Leviticus 23 - Iñupiatun Mumiksat Uqalugiksuat

Ukpiqtuat Niqinaqiviŋit

¹ Atanġum uqallautiŋagaa Moses

² ukuniŋa maliġuagaksraŋiññik Israel-gum kiŋuvaaŋisa niqinaqiraġigumiŋ nanġaisaġlutiŋ.

³ Itchaksranik uvluksraqaqtusi savagviksravsiññik, aglaan itqaumalugu tallimat malġuŋat uvlut, Sabbath, minġuiqsiġvik. Taaptumani uvlumi sumik savagnasi, aglaan katillusi nanġaisitchi. Sabbath ilaata Atanġum pigigaa, sumiḷiqaa iñuugaluaġuvsi.

⁴ Nalunaiḷḷaalugich ukua niqinaqiviksrat tikitchaġikpata.

Qulaurrusiqivik suli Puvlaksautaitchuanik Punniġnik Niqinaqivik

⁵ Qulaurrusiqivik, quvianġutiginiaqtaŋat qutchiksiḷiġlugu Ataniq, isagutiniaqtuq siqiñiq nipikpan akimiaġutaiḷaŋanni (14th) uvlut sivulliġmi tatqimi.

⁶ Akimiaŋanni (15th) uvlut Niqinaqiniq Puvlaksautaitchuanik isagutiniaqtuq, aasii tallimat malġugni uvluni niġiñiaŋitchusi imaksraligaanik punniġnik.

⁷ Sivulliŋanni taapkua uvlut katillusi nanġaiñiaqtusi suli sut savaakkaluasi savaŋiḷḷaglugich.

⁸ Aitchuutigilugich Ataniġmun niqit tallimat malġugni uvluni. Tallimat malġuanni aasii uvlut kativsaaġlusi nanġaiñiaqtusi, aglaan savaaġisuurasi savagniaŋitkisi.

^9-10 Nunamukkuvsi Atanġum qaisaŋanun ilivsiññun aasii kivluiguvsi palauvaksranik, sivulliq qiḷiqtaq aŋaiyyuliqsiqpagmuutiniaġiksi.

¹¹ Aitchuutiginiaġaa nuimagilugu Ataniġmun, akuqtuqtauyumausi. Aŋaiyyuliqsiqpaum maniñiaġaa Sabbath qaaŋiqpan.

¹² Uvlumi taaptumani aitchuutigiguvsigiŋ palauvaksrat, suli ikipkautikun aitchuisaqtusi atausimik ukiuqtutilaaqaqtuamik imnaiyaamik surruutaitchuamik.

¹³ Taapkua aitchuutiksrat aasii iḷalugich sisamatun pounds-tun uqumaisigiruamik palauvagmik akurrutiqaqtuamik olive-gum uqsruanik. Tipaa taaptuma iviġaumaġigaa Atanġum. Aitchuutisiḷu iḷalugich sisamatun qallutitun imaqtutigiruamik taaŋŋaliamik siiġnaniñ.

¹⁴ Niġiñasigik nutauruat palauvaksrat, uiḷaugaluaġlit, samuunnaaŋagaluaġlit, punniliagugaluaġlit, qaitqauŋaunnagit aitchuutit God-mun. Tavra taamna maliġuagaksraq kamagiraksraġigiksi kiŋuvaaġiniaqtavsiḷu taimuŋaaglaan.

Kivluivigmi Niqinaqutit

¹⁵ Tallimat malġuk savaiññiġit qaaŋianikpata Sabbath-miñ, aitchuivivsiññiñ qaġġirriyumausi qipitanik palauvaksranik aitchuutiksravsiññik Ataniġmun.

¹⁶ Aasii malġukipiaq qulit (50th) uvluanni, tallimat malġuk Sabbath qaaŋianikpata, taaptumani uvlumi, manirisaqtusi Ataniġmun nutauruamik palauvaksramik.

¹⁷ Qitunġaġiiḷḷaat qaġġirrigisirut malġugnik punniignik aasii aitchuutigilugik Ataniġmun ilaaguaġlugik aitchuutik. Punnillaa imaksraligaaq uqumaisilaaqaġniaqtuq sisamatun pounds-tun aasii sivulliiñiñ palauvaksraniñ kivluaniñ aitchuutauluni Ataniġmun.

¹⁸ Punniik aasii iḷaniaġaich nunaaqqiuruat tallimat malġugnik imnaiyaanik atausimik ukiuqaqtuanik, atausimik aŋusallumik, suli malġugnik imnaigñik aŋusallugnik; nalliŋit unnii surruutaitchuksraurut. Qaisauniaqtut ikipkautikun aitchuutigilugich Ataniġmun, iḷaqaġlugich palauvaksramik aitchuunmik suli wine-mik. Tipaa taaptuma aitchuutauruam iviġagigaa Atanġum.

¹⁹ Aasii suli aitchuiḷusi atausimik aŋusallumik nagruligmik piḷuun pisigilugu suli malġugnik aŋusallugnik imnaiyaagnik atausimik ukiuqaqtuagnik iḷammiuġniġmun aitchuutigilugich.

²⁰ Aŋaiyyuliqsiqpauruam qaiññiaġaik punniik malġuglu imnaiyaak nakuuniqtapiaġataak aitchuutiksrak Ataniġmun. Tamatkua aitchuutit piginiaġaich aŋaiyyuliqsiqpaich. Taapkua aitchuutit salumarut.

