Leviticus 16 - Iñupiatun Mumiksat Uqalugiksuat

Uvluŋa Piḷuutaiqsauniġum

¹ Atanġum uqautiŋagaa Moses tuqutauqqaaqtillugik iġñiġutiŋiññiñ malġuk Aaron-gum, tuqutauŋaruak qallivaałłakamik sivuġaanun Atanġum.

² Uqallautigaa, “Uqallauttuuŋ aniqatin Aaron kisiatualuk piviksraq tikitpan tunuanuqulugu talukiyaaŋata Salumaniqtauruam Inim, qanukkii tavrani niptaġuuruŋa nuviyakun qulaagun matuaŋata Sivunniuġutim Kiguunniŋata. Kamaksriŋisuaġumi, ilaa tuqutauniaqtuq.

³ Isiġumiñaġniaqtuq Salumaniqtauruamun Inimun kisiatualuk qaġġirrianikkumi nutaġamik aŋusallumik piḷuunmun aitchuutiksramik suli aŋusallumik imnaimik ikipkautikun aitchuutiksramik.”

⁴ Tavraasii Ataniq qaitchiŋaruq ukuniŋa piraksraŋiññik. Aaron Salumaniqtauruamun Inimuŋaiñŋaġmi, ivvaqtuksrauruq suli atiluni aŋaiyyuliqsiqpauruam annuġaaŋiñik: ukił̣haaġiksuaq qaliġuaq suli naitchuak kamikłuuk, tavsiŋa, suli niaqumun nimmaaġun.

⁵ Inauqatigiiksuat Israel-mi aitchuġniaġaat Aaron malġugnik aŋusallugnik nagrulignik piḷuun pisigilugu aitchuutiksraŋigñik suli aŋusallumik imnaimik ikipkautiksramik.

⁶ Aaron aitchuiñiaqtuq immulivium aŋusalluanik aitchuutausaġlugu piḷuutimiñun suli igluqatiiŋisa piḷuutiŋiñun.

⁷ Tavraasii malġugnik nagrulignik paaŋanuurrigisiruq Tupqum Atanġum nayuutauviata.

⁸ Tavrani nalautchuġaġisiruq, malġugnik uyaġagnik, atausiq titiŋaluni “Ataniġmun” aasii igḷua “Azazel-mun.”

⁹ Aaron-gum aitchuutigigisigaa piksraqtaaguruaq nagrulik Ataniġmun aasii aitchuutigilugu piḷuun pisigilugu.

¹⁰ Nagrulik aasii naliġaaguruaq Azazel-mun, qaisaugisiruq iñuulugu Ataniġmun aasii aullaqtillugu nunagluktuamun Azazel-mun, piiḷḷasaġlugich piḷuutiŋich iñuich.

¹¹ Aaron aitchuikpan aŋusalluanik immulivium piḷuun pisigilugu ilimiñun qitunġamiñullu,

¹² aġraliqutiksraġniaqtuq imaligmik ikualaruanik aluanik ikipkaivigmiñ suli malġugnik argagmiutagnik immiġḷugu tivraġiksautigiksuamik aasii Salumaniqtauruamun Inimuutilugich.

¹³ Tavrani Atanġum sivuġaani iḷigisigaa tivraġiksaun igniġmun, aasii avyuata tivraġiksautim taliññiaġaa matua Sivunniuġutim Kiguunniŋata tautuŋitchumagaa aasii tuquluni.

¹⁴ Iḷaŋanik auŋata aŋusallum pamiqsaam piksraġisiruq tikiġmiñun aasii qivsaliglugu sivuġaŋa matuam aasii tavra qivsaliutilugu iḷaŋa tallimat malġugni sivuġaanun Sivunniuġutim Kiguunniŋata.

¹⁵ Taamna pianikpan, tuqutkisigaa nagrulik iñuich piḷuutiŋich pisigilugich aitchuutigisaġlugu auŋa Salumaniqtauruam Inaanuutilugu, aasii qivsaliutilugu matuaŋanun suli sivuġaanun Sivunniuġutim Kiguunniŋata, piusimisun auŋanik immulivium aŋusalluata.

¹⁶ Tainna pigumi savaaġiniaġaa piraġausiq nalaullugu salummaġniksraŋa Salumaniqtauruam Inim salumairrutaanniñ Israel-gum kiŋuvaaŋisa piḷuutipayaaŋiññiñ. Tainna-suli piraksraġigaa Tupiq, qanukkii naparuq qitqani inauruat, piraġausiq nalaułługu salumaitchuaguvlutiŋ.

¹⁷ Isiġniŋanun Aaron-gum Salumaniqtauruamun Inimun savaaġisaqługu piraġausiq nalaullugu salumasiñiaġniksraŋanun aniḷġataqtillugu, iñuqaqtuksrauŋitchuq allamik Tupiġmi. Atuġumiuŋ piraġausiq nalaullugu ilimiñun, igluqatiimiñunlu, suli nunaaqqiqatiimiñunlu,

¹⁸ tavra ikipkaivigmugluni aitchuivigmun ikipkautikun salummaġniaġaa. Iḷaŋanik immulivium aŋusallum auŋata piḷuni suli nagruligum auŋanik piġuaġluguasii aniŋaruanun kaŋiŋisa ikipkaivium.

