Leviticus 21 - Iñupiatun Mumiksat Uqalugiksuat

Salumaruaguniŋat Aŋaiyyuliqsiqpait

¹ Atanġum piraksriŋagaa Moses uqautitquvlugich Aaron-gum iġñiġutiŋi aŋaiyyuliqsiqpauruat, “Nalliat unnii aŋaiyyuliqsiqpauruat salumaiḷiñiaŋitchuq aksiglugu tuquŋaruam timiŋa piraġausikun ilimiñik iḷaksruutiluni aŋaiyyurrikpata nanmiñiq iḷaŋat tuqukpan,

² kisian ilaata aakagikpagu, aapagikpagu, iġñiġikpagu, panigikpagu, aniqatigikpagu aŋun,

³ naakka uiñiŋaitchuaq aniqataa iñuuruaq iglumiñi.

⁴ Salumaiḷiñiaŋitchuq ilimiñun aksiglugu tuquŋaruam timaa tuquniqpata tuvaaqanmi iḷaŋich.

⁵ “Nalliat unnii aŋaiyyuliqsiqpait kivraġniaŋitkaa niaquni naakka kipilugich umini naakka piḷagaġluni timimigun nalunaiqsaġlugu qivġuruagutilaani.

⁶ Salumaruksrauruq suli kanŋunaqsiḷiġniaŋitkaa atiġa. Ilaa qaitchisuuruq niqinik aitchuutauruanik uvamnun, aasii salumaruksrauruq.

⁷ Aŋaiyyuliqsiqpak tuvaaqasiġñiaŋitchuq aġnamik akiitchuuŋaruamik naakka aġnamik aŋusiuŋaruamik naakka avinŋaruamik; ilaa salumaruaguruq.

⁸ Iñuit isummatigiruksraġigaat aŋaiyyuliqsiqpak salumaruagulugu, qanukkii qaitchisuuruq niqinik aitchuutauruanik uvamnun. Uvaŋa Atanġuruŋa; uvaŋa salumaruŋa suli iñugiratka salumaruaġuġuugitka.

⁹ Aŋaiyyuliqsiqpaum paniŋa akiitchuġuġniqpan, kanŋunaqsiḷiġaa aapani; ilaa ikipkaġlugu tuqutauniaqtuq.

¹⁰ “Aŋaiyyuliqsiqpaich Qaukłiat kuvirauŋaruq uqsruqtaaġunmik niaqumigun aasii ilaaguaqtauvluni atullasivḷugich aŋaiyyuliqsiqpauruam annuġaaŋi, tavraasii iḷḷaiqsuŋaiḷaġniaŋitchuq naakkaunnii aligaġlugich annuġaani qiñiġnaqsaġlugu qivġuruagutilaani.

^11-12 Ilaa tavra qaisaġiŋaruq uvamnun aasii piraġausikun salumaiḷiñiaŋitchuq naakkaunnii suksraġiŋaiġḷugu salumaruaq Tupiġa utiġvigigumiuŋ isiqqaaġluni iglumun tuquŋaruaqaqtuamun, ilaata aapagigaluaġumiuŋ naakka aakagigaluaġumiuŋ.

¹³ Tuvaaqatiniktuksrauruq aŋusiuŋaitchuamik,

¹⁴ katittuksraġiŋitkaa uiḷgauruaq naakka avinŋaruaq aġnaq naakkaunnii akiitchuuŋaruaq. Tuvaaqasiġñiaqtuq aŋusiuŋaitchuamik kisian ilaata maŋŋumiñiñ.

¹⁵ Tainna piŋitkumi, miqłiqtuŋi, salumaruksrauruat, piraġausikun salumaitchuaguniaqtut. Uvaŋa Ataniq ilaaguaqtaġiŋagiga Aŋaiyyuliqsiqpagnun Qaukłiġuqługu.”

¹⁶ Atanġum piraksriŋagaa Moses

¹⁷ uqautitquvlugu Aaron, “Nalliŋat kiŋuvaaġiraqpich qilluutaqaqpan timimiñi qaitchiñiaŋitchuq niqinik aitchuutinik uvamnun. Taamna tainnainniaqtuq taimuŋaaglaan.

¹⁸ Kiñapayaaq timimigun qilluutaqaqtuaq aitchuutinik savagniaŋitchuq, suli kiñapayaaq ayauŋaruaq, tusiattuaq, timimigun iłuirrutiqaqtuaq, naakkaunnii nutim qilluutaqaqtuaq;

¹⁹ kiñaunnii argagiitchuaq naakka isigagiitchuaq;

²⁰ kiñasuli napiŋaruaq naakka iñukuluuraq; kiñasuli irigiitchuaq naakka uviñigiitchuaq; naakkaunnii igruiqsinŋaruaq aitchuutinik savagniaŋitchuq.

²¹ Kiŋuvaaŋisa Aaron aŋaiyyuliqsiqpaum timimiktigun iłuirrutiqaqpata qaitchiñiaŋitchut niqinik aitchuutauniaqtuanik uvamnun.

²² Tainnaittuam aŋutim niġiyumiñaġaa niqi aitchuun uvamnun, iluqaaktun salumaruaġlu salumapiaġataqtuaġlu niqik aitchuutik,

²³ aglaan pisigilugu timimiñi iłuirrutini, qalliñiaŋitkaa salumaruaq talukiyaaq naakka qalliḷugu ikipkaivik. Qaunakłaaŋirrutikun aŋalamaqługniaŋitkai taapkua salumaruat, qanukkii Atanġuruŋa suli uvaŋa salumasiŋagitka.”

²⁴ Tavraasii, taaptumiŋa, Moses-gum uqautiŋaniġaa Aaron, iġñiŋiḷḷu Aaron, suli iluqaisa Israel-gum kiŋuvaaŋich.