Leviticus 22 - Iñupiatun Mumiksat Uqalugiksuat

Salumaruaguniŋich Aitchuutit

¹ Atanġum piraksriŋagaa Moses

² uqautitquvlugich Aaron iġñiŋiḷḷu, “Kanŋunaqsiḷiqtaksraġiŋitkiksi salumaruaq atiġa, tavraasii qiksikkutikun aŋalatchaġisi salumaruat aitchuutit Israel-gum kiŋuvaaŋisa qaisaŋit uvamnun. Uvaŋa Atanġuruŋa.

³ Nalliŋat kiŋuvaaġiravsi, piraġausikun salumaiḷḷaġmi, qallikpagi salumaruat aitchuutit Israel-gum kiŋuvaaŋisa ilaaguaqługich qaisaŋit uvamnun, ilaa savaaqatqikkumiñaitchuq ikipkaivigmi. Taamna tainnainniaqtuq taimuŋaaglaan. Uvaŋa Atanġuruŋa.

⁴ “Nalliŋat kiŋuvaaŋisa Aaron kiḷḷiġruaqaqtuaq naakka maqiuquaqaqtuaq quġġivigmiñi niġiñiaŋitchuq salumaruanik aitchuutinik piraġausikun salumasiŋaunnani. Nallipayaaŋata aŋaiyyuliqsiqpaich aksikpauŋ tuquŋaruam timaa salumaiḷiñiaqtuq naakka anitchigumi semen-mik

⁵ naakkaunnii aksiŋagumi salumaitchuamik niġrunmik naakka iñugmik.

⁶ Kiñaliqaa salumaiḷigumi tainnainniaqtuq anaqalġataqtillugu, aasii niġiyumiñaiñmiuq salumaruanik aitchuutinik ivvaqqaaŋaunnani.

⁷ Siqiñiq nipianikpan salumasiñiaqtuq, tavraasii niġiḷḷasiḷuni salumaruanik aitchuutinik, ilaatakii niqigigai.

⁸ Niġiñiaŋitchuq niqaanik niġrutim ilimisun tuquŋaruam naakka tuqunŋaraŋannik allat niġrutit; salumaiḷiñiaqtuq. Uvaŋa Atanġuruŋa.

⁹ “Iluqaġmiŋ aŋaiyyuliqsiqpaich nalauttaksraġigaich maliġiraksrat qaisatka. Tainna piŋitkumiŋ, pasirauniaqtut aasii tuqulutiŋ, qanukkii kamagiŋaitkaich salumaruat maliġiraksrat. Uvaŋa Atanġuruŋa suli uvaŋa salumasisuugitka.

¹⁰ “Aŋaiyyuliqsiqpaich qitunġaŋiḷḷu kisimiŋ niġiḷḷaniaqtut salumaruanik aitchuutinik; allat niġiyumiñaitkaich—iñuk unnii tukkuruaq aŋaiyyuliqsiqpagmun naakka savaktauluni ilaanun.

¹¹ Aglaan aŋaiyyuliqsiqpaum kivgaŋi, tauqsiŋaraŋi naakka aniŋaruat igluani, niġiyumiñaqtut aŋaiyyuliqsiqpaum niqiksriusiaŋiñik.

¹² Aŋaiyyuliqsiqpaum pania tuvaaqatchiŋaruaq aŋaiyyuliqsiqpauŋitchuamik niġiñiaŋitchuq salumaruanik aitchuutinik.

¹³ Uiḷgaŋaruaq naakka avinŋaruaq pania miqłiqtuitchuaq aasii utiqłuni aapami igluanun niġiqasiġumiñaġaa aapani aŋaiyyuliqsiqpak aitchuusiaŋiñik. Aŋaiyyuliqsiqpaum qitunġaġiraŋit kisimiŋ niġiḷḷaniaqtut niqiŋiñiñ.

¹⁴ “Nalliŋich iñuich iḷauŋitchuat aŋaiyyuliqsiqpaum qitunġaŋiñuñ niġiñiġumiŋ salumaruanik aitchuutauruanik pisaaġiŋiḷḷutiŋ, akiḷiqsaksraġigaat aŋaiyyuliqsiqpak iluqaan akiŋanik iḷalugu tallimaŋannik akisutilaaŋata.

