Leviticus 25 - Iñupiatun Mumiksat Uqalugiksuat

Tallimat Malġuŋat Ukiut

¹ Atanġum uqautiŋagaa Moses Mount Sinai-mi aasii piraksriqł̣ugu,

² qaitchitquvlugu ukuniŋa maliġiraksraŋaŋiññik Israel-gum kiŋuvaaŋisa. Isiġataġuvsi nunamun Atanġum qaitchaŋanun ilivsiññun, qutchiksiḷiġniaġiksi Ataniq naurialiqiŋiḷḷakkuvsi tallimat malġuŋat ukiut tikitchaġikpan.

³ Nautchirriiraġaġniaqtusi nunavsiññi, nauyumiññaksaġlugich siiġñisuuruat, suli pukuglugich nauruat itchaksrani ukiuni.

⁴ Aglaan tallimat malġuanni ukiut iluqaani nautchiiñiaŋitchusi, ukiuq tunŋalugu Ataniġmun. Nautchirriiñiaŋitchusi nunavsiññi naakkaunnii nauyumiññaksaġlugich siiġñiviuruat.

⁵ Kivluiñiaŋitchusi-unnii palauvaksranik nausuuruanik ilimiktun nunami, suli pukugnasigik siiġñat grape-gich nauruat nauyumiññaksaŋaitchuani napaaqtuayaani; ukiuq taamna unaŋuiqsiġviuluni inniaqtuq nuna pisigilugu.

⁶ Nuna nauyumiññaksaŋaitkaluaqtillugu taaptumani ukiumi, niqiksraqaqtinniaġaasi, kivgasiḷu, savaktisiḷu, allaniñ nunaniŋŋaqtauruallu iñuuniaqatigirasi,

⁷ pamiqsaallu, suli pamiqsaaguŋitchuallu nunavsiññi. Sunapayauraq nauruaq niġiñaġniaqtuq.

Ukiuŋa Utiqtitchivium

⁸ Malġukipiaq quliŋŋuġutaiḷat (49) ukiut qaaŋiġaġikpata.

⁹ Tavraasii, quliŋanni uvlut tallimat malġuanni tatqich, Uvluŋani Tasuqsautim, tilisiḷusi iñugmik nipauqłuktaun nipatitqulugu nunapayaami.

¹⁰ Tainna piguvsi inillagniaġiksi malġukipiaq quliŋat (50th) ukiut ilaaguaġlugu aasii nivliusiġilugu atanġiqsautilaaŋat nunami iñupayaat. Taaptumani ukiumi nunat tuniŋaruat sivuani utiqtitauniaqtut iñuqqaaŋiñun naakka kiŋuvaaguruanun, aasii suli kisut kivgauruat utiġniaġmiut nanmiñiq iḷamignun.

¹¹ Nautchirriiñiaŋitchusi nautchiivivsiññi naakkaunnii kivluiḷusi palauvaksranik nauruanik ilimiktun naakka pukuglusi siiġñanik grapes-nik nauyumiññaksaŋaitchuaniñ siiġñivivsiññiñ.

¹² Iluqaan taamna ukiuq salumaruaġiniaġiksi; niqiqaġniaqtusi kisianik nautchiivivsiññi nauruanik ilimiktun.

¹³ Taaptumani ukiumi iluqaġmiŋ nunat tunirauŋaruat utiqtitauniaqtut sivuani iñumignun.

¹⁴ Tavraasii tuniriguvsi nunamik Israel-gum kiŋuvaaŋanun naakka tauqsiġuvsi nunamik, saglutautinasi avanmun.

¹⁵ Akiksriġñiaġaat qiñiġlugich qavsiñi ukiuni nauriḷḷatilaaŋa Utiqtitchiñaqsivik Ukiuq tikiñŋaiñŋaan.

¹⁶ Ukiut iñugiagniqpata, akiŋa qutchigñiaqtuq, aglaan ukiut qavsiqiuraukpata, akiksraŋa atchigḷuni, qanukkii uvva qanutun nauriḷḷatilaaŋa nunam tunirauniaqtuq.

¹⁷ Pitqiksiġautinasiuŋ Israel-gum kiŋuvaaŋa, aglaan kamagilugu Ataniq God-iksi.

Iłuirrutaa Tallimat Malġuŋata Ukiut

¹⁸ Kamagilugich Atanġum pitqurapayaaŋi suli piraksriutipayaaŋi, iñuullayumausi anayanniuŋiḷḷusi nunami.

¹⁹ Nuna nauriḷḷaniaqtuq nautchirriaguruanik, aasii iḷaŋaniñ niqiksraqaġniaqtusi suli anayanniuŋiḷḷusi.

