Leviticus 26 - Iñupiatun Mumiksat Uqalugiksuat

Ikayuusiaqaġniŋich Kamaksriñiġum

¹ Ataniq uqallaŋaruq, “Iñuuraqpaliuġnasi naakkaunnii suna arriḷiuġlugu nappaiḷusi, uyaġagnik napaqutanik, naakkaunnii sanaŋaruanik uyaġagnik aŋaiyyuvigiraksravsiññik. Uvaŋa Ataniq God-iksi.

² Qutchiksuaġilugu Unaŋuiqsiġvik suli ini uvamnun nanġaivik. Uvaŋa Atanġuruŋa.

³ “Iñuuguvsi nalaullugit pitquratka suli kamagilugit piraksriutitka,

⁴ sialuksraqaqtinniaġivsi piviksraq nalautittaġikpan, nuna nauriḷḷayumauq suli napaaqtut siiġñiḷutiŋ.

⁵ Palauvaksrasi siiġñaliasiḷu iñugiakpaiḷḷutik pukuktillusisuli siiġñanik grape-nik kanġaqsruiñaqsiñiaqtuq palauvaksranik. Niqiksraqaġniaqtusi iḷaŋaniñ, aasii iñuuniaġlusi anayanniuŋiḷḷusi nunavsiññi.

⁶ “Tutqiutiqaqtinniaġivsi nunavsiññi, suli siñiktuallasiḷusi iqsigaluaġnasi iñugnik. Piiqsinniaġitka iqsiñaqtuat niġrutit nunami, suli aŋuyaktuagiġñiaqtuq taavani.

⁷ Akimmatiqaġniaqtusi akiḷḷivsiññiñ;

⁸ tallimaulusi akiisillaniaġisi tallimakipiaguruat (100), suli tallimakipiaguruat (100) akiiḷiññigniaqtut 10,000-guruanik.

⁹ Piḷḷuatautiqaqtinniaġivsi suli miqłiqtuqaqtillusi iñugiaktuanik; taŋŋiġñiaġiga sivunniuġutikun unniqsuqłiisiga ilivsiññun.

¹⁰ Kivluasi iñugiakpaiḷḷutiŋ ukiuqtutilaaŋatun naamaniaqtut, tavra suli iksiñiaġmiusi iḷakunik utuqqaġnik iniksraliuqsaġlugich nutauruat.

¹¹ Iñuuniaqtuŋa akunnavsiññi salumaruami Tupimni, suli ayyakkumiñaitkivsi.

¹² Itqatigiugaġniaġivsi; God-auluŋa ilivsiññun, aasii ilivsi iñuginiaġivsi.

¹³ Uvaŋa, Ataniq God-iksi, Egypt-miñŋautiŋaravsi kivgauŋaiquvlusi. Navgulaaŋagiga suaŋŋan naqirvaktuqtigiŋaraqsi aasii pisuallasipkaqłusi niaqqusi aaġluŋŋaaġikł̣ugit.”

Tatavsaun Kamaksriŋirrunmun

¹⁴ Ataniq uqallaŋaruq, “Kamagiŋitkuvsigik pitqurriutitka, tatavsaqtauniaqtusi.

¹⁵ Kamagisuŋitkuvsigik pitquratka suli piraksriutitka suli naviglugu sivunniuġutikun unniqsuqłiisiga ilivsiññun,

¹⁶ tatavsaġniaġivsi. Iłuirrutiqpaqaqtinniaġivsi mamilaiḷanik naŋirrutinik, uunnautinik ayaunaqtuanik, suli iñuggutisi asiuliḷutiŋ. Nautchirriġñiaġaluaġmiusi, aglaan suunnauniaŋitchut, qanukkii akiḷḷiivsi akiisillusi niqiginiaġaich.

¹⁷ Akiḷḷiḷiutiniaġivsi akiisitaullasiḷusi, suli tamatkua uumigirisi qaukłiḷiutiniaġisi. Tatamaalaliqpaiḷḷusi aqpamik qimaaniaqtusi malikataqtaitkaluaqtillusi.

¹⁸ “Tainnasiq nalautkaluaġlugu kamagisuŋitkuvsiñŋa suli, suaŋŋaktaaġniaġiga tatavsausiaqsi tallimat malġuktun.

¹⁹ Suunġiġñiaġiga sivunmuuturuaq piukhaaġutiksi; sialugniaŋitchuq, aasii nunagiraqsi paniqpaiḷḷugu siqquqsitiginiaqtuq savił̣hatun.

²⁰ Siġġaqilusi savaakkaluaqsi suunnauniaŋitchuq, qanukkii nunaksi nauriñiaŋitchuq suli napaaqtut siiġñiñiaŋiñmiut.

²¹ “Sivunmuulusi suli ayyaktuqtuaġuvsiñŋa kamagisuŋiḷḷuŋa, suaŋŋaktaavsaaġniaġitka tatavsausiasi tallimat malġuktuvsaaq.

²² Tilisiñiaqtuŋa iqsiñaqtuanik niġrutinik akunnavsiññun, aasii tuquġaġniaġaich miqłiqtusi, maqullugit pamiqsaaġirasi, suli iñukłivaiḷḷusi apqutisi iñuksruiġutiniaqtut.

²³ “Tamanna iluqaan tatavsaun pianikkaluaqtillugu naalaġnisuŋitkuvsiñŋa suli, aglaan paaqłaktaqtuaġluŋa,

²⁴ uvaŋa paaqłaŋniaġivsi aasii tatavsaġlusi tallimat malġuktun siġġaġnaqsił̣haaġlugu sivuaniñ.

