Leviticus 24 - Iñupiatun Mumiksat Uqalugiksuat

Qaunaksriñiŋat Nanniñik

¹ Atanġum uqautigaa Moses

² piraksriqł̣ugich Israel-gum kiŋuvaaŋich ukuniŋa: Qaġġirrisitchi uqsruġiŋñiqsrapiaġatamik olive-niñ nannit uqsruksraŋannik Tupiġmi nayuqtauvimñi; naniq ikumaugaġumauq ataramik.

³ Anaqatuaqpan Aaron-gum ikittuksraġiġai aasii ikumapkaġlugich uvlaaġataqtillugu, tavrani Atanġum nayuġviani siḷataani talukiyaam sivuġaŋani Sivunniuġutim Kiguunniŋata, Salumaniqtauruami Inimi ittuaq. Taamna maliġuagaksraq kamagiraksraġigaat taimuŋaaglaan.

⁴ Aaron-gum qaunaginiaġai nannit akulaiḷḷugu naniqaġvigmiituat kaviqsuamik manigiksuamik savaat suli ikumapkaġlugit Atanġum takkuani.

Punniġit Aitchuutauruat God-mun

⁵ Iñuiññaq sisamatun uqumaisigiruamik palauvagmik piḷusi aasii igalugich qulit malġuuruat (12) punniġit.

⁶ Punniġit malġuullugit tunulliġiiksillugit itchaksraullaaruat iḷisigik niġġivigmun qaaqaqtuamun kaviqsuamik manigiksuamik, Atanġum nayuġviani ittuamun.

⁷ Tivraġiksautit tunulliġiiksillugit qaisausaġlugit niqitun aitchuutauruatun Ataniġmun inaŋiutausaġlugit punniġnun.

⁸ Sabbath tikitchaġikpan, taimuŋaaglaan, punniq iḷiraksrauruq Atanġum sivuġaanun. Taamna Israel-gum kiŋuvaaŋisa piraksriusiaġigaat taimuŋaaglaan.

⁹ Punniġit pigigait Aaron-gum kiŋuvaaŋisalu, aasii niġiñiaġaich salumaruami inimi, qanukkii taamna salumapiaġataqtuaġigaat niqit manirauruat Ataniġmun aŋaiyyuliqsiqpait piksrautiŋit.

Tuvraaksriun Nalaunŋaruakun Tatavsaiñikun

^10-11 Aŋurguuq aapaqaqsimaruq Egypt-miumik suli aakaqaqłuni Israel-gum kiŋuvaaŋanik atiqaqtuamik Shelomith-mik, paniŋa Dibri-m maŋŋuqaqtuam Dan-miñ. Tavrani aullaaġvianni taaptuma aŋutim qinnaŋagaa Israel-gum kiŋuvaaŋa. Qinnallaġmiŋ uqamaqłuktautiginiġaa Ataniq, tavraasii Moses-muutiŋagaat,

¹² qaunaksriḷiqługu inillaŋagaat, aasii utaqqiaqsivḷutik Ataniġmik qanuq pitquniaqtilaaŋanik.

¹³ Atanġum uqallautigaa Moses,

¹⁴ “Aŋun taamna nullaġviŋmiñ anitchiuŋ. Tusaaŋapayaaqtuaq uqamaqługman argatiŋ iḷigisigait aŋutim niaquanun patchisauniḷugu, aasii iluqaġmiŋ nunaaqqim iñuŋisa uyaġagnik miḷḷuuġlugu tuqunniaġaat.

¹⁵ Aasii uqautilugich Israel-gum kiŋuvaaŋich kiñapayaaq uqamaqłuurriruaq God-mik igḷutuqtuksrauniḷugu tatavsausiaŋanik tainnatchim iñuum

¹⁶ aasii tuqutauluni. Kiñapayaaq Israel-gum kiŋuvaaŋa naakka allaniñ nunaniŋŋaqtaugaluaqpan iñuuniaqtuaq Israel-mi uqamaqłuurrikpan Ataniġmik, tuquttaksraġigaat uyaġagnik miḷḷuuġlugu iluqaġmiŋ iñuŋisa nunaaqqim.

¹⁷ “Kiñapayaaq iñuaqtuaq tuquttaksrauruq,

¹⁸ aasii kiña tuqutchiñiqpan niġrunmik iñuum allam pianik simmausiqsaksraġigaa. Pilġusiq una iñuggun simmausiutaulugu iñuggunmun.

¹⁹ “Nallivsi anniġñiqpagu alla iñuk, qanuq piŋaniġupku tainnaptauq ilvich piñiaġmigaatin.

²⁰ Navigniġupku sauniq, iḷaŋat ilvich sauniqpich naviktauniaġmiuq; Iraiġñikkuvich, igḷua irikpit piiqsauniaġmiuq; kigutaiqsiñiġuvich, iḷaŋat kigutikpich piiqsauniaġmiuq. Qanupayaaq anniġñikkaluaġuvit allamik iñugmik tainnaptauq ilvich anniqsauniaġmiutin.

²¹ Kiña iñuk tuqutchikpan niġrunmik, simmausiqsaksraġigaa, aglaan kiñapayaaq iñuaqpan tuqutauniaqtuq.

²² Taamna pitquraq tunŋaruq iluqavsiññun, Israel-gum kiŋuvaaŋiññun suli allaniñ nunaniŋŋaqtauruanun akunnavsiññi iñuuniaqtuanun, qanukkii Uvaŋa Ataniq, God-iksi.”

²³ Moses uqautianiŋmagi taapkuniŋa Israel-gum kiŋuvaaŋich, annisiŋagaat taamna iñuk nullaġviŋmigniñ aasii uyaġagnik miḷḷuuqługu tuqunŋagaat. Tainna tavra Israel-gum kiŋuvaaŋich savaaġiŋagaat Atanġum piraksriutaa Moses-mun.