utiġniaqtuq iñuŋanun naakkaunnii kiŋuvaaŋiñun.

²⁵ Iluqaisa akiŋit inillagniaġait maliġilugu atuġuuraŋat uuktuun.

²⁶ Iġñiaqqaaŋa niġrutim pigianikkaa Atanġum, tavraasii kia unnii aitchuutiginiaŋitkaa piyummatigilugu. Nuġġaq, imnaiyaaq, naakka nagruliayaaq pigigaa Atanġum,

²⁷ iġñiaqqaaŋa aglaan salumaitchuaguruam niġrutim tauqsitqikkumiñaġaat inillaŋaruakun akiŋagun naggusiġḷugu tallimaŋatun. Tauqsitqiŋitparruŋ aasii, tuniyumiñaġaat allamun iñugmun inillaŋaruakun akiagun.

²⁸ Nallivsiunnii tunitqigñiaŋitkaa naakka tauqsitqigḷugu aitchuutigipiaġataġlugu qaiñŋarani Ataniġmun, iñuugaluaqpan, niġrutaugaluaqpan, naakka nunauluni. Iñiġlugu Atanġum pigigaa.

²⁹ Iñuit unnii aitchuutauŋaruat iḷumun uvamnun tauqsitqigñiaŋitkait; tuqutauruksraurut.

³⁰ Qulipayaaŋat nauruat nunami, palauvaksraugaluaqpata naakka siiġñaugaluaqpata, pigigai ilaata Atanġum.

³¹ Tauqsitqikkumiñaġupku iḷaŋa, akiḷiqtaksraġigiñ inillaŋaruakun akiŋa iḷavsaaġlugu tallimaŋanik.

³² Atausiḷḷaa quliuruani pamiqsaani niġrutini pigigaa Atanġum. Niġrutit kisitpatigik, atausiḷḷaa quliuruani pigigaa Atanġum.

³³ Inillagniaŋitkisi niġrutit pigiitchuat naliġagvigillasiḷugich, suli simmiqsuġniaŋitkisi. Simmausiġñiġupku atausiq niġrun allamik, tavra iluqatik niġrutik pigigaik Atanġum suli tauqsitqiġñaġniaŋitchuk.

³⁴ Tavra taapkua piraksriutit Atanġum qaisaŋi Moses-mun Mount Sinai-mi Israel-gum kiŋuvaaŋiññun.