¹⁵ Aŋaiyyuliqsiqpaich qaunakłaaŋiḷḷutiŋ aŋalataksraġiŋitkaich salumaruat aitchuutit

¹⁶ niġipkaġlugich niġiruksrauŋitchuat iñuit tamatkuniŋa; tainnasim pasiraupkaġniaġaich iñuich suli tatavsaqtillugich. Uvaŋa Atanġuruŋa suli aitchuutit salumasisuugitka.”

¹⁷ Atanġum piraksriŋagaa Moses

¹⁸ uqautitquvlugich Aaron-lu iġñiŋiḷu suli Israel-gum kiŋuvaaŋi ukuniŋa maliġuagaksraŋiññik. Nallipayaaŋat Israel-gum kiŋuvaaŋisa naakka allaniñ nunaniŋŋaqtauruaniñ iñuuniaqtuat Israel-mi aitchuisaġumiŋ ikipkautikun, taŋŋiqsaġlugu unniqsuqłiisigiŋaraqtiŋ naakka piyummatikun aitchuiḷutiŋ, niġrun aitchuutaat qilluutaitchuksrauruq.

¹⁹ Akuqtuqtauniaqpan, aŋusalluuruksrauruq surruutaiḷḷuni.

²⁰ Aitchuiñiġuvsi niġrunmik qilluutiqaqtuamik, Atanġum akuqtuġniaŋitkaa.

²¹ Kiñapayaaq aitchuisaġumi iḷammiuġnikun Ataniġmun, naakka taŋŋiqsaġlugu unniqsuqłiisigiŋarani naakka piyummatigivlugu aitchuiñiq, niġrun surruutaitchuksrauruq akuqtuqtauniaġumi.

²² Aitchuiñasi Ataniġmun niġrunmik ayauŋaramik, tusiattuamik, qilluutiniŋaruamik naakka immaŋaruamik kiḷḷiqaqtuamik, unŋuqaqtuamik, naakka amiġmigun qasalluliŋaruamik. Aitchuiñasi tainnasiñik niġrutinik Ataniġmun.

²³ Aasii piyummatigilugu aitchuiñiaġuvich aitchuiyumiñaqtutin niġrunmik agliḷaiḷauramik naakka sulliñiġiitchuamik, aglaan akuqtuqtauniaŋitchuq taŋŋiqsaġlugu unniqsuqłiun.

²⁴ Aitchuiñasi Ataniġmun niġrunmik igruuk siqumitauŋakpagnik, kipiŋakpagnik, tigluuraŋakpagnik, naakka igruiqtinŋakpan. Tainna piñiaŋitchusi ilivsi nunavsiññi.

²⁵ Aitchuiñasi niġrunmik piññaktaaġiŋaravsiññik allamiñ nunaniŋŋaqtauruaniñ. Tainnasit niġrutit sulliñiġiiññisuugait aasii akuqtuqtauyumiñaitchut.

^26-27 Nuġġaq naakka imnaiyaaq naakka nagruliayaaq anikpan, aakaŋaniñ piiqsaksraġiŋitkaat tallimat malġugni uvluni, aglaan aquagun aitchuutauyumiñaqtuq.

²⁸ Aitchuutiginasigik immuliviglu nuġġaŋalu naakka imnaiġḷu imnaiyaaŋalu naakka nagruliglu nagruliayaaŋalu atautchimi uvlumi.

²⁹ Aitchuiguvsi quyanaaġutinik Ataniġmun, maliġisaġisi piraksriutit akuqtuġumagaasi God-im;

³⁰ iluġaan niġisaġiksi tavrani uvlumi.

³¹ Ataniq uqallaktuq, “Kamagisigik piraksriutitka. Uvaŋa Atanġuruŋa.

³² Kanŋunaqsiḷiġnasiuŋ salumaruaq atiġa; Israel-gum kiŋuvaaŋisa salumaruaguniruksraġigaanŋa. Uvaŋa Atanġuruŋa suli uvaŋa salumasisuugivsi;

³³ suli Egypt-miñŋautiŋagivsi God-igitquvluŋa. Uvaŋa Atanġuruŋa.”