Leviticus 19 - Iñupiatun Mumiksat Uqalugiksuat

Pitqurat Salumaruaguniġmun suli Isivġiunmun

¹ Atanġum uqallautiŋagaa Moses

² uqautitquvlugich nunaaqqiuruat Israel-mi, “Piḷuutaitchuksraurusi qanuq uvaŋa, Ataniq God-iksi, piḷuutaitchuŋa.

³ Qiksikkutiqaqtuksraurusi aakavsiññun, aapavsiññun, kamanaġilugulu Sabbath nalunaiŋaraŋa Atanġum, piraksriutiptun. Uvaŋa Ataniq God-iksi.

⁴ “Suksraaġluŋa aŋaiyyunasi iñuuraqpagnun; god-iliuġnasi savił̣hanik aasii aŋaiyyuvigilugich. Uvaŋa Ataniq God-iksi.

⁵ “Tuqutchiguvsi niġrunmik iḷammiuġunmun aitchuutiksramik, maliġiraksriat atuġlugich qaiñŋaratka ilivsiññun, aasii akuqtuġniaġiga aitchuutauruaq.

⁶ Niqaa niġiruksraġigaat taaptumani uvlumi niġrutim tuqutauviani naakka uvlaakukpan. Iḷakuqaqpan piŋayuanni uvlut ikipkaqtaksraġigaat,

⁷ qanukkii piraġausikun salumaitchuaguruq, aasii kialiqaa niġikpagu, akuqtuġniaŋitkiga aitchuutauruaq.

⁸ Kia niġiñiġumiuŋ pasirauniaqtuq suuŋiḷaġiniḷugu ilaaguaqtauŋaruaq uvamnun, aasii iḷauŋaiġñiaqtuq iñugiramni.

⁹ “Kivluiguvsi nunavsiññi nauruanik, kivluġnasigik palauvaksrat killiŋanittuat nauriviich, suli minittasi utiġnasigiŋ.

¹⁰ Nautchiivivsiguatqigñasi pukugiaġlusi siiġñanik pukuŋitchavsiññik naakkaunnii pukuglugich siiġñat kataŋaruat; unitchigiŋ pukuaksraŋit iḷiappait suli allaniñ nunaniŋŋaqtauruat. Uvaŋa Ataniq God-iksi.

¹¹ “Tigligaġnasi, naakka saglutaġlusi, naakka sagluuġlusi.

¹² Unniqsuqłiiñasi atiġa atuġlugu taŋŋiġumaŋiḷḷaan unniqsuqłiutigiraqsi; taamna kanŋunaqsiḷiġutauruq atimnun. Uvaŋa Ataniq God-iksi.

¹³ “Tigligiiñasiuŋ naakkaunnii saglutaġlugu iñuk. Qaitchuŋiññagu akiññaktaaŋa iñuum savaktigiraqpich, atausimi unnii unnuami.

¹⁴ Uqallamaqłuunmik uqallautinagu tusaalaitchuaq naakka putukkisausiġḷugu ayauŋaruaq puukaqtitchaġlugu. Kamagisiñŋa. Uvaŋa Ataniq God-iksi.

¹⁵ “Pitqiksiġautaiḷḷusi suli nalaunŋalusi sivunniuġuvsi pitquratigun; iviġaumagiłhaaġnasigiŋ iḷiappauruat naakka qiksigiłhaaġlugich umialguruat.

¹⁶ Saglutiginnignak iñugmik, suli iñuk uqaqsitaaġvigmiitpan pisigilugu iñuggutini, nivliqsuksraurutin uqallautikpiñ ikayuġumiñaqpauŋ. Uvaŋa Ataniq.

¹⁷ “Isumanŋunak akiḷḷiġilugich allat, aglaan natqiutilugich atiŋirrutauruakun, piḷuusiqiŋitchumautin pisigilugich.

¹⁸ Akisaqtuġnak allanik iñugnik naakka uumigisuŋaiññaġlugich, aglaan nakuaġilugich siḷalliitin ilignun nakuaġimmatun. Uvaŋa Ataniq.