²⁵ Aŋuyagniq tikisinniaġiga ilivsiññun tatavsaqsaġlusi navgikavsi sivunniuġutikun unniqsuqłiisiptinnik, aasii tavra katitkuvsi iniqpavsiññi anayanaitchuamuksaġlusi, mamilaitchuat naŋirrutiqpait iḷiniaġitka akunnavsiññun, aasii qaitchuksraġuġniaqtusi akiḷḷivsiññun.

²⁶ Niqiksraiġutipkaġniaġivsi, qulit aġnat atausitualugmik iggaviqaġniaqtut punniliaksramignun. Autaaġniaġaat, aasii iluqaan niġianigataġuvsiuŋ, kaagniaqtusi suli.

²⁷ “Tamanna tainna pianikkaluaqtillugu sivunmuuguvsi suli paaqłaktuaġluŋa suli kamagisuŋiḷḷuŋa,

²⁸ qinnautiqpagniaġivsi tatavsaġlusiḷu suaŋasivsaaġlugu tallimat malġuktun sivulliġmiñ pisigilugi piḷuutisi.

²⁹ Kaaksiuvaiḷḷusi niġiñiaġisi unnii miqłiqtuuraġniasi.

³⁰ Suksraunġiġñiaġitka nanġaivisi qimiqqaniittuat, siqumillugiḷḷu tivraġiksautinun ikipkaivisi, aasii qaliġiiksitaġlugich tuquŋarat timisi kataŋaruanun iñuuraqpavsiññun. Isummaaŋirrutimni

³¹ iniqpasi siquminniaġitka, maqullugiḷḷu nanġaivisi, suli akuqtuŋiḷḷugich aitchuutisi.

³² Siquminŋavaiḷḷugu nunaksi akiḷḷiivsi nunannaktuat qaallaummiñiaqtut siquptamnik.

³³ Aŋuyaktuat qaipkaġniaġitka ilivsiññun aasii siamitillusi allanun nunanun. Nunaksi iñuksruiġutiniaqtuq, iniqpasiḷu siquptaġuġlutiŋ.

^34-35 Tavraasii nuna unaŋuiqsiññaraaġniaqtuq ilivsi unaŋuiqsiqtilaisaqsi; tainna ittuaġniaqtuq iñuksruiḷaami unaŋuiqsiġḷuni aullaurrauŋapkaqtillusi nunaŋanni akiḷḷiivsi.

³⁶ “Aullaurrauŋaruasii uvaŋa tatamaalapkaqpaił̣ł̣usi anuġim nivliraqtitpagit akutuqpait qimaapkaġniaġaatin aqpamik. Qimaŋniaqtusi malikataqtiqaqtuatun aŋuyaktuani, aasii puukaqtaġniaġmiusi malikataŋitkaluaqtillusi.

³⁷ Putukkisautiniaqtusi avanmun malikataqtiqaŋitkaluaqtillusi, suli aŋuyakkumiñaiñmigisi akiḷḷiisi.

³⁸ Iñugiaktuasii tuquġaġniaqtusi akiḷḷiivsi nunaŋanni.

³⁹ Iñukił̣ł̣usi kisiŋŋuqtauruasii nunaŋanni akiḷḷiivsi iłuiḷḷiuġusi timivsiññi nuŋusaiññaġniaġmiusi pisigilugich ilivsi piḷuutisi suli piḷuutiŋit kiŋuniivsi.

⁴⁰ “Aglaan kiŋuvaavsi quliaġniaġaich piḷuutitiŋ suli piḷuutiŋit kiŋuniimiŋ, paaqłaktuiŋaruat uvamnik,

⁴¹ aasii uvamnun akiḷḷiḷiutipkaqłutiŋ, suli aullaurraupkaqtiłłutiŋ nunaŋanun akiḷḷiimiŋ. Kiisaimmaa, piuniaŋaiġmata kiŋuvaasi suli igḷutuanikługu tatavsausiaqtiŋ piḷuutimiktigullu paaqłautimiktigullu,

⁴² itqaġniaġiga sivunniuġutikun unniqsuqłiisiga Jacob-mun, Isaac-mullu suli Abraham-mun, aasii nutaġniaġiga unniqsuqłiisiga aitchuġniaġnivḷugich nunamik iñugiratka.

⁴³ Sivulliulugu aglaan, nunamiñ iñutka piiqsuksraurut, atuŋiññiŋani nunam miñġuiqsiqtillugu, suli igḷutuqtuksraġigaat iluqaan tatavsaun ayyaŋammatigik pitquratka suli piraksriutitka.

⁴⁴ Tavraaglaan, nunaŋaniinŋaisa akiḷḷiimiŋ, suksraapiaġlugich naakka suksraunġiġḷugich piñiaŋitkitka. Ataniġiniaġaanŋa suli God-igiluŋa, aasii nutqaqtinniaŋitkiga sivunniuġutiga iliŋiññun.

⁴⁵ Nutaaġuġniaġiga sivunniuġutikun unniqsuqłiisigiŋaraġa kiŋuniiŋiññun qiñiqtinnapki iluqaisa nunaqpauruat suaŋŋatimnik Egypt-miñŋautivlugich iñugiratka, uvaŋa Ataniq, God-igitquvluŋa iliŋiññun.”

⁴⁶ Iluqaġmiŋ tavra taapkua pitqurat suli piraksriutit Atanġum qaisaŋit Moses-mun Mount Sinai-mi pigitquvlugich Israel-gum kiŋuvaaŋiññun.