Leviticus 2 - Iñupiatun Mumiksat Uqalugiksuat

Palauvaksrat Aitchuutit

¹ Nallisi aitchuutiqaqpata palauvaksranik Ataniġmun, palauvalluatauruksrauruq. Uqsruliġḷugu olive uqsruanik tivraġiksaunmiglu iḷalugu

² aasii aŋaiyyuliqsiqpagnuutilugu Aaron iġñiŋiñun. Aŋaiyyuliqsiqpak piksraġluni tavraŋŋa ikipkaġniaġaa nalunaiqsaġlugu tavra taamna iluqaan aitchuutauŋatilaaŋanik Ataniġmun. Tipaa taaptuma niqim aitchuutauruam iviġaumanaqtuq Ataniġmun.

³ Iḷakuŋa palauvaksram aitchuutauruam piginiaġaat aŋaiyyuliqsiqpaich; salumaruagupiaġataqtuq, piksraqtaaguvluni niqimiñ aitchuutauruamiñ Ataniġmun.

⁴ Aitchuutauruaq aasii punniukpan igaŋaluni punillivikun, kukiaguruksrauruq imaksraiḷaaġlugu. Maptunaaŋayumiñaqtut piḷiagulutiŋ palauvagmik akunŋaruamik olive uqsruanik naakka maptukitchuat punniġich uqsruqtaaŋalugich olive uqsruanik.

⁵ Aitchuutauruaq punniukpan kukiaguluni siḷaavyiutikun, piḷiaguruksrauruq palauvagmik akunŋaruamik olive uqsruanik aglaan imaksraiḷaaġlugu.

⁶ Siqumillugu aasii kuviqqilugu uqsrumik tavra palauvaksraun aitchuutauruq.

⁷ Aitchuutauruaq punniukpan kukiaguluni punnilivigmi, piḷiaguruksrauruq palauvagmiñ olive uqsruanik iḷaqaġuni.

⁸ Qaġġisilugu aitchuutiksrautauruaq Ataniġmun aasii qaiḷḷugu aŋaiyyuliqsiqpagmun, ikipkaivigmuutiniaġaa.

⁹ Aŋaiyyuliqsiqpaum iḷaŋa piñiaġaa ilaaguaqtauŋatilaaŋa nalunaiqsaġlugu iluqaan aitchuutauŋatilaaŋanik Ataniġmun, aasii ikipkaġniaġaa ikipkaivigmi. Tipaa taaptuma niqim aitchuutauruam iviġaumanaqtuq Ataniġmun.

¹⁰ Iḷakuŋa aitchuutim aŋaiyyuliqsiqpaich piginiaġaat; salumaruagupiaġataqtuq, piksraqtaaguvluni aitchuutauruamiñ Ataniġmun.

¹¹ Palauvaksraniñ aitchuutauruat qaitchasi Ataniġmun puvlaksautaitchuksraurut; imaksrautaitchuksraurut, honey-qaqtuksrauŋitchullu niqiksrat ikipkaqtat aitchuutauniaqtuat Ataniġmun.

¹² Aitchuutauniaqtuaq sivulliġñiñ palauvaksraniñ kivluavsiññiñ ukiutuaġaġikpan qaitchuksraġigiksi Ataniġmun, aglaan ikipkaġaluaġnagu ikipkaivigmi.

¹³ Taġirriġḷugu palauvaksraq aitchuutaupayaaqtuaq, taġium arriġigaa sivunniuġutauŋaruaq ilivsiññiḷu God-miḷu. (Taġiuliqsuksraġigisi iluqaisa aitchuutigirasi.)

¹⁴ Qaġġirriguvsi Ataniġmun aitchuunmik sivulliuruaniñ kivluaniñ, aitchuisaqtusi argiŋaruamik kanuqqiŋaruamik palauvaksramik.

¹⁵ Iḷalugu olive uqsruanik suli tivraġiksaunmik.

¹⁶ Aŋaiyyuliqsim ikipkaġniaġaa taaptuma iḷaŋa akunŋaruam, tivraġiksaullu iluqaan, itqaummatausaġlugu niqiksraq aitchuutauruaq Ataniġmun.