¹⁹ Tikimiñik qivsaliutiniaġaa iḷaŋa augum ikipkaivigmun tallimat malġuiqsuaġlugu. Tainnaġumi salumasiñiaġaa piḷuutiŋiñiñ Israel-gum kiŋuvaaŋisa aasii ilaaguaqtaulugu.

Pasirauruaq

²⁰ Aaron piraġausiq nalaullugu salummaiganigataġumi Salumaniqtauruamik Inimik, Tupiġmik Atanġum nayuutauvianik, ikipkaivigmiglu, qaisaġigisigaa Ataniġmun iñuuruaq nagrulik naliġaaguruaq Azazel-mun.

²¹ Argagni iluqaaktun nagrulgum niaquanukkisigaik aasii quliaġlugich iluqaisa pigiitchuat, piḷuutit, suli paaqłaktautiŋich Israel-gum kiŋuvaaŋisa, aasii nuutillugich nagruligum niaquanun. Tavraasii taamna nagrulik aullaqtinniaġaa nunagluktuamun nalunaiqsauruakun iñukun.

²² Nagruligum akigaaġiniaġaich iluqaisa piḷuutiŋich aasii aullautilugich inauvigiŋaisaŋannun nunamun.

²³ Tavraasii Aaron Tupiġmugluni, mattaġniagai aŋaiyyuliqsiqpauruam annuġaaŋich atuqtani isiŋaiñŋaġmi Salumaniqtauruamun Inimun, aasii tavruŋa uniññiaġaich.

²⁴ Ivvaqtuksrauruq tavrani salumaruami inimi aasii ilaata annuġaani atilugich. Tainna pianikkumi, aniḷuni aitchuiñiaqtuq ikipkaqtamik aitchuunmik ilaata piḷuutini piiqsaġlugich suli piḷuutiŋich iñuich.

²⁵ Ikipkaġisigaa ikipkaivigmi qaunnaŋa niġrutim aitchuisaġluni piḷuun pisigilugu.

²⁶ Iñuk aasii aullaurriruaq nagruligmik nunagluktuamun Azazel-mun iqaqsriruksrauruq annuġaamiñik suli ivvaġluni utiŋaiñŋaġmi inauviannun.

²⁷ Immulivium aŋusallua nagruliglu aitchuutauruak piḷuun pisigilugu, Salumaniqtauruamun Inimuutiŋagaak auŋak piḷuutaiġutausaqługu, tigumiaġlugik siḷataanuutigisigaik inauviata aasii ikipkaġlugik. Amiŋak, niqiŋik, suli iŋaluaŋik iluqaisaasii ikipkaġlugich.

²⁸ Ikipkaiyyaqtuam iqaġiruksraġigaich annuġaani suli ivvaġluni utiŋaiñŋaġmi nullaummivigmun.

Nalunaiqsaġivlugu Atuġmarruŋ Uvluŋa Piḷuutaiqsauniġum

²⁹ Ukua maliġuagaksriat atugaġiraksraġigaich taimuŋaaglaan. Quliŋanni uvlut tallimat malġuŋanni tatqich, Israel-gum kiŋuvaaŋiḷḷu allaniḷḷu nunaniŋŋaqtauruat iñuuniaqatauruat akunġanni niġiŋaiḷaqtuksraurut suli sunik savakkaluaġnatiŋ.

³⁰ Taavsrumani uvlumi piraġausiq nalaullugu atuqtaksraġigaat salummaqsaġlutiŋ piḷuutipayaamigniñ, piraġausiq nalaullugu salumasisaġlutiŋ.

³¹ Taamna uvluq salumapiaġataqtuaguniaqtuq, niġiŋaiḷaġlutiŋ suli sunik savaŋiyvigilugu. Taapkua maliġuagaksriat atuġuusaġataġniaġaich taimuŋaaglaan.

³² Aŋaiyyuliqsiqpaich Qaukłiat, ilaaguaqtauŋaruaq qaisauvluni inaŋiutisaqłuni aapamiñun, savaaqaġniaqtuq piraġausiq nalaullugu salumasiñiksram. Atiruksrauruq aŋaiyyuliqsiqpauruam annuġaaŋiñik

³³ aasii savaaġilugu piragausiq nalaullugu salumasiñiksraŋa Salumapiaġataqtuam Inim, iluqaallu Tupqa Atanġum nayuqtauviata, ikipkaiviglu, aŋaiyyuliqsiqpaiḷḷu, suli iluqaisa iñuŋich nunaaqqiuram.

³⁴ Taapkua maliġuagaksrat atuġuuniaġaich taimuŋaaglaan. Taamna piraġausiq nalaullugu savaaġiniaġaat atausiaġlugu ukiumi salummaqsaqługich Israel-gum kiŋuvaaŋich piḷuutipayaaŋiññiñ. Tavraasi Moses savaŋaruq Atanġum piraksriutaa nalaułługu.