²¹ Taaptumani uvlumi savagnasi uvlumi savaakaavsiññik, aglaan katillusi nanġaiyyaġlusi. Kiŋuvaaġiniaqtavsi taamna atugaġiraksraġigaat taimuŋaaglaan sumi iñuuniaġaluaġumiŋ.

²² Kivluiguvsi nauriñiaġvivsiññi, kivluġnasigiŋ palauvaksrat killiŋaniittuat nauriviich, suli utiġlusi kivluġnasigik nuvuŋit palauvaksrat pukuŋitchavsi; tavraniillit piiḷḷiuqtuat iñuit suli allaniñ nunaniŋŋaqtauruat piginiaġaich. Uvaŋa Atanġuruŋa God-iksi.

Ukiutchiami Niqinaqiniq

^23-24 Sivulliq uvluq tallimat malġuanni tatqich ilaaguaqtauli minġuiqsiġviuluni, aasii katillusi nanġaiyyaġlusi nivliqpata nipauqłuktautit.

²⁵ Aitchuiḷusi niqinik Ataniġmun aasii savaakaavsiññik uvlumi savagnasi.

Uvluŋa Piḷuutaiqsiñiġum

^26-27 Quliŋat uvlut tallimat malġuanni tatqich ukiutuaġaġikpan piraġausiq nalautitchaġiksi piḷuutaiqsaġlugich iñuich. Taaptumani uvlumi sumik unnii niġiñasi; katillusi nanġaiyyaġumausi, aasii aitchuiḷusi niqinik Ataniġmun.

²⁸ Savagnasi taaptumani uvlumi, qanukkii uvluġigaa piḷuutaiqsiñiġum.

²⁹ Kiñapayaaq sumik niġiñiġumi taaptumani uvlumi iḷauŋaiġñiaqtuq God-im iñuŋiññi.

³⁰ Aasii kiñapayaaq savagniqpan taaptumani uvlumi, Atanġum ilaata tuqunniaġai.

³¹ Taamna piraksriun tunŋaniaqtuq kiŋuvaapayaavsiññun, sumi iñuuniaġaluaqpata.

³² Siqiñġum nipiniŋaniñ quliŋŋuġutaiḷaŋani uvlut taaptumani tatqimi nipitqigñiŋanun aglaan atuqsaqtuq taamna uvluq ilaaguaŋaruagulugu minġuiqsiġvik, niġiŋaiḷaġviulugu.

Niqinaqivik Uqqirviktigun

^33-34 Niqinaqivik Uqqirviktigun isagutiniaqtuq akimiaŋanni (15th) uvlut, tatqich tallimat malġuanni, aasii igliġluni tallimat malġugni uvluni.

³⁵ Sivullianni taapkua uvlut katillusi nanġaisaqtusi suli savagnasi savaakaavsiññik.

³⁶ Uvlutuaqpan tallimat malġugni uvluni aitchuiñiaqtusi niqinik. Tallimat piŋayuanni uvlut atautchimuvsaaġlusi nanġaiñiaqtusi aasii aitchuiḷusi niqinik. Aŋaiyyuviginiaġiksi taamna uvluq, aasii savagniaŋitchusi savaakaavsiññik.

³⁷ (Tavra taapkua ukpiqtuaguruat quyyatigivlugich qutchiksiḷiġutaulutiŋ Ataniġmun katillutiŋ nanġaiḷutiŋ suli aitchuutiqaġlutiŋ niqinik, ikipkautikun aitchuutinik, palauvaksranik aitchuutinik, suli wine-nik aitchuutinik, piraksrautauruaq maliġilugu uvlutuaġaġikpan.

³⁸ Taapkua tavra niqinaqiniġich iḷḷatauniaqtut uvluŋiññun Sabbath God-im nalunaiŋaraŋiññun, aasiisuli taapkua aitchuutit iḷḷatiniaġmiut aitchuutigisuuravsiññun, aitchuutivsiññullu taŋŋiqsaġlugich unniqsuqłiisauruat, suli piyummatiqaqłusi aitchuutigiravsiññun Ataniġmun.)

³⁹ Kivluanigataġuvsigik nautchiivisi, quvianġuvigilugu niqinaqigisirusi tallimat malġugni uvluni, isagutilusi akimiaŋanni (15th) uvluŋisa tallimat malġuŋata tatqich. Sivulliq uvluq ilaaguaġlugu savagnasi niqinaqiŋaiġuvsiḷu tallimat piŋasut uvluanni.

⁴⁰ Taaptumani sivulliġmi uvlumi siiġñaġigñiqtauruanik piksraġlusi napaaqtuvsiññiñ, suli piksraġlusi qisiqsiutiŋiññik nunagluktuami napaaqtum, qisiqsiutiŋiññiglu akutuqpaukkaqtuat napaaqtut, aasii isagutilugu quyyatigilugu qutchiksiḷiġutaulugu Ataniġmun God-ivsiññun.

⁴¹ Quvianġuvigilugu tallimat malġugni uvluni. Taamna piraksriun atugaġiniaġaat kiŋuvaaġiravsi taimuŋaaglaan.

⁴² Iluqaġmiŋ Israel iñuŋi iñuuniaqtut uqqirvigñi tallimat malġugni uvluni,

⁴³ kiŋuvaaġirasi iḷisimayumaut Ataniġmun iñuupkaŋatilaaŋiññik Israel-gum kiŋuvaaŋich uqquutaġruiññani aullatigamigich Egypt-miñ. Uvaŋa Ataniq God-iksi.

⁴⁴ Tavraasii tainna Moses-gum uqautiŋagai Israel-gum kiŋuvaaŋich maliġuagaksraŋiññik niqinaqikpata qutchiksiḷiġlugu Ataniq.