Leviticus 18 - Iñupiatun Mumiksat Uqalugiksuat

Atuquŋisauruat Allatuutit

¹ Atanġum uqallautigaa Moses,

² uqallaquvlugu Israel-gum kiŋuvaaŋiññun, “Uvaŋa Ataniq God-igiraqsi.

³ Maliġinasigik piraġausiŋich iñuŋisa Egypt, iñuuniaġvigiŋaravsi, naakkaunnii iñuich nunaŋaniittuat Canaan, ullauqtaptigni.

⁴ Kamagilugich uvaŋa pitquratka suli piraksriutitka. Uvaŋa Atanġuruŋa ilivsi God-iksi.

⁵ Maliġilugich piraġausit suli pitqurat qaisatka ilivsiññun; annautiniaġisi iñuggutisi tainna piguvsi. Uvaŋa Atanġuruŋa.”

⁶ Atanġum qaiñŋagaich ukua maliġuagaksrat. Allatuqatiqaġnasi nalliŋiññik nanmiñiq iḷavsi.

⁷ Kanŋunaqsiḷiġnagu aapagiran allatuqatigilugu aakan. Kanŋunaqsiḷiqtaksraġiŋitkiñ nanmiñiq ilvich aakagiran.

⁸ Kanŋunaqsiḷiġnagu aapagiran allatuqatiqaġlutin iḷaŋannik tuvaaqatiŋisa.

⁹ Allatuqatiginagu aġnaq aniqatiñ, aakavit panigigaluakpauŋ naakka aapavit panigigaluakpauŋ, iñuguqatigiŋaitkaluaġupku naakka iñuguqatigiŋalugu iñuguġvikaaġni iglumi.

¹⁰ Allatuqatiginagu aġnaq tutaaluiñ; taamna kanŋunaqsiḷiġutauniaqtuq ilignun.

¹¹ Allatuqatiqaġnak nukaaluksraġnik aġnamik; tavraptauq ilaa, nukaalugimmigiñ.

^12-13 Allatuqatiqaġnak atchagnik, aapavich aniqatigigaluaqpauŋ naakka aakavich aniqatigilugu.

¹⁴ Allatuqatiqaġnak aŋaalukpich tuvaaqataanik; tavraptauq, ilaa, atchagimmigiñ.

¹⁵ Allatuqatiqaġnak ukuaġiraġnik

¹⁶ naakkaunnii aniqarvich aŋutim tuvaaqataanik, taamna kanŋunaqsiḷiġñiaġiñ aniqatin.

¹⁷ Allatuqatiqaġnak panianik naakka tutaaluanik aġnam piqatigiŋaraqpich; nanmiñiq iḷagiviaġitin, taamna aasii pigiiḷḷiqutauruq.

¹⁸ Tuvaaqatikpich aniqataanik aġnamik tuvaaqatiksraġnak, iñuupkaqtillugusuli tuvaaqatin.

¹⁹ Piqatiginagu aġnaq aalġupkaqtillugu tatqiḷisuaġman nalautitchuuruamik, qanukkii piraġausiq nalaułługu salumaitchuaguruq.

²⁰ Allatuqatiqaġnak allam iñuum tuvaaqataanik; piraġausiq nalaułługu salumaiḷiñiaqtutin.

²¹ Qaisaġinagich miqłiqtutin aitchuutigitqulugit god-mun Molech-mun, qanukkii tainnasim kanŋunaqsiḷiġniaġaa atqa God-im, Atanġuruam.

²² Aŋun allatuqatiqaġniaŋitchuq allamik aŋunmik; God-im taamna naġġugigaa.

²³ Aŋun naakka aġnauruaq allatuqatiqaġniaŋitchuq niġrunmik; tainnasiq allatuun piraġausiq nalaułługu salumaiḷḷisauruq.

²⁴ Salumaiḷiñasi ilivsiññik tainnasiñik savaglusi, qanuq uvva ukpiġutaitchuat tainnasiñik savaaqaqhutik salumaiḷisuurut, taipkua ukpiġutaitchuat iñuuniaŋaruat nunami sivuvsiññi Atanġum aullaqtitaqtaŋich isillatquvlusi.

²⁵ Savaaŋisa tavra nuna salumaitchuaġuqtinŋagaat, tavraasi Atanġum tatavsaġaa nuna aasii ayyaktiłługich iñuich iñuuniaqtuat tavrani.

^26-27 Tavra savaaqaŋarut iluqaiññik iłuaŋitchuanik aasii nuna salumaiḷipkaqługu, aglaan ilivsi tainna piruksrauŋitchusi. Iluqasi, Israel iñugigaluaqpasi naakka nunaniñ allaniŋŋaqtauruallu iñuuniaqatigirasi, kamagiruksraġigisi Atanġum pitquraŋiḷḷu piraksriutiŋiḷḷu,

²⁸ aasii nunam ayyagniaŋitkaasi, ayyausiġmisun ukpiġutaitchuanik iñuuniaŋaruanik taavani sivuvsiññi.

²⁹ Iḷisimarusi kiñapayaaq tamatkuniŋa naġġunapiaġataqtuanik piñiġumi iḷauyumiñaiġñiaqtuq God-im iñugiraŋiñi.

³⁰ Aasii Ataniq uqallaktuq, “Kamagisigik piraksriutitka qaisatka suli maliġinagich piraġausiŋich iñuich iñuuruat nunami sivuvsiññi, suli salumaiḷiñasi ilivsiññun savaaqaġlusi nallipayaaŋiññik. Uvaŋa Atanġuruŋa God-igiraqsi.”