¹⁹ “Kamagilugich piraksriutitka. Allagiiksuat niġrutit nuliktitaġnasigik. Nautchirriiñasi allakaaġiigñik nautchiaksragnik atautchimun nautchiivigmun. Atuġnasi annuġaanik piḷiaguruanik allakaaġiiñiñ kalikuliaksraniñ.

²⁰ “Kivgaq aġnaq allam aŋutim nuliaġiliutiniaqtaŋa akiḷianiŋaitpauŋ suli atanġiqsitauŋaitpan, aasii tavra allam aŋutim allatuqatigikpagu, tatavsaqtauniaqtuk aglaan tuqutauniaŋitchuk, kivgauvluni.

²¹ Taamna aŋun qaġġirrigisiruq imnaimik aŋusallumik paaŋanun salumaruam Tupqum nayuqtauvigma nunuurautikun aitchuutigisaġlugu.

²² Aasii taaptumiŋa aŋaiyyuliqsiqpak savaaqaġisiruq piraġausiq nalaullugu salumasiñiġmun taaptuma aŋutim piḷuutiŋi piiqsaġlugich, aasii God-im suliqutigiŋaiġñiaġaa.

²³ “Isiġataġuvsi nunaŋanun Canaan aasii nautchirriiḷusi qanusipayaamik napaaqtumik, niġiñaitchuaguniaqtut siiġñaŋit piraġausiq nalaullugu piŋasuni ukiuni. Taapkunani ukiuni niġiruksraġiŋitkisi.

²⁴ Sisamaŋanni ukiut iluqaisa siiġñat ilaaguaqtaugisirut aitchuutaulutiŋ manisaġlugu quyyatiksi uvamnun, Ataniġmun.

²⁵ Aglaan tallimaŋanni ukiut niġiyumiñaġisi siiġñat. Tainna iluqaanik piguvsi, napaaqtusi nauriñiaqtut siiġñavsaanik. Uvaŋa Ataniq God-iksi.

²⁶ “Niqipiaqtuġnasi auqaqpan suli. Aŋatkuaġnasi.

²⁷ Kivraġnasigik umisi

²⁸ naakkaunnii kakinasi ilivsiññun naakkaunnii kiḷḷiaġnasiuŋ timiksi qivġuguvsi. Uvaŋa Atanġuruŋa.

²⁹ “Kanŋunaqsipkaġnasigik panisi akiitchuġuġlugich; tainna piguvsi, saanniaqtusi allanun god-inun suli nuna siḷivinniaqtuq pigiiḷḷiqunmik.

³⁰ Kamagilugu Sabbath Atanġum nalunaiqsaŋa, suli qutchiksuaġilugu ini nanġaiviuruaq uvamnun. Uvaŋa Atanġuruŋa.

³¹ “Apiqsriñasi siḷġiqsuunmik uqaqatiqaġuuruaniñ tuquŋaruat iḷitqusiŋiññik. Tainna piraġausiq nalaullugu piguvsi salumaiḷiñiaqtusi. Uvaŋa Ataniq God-iksi.

³² “Qiksigilugich utuqqanaat suli qutchiksuaġilugich. Qiksiksrautikun kamagiluŋa. Uvaŋa Atanġuruŋa.

³³ “Aŋalamaqługnasigik allaniñ nunaniŋŋaqtauruat iñuuruat nunavsiññi.

³⁴ Aglaan aŋalallugich allaniñ nunaniŋŋaqtauruat tainnaptauq aŋalatchimmatun Israel-gum kiŋuvaaŋiññik, suli nakuaġilugich nakuaġimmatun ilivsiññun. Itqaumalusi qaŋauvlugu allaniñ nunamiuguŋatilaaqsi Egypt-mi. Uvaŋa Ataniq God-iksi.

³⁵ “Saglutaġnagu kiñapayaaq atuġlusi iłuaŋitchuanik uuktuutinik taktilaaġutinik, uqumaisilaaġutinik naakka iñugiaktilaaġutinik.

³⁶ Atuġlusi nalaunŋaruanik uuktuutinik, nalaunŋaruanik uqumaisilaaġutinik, naakka iñugiaktilaaġutinik. Uvaŋa Ataniq ilivsi God-iksi, suli Egypt-miñŋautiŋagivsi.

³⁷ Kamagisigik iluqaisa pitquratka piraksriutitkalu. Uvaŋa Atanġuruŋa.”