²⁰ Aglaan imma iñuk apiqsriñiaqpalliqsuq sumik niqiksraqaġniaqtilaamiŋnik tallimat malġuk ukiuŋani, nautchiiviit nautchirriġvigiŋitpatigik suli nauruanik katitchiŋiḷḷutiŋ.

²¹ Atanġum nauriḷḷuataqtinniaġaa nuna itchaksraŋanni ukiut nauriyumiñaqsiḷugu naamasiḷugich niqiksrat malġugnun ukiugnun.

²² Nautchirriiguvsi nautchiivivsiññi tallimat piŋayuanni ukiut, niqiqaġniaqtusi iḷaŋaniñ kivluavsiññik itchaksraŋanni ukiut, niqaiḷḷiuġniaŋitchusi nautchirriasi taaptumani ukiumi katilġataqtillugich.

Utiqtitaummata Nunat

²³ Nunagiraqsi tuniñasiuŋ tauqsitqikkumiñaiġḷugu, qanukkii ilivsi nanmiñiq pigiŋitkiksi; God-im ilaata pigigaa, aasii ilivsi allaniñ nunaniŋŋaqtatun ittusi atullasiññaqługu nuna.

²⁴ Nunamik tunisiñiqpata, nunagiqqaaqtaŋata iñuum tauqsitqiḷḷaruksraġigaa, taamna nalunaiŋaruksrauruq.

²⁵ Nalliqsi Israel-gum kiŋuvaaġiraŋiñi piiḷḷiuliġḷutiŋ tuniruksraġuġniġupku nunan, nanmiñiq iḷakpich tauqsitqiksaksraġigaa.

²⁶ Iḷaitkuvich tauqsitqiurriyumiñaqtuamik, aquvatigun piiḷḷiuŋaiġuvich aasii naamallasiḷutin tauqsitqikkumiñaġiñ ilignik.

²⁷ Tainna piñiġuvich akiḷiiruksraurutin iñugmun tauqsiŋaruamun taputilugich ukiut qavsiutilaaŋat Ukiumun Utiqtitchivigmuaglaan tikitchumaaqtuamun, tavra aasii utiġniaqtutin ilvich nunagnun.

²⁸ Aglaan inuŋaniqpan maniiñ tauqsiutiksran tasuġniaġupku nunan, aŋalanniaġaa tauqsiŋaruam Ukiuŋa Utiqtitchivium tikitqigataqtillugu. Taaptumani aasii ukiumi utiġniaqtuq nutim iñuanun.

²⁹ Tunisiguvich iglumik sapukutaqaqtuami iniqpagmi, tauqsitqikkumiñaġiñ taaptumani ukiumi tunisiñiġni.

³⁰ Aglaan tauqsitqiŋiññiġupku taaptumani ukiumi, tauqsitqikkumiñaiġñiaġiñ, aasii iglu pigiliutipiaġniaġaa tauqsiqsuam suli iliŋisa kiŋuvaaŋisa; utiqtitauniaŋitchuq Ukiuŋani Utiqtitchivium.

³¹ Aglaan iglut sapukutaiḷaani nunaaqqiñiittuat aŋalallaniaġaich nautchiiviktiŋ; iñuŋisa tauqsitqiḷḷaniaġaich, aasii utiqtitaulutiŋ Ukiuŋani Utiqtitchivium.

³² Aglaan suli, Levi-m kiŋuvaaŋisa tauqsitqiḷḷaniaġaich qakugupayaaq nunatiŋ nunaaqqiñi inillaktauvlutiŋ iñuuniaġvimigni.

³³ Iglu iḷaŋanni nunaaqqit tuniraġiŋakparruŋ Levi-m kiŋuvaaŋiññun aasii tauqsitqiŋaiḷḷugu, utiqtitaksrauruq Ukiuŋani Utiqtitchivium, qanukkii iglut Levi-m kiŋuvaaŋisa pigiraŋit nunaaqqimi iliŋisa pigipiaġait akunġanni Israel-gum kiŋuvaaŋisa.

³⁴ Aglaan niġiñiaġviich avataanniittuat Levi-m kiŋuvaaŋisa iniqpagiraŋiñi tunirauniaŋitchut; Iliŋsa nunaginiaġaich taimuŋa.

Atukkirrutit Iḷiappauruanun

³⁵ Nalliŋit Israel-gum kiŋuvaaŋich iñuuniaqtuat qanivsiññi piiḷḷiuliġñiqpata suli ilimignun piñiaġutiksraiġutilutiŋ, piqaqtitaksraġigisi savaktigimmatun iḷiḷugit, iñuuniallayumaut qanivsiññi.

