Leviticus 20 - Iñupiatun Mumiksat Uqalugiksuat

Tatavsautiŋi Kamaksriŋiññiġum

¹ Atanġum uqallautigaa Moses

² uqautitquvlugich Israel-gum kiŋuvaaŋich, “Nallivsi naakkaunnii allaniñ nunaniŋŋaqtauruam iñuuniaqtuam akunnivsiññi miqłiqtuni aitchuutigikpagu god-mun Molech-mun uyaġagnik miḷḷuuġlugu tuquttuksraġigaat nunaaqqimiittuapayaat.

³ Nallivsi aitchuutigikpauŋ miqłiqtuni Molech-mun aasii salumaruaq Tupiġa salumaiḷiḷugu suli kanŋunaqsiḷiġlugu salumaruaq atiġa, akiḷḷiḷiutiniaġiga suli iḷauŋaiġñiaqtuq iñugiramnun.

⁴ Aglaan suli nunaaqqiuruat suqutigiŋitparruŋ savaaġiraŋa suli tuqunŋiḷḷugu,

⁵ Uvaŋa akiḷḷiġiliutiniaġivsi aŋayuqaaġiiktuasii allallu iḷḷatiruat ukpiqsraŋaiqsuat uvamnik, aŋaiyyuvlutiŋ Molech-mun. Iḷauyumiñaiġñiaqtuq nalliat unnii iñugiramnun.

⁶ “Qanuq piñiaqtilaavsiññik iḷisimasuglusi ullautiguvsi uqaqatiqaġuuruanun tuquŋaruat iḷitqusiŋiññik, akiḷḷiḷiutiniaġivsi suli iḷauyumiñaiġñiaqtusi iñugiramnun.

⁷ Salumaruagusitchi, qanukkii uvaŋa Ataniq God-iksi.

⁸ Kamagisigik pitquratka, qanuq uvaŋa Atanġuruŋa suli uvaŋa salumasipkaġivsi.”

⁹ Atanġum ukua maliġiraksrat qaisaġiŋagai. Nallivsi pimaqłuutikun uqamaqłuutikpagu aapani naakka aakani tuqutauniaqtuq; iliŋnun tavra tunŋaruq tuqqutin.

¹⁰ Aŋun allatuqatiqaġumi allam aŋutim nuliaŋanik, iluqatik aŋullu aġnaġlu tuqutauruksrauruk.

¹¹ Aŋun allatuqatiqaġumi iḷaŋannik aapami tuvaaqatiŋisa kanŋunaqsiḷiġaa aapani, aasii iluqatik aŋullu aġnaġlu tuqutauruksrauruk. Iliŋigñun tunŋaruq iliŋiksa tuqutauniŋak.

¹² Aŋun allatuqatiqaġumi ukuaġmiñik, iluqatik tuqutauruksrauruk. Navikkaak iḷagiigñiq aasii iluqaagnun tunŋaruq iliŋiksa tuqutauniŋak.

¹³ Aŋun allatuqatiqaġumi aŋunmik, savaŋaruk piḷupiallaktuamik, aasii iluqatik tuqutauruksrauruk. Iliŋigñun tunŋaruq tuqutauniŋak.

¹⁴ Aŋun aasii tuvaaqasiqpan aġnamik aġnamlu taaptuma aakaŋanik, iluqaġmiŋ piŋasuuruat ikipkaġlugich tuqutaksraurut pisigilugu kanŋunaqsiḷiġun savaaġiraŋat; tainnasiq igliqtitaksraġiŋitkiksi akunnavsiññi.

¹⁵ Aŋutim atuaġiniqpauŋ niġrun, ilaalu niġrullu tuqutaksrauruk.

¹⁶ Aġnaq allatuqatiqaġniatakkumi niġrunmik, ilaalu niġrullu tuqutaksrauruk. Iluqatik patchisauruk tuqqunmignun.

¹⁷ Aŋun tuvaaqasiqpan aniqanmiñik aġnauruamik naakka nayaksraġmiñik, iñuit takkuanni kanŋunaqsiḷiqtaksrauruk aasii aullaqtillugik nunaaqqimiñ. Allatuqatigiŋavlugu aniqatini aġnaq tatavsaqtaksrauruq.

¹⁸ Aŋun nalaqatiqaqpan aġnamik aalġupkaqtillugu, iluqaaktun iḷauŋaiqsitaksrauruk Israel-guqatimigniñ, qanukkii navgiruk piraġausimik salumasiñikun.

¹⁹ Aŋun allatuqatiqaqpan atchagmiñik, iluqatik tatavsaqtaksrauruk navgivḷutik iḷagiigñiġmik.

²⁰ Aŋun allatuqatiqaġumi aŋaalugmi tuvaaqataanik, kanŋunaqsiḷiġaa aŋaaluni, aasii ilaalu aġnaġlu tatavsaqtauniaqtuk; nalliak unnii miqłiqsiñiaŋitchuq.

²¹ Aŋutim aatpauŋ aniqanni tuvaaqataanik aasii katillugu, tuquniaqtuk miqłiqsigaluaġnatik. Salumaitchualiqiruq piraġausikun aasii kanŋunaqsiḷiqługu aniqanni.

²² Ataniq uqallaktuq, “Kamagisigik iluqaisa pitquratka suli piraksriutitka, ayyaktauŋitchumausi nunaŋaniñ Canaan, taamuŋa tikiutiyumaaqtavsi.

²³ Atuġnasigik piraġausiŋit iñuit taavani iñuuniaqtuat; Aullaqtitaġitka ukpiġutaitchuat isillatquvlusi nunamun. Iviġaumagiŋitkitka pigiitchuat piraġausiŋich.

²⁴ Aglaan uvva unniqsuqłiiŋagivsi nunalluatamik naurisuqtuamik, pigitquvlugu ilivsiññun. Uvaŋa Ataniq God-iksi, aasii ilivsiguaqtaġiŋagivsi allaniñ nunaqpauruaniñ.

²⁵ Tavraasi, nalunaigiruksraġigisi niġrutillu tiŋmiallu piraġausikun salumaruaguruat suli salumaitchuaguruat. Niġiñasi salumaitchuanik niġrutinik naakka tiŋmianik. Uqallausiġiŋagitka salumaitchuaguvlugich, aasii niġiñiġuvsigik salumaiḷiñiaqtusi.

²⁶ Salumaruaguniaqtusi suli kisima piginiaġivsi, qanukkii Atanġuruŋa suli salumaruaguruŋa. Ilaaguaqtaġiŋagivsi allaniñ nunaqpauruaniñ kisima pigisukłusi.

²⁷ “Kiñapayaaq aŋun naakka aġnaq ikayuqtisiuqtuaq ilitqusiŋiññiñ tuquŋaruat tuqutauniaqtuq uyaġagnik miḷḷuuġlugu; Nallisi tainna piñiqpata tavra patchisauniaqtusi tuqqutivsiññun.”