³⁶ Akiiḷḷiġñiaŋitkisi Israel-gum kiŋuvaaŋich naggutinnagvigilugich, aglaan kamagilugu God suli iñuuniaqtillugich akunnivsiññi.

³⁷ Akiḷiipkaġnasigik naggunmik atukkirrutivsiññun manigmun, suli naggutinnagnasi niqinik tunirivigiguvsigik.

³⁸ Tavra taamna piraksriutigigaa Atanġum God-ivsi, Egypt-miŋŋaurrivsi aitchuġukłusi nunamik Canaan-mik suli ilivsiññun God-igitquvluni.

Atanġiqsitauniŋat Kivgauruat

³⁹ Iḷaŋich Israel-gum kiŋuvaaŋich iñuuniaqtuat qanivsiññi piiḷḷiulipiaġataqpata aasii tunnisaġivlutiŋ ilivsiññun kivgausuglutiŋ, savaktinniaŋitkisi kivgat savaaŋiññik.

⁴⁰ Ilivsiññiinniaqtut savaktivsitun aasii savautilusi tikiḷġataqtillugu Ukiuŋa Utiqtitchivium.

⁴¹ Tavraniasii iliŋiḷḷu qitunġatiglu uniññiaġaasi aasii utiġlutiŋ iḷamignun nunaŋannun kiŋuniimiŋ.

⁴² Israel-gum kiŋuvaaŋich Atanġum kivgaŋi, suli ilaata Egypt-miŋŋautiŋagai; tunirauruksrauŋitchut kivgatun.

⁴³ Piaqłuktaġlugich aŋalannasigik, aglaan kamagilugu God-iksi.

⁴⁴ Kivgaqaġukkuvsi, tauqsiġumiñaġisi nunaqpauruaniñ avativsiññiittuaniñ.

⁴⁵ Tauqsiġumiñaġmigisi miqłiqtuŋit allaniñ nunaniŋŋaqtauruat akunnavsiññi iñuuniaqtuat. Miqłiqtut aniŋaruat nunavsiññi kivgaliutiyumiñaġisi,

⁴⁶ aasii kiŋuvaaksrirrutigiyumiñaġmigisi qitunġavsiññun, savautiruksraġiniaġaich qitunġasi iñuuniqtutilaamiktun. Aglaan aŋalanniaŋitkisi Israel-gum kiŋuvaaŋich piaqłuktaġlugich.

⁴⁷ Iḷaanni allaniñ nunaniŋŋaqtauruaq umiallagniqpan, iḷaŋiḷḷi Israel-gum kiŋuvaaŋich piiḷḷiuqtillugich suli tuniḷutiŋ ilimignik kivgauniġmun taaptumuŋa allaniñ nunaniŋŋaqtauruamun naakka iḷaŋiññun allaniñ nunaniŋŋaqtauruam,

⁴⁸ tunirauganikkumiŋ tasuqtauyumiñaġniaqtut. Aniqataugaluaġumi

⁴⁹ naakkaunnii aŋaaluugaluaġumi naakka aññaugaluaġumi naakka qanuq nanmiñiq iḷaugumi tauqsitqikkumiñaġaich; naakkaunnii ilimignik maniññakkumiŋ, akiḷiiḷutiŋ atanġiqsitauyumiñaqtut.

⁵⁰ Kaŋiqsiuqtaksraġigaat iñuk tauqsiqtiktiŋ, aasii kisillugich ukiut tuniraukamiŋ qaŋa tikiḷġataqtillugu Ukiuŋa Utiqtitchivium suli atanġiqsitaummata akiksriġḷugi akiŋatitun savaktiuruat.

^51-52 Utiqtitaksraġigaat iḷaŋa akiḷiutaata qavsiutilaaŋatigun ukiut kisiŋŋuqtuat,

⁵³ savaktauruatitun akiññaktaqłutiŋ ukiuġaġimman. Umialiŋata piaqłuktaġlugich aŋalataksraġiŋitkai.

⁵⁴ Atanġiqsitauŋitpata taapkua nalliatigun, iliŋiḷḷu qitunġaŋiḷḷu atanġiqsitaksraġigaich tikitpan Ukiuŋa Utiqtitchivium.

⁵⁵ Israel-gum kiŋuvaaŋich iñiġlugu kivgauyumiñaitchut, qanukkii Israel-gum kiŋuvaaŋich ilaata Atanġum kivgaġigai. Egypt-miŋŋautiŋagai. Ilaa Ataniq, God-igigaat.